1, 2. ¿Ambe arhikuekasïni Jeobani eraani?

IREKAXAKACHI “jurhiatikuechani jimbo” enga kánikua “peligru” jaka ka sánhani arhiati no sési jánhaskuarheni ante de ísïini komu jimbanhi jurhiatikua ma jarhani nani enga ménderu pínandikua jauaka Echerirhu (2 Tim. 3:1). Ísï jimbo, sési jarhasti kurhamarhikuarhini: “¿Naniasïchi eraasïni juchari éskuecha jingoni?”, o sea, ¿nénchi andarherasïni parajtsïni jarhuatani ka orhejtsïkuni? Jamberichi jirejiresï mókuntaaka: “Jeobani”. Ka inde jindesti sánderu ambakiti mókuntskua.

² ¿Ambe arhikuekasïni Jeobani eraani? Ka ¿nénachi uá seguru jarhani eskachi sési jimbomindu imani eraaxaka mientrasi engachi jánguarhintani jaka orhepani uérakuani problemechani pauani pauani anapu? Ióntki, salmueri karari ma uandaspti na enga xáni uétarhijka Jeobani eraani o andarherani parajtsïni jarhuatani engachi no sési nitamakuarhini jauaka (arhinta je Salmo 123:1-4). Ini ambe ísï terokutantaspti komueska imani ambe enga jántspiri ma újka. Enga uandapka eska jántspiriri éskuechaksï pendienti jarhasïnga ambe enga imeri patroniri jájki újka, no solu arhikuekasïrendi eska mintsikasïrenga eska patroni jemba íntskuaka tʼirekua ka eska kuájchakuaka. Ístu, arhikuekasïrendi eska jatsispka para méntku exeni jarhani imeri patronini para kuenta íntskukuarhini ambe enga uéjka ka jaiapanherantani. Májkueni, uétarhisïndi eskachi pauani  pauani estudiariuaka Bibliani parachi mítini o jánhaskani ambe enga Jeoba uéjka ka úni ambe engajtsïni arhiaka. Solu ísïjtsïni íntskuati imeri jarhuajperata (Efes. 5:17).

3. ¿Ambejtsïni uá ójkutani ka úni eskachi nóteru seguirini jauaka Jeobani eraani?

³ Nájkirukachi mítika eska jukaparhakueska méntku Jeobani eraani jarhani, ménisïjtsïni uáti ambe ma ójkutani. Inde ambe nitamanchaspti Jesusiri ambakiti amiga ma enga Marta arhinhenga. “Marta méntku jirejiresï jámaxapti tʼirekua prebenirini” (Luk. 10:40-42). Enga inde ambe nitamanchapka ambakiti kʼuiripu ma mientrasi enga Jesusi imani jingoni japka, nójtsïni ísku pakatapirindi engachi juchajtu májkueni ambe nitamanchapiringa. Jiájkani ¿ambejtsïni uá ójkutani? Ini artikulurhu, exeakachi nénajtsïni uá no sési ambe úcheni ambe engaksï máteruecha újka. Ístuchi jorhenguarhiaka ambechi uá úni para seguirini jarhani Jeobani eraani.

4. ¿Andijtsïnisï úpirini ísku pakatani enga Moisesi no inchapka Echerirhu enga Aiaminhapka?

⁴ Seguruchi jarhaska eska Moisesi andarhierenga Jeobani para jarhuajperata kurhakuni. Moisesi, “uinhapikuarhintasïrendi mintsikaparini Diosïni enga no nema újka exeni, komosieka exeni japiringa” (arhinta je Ebreu 11:24-25, 27). Bibliajtsïni arhisïndi: “Peru no méni desde jiájkani uératini niárasti jarhani Israeli profeta ma, ísï eska Moisesi, enga Jeoba niárapka sési jimbomindu mítini” (Deut. 34:10). Peru nájkiruka ambakiti pájperakua ma jatsipka Jeobani jingoni, tsïtaspti kóntperatani para inchani Echerirhu enga Aiaminhapka (Núm. 20:12). ¿Ambe úkuarhispi?

5-7. a) ¿Ambe úkuarhispi ante de tsimani kutsï nitamani engaksï israelitecha uéakuntapkia Ejiptu? b) ¿Ambe úspi Moisesi?

⁵ Ante de tsimani kutsï nitamani engaksï israelitecha uéakuntapkia Ejiptu ka antedeksï Sinai juáta jimbo niárani, kʼéri problema ma úkuarhispti. Israelitechaksï uénaspti uandauandamini, jimboka no jarhaspka itsï ka Moisesi jingonksï kejarikuarhispti. Problema xáni kʼéri úkuarhispti enga Moisesi kómarhipka Jeobani: “¿Ambe uá ini iretani jingoni? ¡Sánderkia ka tsakapkueraatijtsïni!” (Éx. 17:4). Jeoba mókukuntaspti arhiparini ambe enga meru jatsipka para úni: jatsispti para imeri pirimu jingoni uánharhitani Orebi anapu kʼerendani ma, ka ísï úparini kánikua itsï uérapirindi. Biblia seguirisïndi arhini: “Moisesi ísï úspti, Israeliri orhejtsïkuticheri éskuecheri orhepatini jimbo”. Israelitechaksï niáraspti itsïmani na engaksï xáni úpka ka problema sési pénhantasptia (Éx. 17:5, 6).

⁶ Biblia arhisïndi eska Moisesi niáraspka arhirani imani lugarini Masah enga arhikuekajka “Tsʼéjkukua” ka Meribá enga arhikuekajka “Arhirperakua”. ¿Andisï indeni nombrichani jatsikuapi? “Jimbokaksï israelitecha úndaspka arhirperani ka jimbokaksï niáraspka tsʼéjkuni Jeobani, uandaparini: ‘¿Jeoba juchantsïni jingoni jarhaski, o nómbe?’” (Éx. 17:7).

⁷ ¿Na exespi Jeoba imani ambe enga Meribá úkuarhipka? Eskaksï israelitecha no solu Moisesinksï no janhanharhispka niksï kurhajchani, sino Jeobani (arhinta je Salmo 95:8, 9). Israelitechaksï no sési ambe úspti. Peru Moisesi nómbe, ima Jeobani kurhakuspti jarhuajperata ka úspti ambe enga meru arhipka Jeoba.

8. ¿Ambe niáraspi úkuarhini engaksï israelitecha kʼamarani japkia biajini desierturisï?

⁸ Kuarenta uéxurhinisï tátsekua engaksï kʼamarani japkia biajini desierturisï, sáno májkueni ambe úkuarhispti. Israelitechaksï lugari ma jimbo jarhaspti engaksï ístu niárapiringa arhini Meribá. I lugari Kadési no iauani jarhaspti, jima no iauani enga uénapkia  jindeni Echeri engaksï Aiaminhapka. * Israelitechaksï ménderu kejarikuarhispti, jimboka no jarhaspka itsï (Núm. 20:1-5). Peru ini uelta, Moisesi ménderueni úsptia ambe ma.

9. ¿Jeoba ambe arhispi Moisesini eska úpiringa, peru ambe úspi ima? (Exe je dibujuni enga uénakuarhu jaka).

⁹ ¿Ambe úspi Moisesi engaksï ménderu israelitecha kejarikuarhipka? Ménderu Jeobani andarheraspti paraka arhipiringa ambe úni. Ini uelta, Jeoba no arhispti eska kʼerendarhu uánharhitapiringa. Sino eska pʼíkupiringa imeri pirimuni ka arhini ambe ma kʼerendani nani enga tántaapiringa kʼuiripuechani (Núm. 20:6-8). Peru Moisesi no ma ambe arhispti kʼerendani. Sino jurajkutakuarhispti eska andapiringa imeri ikiatapu ka uinhachakuaspti imechani engaksï jima japka: “¡Iásï, kurhaa je, no kurhandirecha! ¿Ini kʼerendarhu jimboeski nani engaksïni jucha petachiaka itsï?”. Tátsekua kʼerendarhu uánharhitaspti no ma xanharku, sino tsimani (Núm. 20:10, 11).

10. ¿Ambe úspi Jeoba imani ambe jimbo enga Moisesi úpka?

¹⁰ Jeoba kánikua ikiaspti Moisesi jingoni (Deut. 1:37; 3:26). ¿Andi? Jamberi uánikua ambe jimboepti. A lo mejori ikiapti imani jingoni jimboka ini uelta no úspka ísï eska Jeoba na arhipka.

11. Enga Moisesi kʼerendarhu uánharhitapka, ¿andiksïsï israelitecha úpirini eratsini eska no Jeobaeri milagru máespka?

¹¹ Ju je exeni máteru rasoni enga jamberi Jeoba ikiapka Moisesi jingoni. Ambe engaksï jimbo úkata jaka tsakapuecha engaksï primeru Meribá jimbo japka, jindesti boronecha komueska kutsari engaksï kúnguarhintajka ka kánikua chopeni. Na uéjki xáni uinhamu uánharhitanhani tsakapurhu, no nema erokuarhisïndi eska uéraaka itsï. Peru segundu Meribá anapu tsakapuechaksï chʼerapisti enga kánikua ménderueni jásïka tsakapu choperi jingoni. Komu i jásï tsakapu chʼerapijka ka pʼorhopʼorhojkʼasïni, imani lugari jimbo niárasïndi itsï patsakuarhini enga kʼuiripu újka úrani. Enga Moisesi kʼerendarhu uánharhitapka enbesi de uandajpani, jamberiksï israelitecha eratsipti eska itsï jimbosï uérenga jimboka jimesïsï jarhaspka itsï ka no jimboka Jeoba milagru ma úpiringa. *

12. ¿Ambe máteru rasoni jimbo ikiapi Jeoba Moisesi ka Aaroni jingoni?

¹² Jarhasti máteru rasoni enga jimbo Jeoba ikiapka Moisesi ka Aaroni jingoni. Ju je exeni ambe enga Moisesi arhipka kʼuiripuni: “¿Ini kʼerendarhu jimboeski nani engaksïni jucha petachiaka itsï?”. Enga uandapka “jucha”, jamberi úpirindi arhikuekani eska ima ka Aaroni. Ambe enga uandapka, xarhataspti eska no sáni janhanharhispka Jeobani, imani enga úpka milagruni. Salmo 106:32, 33 arhisïndi: “Úsptiksï eska [Jeoba] ikiapiringa jima enga Meribá anapu itsï japka ka imecheri kulpa jimbo no sési nikuspti Moisesini. Jimbokaksï kurhurajkuspkia Moisesini, ima uénaspti no sáni eratsiparini uandani” * (Núm. 27:14). Ambe enga Moisesi úpka, no kʼéri ambe arhispti Jeobani. Jeoba arhispti Moisesini ka Aaronini: “Chájtsïni no kurhajchaska  ambe engaksïni ji juramuchipka” (Núm. 20:24). Meruksï kʼéri pekadu ma úspti.

13. ¿Andisï Jeoba jurhimbikua jingoni jámapi imani ambe jimbo enga Moisesi úpka?

¹³ Moisesi ka Aaroni jindespti engaksï orhejtsïkuenga Jeobaeri iretani, ísï jimbo, imecheri responsabilidadi sánderu kʼéspti para Jeoba jingoni (Luk. 12:48). Antesi, Jeoba no sésikua íntskuaspti eskaksï inchaakupiringa Kanaani méntku ma jenerasioni israelitecheri engaksï no kurhandirapka (Núm. 14:26-30, 34). Jimbosï jatsipti para májkueni úni Moisesini jingoni enga no kurhajchapka Jeobani: no inchapirindi Echerirhu enga Aiaminhapka.

14, 15. ¿Ambe úspi eska Moisesi no janhanharhipiringa Jeobani?

¹⁴ ¿Ambe úspi eska Moisesi no janhanharhipiringa Jeobani? Ju je ménderu exeni Salmo 106:32, 33, arhisïndi: “Úsptiksï eska ikiapiringa jima enga Meribá anapu itsï japka ka imecheri kulpa jimbo no sési nikuspti Moisesini. Jimbokaksï kurhurajkuspkia Moisesini, ima uénaspti no sáni eratsiparini uandani”. Nájkirukaksï israelitecha Jeobanisï no kurhajchapka, Moisesi niáraspti kuatantani. Enga ísï no úpka pʼíngukuarhini, úspti eska uandapiringa no sáni eratsiparini ambe enga úkuarhinchapiringa.

¹⁵ Moisesi jurajkuspti eska ima ambe engaksï máteruecha úpka, ójkutapiringa ka nóteru úsptia imani ambe enga Jeoba uékenga. Primeru xanhari engaksï israelitecha kejarikuarhipka itsï jimbo, Moisesi sési ambe úspti (Éx. 7:6). Peru jamberi iásï kuataraptia ka nóteru jánhaskania ambe úni imani kʼuiripu no kurhandirecha jingoni enga xáni ióni jámapkia. Jamberi sánderu eratsipti na enga pʼikuarherani japka ka eska Jeobani kʼéri ambe arhini.

16. ¿Andichisï jatsi para exeni imani ambe enga Moisesi úpka?

¹⁶ Enga ambakiti profeta ma komu Moisesi jurajkupka eska máteru ambe ójkutapiringa ka pekarini, juchajtuchi úpiringa májkueni nitamanchani. Ísï eska ima, nóteru ióndanchi jimbanhi parhakpinirhu jauakia engajtsïni Jeoba aiachika (2 Ped. 3:13). Nochi nema uékasïnga tsikakuarhini indeni kʼéri kóntperatani. Peru engachi uéjka jima jarhani, jatsiskachi para méntku eraani jarhani Jeobani ka méntkisï jánguarhintani imani ambe úni enga ima uéjka (1 Juanu 2:17). ¿Ambechi jorhenguarhisïni enga Moisesi ísï no sési ambe úpka?

17. ¿Ambejtsïni jarhuata parachi no kuatantani?

¹⁷ Ju je no kuatantani. Ménisïchi jatsisïnga para mísmu problema ma nitamakuarhini jarhani. Perujtsïni Biblia arini konseju íntskusïndi: “Jaue no kuatantani ambakiti ambe úni jimbokachi ambakiti ambe pʼikuntaaka engachi no kuatantaaka” (Gal. 6:9; 2 Tes. 3:13). Engachi imani ambe nitamanchani jauaka engajtsïni kuatajkujka, ochi no úni jarhani sési pájperani nema jingoni, ¿jánguarhintaachi no ikiani ka no no sési ambe uandani? (Prov. 10:19; 17:27; Mat. 5:22). Engajtsïni máteruecha ikiataaka, jatsiskachi para Jeobani jurajkukuni paraka ima xarhataaka imeri ikiatapu (arhinta je Roma 12:17-21). Ísïchi uáka engachi Jeobani eraaska o andarherani ka tekantskua jingoni erokuarhini eska ima uáka ambe ma jiáni enga uétarhiaka. Engachi no ini ambe úska ka ambe ma jingonchi bengarikuarhintani, ísïpirindi komu no janhanharhini jarhani Jeobani.

18. ¿Ambechi jatsiski para miáni engachi instruksionichani intsïnhauaka?

¹⁸ Ju je jánguarhintani kumpliriuani  jimbanhi instruksionichani. Engajtsïni Jeoba jimbanhi instruksionichani íntsaajka imeri kúnguarhikua jimbo, jatsiskachi para jirejiresï úni ambe engajtsïni arhiaka. Nochi afuersa uékaaka imani ambeteru úni enga antesi únhenga (Ebr. 13:17). Ka ístu, jingontkuchi jámaaka para no sánderu ambe uékani úni “ka eska enga karakata jaka” (1 Kor. 4:6). Engachi kumpliriska ini ambe, xarhataakachi eskachi Jeobani eraaxaka o andarherani.

19. ¿Ambechi uá paraka juchari pájperakua Jeoba jingoni no niáraaka no sési jarhani máteruecheri kulpa jimbo?

¹⁹ Ju je no jurajkuni eska juchari ambakiti pájperakua Jeoba jingoni niáraaka no sési jarhani máteruecheri kulpa jimbo. Engachi méntku Jeobani eraani jauaka o andarherani, nochi jurajkuaka eska ambe engaksï máteruecha uáka, niáraka úni eskachi nóteru tsípikua jingoni jámakia, o eskachi no sési jauaka Jeoba jingoni. Uétarhisïndi méntku miáni jarhani indeni ambe ka sánderu imecha engaksï responsabilidadichani jatsiaka Jeobaeri organisasionirhu, ísï eska Moisesi. Ísïsti eskachi táchanisï jatsiska para Jeobani kurhajchani parachi salbarikuarhini. Peru jatsiskachi para miáni eska Jeoba no iáminduechani jusgariuasïnga juramukua ma jingoni engachi no uáka kumplirini (Filip. 2:12). Engachi sánderu responsabilidadichani jatsiaska, Jeobajtsïni sánderu ambe kurhachintaati (Luk. 12:48). Engachi meru xénchajka Jeobani, no ma ambe uáti eskachi jurajkuaka imani ni eskajtsïni ima nóteru xénchaakia (Sal. 119:165; Rom. 8:37-39).

20. ¿Ambechi jatsiski para jánguarhintani konseguirini?

²⁰ Ini tiempu jimbo enga xáni úkua jukaka, ju je méntku exeni jarhani o andarhierani imani enga uaxakatini jaka imeri tronurhu jini auandarhu, parachi mítini ambe enga uéjka eskachi uáka. Ju je no méni jurajkuni eska ambe engaksï máteruecha uáka, niáraka no sési úkuni juchari ambakiti pájperakua Jeoba jingoni. Ambe enga Moisesi nitamanchapka, ambakiti ambejtsïni jorhendasïndi. Enbesi dechi ikiani imani ambe jimbo engaksï máteruecha no sési újka, ju je jánguarhintani andarherani “Jeobani, juchari Tata Diosïni astakajtsïni íntskuaka imeri jarhuajperata” (Sal. 123:1, 2).