你有冇仰望耶和華？
“住喺天上嘅主啊，我舉目仰望你。”——詩篇123:1
1,2．仰望耶和華意味住乜嘢？
而家係“難以應付嘅非常時期”，我哋嘅生活變得越來越艱難。直到耶和華毁滅呢個邪惡嘅世界，地球先至會恢復真正嘅和平。（提摩太後書3:1）我哋可以問吓自己：“我哋從邊度可以得到幫助同指引？”可能我哋會馬上回答：“從耶和華嗰度。”呢個的確係最正確嘅答案。
2 仰望耶和華，向佢尋求幫助意味住乜嘢？我哋點樣可以肯定自己喺逆境之下始終仰望耶和華？多個世紀之前，詩篇執筆者指出，我哋遇到難題嘅時候就更加要仰望耶和華。（請讀詩篇123:1-4）佢話，我哋仰望耶和華就好似一個僕人仰望佢嘅主人噉。僕人唔單止倚靠主人提供食物同保護，亦都要不斷留意主人對佢有乜嘢要求，並按照主人嘅意思去做。同樣，我哋每日查考上帝嘅話語，了解耶和華嘅指引並付諸行動。噉我哋就可以確信，喺面對困難嘅時候可以得到耶和華嘅幫助。（以弗所書5:17）
3．點解耶和華嘅忠僕有時都會分心？
3 雖然我哋知道，時刻仰望耶和華好重要，不過我哋有時都會分心。耶穌嘅好朋友馬大曾經就有噉嘅問題。佢因為“照顧嘅事多”，所以“分身不暇”。（路加福音10:40-42）既然一個咁忠心嘅人喺耶穌身邊嗰陣都會分心，噉我哋有同樣嘅問題都唔使覺得出奇。乜嘢事會影響我哋，使我哋唔能够定睛注視耶和華？呢篇課文會討論，其他人嘅行為會點樣令我哋分心，以及我哋可以點樣繼續仰望耶和華。
失去殊榮嘅忠僕
4．摩西唔可以進入應許之地，點解係一件令人覺得意外嘅事？
4 摩西的確向耶和華尋求指引。佢“堅定不移，好似睇見嗰位肉眼睇唔見嘅上帝”。（請讀希伯來書11:24-27）聖經話：“喺以色列當中再都冇興起先知好似摩西一樣。摩西係耶和華面對面所認識嘅。”（申命記34:10）雖然摩西同耶和華有親密嘅關係，不過佢最終失去咗進入應許之地嘅殊榮。（民數記20:12）摩西做錯乜嘢事？
5-7．以色列人離開埃及之後冇幾耐就發生乜嘢問題？摩西點樣應付當時嘅情況？
5 以色列人離開埃及唔够兩個月，都未去到西奈山，就發生咗一個嚴重嘅問題。民衆開始埋怨冇水飲，又向摩西發怨言。佢哋情緒越來越激動，於是摩西向耶和華呼求話：“我應該點樣應付呢班人呢？佢哋就嚟攞石頭打死我嘞！”（出埃及記17:4）耶和華馬上作出回應，俾摩西明確嘅指示。摩西按照耶和華嘅吩咐，用杖擊打何烈山嘅岩石，結果就有水從岩石湧出嚟。經文話：“摩西就喺以色列嘅長老眼前噉樣做。”以色列人有足够嘅水飲，問題就解決咗嘞。（出埃及記17:5,6）
6 聖經話俾我哋知，摩西為嗰個地方起名叫瑪薩（意思係“試驗；考驗”），又叫米利巴（意思係“爭吵”）。點解呢？“因為以色列人喺嗰度爭吵，又試探耶和華，話：‘耶和華真係喺我哋當中？’”（出埃及記17:7）
7 耶和華對米利巴發生嘅事有乜嘢睇法？喺耶和華眼中，以色列人噉樣做就等於背叛佢，挑戰佢嘅權柄，而唔只係反對摩西。（請讀詩篇95:8,9）以色列人所犯嘅錯誤非常嚴重。不過，當時摩西採取正確嘅行動，仰賴耶和華並聽從佢嘅指引。
8．以色列人喺曠野四十年嘅流浪生活就快結束嘅時候，發生乜嘢事？
8 四十年之後，同樣嘅事情又再發生，呢次摩西點樣做呢？以色列人就快結束喺曠野嘅流浪生活嗰陣，嚟到一個叫米利巴嘅地方。呢個米利巴喺應許之地邊境嘅加低斯附近，同之前嗰個唔係同一個地方。 *以色列人再次埋怨冇水飲。（民數記20:1-5）不過呢次，摩西處理問題嘅時候犯咗嚴重嘅錯。
9．耶和華吩咐摩西乜嘢？但係摩西點樣做？（請睇吓課文開頭嘅圖片）
9 摩西點樣應對呢次反叛？佢再一次向耶和華尋求指引。但耶和華今次冇叫摩西擊打岩石，而係叫佢攞住杖，召集民衆到岩石前面，然後向岩石講話。（民數記20:6-8）但係摩西冇噉樣做，而係好嬲噉大聲同民衆講：“你哋呢啲叛徒聽住！唔通一定要我哋從呢塊岩石當中引水俾你哋先至得？”講完之後，佢唔止一次，而係兩次擊打岩石。（民數記20:10,11）
10．耶和華對摩西所做嘅事有乜嘢反應？
10 摩西所做嘅事使耶和華好憤怒。（申命記1:37；3:26）點解耶和華有咁强烈嘅反應？使耶和華發怒嘅原因可能有幾個，而其中之一就係，摩西冇按照耶和華呢次嘅指示去做。
11．點解摩西擊打岩石可能會使以色列人覺得耶和華冇施行奇迹？
11 另一個原因可能係，喺第一個米利巴，周圍都係堅固嘅花崗岩。無論人點樣擊打呢啲岩石，正常嚟講都唔可能有水湧出嚟。但係，第二個米利巴就好唔同，地質構成主要係石灰岩。由於石灰岩有多孔透水嘅特性，岩層下面往往儲藏咗大量嘅地下水。喺呢啲地區，人只要鑿開岩層就可以取水飲用。所以，如果摩西唔係對岩石講話，而係擊打岩石，噉以色列人會唔會因為呢個原因，就覺得啲水系自然湧出嘅，而唔係耶和華施行咗奇迹？ *我哋唔可以肯定。
摩西違背耶和華嘅訓示
12．耶和華對摩西同亞倫發怒嘅另一個原因可能係乜嘢？
12 耶和華對摩西同亞倫發怒可能仲有另一個原因。請留意摩西對民衆所講嘅話。佢話：“唔通一定要我哋從呢塊岩石當中引水俾你哋先至得？”摩西所講嘅“我哋”，睇嚟係指佢同亞倫。摩西噉樣講，表明佢冇將所有功勞歸俾真正施行奇迹嘅耶和華，冇對耶和華表現尊重嘅態度。詩篇106:32,33所講嘅好可能就係呢件事。經文話：“佢哋喺米利巴水邊惹動怒氣，結果摩西因佢哋而遭殃。佢哋使摩西苦惱氣憤，於是佢嘅嘴冒失發言。” *（民數記27:14）摩西嘅行為表明，佢冇將耶和華應得嘅榮耀歸俾耶和華。耶和華對摩西同亞倫講：“你哋違背咗我嘅訓示。”（民數記20:24）呢個真係一個嚴重嘅過犯！
13．點解耶和華對摩西嘅判決係公平合理嘅？
13 摩西同亞倫身為耶和華子民嘅領袖，要承擔更大嘅責任。（路加福音12:48）之前，以色列人因為反叛耶和華，結果耶和華唔允許嗰一代人進入應許之地。（民數記14:26-30,34）摩西違背耶和華嘅訓示，所以耶和華亦都唔允許摩西進入應許之哋。耶和華對摩西作出同樣嘅判決，係公平合理嘅。
問題嘅起因
14,15．乜嘢導致摩西違背耶和華嘅訓示？
14 乜嘢令摩西違背耶和華嘅訓示？請再一次留意詩篇106:32,33：“佢哋喺米利巴水邊惹動怒氣，結果摩西因佢哋而遭殃。佢哋使摩西苦惱氣憤，於是佢嘅嘴冒失發言。”摩西見以色列人反叛耶和華就深感怨憤，結果冇控制自己嘅情緒，講出魯莽嘅話。
15 摩西受其他人影響，冇繼續仰望耶和華。以色列人第一次埋怨冇水飲嗰陣，摩西用咗正確嘅方式處理問題。（出埃及記7:6）不過，可能摩西因為以色列人多年來都反叛上帝，就變得身心疲累，灰心喪氣。摩西可能過度重視自己嘅感覺，而冇考慮可以點樣榮耀耶和華。
16．點解我哋要從摩西嘅錯誤汲取教訓？
16 既然摩西呢位咁忠心嘅先知都會分心同犯錯，噉同樣嘅事都好容易會發生喺我哋身上。同摩西一樣，我哋今日亦都即將進入耶和華應許嘅新世界。（彼得後書3:13）我哋都唔想錯失呢個美好嘅機會。不過想進入新世界，我哋就要繼續仰望耶和華，聽從佢嘅吩咐。（約翰一書2:17）我哋從摩西嘅錯誤汲取到乜嘢教訓？
避免受其他人影響而分心
17．我哋情緒激動嘅時候應該點樣做？
17 唔好喺情緒激動之下魯莽行事。即使我哋要反反覆覆處理同樣嘅問題，都“千祈唔好放棄行善，如果唔灰心鬆懈，到咗時候就會有收成”。（加拉太書6:9；帖撒羅尼迦後書3:13）某啲人或者事一次又一次令我哋心煩嘅時候，我哋有冇控制自己嘅嘴唇同情緒呢？（箴言10:19；17:27；馬太福音5:22）俾人激嬲嗰陣，我哋要學會“聽憑上帝發怒”。（請讀羅馬書12:17-21）所以，我哋繼續仰望耶和華，就會耐心等待，相信佢會喺最適當嘅時候採取行動。相反，如果我哋魯莽噉用自己嘅方式解決問題，就係唔尊重耶和華嘞。
18．我哋喺跟從指引方面要記住乜嘢？
18 認真跟從最新嘅指引。我哋點樣做就係忠心噉跟從耶和華嘅最新指引？當耶和華通過佢嘅組織俾我哋新指引嗰時，我哋應該馬上跟從，而唔係單憑經驗行事。（希伯來書13:17）同時，我哋要小心，“唔好越出經上所記嘅話”。（哥林多前書4:6）噉樣，我哋就可以繼續仰望耶和華。
摩西對其他人嘅過犯有乜嘢反應？我哋從中學到乜嘢？（請睇第19段）
19．我哋可以點樣避免俾其他人嘅過犯損害自己同耶和華嘅關係？
19 唔好俾其他人嘅過犯損害你同耶和華嘅關係。我哋如果想繼續仰望耶和華，就會努力保護自己同耶和華嘅關係，唔會因為其他人嘅過犯而心懷怨憤。如果我哋同摩西一樣喺上帝嘅組織當中擔任某啲職責，就更加應該留意呢一點。當然，我哋每個人都要不斷努力服從耶和華先可以得救。（腓立比書2:12）我哋嘅職責越多，要承擔嘅責任就越大。（路加福音12:48）只要我哋全心愛戴耶和華，就冇任何事能够絆倒我哋，或者隔斷耶和華對我哋嘅愛。（詩篇119:165；羅馬書8:37-39）
20．你決心點樣做？
20 我哋正生活喺一個困難重重、充滿挑戰嘅時期。願我哋繼續舉目仰望“住喺天上嘅主”，明辨佢嘅旨意。摩西嘅事例使我哋明白一個重要嘅道理，就係唔應該俾其他人嘅過犯損害自己同耶和華嘅關係。當周圍嘅人犯錯嘅時候，我哋與其反應過激，不如下定決心“仰望耶和華我哋嘅上帝，直到佢向我哋施恩”。（詩篇123:1,2）
^ 8段 呢個米利巴同利非訂附近嗰個又名瑪薩嘅米利巴唔係同一個地方。不過，呢兩個地方都因為以色列人喺嗰度發生過爭吵而被命名為米利巴。——請睇英語《聖經新世界譯本》附錄B3嘅地圖。
^ 11段 一位聖經學者評論呢個記載話：“按照猶太人嘅一個傳統講法，嗰啲反叛嘅民衆指責摩西話：‘摩西知道呢啲岩石下面有地下水！如果佢想證明佢能够施行神迹，就試吓從其他岩石嗰度變啲水出嚟啦。’”當然，呢個只係一個傳統嘅講法。
^ 12段 請睇《守望台》1988年11月1日刊“讀者來函”。
