Ngeenge ova kala oufiku pamwe ovo aveke nopehe na etomheno la femba, osho oshi li oumbangi wa kola kutya ova haela. Onghee hano, kakele ngee ope na omatomheno a femba, opa pumbiwa okomitiye yopamhangu. — 1 Kor. 6:18.

Olutu lovakulunhuongalo ohali konakona noukeka onghalo keshe opo li tokole ngeenge opa pumbiwa okomitiye yopamhangu. Pashihopaenenwa: Mbela ovo inava hombolafana ova kala tava endelafana? Mbela ova pelwe nale omayele e na sha nanghee have lihumbatelafana? Mbela oshike she va ningifa va nangale meumbo limwe? Mbela ova kala nale va diladila okuninga ngaho? Mbela ova li tava dulu okuninga po sha, ile opa ningwa oshinima osho va li itava dulu okuninga po sha, ngaashi oshiningwanima ile oshinima shombadilila osho she va fiya vehe na osho tava dulu okuninga po kakele ashike kokunangala meumbo limwe? (Omuud. 9:11) Omalongekido okunangala okwa li a unganekwa ngahelipi? Molwaashi eenghalo oda yoolokafana, otashi dulika pe na oinima oyo ovakulunhuongalo tava ka konakona.

Konima eshi olutu lovakulunhuongalo la konakona ouyelele aushe, otali ka tokola ngeenge ovo inava hombola ova pumbwa okukatukilwa onghatu kokomitiye yopamhangu.