1, 2. a) Ka uagu súdini lubéi lun luéigiñe wamá lóubadina Heowá? b) Kaba wakutiha lidan arütíkulu le?

ÚATI amu gabafutimati, chútimaati aau ani hínsiñehabuti luéi Bungiu. Ligía súdini lubéi lun úaragua wamá lun luma lun luéigiñe wamá lóubadina (Sal. 96:4-6). Íbini ítara, añahein hádangiñe lubúeingu Heowá adügatiña katei mabuidunti dan le lunti lan yebe houdin luéigiñe lóubadina.

² Lidan arütíkulu le, wakutihaba hénpulu hawaguti gürigia ha meha ariñagubaña luéigiñeñanu lan lóubadina Heowá ani hadaaguña meha katei le auti magundan lan. Gayaraati wafurendeirun saragu katei súdiniti lídangiñe burí sügǘ le le gayaraabei líderaguniwa lun úaragua wamá lun Heowá.

3. Ka uagu leweridirei Heowá Kaín, ani ka lariñagubei lun?

³ Ariha waméi le asuseredubei lun Kaín. Masaminarunti meha áhuduragua lan lun amu bungiu luéidügü lun Heowá. Lau sun lira, magundanti meha Heowá lau ligaburi láhuduragun lun ladüga arihati meha katei wuribati tidan lanigi (1 Huan 3:12). Ligía lariñagunbei Heowá lun Kaín: “Lun hamuga badügüni le buídubei, gayaraabei yebe biñuruni bigibu; gama lumoun kei madügün bani, lagurabahaña figóu lun lagumadirunibu. Lau sun  lira gayaraati buguya lan agumadirei” (Agu. 4:6, 7). Lidan amu dimurei, lariñaguña meha Heowá lun anhein lan asaküriha ñüdün ligía luéigiñe lóubadina gamadaguabei lan meha Heowá luma.

4. Ka ladügübei Kaín dan le libihinbalin chansi lun luéigiñe lan lóubadina Heowá?

⁴ Anheingubeirügü meha lasansira Kaín ligaburi lisaminan ítara luba meha lagundaarunya Heowá lau. Gama lumoun, madügünti gasu lau ladundehan Heowá. Adügati luriban saminaü luma layumahan katei mabuidunti lun ladügüni le wuribabei (Sant. 1:14, 15). Saminati funa san Kaín dan meha le nibureingili luagu lachülürüba lan dan lun lagarabaagun luagu Bungiu? Másiñati masaminarun lani. Gama lumoun, lau lásügürün dan, aba ladügüni le magurabunbei: aba lebedaagun lun Bungiu ani aba láfaruni lamulen hilagubei.

5. Ka luwuyeri saminaü gayaraabei ladügün lun weferidiruni lugundan Heowá?

⁵ Ítara kei Kaín, gayaraati lariñagun aban kristiánu láhuduraguña lan lun Heowá ani aniha adüga katei wuribati (Hud. 11). Másiñati apurichiha lan saragu ñüdün ligía adamuridagua, gama lumoun, lasaminaruña giñe luagu katei lánina magíaguni, layumahaña libihin irisini o íbini liyereeguduña lan somu íbiri lun (1 Huan 2:15-17; 3:15). Gayaraati ladügün katei burí le lun lafigouhan. Másiñati ibidiñe lan houn amu le wasaminarubei o le wadügübei, ánheinti Heowá ariha lumuti sun katei ani subuditi lun anhein le lan lúgubu luéigiñeñadiwa lubéi lóubadina (aliiha huméi Heremíasi 17:9, 10).

6. Ida liña líderaguniwa Heowá lun wárügüdagun woungua luéi figóu?

⁶ Lau sun lira, marihin lumutiwa Heowá keisi gürigia maranihaaña. Anhein ariha wadiseduña lan luéi agunbiraha lumutiwa lau dimurei le: “Giribu humá nun, ábame nagiribudun hun!” (Mal. 3:7). Busenti lun wararamun lun wuribani dántima le wageindaguña lan luma wadebilin (Isa. 55:7). Ánhawa adügei lira, líderagubadiwa ani líchugubei erei le wemegeirubei woun lun méiguadun wamá lidoun figóu (Agu. 4:7).

7. Ida liña lagadeiruni Salomón lumadagua luma Heowá?

⁷ Gayaraati wafurendeirun saragu lídangiñe le ladügübei urúei Salomón. Dan meha le nibureingili, áluaha lumuti ladundehan Heowá, ábati líchugun lichú aau lun ani ariñagati lun lun lábunagun aban tubuidun ténpulu Herusalén (1 Uru. 3:12; 11:1, 2). Ariñagati meha Lilurudun Bungiu moun lumuti lan hamarieidun urúeigu ebüréuna hama saragu würiña luéi legeyedunu katei le hanigi (2 Lur. 17:17). Gama lumoun, maganbaditi meha Salomón lun Bungiu ani lau lásügürün dan aba lamarieidun hama 700 würiña ani aba lanügün 300 hanwoun lun linounnagume (1 Uru. 11:3). Saragu hádangiñe mama meha ísüraelina ani huduguatiña meha houn búngiugu mama inarünitiña. Ligíati, maganbaditi meha Salomón lun lilurudun Bungiu le ariñagubei siñá lan hamarieidun ísüraelina hama würiña terenchana (2 Lur. 7:3, 4).

8. Darí halía lébeda ladüraaguni Salomón lilurudun Heowá?

⁸ Murusun murusun, aba eferidireina lani Salomón línsiñehabu luagu lilurudun Bungiu ani aba ladügün katei wuribati. Aba ladügün aba latarü tun bungiu Asütárüte lúmaya amu lun bungiu mama inarüniti Kemosu. Ñein lúarada hama lánigu weiriou lidan áhuduraguni mama inarüniti. Mabusigariti ani aba ladügüni latarü burí ligía luagu wübü le ligibugiñebei Herusalén, uburugu ñein lubéi lábunaguoun litenpulun Heowá (1 Uru. 11:5-8; 2 Uru. 23:13). Másiñati aba lan leyeedagun lungua lau lasaminarun meberesenbei  lan Bungiu lau lumaganbadin adügarügaali ligía sákürifisiu ténpulurugu.

9. Ka asuseredubei ladüga lumaganbadin Salomón lun leweridihan Bungiu?

⁹ Gama lumoun, másügürangüdün lumuti Heowá figóu ítaraguarügü. Ariñagatu Bíbülia: “Aba lagañidun Aburemei lun Salomón ladüga ladireirun luéi lárigiñe buga arufudaguaali lan lungua lun bián wéiyaasu ariñaga ligía lun lun máhuduragun lan houn amu búngiugu. Gama lumoun madügünti gasu lau le lariñagubei Aburemei lun”. Ligía aba lubéi magundanhali lan meha Bungiu lau ani míchugun ligía ídemuei lun. Ábati lafareinragun larúeihan Ísüraeli lidan biama, ligíati, marúeihantiña ladügawagun Salomón luagu sun ageiraü ani súfuritiña saragu luagu saragu dan (1 Uru. 11:9-13).

10. Ka gayaraabei ladügün lun wagadeiruni wamadagua luma Heowá?

¹⁰ Ítara kei likesin Salomón, aban lídangiñe katei le denchatimabei lun wamadagua luma Bungiu gamadagua wamá hama ha úati gunfuranda hamani lilurudun o menebenehabutiña lun. Másiñati lílana lan damuriguaü fiu hádangiñe ha débiliti hamadagua luma Heowá. Gayaraati giñe waduheñu hamá hádangiñe, wabesinanigu o wapanaagu lidan wadagimanu o leskuelarugu ha meseriwiduntiña lun Bungiu. Le linarün katei, anhein mineben lubéi lilurudun Bungiu houn gayaraati hadügün lun wagadeiruni wamadagua luma Heowá.

11. Ka gayaraabei líderaguniwa lun desidírü wamá anhein lunti lubéi wadüraaguni wamadagua luma somu gürigia?

¹¹ (Aliiha huméi 1 Korintuna 15:33). Hiibe-agei gürigia buiti hagaburi ani mama sun ha mámabaña Gefentiña adügatiña katei wuribati súnwandan. Anhein gamadagua wabéi hama gürigia ha ítaratiña, wariñaguña hamuga san buidu lan umadaguaü ligía? Lunti wálügüdagun woungua anhein ladügüba lubéi gamadagua wamá hama lun buídutima lan wamadagua luma Heowá. Samina wamá luagu le tídanbei hanigi. Kei hénpulu, luágutima san katei létima iseribei lidan tuáguti daüguaü hayanuha luma luagu isebáhari, seinsu, gágamuru, konputadora luma amu burí umegeguni? Hínsiñeti san houn hayanuha wuriba hawagu amu o lun habahüdagun bulagiadi? Ariñagati Hesusu: “Katei le buinbei tidan anigi, ligía lariñagubei iyumaü” (Mat. 12:34). Ligíati, ánhawa íchiga fe gayara lan ladügün gamadagua wamá luma somu gürigia lun wagadeiruni wamadagua luma Heowá másügüra wamá saragu dan luma ani anhein mégeiwa, dürügua waméi umadaguaü ligía (Ari. 13:20).

12. a) Ka lariñagubei Heowá houn ísüraelina murusun dan lárigiñe háfuridun Ehiptugiñe? b) Ida liña hóunabun ísüraelina dan le lariñagubei Heowá houn lúnrügüba lan háhuduragua?

¹² Gayaraati giñe wafurendeirun saragu lídangiñe le asuseredubei murusun dan  lárigiñe háfuridun ísüraelina Ehiptugiñe. Dan le hachülürünbei ligibugiñe wübü Sinaí aba larufuduni Heowá houn lau aban milaguru ñeinñein lan hama. Aba tasaliragun aban dúeri búrigati, ñeinñein labirihaniga, wayuhuru, gumuleli ani aba laganbúniwa tinwinrúniwa fidu le héreti (Afu. 19:16-19). Ñein lariñaga Heowá houn ísüraelina aba lan “Bungiu emeiditi” ligía. Chóurugüda lumuti giñe houn úaraguabei lan hama ha hínsiñehabutiña lun gaganbadi hagía lun lugumadin (aliiha huméi Áfuriduni 20:1-6). Lidan amu dimurei, lariñaguña meha houn ánhaña lan ñüdün luéigiñe lóubadina gamadaguabei lan hama. Lun hamuga ñein wamá oura ligía, ida luba hamuga wóunabun lun füramasei le? Chóuruti wóunabuba lan kei hóunabun ísüraelina. Ariñagatu Bíbülia: “Aba hóunabun súngubei: —Wadügübei sun le lariñagubei Wabureme!” (Afu. 24:3). Gama lumoun, murusun dan lárigiñe, aba lóuchawagun úaraguni le hawagubei lidan aban igaburi le magurabun hamuti.

13. Ka sügǘ arufudubalin múaragun hamá ísüraelina lun Heowá?

¹³ Aba hanufudedagun ísüraelina dan le harihinbalin dúeri búrigati, labirihaniga luma líbiri katei le arufudubalin lubafu Bungiu. Ligía hamuriahanbei luma Moisesi lun ligíaba lan ayanuha luma Heowá (Afu. 20:18-21). Ábati lamudeirun Moisesi luagu wübü Sinaí ani rédeiti ñein luagu saragu dan. Kei úa lubéi meha hábuti hama le uágubei hafiñera, lunti meha san hasaminarun chagawaña lan? Genegeti derebugutima lan meha hafiñen dan le ñein lan Moisesi hama. Aba heferidiruni haguraasun, ábati hariñagun lun Aarón: “Adügabá búngiugu woun lun hadundehaniwa, lugundun ibidiñeti woun ka lan suserebei lun Moisesi le asagarubaliwa Ehiptugiñe” (Afu. 32:1, 2).

14. a) Ida liña heyeedagun ísüraelina houngua? b) Ida liña larihini Heowá le hadügübei?

¹⁴ Subudi hamuti meha ísüraelina figóu lan wéiriti láhudurawagun houn guáriua (Afu. 20:3-5). Íbini ítara, másügürünti saragu dan aba háhuduragun lun aban bágasu lauti golu. Subuditi meha houn maganbadi hamá lun Bungiu, lau sun lira, aba heyeedagun houngua ani saminatiña luéigiñeñanu lan lóubadina Heowá. Íbini Aarón ariñagati hefeduhaña lan meha lun Heowá. Gama lumoun, aba lasandiragun Bungiu lungua garabaguaaña lan lun. Aba lariñagun lun Moisesi rúguaaña lan ísüraelina houngua lidoun féridiguaü ani ígira hamaali lan üma le uágubei lariñaga houn lun hafalaruni. Aba lagañidun Heowá hama darí lun lasaminarun lagumuchun lau néchani ligía (Afu. 32:5-10).

15, 16. Ida liña larufuduni Moisesi luma Aarón luéigiñeñanu lan lóubadina Heowá? (Ariha huméi dibuhu le lídanbei lagumeseha arütíkulu).

¹⁵ Kei gudemehabu lan Heowá, magumuchunti hau ísüraelina hagía. Aba líchugun chansi houn ha úaraguabaña lun lun houdin luéigiñe lóubadina (Afu. 32:14). Dan le larihinbei Moisesi añahán lan gürigia abinaha, eremuha ani agúaraha ligibugiñe bágasu lauti golu, aba lamuligiduni darí lun ladügüni kalikime. Lárigiñe aba lariñagun: “Ha lúmagiñebaña Bungiu ñübuin hamá numoun”. Ábati houdin sun lewitagu lumoun (Afu. 32:17-20, 26).

¹⁶ Íbini Aarón lan adügübalin guáriua, asakürihati lárigiñe ani aba lidin luéigiñe lóubadina Heowá úara hama ha híbiri lewitagu. Mámarügü ñǘdünrügütiña wügüriña ha luéigiñe lóubadina Heowá, aba giñe hafanreinragun hawéi ísüraelina ha múaragunbaña. Buiti meha le hanúadirubei hadügün lugundun weyuméme ligía hilaguatiña saragu milu ísüraelina ladüga háhuduragun lun aban bungiu mama inarüniti. Hati ñǘdünbaña luéigiñe lóubadina Heowá füramasewati houn habinirúba lan (Afu. 32:27-29).

17. Ka wafurendeirubei lídangiñe le lariñagubei Pábulu luagu le asuseredubei dan le hadügünbalin ísüraelina bágasu lauti golu?

 ¹⁷ Ayanuhati Pábulu luagu bágasu lauti golu le hadügübei ísüraelina ani eweridihati: ‘Sun le asuseredubei houn, aban hénpulu woun, lun máhuduragun wamá houn guáriua kei meha hadüga fiu hádangiñe’. Lárigiñe aba lariñagun: “Aba labürüdǘn tidan Lererun Bungiu keisi arufudahani woun, wagía le wínwanbei lidan lagumuhóun dan le. Le lubeiti haritaguabei luagu deregüdagua lan léibugun luma Bungiu, góunigila, ábürühadügüliñein” (1 Ko. 10:6, 7, 11, 12). Kei aubei lariñagei Pábulu, íbini ha áhuduragubaña lun Bungiu gayaraati hagumeserun adüga katei wuribati. Ha éiguadubaña lidoun óuchawaguni, másiñati samina hamá gundamémegili lan Heowá hau. Gama lumoun, láurügü busén lan aban gürigia lun lumada lan Bungiu o lau lariñagun úaragua lan lun mama súnwandan mini lan le gunda lan Heowá lau (1 Ko. 10:1-5).

18. Ka gayaraabei ladügün lun wadisedun luéi Heowá, ani ida luba lidin woun anhein wadüga?

¹⁸ Kei aubei warihei, aba heferidiruni ísüraelina haguraasun dan le harihinbei darasaguali lan lararirun Moisesi luéigiñe wübü Sinaí. Ítarameme, gayaraati giñe weferidiruni waguraasun ladüga genege lan darasaguali lan luéyuri Heowá luma iseri ubóu. Másiñati samina wamá mégeigili lan saragu dan lubá lagunfulirun füramase burí le o hanarime lan lubuidun lun inarüni lan. Ánhawa móunigiragun woungua luéi ligaburi saminaü le gayaraabei ladügün lun wasaminarun wawouguoun lubaragiñe hamuga wadügüni lugundan Bungiu. Lau lásügürün dan, gayaraati ladügün katei le lun wadisedun luéi Heowá luma lun wadügün katei le yebe masaminarun wabéi wadügün.

19. Ka inarüni méiniti moun lumuti wabulieiduni, ani ka uagu?

¹⁹ Moun lumuti wabulieiduni amuriaha lan Heowá wama súnwandan lun gaganbadi wamá lun luma lun lúnrügü lan wáhuduragua (Afu. 20:5). Anhein mama lubéi wadügüñein lugundan Heowá wadügüñein lugundan Satanási ani lidounrügüba günringuaü lanügawa katei le. Ligía lariñagunbei Pábulu woun: “Siñati hatun lídangiñe likopun Heowá ǘnhame ata lídangiñe hakopun máfianu. Siñati giñe heigin luagu lidabulan Heowá ǘnhame eiga luagu hadabulan máfianu” (1 Ko. 10:21, TNM).

20. Ida luba gayara lan líderaguniwa Heowá íbini dan le wachararun?

²⁰ Genegeguati abahüdaguni luáguti Kaín, Salomón luma hawaguti ísüraelina lidan aban igaburi. Sun hagía gachansintiña meha lun hasakürihan luma lun hasansiruni hagaburi (Adü. 3:19). Furanguti míchugun lániña Heowá ha achararubaña kei féridihaña. Haritagua waméi feruduna lani Aarón. Uguñe weyu, gayaraati leweridiruniwa Heowá lau layusurun abahüdaguni tídangiñeti Bíbülia, agumeiraguagüdüni o dan le líchugun aban íbiri adundehani woun lau ínsiñehabuni. Dan le gaganbadi wamá lun leweridihan Heowá chouru wamuti gudemehabubei lan woun.

21. Ka lunbei wadügüni dan le wóuchawagun lun múaragun wamá lun Heowá?

²¹ Gébunati lugudemehabu Heowá (2 Ko. 6:1). Ru lumuti chansi woun “lun wígiruni wuribani luma igaburi lánina ubóu” (aliiha huméi Titu 2:11-14). Sunme wawinwanduña lan “lidan dan le” wagagibudaguba luma sügǘ le gayaraabei lóuchaguni wáhuduragun lun Bungiu. Áfaagua wamá lun aranseñu wamá súnwandan lun luéigiñe wamá lóubadina Heowá lugundun lúnrügüba wáhuduragua, lunti inebe lan woun úaragua wagíame lun (2 Lur. 10:20).