1, 2. Ano an nahiuupod han pagkita kan Jehova?

NAGKIKINABUHI kita ha “peligroso gud nga mga panahon nga makuri pakiangayan,” ngan mas magtitikakuri pa ngani an aton pagkinabuhi antes bungkagon ni Jehova inin maraot nga sistema ngan ipahiuli an tinuod nga kamurayawan ha tuna. (2 Tim. 3:1) Salit maopay nga pakianhan naton an aton kalugaringon, ‘Kan kanay ako nagkikita, o nasarig, para hin bulig ngan giya?’ Bangin bumaton dayon kita nga “Kan Jehova,” ngan ito an pinakamaopay nga baton.

² Ano an nahiuupod han pagkita kan Jehova? Ngan paonan-o naton masisiguro nga pirme nakapokus an aton mga mata ha iya samtang gin-aatubang naton an mga pagsari ha kinabuhi? Mga siglo na an naglabay, ginsaysay han usa nga salmista kon mationan-o kaimportante an pagkita kan Jehova ha panahon nga nagkikinahanglan kita hin bulig. (Basaha an Salmos 123:1-4.) Iya iginpariho an aton pagkita kan Jehova ha paagi han pagkita han usa nga surugoon ha iya agaron. Ano an karuyag sidngon han salmista? An usa nga surugoon diri la nagkikita, o nasarig, ha iya agaron para hin pagkaon ngan proteksyon kondi kinahanglan liwat niya pirme magkita ha iya agaron basi mahibaroan niya an mga karuyag han iya agaron ngan katapos,  buhaton ito. Sugad man, kinahanglan naton usisahon an Pulong han Dios kada adlaw basi mahibaroan kon ano an karuyag ni Jehova nga buhaton naton ngan katapos, himoon ito. Ini la an paagi nga masisiguro naton nga bubuligan kita ni Jehova kon magkinahanglan kita hin bulig.​—Efe. 5:17.

3. Ano an mahimo magin hinungdan nga diri na naton maipokus an aton mga mata kan Jehova?

³ Bisan kon maaram kita kon mationan-o kaimportante an pagkita pirme kan Jehova, usahay bangin maulang kita ha pagbuhat hito. Ito an nahitabo ha duok nga sangkay ni Jesus nga hi Marta. Naulang hiya tungod han pag-inasikaso ha mga buruhaton. (Luc. 10:40-42) Kon nahitabo ito ha usa nga matinumanon nga tawo bisan kon upod niya mismo hi Jesus, diri kita sadang mahipausa kon mahitabo liwat ito ha aton. Ano an mahimo magin hinungdan nga diri na naton maipokus an aton mga mata kan Jehova? Hini nga artikulo, aton hihisgotan kon paonan-o an ginbubuhat han iba mahimo makagwara han aton pokus. Hibabaroan liwat naton kon paonan-o kita magpapabilin nga nakapokus kan Jehova.

4. Kay ano nga baga hin diri katoohan nga nawara ni Moises an pribilehiyo nga makasulod ha Tuna nga Iginsaad?

⁴ Hi Moises sinarig gud kan Jehova para hin giya. Ngani, “hiya padayon nga nagpailob nga sugad hin nakikita an Dios nga diri-nakikita.” (Basaha an Hebreo 11:24-27.) An Biblia nagsusumat ha aton nga “waray na tinmindog nga manaragna ha Israel nga sugad kan Moises, nga nakilala ni Jehova nawong ha nawong.” (Deut. 34:10) Bisan kon hi Moises duok nga sangkay ni Jehova, nawara pa gihapon ha iya an pribilehiyo nga makasulod ha Tuna nga Iginsaad. (Num. 20:12) Ano an hinungdan han kawara han iya pribilehiyo?

5-7. Ano nga problema an binangon katapos gud la bumaya ha Ehipto an mga Israelita, ngan ano an ginbuhat ni Moises may kalabotan hito nga problema?

⁵ Waray pa magduha ka bulan tikang han binaya ha Ehipto an mga Israelita, ngan antes pa hira makaabot ha Bukid Sinai, may binangon nga seryoso nga problema. An mga tawo nagtikang pagreklamo tungod han kawaray-tubig. Nagngurutob hira kontra kan Moises ngan nasina gud ha iya, salit nagsinggit hi Moises kan Jehova: “Ano an akon bubuhaton hinin katawohan? Baga andam na hira pagbato ha akon.” (Eks. 17:4) Ginbaton ni Jehova hi Moises pinaagi ha paghatag ha iya hin matin-aw nga instruksyon. Ginsidngan hiya nga kuhaon an iya tungkod ngan lambahon an bato ha Horeb, ngan katapos mabugwak an tubig. An Biblia nasiring: “Amo an ginbuhat ni Moises ha atubangan han mga katigurangan ha Israel.” An mga Israelita nanginom tubtob nga natagbaw hira, ngan nasulbad an problema.​—Eks. 17:5, 6.

⁶ An giniyahan nga asoy nagsusumat ha aton nga kan Moises “ginngaranan an lugar nga Masa, ngan Meriba, tungud han pagawayaway han mga anak ni Israel, ngan tungud nga ira ginsulay hi Jehova, ngan nasiring: Hahani ba hi Jehova ha aton, kon waray ba?” (Eks. 17:7) Angayan gud ito nga mga ngaran kay nangangahulogan ito hin “Pagsari” ngan “Pag-araway.”

⁷ Ano an inabat ni Jehova ha nahitabo ha Meriba? An ginbuhat han mga Israelita ginhunahuna ni Jehova sugad nga pagrebelde ha iya pagka-Dios, diri la kay pagrebelde kan Moises. (Basaha an Salmos 95:8, 9.) Sayop gud an ginbuhat han mga Israelita. Hito nga sitwasyon, ginbuhat ni Moises an husto pinaagi ha pagsarig kan Jehova ngan katapos pagsunod hin maopay han iya giya.

8. Ano nga problema an binangon ha ikatarapos han 40 ka tuig nga paglakaton han mga Israelita ha kamingawan?

⁸ Pero ano an nahitabo han binangon an pariho nga problema paglabay hin mga 40 ka tuig, ha ikatarapos han paglakaton han mga Israelita ha kamingawan? An mga Israelita inabot ha usa nga  lokasyon nga gintawag liwat nga Meriba. Pero iba ini nga Meriba; hirani ini ha Kades, hirani ha giutan han Tuna nga Iginsaad. * An mga Israelita nagreklamo na liwat tungod han kawaray-tubig. (Num. 20:1-5) Pero hini nga sitwasyon, iba gud an ginbuhat ni Moises.

9. Ano nga instruksyon an iginhatag kan Moises, pero ano an iya ginbuhat? (Kitaa an retrato ha tinikangan hini nga artikulo.)

⁹ Ano an ginbuhat ni Moises han nagrebelde an katawohan? Nangaro utro hiya kan Jehova hin giya. Pero hini nga higayon, waray sugoa ni Jehova hi Moises nga lambahon an bato. Ginsidngan hi Moises nga kuhaon an iya tungkod, tirukon an katawohan ha atubangan han bato, ngan katapos yaknan an bato. (Num. 20:6-8) Pero waray yakni ni Moises an bato. Lugod, iya iginpagawas an iya kasina pinaagi ha pagsinggit ha mga tawo nga nagtitirirok: “Yana pamati, kamo nga mga masukihon; pagdadad-an ba kamo namon hin tubig tikang hini nga bato?” Katapos, ginlambahan niya an bato diri la makausa kondi makaduha.​—Num. 20:10, 11.

10. Ano an inabat ni Jehova ha ginbuhat ni Moises?

¹⁰ Hi Jehova nasina ngan napungot pa ngani kan Moises. (Deut. 1:37; 3:26) Kay ano nga ito an inabat ni Jehova? Posible nga tungod ito han pipira nga rason. Sugad han gin-unabi na, bangin nasina hi Jehova kan Moises tungod kay waray niya sunda an bag-o nga instruksyon nga iginhatag ha iya.

11. Han ginlambahan ni Moises an bato, kay ano nga posible nga naaghat niya an mga Israelita nga maghunahuna nga waray maghimo hin milagro hi Jehova?

¹¹ May usa pa nga posible nga hinungdan. An dagku nga mga bato nga makikita ha lokasyon han siyahan nga Meriba solido nga mga granito. Bisan kon lambahon ito hin makusog, waray bisan usa nga maglalaom nga may magawas nga tubig tikang hito. Pero naiiba gud an dagku nga mga bato nga makikita ha ikaduha nga Meriba; kasagaran na nga mahumok ito nga klase hin bato nga gintatawag nga apog. Tungod kay mahumok ito nga klase hin bato, nahunob an tubig dida hito ngan natitirok ha ilarom. Ngan mahimo makakuha hin tubig an mga tawo pinaagi ha pagbuho hito nga bato. Salit han ginlambahan ni Moises an bato imbes nga yaknan ito, posible ba nga ginhunahuna han mga Israelita nga an pag-awas han tubig natural la nga hitabo ngan diri usa nga milagro nga tikang kan Jehova? * Diri kita makakasigurado.

12. Ano an usa pa nga posible nga rason nga nasina hi Jehova kan Moises pati kan Aaron?

¹² May usa pa nga makatadunganon nga rason kon kay ano nga nasina hi Jehova kan Moises pati kan Aaron. Tigamni an ginsiring ni Moises ha mga tawo: “Pagdadad-an ba kamo namon hin tubig tikang hini nga bato?” Pinaagi ha paggamit han pulong nga “namon,” posible nga gintutudlok ni Moises an iya kalugaringon ngan hi Aaron. Ito nga mga pulong nagpapakita hin duro nga kawaray-respeto kan Jehova sugad nga an tinuod nga Surok hito nga milagro. Ini nga posibilidad baga hin ginpapamatud-an han Salmos 106:32, 33: “Ginpakasina liwat hiya [Jehova] nira didto han mga tubig ha Meriba, sanglit an kamaraut inabut kan Moises tungud ha ira; kay maglaris hira kontra han [o, ginpasina nira an] iya espiritu, ngan nagyakan hiya hin diri kaangayan han iya mga im-im.” * (Num. 27:14) Anoman an hinungdan, waray ihatag ni Moises an bug-os nga pasidungog nga angayan gud para kan Jehova.  Ginsidngan ni Jehova hira Moises ngan Aaron: “Kamo sinmuki patok ha akon polong.” (Num. 20:24) Seryoso gud ito nga sala!

13. Kay ano nga angayan ngan makatadunganon an sirot ni Jehova kan Moises?

¹³ Sugad nga mga lider han katawohan ni Jehova, durodaku an ginlalaoman ni Jehova kanda Moises ngan Aaron. (Luc. 12:48) Han naglabay, waray tuguti ni Jehova an usa nga bug-os nga henerasyon han mga Israelita nga makasulod ha tuna han Canaan tungod han ira pagin rebelyoso. (Num. 14:26-30, 34) Salit angayan ngan makatadunganon la nga hukman ni Jehova hi Moises hin pariho nga sirot tungod han iya pagrebelde. Pariho han iba nga mga rebelde, waray hiya tuguti nga makasulod ha Tuna nga Iginsaad.

14, 15. Ano an hinungdan nga nagrebelde hi Moises kan Jehova?

¹⁴ Ano an hinungdan nga nagrebelde hi Moises kan Jehova? Hunahunaa utro an ginsisiring han Salmos 106:32, 33: “Ginpakasina liwat hiya nira didto han mga tubig ha Meriba, sanglit an kamaraut inabut kan Moises tungud ha ira; kay maglaris hira kontra han [o, ginpasina nira an] iya espiritu, ngan nagyakan hiya hin diri kaangayan han iya mga im-im.” Bisan kon kan Jehova nagrebelde an mga Israelita, hi Moises an nasina. Tungod han iya kawaray-pagpugong ha kalugaringon, nagyakan hiya nga waray hunahunaa an magigin resulta.

¹⁵ Gintugotan ni Moises an ginbubuhat han iba nga magin hinungdan nga diri na niya maipokus an iya mga mata kan Jehova. Han siyahan nga higayon nga nagreklamo an mga tawo tungod han kawaray-tubig, ginbuhat ni Moises an husto. (Eks. 7:6) Pero katapos hin mga dekada nga pakig-upod ha rebelyoso nga mga Israelita, posible nga ginsumhan ngan nasina hiya ha ira. Posible ba nga nagpokus la hi Moises hito nga iya inaabat imbes nga kon paonan-o niya mapapasidunggan hi Jehova?

16. Kay ano nga sadang naton hunahunaon an mga ginbuhat ni Moises?

¹⁶ Kon an usa nga matinumanon nga propeta nga pariho kan Moises nawara ha iya pokus ngan nakasala, posible liwat nga mahitabo ito ha aton. Pariho kan Moises, hirani na kita sumulod ha usa nga simboliko nga tuna, an bag-o nga kalibotan nga iginsaad ha aton ni Jehova. (2 Ped. 3:13) Waray gud usa ha aton nga maruruyag nga mawad-an hinin espesyal nga pribilehiyo. Pero basi naton makab-ot an aton tumong, kinahanglan naton tipigan nga nakapokus an aton mga mata kan Jehova ngan buhaton pirme an iya kaburut-on. (1 Juan 2:17) Ano nga mga leksyon an aton mahibabaroan ha sayop ni Moises?

17. Ano an mabulig ha aton nga diri mawara an aton pagpugong ha kalugaringon kon nasisina kita?

¹⁷ Ayaw tuguti nga mawara an imo pagpugong ha kalugaringon kon nasisina ka. Bisan kon pauroutro naton nga naieksperyensyahan an pariho nga mga problema, “ayaw kita pag-undang ha pagbuhat han maopay, kay pag-abot han panahon mag-aani kita kon diri kita manluya.” (Gal. 6:9; 2 Tes. 3:13) Kon naatubang kita hin mga sitwasyon nga nakakapasina ha aton o hin pauroutro nga diri pagsinabtanay tungod han magkaiba nga personalidad, ginkukontrol ba naton an aton ginyayakan ngan an aton kasina? (Prob. 10:19; 17:27; Mat. 5:22) Kon napasina kita han iba, kinahanglan naton ‘pabay-an nga an Dios an magpahayag han kangalas.’ (Basaha an Roma 12:17-21.) Kon padayon kita nga nagkikita kan Jehova, maipapakita naton ha iya an angayan nga pagrespeto pinaagi ha pagtugot ha iya nga hiya an magpahayag han iya kangalas, mapailubon nga naghuhulat han iya paggios may kalabotan ha aton problema kon para ha iya ginkikinahanglan ito. Pero kon mabulos kita, pagpakita ito nga diri naton ginrirespeto hi Jehova.

18. Ano an kinahanglan naton hinumdoman may kalabotan ha pagsunod ha mga giya?

 ¹⁸ Sunda hin maopay an bag-o nga mga giya. Ginsusunod ba naton hin maopay an bag-o nga mga giya nga ginhahatag ha aton ni Jehova? Kon oo, diri naton basta nga bubuhaton na la an mga butang uyon ha paagi han aton pagbuhat hito hadto. Lugod, magigin andam gud kita ha pagsunod ha bag-o nga mga giya nga iginhahatag ni Jehova pinaagi han iya organisasyon. (Heb. 13:17) Sugad man, sadang kita magbantay nga ‘diri pasobrahan an mga butang nga nahisurat.’ (1 Cor. 4:6) Ha pagbuhat hito, gintitipigan naton nga nakapokus an aton mga mata kan Jehova.

19. Ano an mahimo naton buhaton basi diri madaot an aton relasyon kan Jehova tungod han mga sayop han iba?

¹⁹ Ayaw tuguti an sayop han iba nga makadaot han imo relasyon kan Jehova. Kon gintitipigan naton nga nakapokus kan Jehova an aton simboliko nga mga mata, diri naton tutugotan an ginbubuhat han iba nga makapasina ha aton o makadaot han aton relasyon kan Jehova. Importante gud ini labi na kon may-ada kita daku nga responsabilidad ha organisasyon han Dios, pariho kan Moises. Bisan kon an kada tagsa ha aton kinahanglan ‘padayon nga mangalimbasog nga may kahadlok ngan pangurog para ha iya katalwasan,’ sadang naton hinumdoman nga waray hi Jehova maghimo hin istrikto o diri nababag-o nga suruklan ha paghukom ha aton. (Fil. 2:12) Lugod, kon mas daku an aton responsabilidad, mas daku an ginlalaoman ha aton ni Jehova. (Luc. 12:48) Pero kon hinigugma gud naton hi Jehova, waray bisan ano nga makakapakdol ha aton o makakagbulag ha aton tikang ha iya gugma.​—Sal. 119:165; Roma 8:37-39.

20. Ano an sadang naton magin determinasyon?

²⁰ Hinin makuri nga mga panahon, hinaot tipigan naton nga nakapokus an aton mga mata kan Jehova, an “nalingkod dida ha mga langit,” basi masabtan naton an iya kaburut-on. Hinaot diri naton tugotan nga madaot an aton relasyon ha iya tungod han ginbubuhat han iba. An nahitabo kan Moises nagtututdo ha aton nga importante nga ipasilsil naton ha aton hunahuna ngan kasingkasing ito nga leksyon. Imbes nga sobra nga magreak ha mga kaluyahan han iba, magin determinado unta kita nga an ‘aton mga mata magkita kan Jehova nga aton Dios, tubtub nga tagan kita niya hin kalooy.’​—Sal. 123:1, 2.