1, 2. (a) Wai ih waiz fi deh pahn Jehoava said? (b) Weh wi wahn stodi eena dis aatikl?

IH WAIZ fi hoal aan tu Jehoava. Nobadi moa powaful, waiz, er lovin dan fi wee Gaad! Wich wan a wi wudn waahn deh pahn fi hihn said? (Ps. 96:4-6) Sohntaim, eena sertn sichuwayshanz, som a Gaad servants kyaahn mek op dehn main if dehn wahn tek Jehoava said er nat.

² Eena dis aatikl, wi wahn diskos di egzampl a som a Gaad servants hoo mi klaym seh dehn deh pahn Jehoava said bot di saym taim mi-di du tingz weh hihn hayt. Dehnya egzampl wahn teech wi wai wi need fi stay laayal tu Jehoava wid aala wi haat.

3. Wai Jehoava mi chrai help Kayn, ahn weh Hihn mi tel ahn?

³ Tink bowt di egzampl a Kayn. Hihn mi wership Jehoava. Bot Jehoava neva aksep ih wership, bikaaz wikidnis mi don staat tu groa deep dong eena ih haat. (1 Jan 3:12) Soh Jehoava chrai help ahn. Jehoava tel ahn: “If yu du gud, yu noh tink Ah wahn bles yu? Bot if yu noh du gud, sin deh da yu doa an ih kyaahn wayt fi kanchroal yu; yoo tink yu ku kanchroal it?” (Gen. 4:6, 7) In ada werdz, Jehoava mi-di tel Kayn, “If yoo  feel sari fahn yu haat fi weh yu wahn du, ahn stan op pahn mai said, den Ai wahn deh pahn fi yoo said.”

4. Wen Jehoava mi gi Kayn di chaans fi deh pahn fi Hihn said, weh Kayn mi du?

⁴ Jehoava wuda mi aksep Kayn wership if ih mi karek di way ih mi-di tink. Bot Kayn neva lisn tu di kongsl. Bikaaz a weh ih mi-di tink ahn di selfish dizaiya ih mi gat eena ih haat, ih en op di du weh rang. (Jay. 1:14, 15) Wen Kayn da-mi wahn yong bwai, ih praabli neva tink ih mi wahn stan op gens Jehoava. Bot, dat da egzakli weh Kayn mi en op di du. Ih gaahn gens Gaad ahn kil ih oan breda!

5. Weh kaina tinkin ku mek wi looz wi rilayshanship wid Jehoava?

⁵ Jos laik Kayn, tudeh wi mait klaym seh dat wi di wership Jehoava bot stil di du tingz weh hihn hayt. (Jood 11) Wi mait deh pahn servis ahn goh da aala di meetin dehn, bot sayhn taim, di alow doti tinkin, greedinis, ahn haychrid fi kanchroal weh wi di tink bowt aal di taim. (1 Jan 2:15-17; 3:15) Dis kaina tinkin ku leed tu sinful akshanz. Ada peepl mait noh noa weh wi di tink bowt er noa weh wi di du, bot Jehoava si evriting. Ahn hihn noa if wi deh pahn fi hihn said wid aala wi haat.—Reed Jeremiah 17:9, 10. *

6. How Jehoava ku help wi geh kanchroal a wi sinful tinkin ahn dizaiya dehn?

⁶ Eevn wen wi mek mistayk, Jehoava noh kwik fi giv op pahn wi. If wee di hed tuwaadz spirichwal daynja, Jehoava inkorij wi: “Kohn bak tu mi, an Ai wahn kohn bak tu yoo.” (Mal. 3:7) Jehoava waahn wi stan op gens evriting weh hihn hayt, espeshali wen wi di schrogl wid wi oan weeknis dehn. (Isa. 55:7) If wi du dat, hihn wahn deh pahn fi wee said. Ih wahn gi wi di spirichwal, imoashanal, ahn fizikal schrent wi need fi kanchroal wi sinful tinkin ahn dizaiya dehn.—Gen. 4:7.

7. How Salaman mi looz ih rilayshanship wid Jehoava?

⁷ Wi ku laan wahn lat fahn di egzampl a King Salaman. Wen ih mi yong, Salaman mi luk tu Jehoava fi gaidans. Gaad mi giv ahn di privilij fi bil di byootiful templ da Jeroosalem. Bot Salaman mi looz ih frenship wid Jehoava. (1 Ki. 3:12; 11:1, 2) Gaad Laa mi seh dat wahn Heebroo king noh fi tek “lata waif fi ihself, soh dat ih haat [mait] noh schray weh.” (Deut. 17:17) Salaman neva lisn. Ih en op di marid 700 laydi ahn tek wahn nada 300 uman. (1 Ki. 11:3) Wahn lata ih waif dehn da neva Izrelait. Dehn mi wership faals gaadz. Soh, Salaman neva jos tek lata waif, ih disobay Gaad laa weh seh ih noh fi marid uman fahn ada nayshan.—Deut. 7:3, 4.

8. How bad Salaman mi sin gens Jehoava?

⁸ Lee bit bai lee bit, Salaman lef Jehoava raichos standadz. Dis mek ih mi en op di du sohn veri bad tingz. Ih mi bil wahn alta tu wahn uman gaad weh mi naym Ashtoret an at lees wan tu di faals gaad weh mi naym Keemosh. Den hihn an ih waif dehn wership dehndeh faals gaad da di alta dehn. Salaman mi eevn bil dehndeh alta pahn wahn mongtin fronta Jeroosalem, wehpaat ih mi bil di templ a Jehoava! (1 Ki. 11:5-8; 2 Ki. 23:13) Maybi Salaman mi tink dat if ih mi stil kantinyu fi aafa op sakrifais da di templ, Jehoava wuda ignoar di rang tingz weh ih mi-di du.

9. Weh hapm bikaaz Salaman ignoar Gaad waanin?

 ⁹ Jehoava noh ignoar sin. Di Baibl seh: “Jehoava mi geh beks bad wid Salaman, bikaaz ih haat mi schray weh fahn Jehoava . . . , hoo mi apyaa tu ahn too taimz ahn waan ahn bowt dis saym ting, dat ih noh fi goh afta di ada gaad dehn. Bot hihn neva obay di koman fahn Jehoava.” Bikaaz a dat, Jehoava rijek Salaman ahn stap sopoat ahn. Ih mi tek weh 10 a di 12 chraib a Izrel, ahn lef Salaman son dehn di rool oava di 2 chraib weh lef, ahn dehn mi sofa terabl prablemz fi yaaz afta dat.—1 Ki. 11:9-13.

10. Weh ku mek wi looz wi rilayshanship wid Jehoava?

¹⁰ Wi laan fahn Salaman egzampl dat wan a di bigis daynja tu wi spirichwaliti da frenship wid peepl hoo noh andastan ner rispek Jehoava standadz. Dehn mait bee bradaz ahn sistaz hoo goh da di meetin dehn, bot dehn spirichwali week. Er, ih ku bee wi relitiv, nayba, er peepl wi werk er goh da skool wid hoo noh wership Jehoava. Ih noh mata da hoo, if wi kloas frenz noh rispek Jehoava standadz, in taim dehn ku mek wi looz wi kloas rilayshanship wid Jehoava.

11. Weh ku help wi fi disaid if wi fi stap spen taim wid som a wi frenz?

¹¹ Reed 1 Korintyanz 15:33. Moas peepl ga nais wayz. Ahn wahn lata peepl hoo da noh Jehoava Witnisiz noh praktis bad tingz. If yoo ku seh dat bowt yu frenz, yu tink dat meenz dehn da gud kompni? Aks yuself how fi dehn frenship wid yoo wahn afek yu rilayshanship wid Jehoava. Dehn wahn mek ih geh schranga? Weh deh eena dehn haat? Fi egzampl, da weh dehn taak bowt moas a di taim? Da fashan, moni, di laytes ilekchranik divais, entataynment, er ada werli tingz? Dehn taak negitiv bowt adaz er tel doti joaks? Jeezas mi waan wi seh: “Wateva unu haat ful op wid, dat da weh wahn kom owta unu mowt.” (Mach. 12:34) If yoo noa dat di kompni yu kip ku mek yu looz yu frenship wid Jehoava, den du sohnting bowt it. Eeda yu kot bak pahn di amonk a taim yu spen wid dehn, er kot aaf da frenship aal tugeda.—Prov. 13:20.

12. (a) Weh Jehoava tel di Izrelait dehn rait afta dehn lef Eejip? (b) Weh di Izrelait dehn seh wen Gaad aks dehn fi bee laayal?

¹² Wi ku laan fahn weh mi hapm afta di Izrelait dehn mi lef Eejip. Di peepl mi gyada tugeda fronta Mongt Sainai. Pahn da mongtin, Jehoava shoa dehn dat hihn da wahn reel Gaad. Hihn mi du sohn mirakl. Ih mek wahn daak klowd apyaa. Ih mek dehn hyaa tonda ahn wahn lowd stedi naiz weh mi song laik  wahn haan. Ih mek dehn si laitnin ahn smoak tu. (Ex. 19:16-19) Den, Jehoava mi tel di Izrelait dehn dat hihn da ‘wahn Gaad weh ekspek dehn fi wership ahn wid aala dehn haat.ʼ Hihn mi pramis dehn dat ih wuda stay laayal tu dehn if dehn lov hihn an obay fi hihn komanment dehn. (Reed Exodus 20:1-6.) * In ada werdz, Jehoava mi-di tel dehn, “If unu deh pahn mai said, Ai wahn deh pahn fi unu said.” Weh yoo wuda du if Jehoava pramis yu dat? Yu wuda du egzakli weh di Izrelait dehn mi du. Dehn “ansa wid wan vais: ‘Evriting weh Jehoava seh, wee wilin fi du.ʼ” (Ex. 24:3) Bot, noh lang afta dat, sohnting hapm weh mi tes dehn laayalti.

13. Weh mi tes di laayalti a di Izrelait dehn?

¹³ Di daak klowd, di laitnin, ahn di ada miraklz mi fraitn di Izrelait dehn. Soh dehn aks Moaziz fi taak tu Gaad fi dehn. Moaziz mi agree fi du dis. Ih gaahn taak tu Jehoava pahn Mongt Sainai. (Ex. 20:18-21) Moaziz mi deh pahn di tap a di mongtin fi wahn lang taim. Yu tink di Izrelait dehn mi deh schrandid eena di wildanes wid nobadi fi leed dehn? Ih luk laik dehn onli mi ga fayt wen Moaziz mi deh wid dehn. Dehn staat tu looz dehn payshens ahn tel Ayron: “Mek wahn gaad fi wi, wan hoo wahn goh heda wi, bikaaz wi noh noa weh gaan aan wid disya Moaziz, di man hoo mi leed wi owta di lan a Eejip.”—Ex. 32:1, 2.

14. How di Izrelait dehn mi fool dehnself, ahn weh Jehoava mi du bikaaz dehn mi sin?

¹⁴ Di Izrelait dehn mi noa dat ih rang fi wership aidol. (Ex. 20:3-5) Bot stilyet dehn gaahn hed ahn wership wahn kyaaf weh mi mek owta goal! Dehn mi disobay Jehoava ahn yet dehn mi tink dat dehn mi stil deh pahn Jehoava said. Dehn onli mi-di fool dehnself, noh chroo? Ayron mi eevn kaal di kyaaf wership “wahn festival tu Jehoava”! How Jehoava mi feel wen ih si weh dehn mi-di du? Ih mi feel laik dehn mi bichray ahn. Jehoava tel Moaziz dat di peepl “mi korop dehnself” ahn “mi lef di way weh [Hihn] mi koman dehn fi goh.” Jehoava mi geh soh beks, dat ih mi waahn dischrai dehn.—Ex. 32:5-10.

15, 16. How Moaziz an Ayron mi shoa dat dehn mi deh pahn Jehoava said? (Koment pahn di picha da di biginin a dis aatikl.)

¹⁵ Jehoava da wahn Gaad a mersi. Soh ih disaid noh fi dischrai di Izrelait dehn. Ih gi dehn wahn chaans fi shoa dat dehn mi waahn deh pahn fi hihn said. (Ex. 32:14) Wen Moaziz si how di peepl di goh aaf fronta di aidol—di daans, di sing, ahn hala op—ih tek di aidol ahn krosh it op til ih ton tu loan dos. Den ih tel dehn: “Hoo deh pahn Jehoava said? Kohn ya!” Den, “aala di Leevait dehn gyada rong” Moaziz.—Ex. 32:17-20, 26.

¹⁶ Eevn doa Ayron mi help mek di aidol, ih mi ripent ahn jain di res a di Leevait pahn Jehoava said. Dehnya laayal Izrelait neva jos di tek said wid Jehoava, dehn mi-di separayt dehnself fahn di wan dehn weh mi-di du rang. Dat da-mi wahn waiz ting fi du kaaz laytaraan da  day, towznz a dehn mi looz dehn laif sayka dehn aidol wership. Bot Jehoava mi pramis di wan dehn weh mi deh pahn fi hihn said wahn blesin.—Ex. 32:27-29.

17. Weh Paal werdz bowt di kyaaf wership teech wi?

¹⁷ Weh wi ku laan fahn weh mi hapm tu di Izrelait dehn weh mi wership di kyaaf? Di apasl Paal mi seh: ‘Aala dehn ting hapm soh dat wee ku tek waanin ahn noh wership aidol laik weh som a dehn mi du. Aala dis don rait dong eena di Skripcha fi waan wi, kaa wee di liv eena di laas dayz. Soh, if eni wan a unu tink seh unu di stan op schrang, unu beta kyaaful dat unu noh faal dong.ʼ (1 Kor. 10:6, 7, 11, 12) Laik weh Paal mi seh, eevn peepl weh di wership Jehoava ku get involv eena praktis weh rang. Bradaz er sistaz weh giv een tu temtayshan mait tink dat dehn stil ga wahn gud standin wid Jehoava. Bot noh bikaaz wi waahn bee Jehoava fren er seh wi laayal tu hihn meen dat Jehoava pleez wid wi.—1 Kor. 10:1-5.

18. Weh ku kaaz wi fi jrif weh fahn Jehoava, ahn weh wahn bee di rizolt?

¹⁸ Di Izrelait dehn mi geh taiyad a wayt pahn Moaziz. Dehn mi tink dat ih mi-di tek tu lang pahn di mongtin. Jos laik dat, wi mait geh taiyad a wayt fi Jehoava day ahn fi Paradais. Wi mait tink dat ih haad fi bileev eena dehnya pramis, er dat dehn noh wahn kohn chroo til way eena di fyoocha. If wi noh karek dis kaina tinkin, wi ku staat tu goh afta mateeryal tingz insteda du di wil a Jehoava. In taim, wi ku eevn jrif weh fahn Jehoava an en op di du tingz weh wi wudn tink bowt du wen wi mi spirichwali schrang.

19. Wat impoatant chroot wi noh fi faget, ahn wai?

¹⁹ Wi shuda neva faget dat Jehoava ekspek wi fi obay ahn eena evriting an serv ahn wid aala wi haat. (Ex. 20:5) If wi jrif weh fahn Jehoava wership, wi ku en op di du weh Saytan waahn wi du ahn dat wahn leed tu prablemz. Dats wai Paal seh: ‘Yu kyaahn jrink di wain fahn di kop weh di Laad gi ahn jrink fahn di kop weh peepl don yooz fi wership di deemonz wid. Sayhn way, yu kyaahn eet ahn ga paat eena di Laad taybl ahn di taybl a di deemon dehn.ʼ—1 Kor. 10:21.

20. How Jehoava help wi eevn wen wi mek wahn mistayk?

²⁰ Di Baibl egzampl a Kayn, Salaman, ahn di Izrelait dehn da Mongt Sainai ga sohnting in kaman. Aala dehn mi ga wahn chaans fi ‘ton fahn dehn sinz ahn ton tu Gaad.ʼ (Aks 3:19) Dat teech wi dat Jehoava noh kwik fi giv op pahn sombadi weh du sohnting rang. Tink bowt how Jehoava mi fergiv Ayron. Tudeh, Jehoava waan wi chroo di difrent egzampl dehn eena fi hihn Werd, wi poblikayshan dehn, er kain advais fahn wahn brada er sista. Wen wi lisn tu dehnya waanin, wi ku bee shoar dat Jehoava wahn shoa wi mersi.

21. Weh wi fi du wen eniting tes wi laayalti tu Jehoava?

²¹ Jehoava mersi ga wahn perpos. (2 Kor. 6:1) Ih mersi gi wi di chaans ‘fi giv op di plezha a dis werlʼ ahn liv fi Gaad insted. (Reed Taitos 2:11-14.) Az lang az wi liv eena dis sistem a tingz, wi wahn fays difrent sichuwayshan weh tes wi laayalti tu Jehoava. Mek wi aalwayz bee redi fi stan op pahn Jehoava said. Bikaaz ‘Jehoava da wi Gaad, da hihn wi fi serv ahn da hihn wi fi hoal aan tuʼ!—Deut. 10:20.