1, 2. ¿Xi riníʼ guyadxinu Jiobá?

NABÁNINU ti tiempu nabé «nagana», ne jmaruʼ si nagana zabáninu ora jma mayaca guinitilú guidxilayú malu riʼ ne maʼ chuʼ paz lu Guidxilayú (2 Tim. 3:1). Nga runi galán guinabadiidxanu: «¿Paneza caduyadxinu?», o ¿tu ruyúbinu gacané laanu ne guluíʼ laanu xi naquiiñeʼ gúninu? Zándaca nagueendaca guicábinu: «Jiobá». Ne nga nga respuesta jma jneza ni zanda gudiʼnu.

² ¿Xi riníʼ guyadxinu Jiobá? Ne ¿ximodo zanda chuʼnu seguru qué rusaana de guidúʼyadxinu laabe ora cadídinu lu ca guendanagana ni ridxaagalunu guiráʼ dxi? Raca stale gayuaa iza, tobi de ca hombre ni bicaa salmo guníʼ pabiáʼ risaca guyadxinu Jiobá para gacané laanu ora maʼ cadídinu lu guendanagana (biindaʼ Salmo 123:1-4). Bichaagabe ni né dxiiñaʼ runi ti mozo. Ora guniʼbe qué rusaana ti mozo de guyadxí náʼ xpixuaanaʼ la? cadi caníʼsibe napa mozo ca confianza zudii xpixuaanaʼ laa guendaró ne zapa laabe. Laaca guniʼbe ruuyadxí mozo ca náʼ xpixuaanaʼ ti ganna xi canabaʼ xpixuaanaʼ laa ne guni ni canábabe laa. Zacaca nga naquiiñeʼ gúninu, caquiiñeʼ guidúʼndanu  Stiidxa Dios guiráʼ dxi ti gánnanu xi rinabaʼ Jiobá laanu gúninu. Purtiʼ zacá zanda gacanebe laanu (Efes. 5:17).

3. ¿Xi zándaca gucaa laanu gusaana de guidúʼyadxinu Jiobá?

³ Neca nánnanu nabé risaca nga guidúʼyadxinu Jiobá guiráʼ ora la? ziuu ora zándaca guiaandaʼ laanu gunáʼ nga ni jma risaca ne pur nga guidúʼyadxinu sti laadu. Ngapeʼ nga ni bizaaca ti xhamiga Jesús ni láʼ Marta. Biaandaʼ laabe gunáʼ nga ni jma risaca tantu cá íquebe xhiiñabe (Luc. 10:40-42). Pa Marta guyuu gaxha de Jesús ne bizaaca zacá la? cadi naquiiñeʼ guidxagayaanu pa guizaacanu zacá. Yanna, ¿xi zanda gucaa laanu gusiáʼndanu gunáʼ nga ni jma risaca yaʼ? Lu tema riʼ zadúʼyanu ximodo zanda guniná ni runi xcaadxi binni laanu. Ne laaca zazíʼdinu xi caquiiñeʼ gúninu para cadi gusaana de guidúʼyadxinu Jiobá.

4. ¿Xiñee zándaca guidxagayaanu qué ñuu Moisés ndaaniʼ Tierra Prometida?

⁴ Nánnanu biyubi Moisés gacané Jiobá laa. Purtiʼ«bidxii lú be neza ze be purti casi ñaca cayuuya be Dios neca qué rihuinni» (biindaʼ Hebreos 11:24-27). Biblia ná «qué huayuu dxi chuʼ sti profeta casi Moisés ndaaniʼ guidxi Israel, purtiʼ binibiáʼ chaahuiʼ Jiobá laabe» (Deut. 34:10). Peru neca guizáʼ guca xhamigu Moisés Jiobá, binítibe oportunidad de ñuube ndaaniʼ Tierra Prometida (Núm. 20:12). ¿Xi bizaaca yaʼ?

5-7. a) ¿Xi bizaaca despué de biree ca israelita de Egipto? b) ¿Xi biʼniʼ Moisés?

⁵ Biaʼ chupa beeu despué de biree ca israelita que de Egipto, ante chindácabe lu dani Sinaí, gúpacabe ti guendanagana. Bizulú guidxi que gudicheruaa ne bicaalucaʼ Moisés. Cumu maʼ cadi nuudxí ca binni que la? gudxi Moisés Jiobá ca diidxaʼ riʼ: «¿Xi guneʼ né guidxi riʼ? ¡Stuudxi si la? maʼ zuchácabe guié naa!» (Éx. 17:4). Jiobá gudxi laabe xi naquiiñeʼ gúnibe: naquiiñeʼ quíbibe vara ni naazebe que guié stiʼ Horeb para guiree nisa ndaaniʼ ni. Ne Biblia ná: «Biʼniʼ Moisés zaqué nezalú ca ancianu stiʼ Israel». Güeʼ ca israelita que nisa dede ra bidxacaʼ ne zaqué guca chaahuiʼ guendanagana que (Éx. 17:5, 6).

⁶ Biblia ná gulee láʼ Moisés lugar que Masah, ni riníʼ «Prueba» ne Meribá, ni riníʼ «Ridindené». ¿Xiñee biáʼsipeʼ modo gulee labe ca lugar riʼ yaʼ? «Purtiʼ gudindené ca israelita que Moisés ne bitiidicabe Jiobá a prueba, ora guníʼcabe: “¿Nuuné Jiobá laanu la? o coʼ?”» (Éx. 17:7).

⁷ ¿Ximodo biiyaʼ Jiobá ni bizaaca Meribá que yaʼ? Biiyabe cadi stiidxaʼ si Moisés nga qué niná ca israelita que nuzuubaʼ, sínuque ne stiidxabe (biindaʼ Salmo 95:8, 9). Rihuinni dxíchica qué ñuni ca israelita que ni jneza. Peru Moisés biʼniʼ ni jneza: gunábabe Jiobá gacané laabe ne bíʼnibe ni gudxi laabe.

8. ¿Xi guendanagana bidxaagalú ca israelita que maʼ para guiluxe biaje sticaʼ lu desiertu?

⁸ Cuarenta iza despué, maʼ para guiluxe viaje stiʼ ca israelita lu desiertu, laaca ngueca guendanagana gúpacaʼ. Dxi nuucabe sti lugar ni biree lá Meribá, lugar riʼ la? nuu ni gaxha de Qadés, maʼ gaxha para chúʼcabe lu Tierra  Prometida. * Gudicheruaa ca israelita que sti biaje purtiʼ gastiʼ nisa (Núm. 20:1-5). Peru maʼ gadxé ni biʼniʼ Moisés biaje riʼ.

9. ¿Xi biʼniʼ mandar Jiobá Moisés guni, peru xi bíʼnibe? (Biiyaʼ dibuju ni zeeda ra ruzulú tema riʼ).

⁹ ¿Xi biʼniʼ Moisés ora bicaalú ca israelita laa sti biaje yaʼ? Laaca biyúbibe Jiobá para gabi laabe xi naquiiñeʼ gúnibe. Peru biaje riʼ qué ñabi diʼ Dios laabe ugázebe vara que lu guié que. Ni gudxi Dios laabe nga guinaazebe vara stibe, guchíñabe ca binni que guidubi buelta guié que ne guiníʼnebe guié que (Núm. 20:6-8). Peru qué niniʼné Moisés guié que. Ni bíʼnibe nga bidiibe lugar guchiichi guidxi que laabe ngue runi gudindenebe laacaʼ. Ne rábibe laacaʼ: «¡Binni qué ruzuubaʼ diidxaʼ, lagucaadiaga! ¿Ñee de lu guié riʼ nga caquiiñeʼ cueedu nisa para laatu la?». Ne despué bigázebe vara stibe lu guié que chupa biaje (Núm. 20:10, 11).

10. ¿Xi biʼniʼ sentir Jiobá pur ni biʼniʼ Moisés?

¹⁰ Guizáʼ bidxiichiné Jiobá Moisés (Deut. 1:37; 3:26). ¿Xiñee yaʼ? Zándaca nuu stale razón. Zándaca ni bichiichi laabe nga qué nuzuubaʼ Moisés stiidxabe biaje riʼ.

11. Ra bigaze Moisés vara cueʼ guié que, ¿xiñee zándaca guníʼ ique ca israelita cadi Jiobá biʼniʼ milagru que?

¹¹ Guidúʼyanu sti razón xi pur zándaca bidxiichiné Jiobá Moisés. Ca guié ni nuu Meribá ni bizéʼtenu primé que, nabé naguidxi cani. Neca guizáʼ nadipaʼ ugázecabe vara ni la? guirutiʼ ribeza guireeʼ nisa cueʼ cani. Peru guiropa Meribá bizéʼtenu ca maʼ gadxé ca guié nuu raqué, runibiáʼcabe ca guié riʼ casi piedra caliza. Cumu jma naguudxi ca guié caliza riʼ, ne napa cani huecuhuiiniʼ lade cani la? riaana nisa ndaaniʼ cani purtiʼ reʼ cani nisa ne zanda iquiiñeʼ binni nisa ni riree ndaaniʼ cani. Cumu bigaze Moisés vara que guié que lugar de niniʼné ni la? zándaca guníʼ ique ca israelita que stubi nisa que biree de raqué ne cadi purtiʼ biʼniʼ Jiobá ti milagru. *

12. ¿Xi sti razón zándaca gupa Jiobá para bidxiichiné Moisés ne Aarón?

¹² Zándaca nuu sti razón xi pur bidxiichiné Jiobá Moisés ne Aarón. Guidúʼyanu xi gudxi Moisés guidxi que: «¿Ñee lu guié riʼ nga caquiiñeʼ cueedu nisa para laatu la?». Ora guniʼbe «cueedu nisa», zándaca caniʼbe de laabe ne Aarón. Ca diidxaʼ ni guniʼbe ca bisihuinni ni qué gápabe respetu Jiobá, purtiʼ laa nga biʼniʼ milagru que. Ne zándaca ni bizaaca riʼ nga ruzeeteʼ Salmo 106:32, 33 ra ná: «Bichiichicabe Dios [Jiobá] dxi guleecabe nisa Meribá, ne pur ngue huaxiéʼ galán guyé ni Moisés. Ngue runi bidxiichi [Moisés] ne guníʼ cosa sin niníʼ ique» * (Núm. 27:14). Ni biʼniʼ Moisés ca qué nusisaca ni Jiobá. Ngue runi  gúdxibe Moisés ne Aarón: «Qué nuzuubatu stiidxaʼ» (Núm. 20:24). Nabé feu modo bicheenécabe Jiobá.

13. ¿Xiñee biaʼsi biʼniʼ Jiobá ora guníʼ qué ziuu Moisés ndaaniʼ Tierra Prometida?

¹³ Moisés ne Aarón nga guzanirú lu xquidxi Dios, ngue runi guizáʼ naroʼbaʼ responsabilidad gúpacabe (Luc. 12:48). Dxi bichee ca israelita que, gudxi Jiobá laacaʼ qué ziuucaʼ lu layú stiʼ Canaán purtiʼ bicheenecaʼ laabe (Núm. 14:26-30, 34). Ngue runi biaʼsi biʼniʼ Jiobá ora guníʼ qué ziuu Moisés ndaaniʼ Tierra Prometida que purtiʼ qué nuzuubaʼ diidxaʼ.

14, 15. ¿Xi zándaca bicaa Moisés cadi guzuubaʼ diidxaʼ?

¹⁴ ¿Xi zándaca bicaa Moisés cadi guzuubaʼ diidxaʼ yaʼ? Guzéʼtenu sti biaje xi ná Salmo 106:32, 33: «Bichiichicabe Dios dxi guleecabe nisa Meribá, ne pur ngue huaxiéʼ galán guyé ni Moisés. Ngue runi bidxiichi ne guníʼ cosa sin niníʼ ique». Neca Jiobá nga bicaalú ca israelita que la? peru bidxiichi Moisés pur ni bíʼnicabe que. Cumu qué ñanda nucueezabe laca laabe la? guniʼbe cosa sin niníʼ íquebe.

¹⁵ Bidii Moisés lugar guchiichi ni biʼniʼ xcaadxi laa ne pur ngue maʼ qué ñuni ni gudxi Jiobá laa. Primé biaje gudicheruaa ca israelita que pur gastiʼ nisa la? qué nidxiichi Moisés ne biʼniʼ ni jneza (Éx. 7:6). Maʼ stale iza de cayuni huantarbe guidxi ni qué ruzuubaʼ diidxaʼ que, ngue runi zándaca maʼ bidxágabe ne maʼ bireebe gana. Zándaca jma gucuá íquebe ni cayuni sentirbe lugar de nicá íquebe nusisácabe Jiobá.

16. ¿Xiñee risaca guiníʼ íquenu ni bizaaca Moisés riʼ?

¹⁶ Pa Moisés guca ti profeta stiʼ Dios ne bidii lugar guni distraer ni biʼniʼ xcaadxi laa ne bichee la? laanu laaca zanda guizaacanu ni bizaacabe ca. Cadi guiaandaʼ laanu laaca mayaca chuʼnu ndaaniʼ guidxilayú cubi ni biʼniʼ prometer Dios laanu (2 Ped. 3:13). Nin tobi de laanu qué racaláʼdxinu gunítinu privilegiu sicarú riʼ. Peru pa racaláʼdxinu chuʼnu ndaaniʼ guidxilayú cubi ca la? naquiiñeʼ guidúʼyadxinu Jiobá guiráʼ ora ne gúninu stipa pur gúninu ni nabe (1 Juan 2:17). ¿Xi rizíʼdinu de ni bizaaca Moisés riʼ yaʼ?

17. ¿Xi zacané laanu para cadi gudiʼnu lugar chuʼ xiixa ni cuee gana laanu?

¹⁷ Cadi gudiʼnu lugar chuʼ xiixa ni cuee gana laanu. Nuu biaje rudxíʼlunu xiixa guendanagana chupa chonna biaje. Peru Biblia cayabi laanu: «Cadi guireʼnu gana de gúninu ni jneza, purtiʼ ora guedandá tiempu zandísanu cosecha pa qué guidxáganu» (Gál. 6:9; 2 Tes. 3:13, TNM). Ora guidxaagalunu xiixa guendanagana o gatigá chuʼdindenenu tuuxa, ¿ñee zuni controlarnu ni rúninu ne ni rininu la? (Prov. 10:19; 17:27; Mat. 5:22). Pa guchiichi xcaadxi binni laanu, naquiiñeʼ guizíʼdinu gusaananu ni lu náʼ Jiobá (biindaʼ Romanos 12:17-21). Rúninu ni ora ruuyadxinu Dios ne ora ribézanu né paciencia gacanebe laanu órapeʼ caquiiñeʼ gúnibe ni. Ora rúninu ni ná íquenu ne ora gacaláʼdxinu guquíxenu ni gúnicabe laanu la? zusihuínninu qué gápanu respetu Jiobá.

18. ¿Xi cadi naquiiñeʼ guiaandaʼ laanu ora gábicabe laanu gúninu xiixa?

 ¹⁸ Gúninu guiráʼ ni cayabi Jiobá laanu tiempu riʼ. Ora riquiiñeʼ Jiobá organización stiʼ para gabi laanu xi naquiiñeʼ gúninu, nagueendaca naquiiñeʼ gúninu ni canábacabe laanu. Qué zacá íquenu gúninu ca cosa ca casi maca biaʼnu gúninu cani (Heb. 13:17). Ne laaca ziuʼnu cuidadu para cadi gúninu xiixa ni cadi cá lu Stiidxaʼ Dios (1 Cor. 4:6). Pa guzúʼbanu diidxaʼ la? zusihuínninu cadi cusaana de guidúʼyadxinu Jiobá.

19. ¿Xiñee qué zusaana de gaca xhamígunu Jiobá pur ni guni xcaadxi?

¹⁹ Cadi gudiʼnu lugar pur ni guni xcaadxi maʼ qué gaca xhamígunu Jiobá. Pa qué gusaana de guidúʼyadxinu Jiobá, qué zadxiichinu pur ni guni xcaadxi ne qué zusaana de gaca xhamígunu Jiobá. Cadi naquiiñeʼ guiaandaʼ ndiʼ ca hermanu ni napa xiixa responsabilidad ndaaniʼ organización stiʼ Dios cásica gupa Moisés. Guiranu naquiiñeʼ gúninu stipa pur guzúʼbanu stiidxaʼ Jiobá para ganda guilanu. Peru cadi guiaandaʼ laanu riáʼ laanu Jiobá ora runi juzgar laanu (Filip. 2:12). Mientra jma gápanu responsabilidad la? jma nadipaʼ zanabaʼ Jiobá cuenta laanu (Luc. 12:48). Pa nadxiinu Jiobá la? gastiʼ qué zusaba laanu ne gastiʼ qué zuxheleʼ laanu de laabe ne qué zusaana de gannaxhiibe laanu (Sal. 119:165; Rom. 8:37-39).

20. ¿Xi naquiiñeʼ guicá íquenu gúninu?

²⁰ Lu ca dxi jma nagana riʼ, cadi gusaana de guidúʼyadxinu Jiobá, Dios ni zuba lu trono ni nuu guibáʼ, ti gánnanu xi racaláʼdxibe gúninu. Cadi gudiʼnu lugar pur ni guni xcaadxi gusaana de gaca xhamígunu Dios. Ne qué chuʼ dxi guiaandaʼ laanu ni bizaaca Moisés. Lugar de guniná ni guni xcaadxi laanu la? guicá íquenu guyadxinu náʼ «Jiobá Dios stinu dede ora gacané laanu» (Sal. 123:1, 2).