Wan, nu awan tu rasonable nga makagafu, mabbuu tu hudisial nga komite base ta masikan nga ebidensia (circumstantial evidence) na seksual nga imoralidad.​—1 Cor. 6:18.

Usitakkan tu mapia na baggi na elder ira i kada situasion tapenu mammuan nu mepangngo i hudisial nga komite. Angngariganna: Egga kari i romantiko nga relasiodda? Natabarangngan ngana kari ira meyannung ta konduktada ta kataggi-tadday ta nappasa? Anni i rason nu ngatta tanga-gabi ira nga nakkavulu ta tadday nga balay nga ira laman? Pinlanoda kari nga kuan yatun? Egga kari paga i opsiodda tatun nga gannug, onu egga i rasonable nga makagafu, awayyana nga egga i ari inekspekta nga nesimmu onu egga i kurug nga emerhensia nga awan ngana tu tanakuan nga pappiliadda nu ari tanga-gabi nga makkavulu? (Ecl. 9:11) Sitaw ira nagidda? Megafu ta nadduruma i situasion, baka egga paga i tanakuan nga makoffun ira nga gannug nga ikonsidera na elder ira.

Kabalidda mala i mepangngo ira nga informasion, ammuan na baggi na elder ira nu kawagan i hudisial nga aksion ta kingnguada dua.