1, 2. (a) Mɛni hewɔ nilee yɔɔ mli akɛ wɔbaahi Yehowa gbɛfaŋ lɛ? (b) Mɛni he wɔbaasusu yɛ nikasemɔ nɛɛ mli?

NILEE yɛ mli akɛ wɔbaakpɛtɛ Yehowa, wɔ-Nyɔŋmɔ lɛ he. Mɔ ko mɔ ko bɛ ni yɔɔ hewalɛ, loo ehiɛ kã shi, loo eyɔɔ suɔmɔ fe lɛ! Wɔ fɛɛ wɔmiisumɔ ni wɔye lɛ anɔkwa ni wɔhi egbɛfaŋ, aloo jeee nakai? (Lala 96:4-6) Kɛ̃lɛ, Nyɔŋmɔ tsuji komɛi eyafeee nakai.

² Yɛ nikasemɔ nɛɛ mli lɛ, wɔbaasusu mɛi komɛi ni kɛɛ amɛyɛ Yehowa gbɛfaŋ shi amɛfee nibii ni enáaa he miishɛɛ lɛ ahe. Saji ni wɔbaakase yɛ amɛhe lɛ baaye abua wɔ ni wɔye Yehowa anɔkwa yɛ nɔ fɛɛ nɔ mli.

3. Mɛni hewɔ Yehowa bɔ mɔdɛŋ akɛ ebaaye ebua Kain lɛ? Ni mɛni ekɛɛ Kain?

³ Susumɔ Kain sane lɛ he okwɛ. Kain jáaa amale nyɔŋmɔi. Fɛɛ sɛɛ lɛ, Yehowa náaa Kain he miishɛɛ. Mɛni hewɔ? Ejaakɛ Yehowa na akɛ Kain tsui mli tseee. (1 Yoh. 3:12) Yehowa bɔ mɔdɛŋ akɛ ebaaye ebua Kain. Ekɛɛ lɛ akɛ: “Kɛji otsake ni ofee ekpakpa lɛ, ani ohiɛ baŋ nyam? Shi kɛji otsakeee ni obaafee ekpakpa lɛ, esha bu shinaa lɛ shi, ni eetao eye onɔ;  shi bo lɛ, ye enɔ.” (1 Mo. 4:6, 7) Yɛ gbɛ ko nɔ lɛ, Yehowa kɛɛ Kain akɛ, “Kɛ́ otsake otsui ni oye mi anɔkwa lɛ, mi hu maye bo anɔkwa.”

4. Be ni Kain ná hegbɛ ni ekɛbaatsɔɔ akɛ eyeɔ Yehowa anɔkwa lɛ, mɛni efee?

⁴ Yehowa hã Kain le akɛ, ja etsake etsui dani ehiɛ baaba nyam yɛ ehiɛ. Shi Kain booo ŋaa ni Yehowa wo lɛ lɛ toi. No hewɔ lɛ, susumɔ fɔŋ kɛ shwelɛ fɔŋ ni ená akɛ ebaafee nɔ ni lɛ diɛŋtsɛ esumɔɔ lɛ ná enɔ hewalɛ ni efee esha. (Yak. 1:14, 15) Eeenyɛ efee akɛ, be ni Kain ji gbekɛ lɛ, ebaaa ejwɛŋmɔŋ kɔkɔɔkɔ akɛ be ko baashɛ ni ebaatse Yehowa hiɛ atua. Shi nakai pɛpɛɛpɛ efee lɛ. Etse Nyɔŋmɔ hiɛ atua, ni egbe lɛ diɛŋtsɛ enyɛmi, Habel!

5. Mɛni baanyɛ ahã Yehowa hiɛ dromɔ aŋmɛɛ wɔ?

⁵ Ŋmɛnɛ lɛ, Kristofoi komɛi feɔ amɛnii tamɔ Kain. Amɛkɛɔ akɛ amɛmiijá Yehowa, shi yɛ nakai beiaŋ nɔŋŋ lɛ, amɛmiifee nibii ni Yehowa nyɛɔ. (Yuda 11) Ekolɛ amɛyaa shiɛmɔ kɛ asafoŋ kpeei daa, shi yɛ nakai beiaŋ nɔŋŋ lɛ, akɔnɔi fɔji, hiɛkɔ̃ɔ, kɛ hetsɛ̃ eyi amɛtsuiŋ obɔ. (1 Yoh. 2:15-17; 3:15) Kɛ́ mɛi ni tamɔ nɛkɛ lɛ ejieee susumɔi fɔji nɛɛ kɛjeee amɛtsuii amli lɛ, ebaanyɛ ehã amɛfee esha. Adesai krokomɛi enaaa wɔtsuiŋ, ni ekolɛ amɛleee nibii fɛɛ ni wɔfeɔ. Shi Yehowa le fɛɛ. Ele mɛi ni jɛɔ amɛtsuiŋ fɛɛ amɛjáa lɛ lɛ kɛ mɛi ni efeee nakai lɛ.​—Kanemɔ Yeremia 17:9, 10.

6. Kɛ́ wɔhi Yehowa masɛi lɛ, mɛni ebaafee kɛwa wɔ koni wɔnyɛ wɔye akɔnɔi fɔji anɔ?

⁶ Kɛ́ wɔtɔ̃ po lɛ, Yehowa kpooo wɔjeŋ ehãaa wɔ oya nɔŋŋ. Moŋ lɛ, etoɔ etsui shi ehãa wɔ. Kɛ́ wɔkɔ gbɛ ko ni ehiii lɛ, Yehowa kɛɔ wɔ akɛ: “Nyɛkua nyɛsɛɛ kɛbaa miŋɔɔ, ni mi hu maku misɛɛ kɛba nyɛŋɔɔ.” (Mal. 3:7) Yehowa le akɛ wɔyɛ gbɔjɔmɔi ni esa akɛ wɔwu wɔshi, ni eesumɔ ni wɔnyɛ efɔŋ. (Yes. 55:7) Kɛ́ wɔfee nakai lɛ, lɛ hu ebaahi wɔmasɛi. Ebaaye ebua wɔ ni ebaawaje wɔ yɛ gbɛ fɛɛ gbɛ nɔ koni wɔnyɛ wɔye akɔnɔi fɔji anɔ.​—1 Mo. 4:7.

7. Mɛni hewɔ Solomon kɛ Yehowa teŋ fite lɛ?

⁷ Be ni Solomon ji oblanyo lɛ, wekukpaa kpakpa yɛ ekɛ Yehowa teŋ. Anɔkwa, Nyɔŋmɔ hã ehiɛ kã shi waa, ni ehã lɛ hegbɛ kpele akɛ ema sɔlemɔ shĩa fɛfɛo ehã lɛ yɛ Yerusalem. Shi sɛɛ mli lɛ, Solomon kɛ Yehowa teŋ fite. (1 Maŋ. 3:12; 11:1, 2) Te eba lɛ tɛŋŋ? Yɛ Mla ni Nyɔŋmɔ kɛhã Israelbii lɛ mli lɛ, ekɛɛ akɛ amɛmaŋtsɛmɛi lɛ ‘akaŋɔ ŋamɛi pii amɛhã amɛhe,’ kɛjeee nakai lɛ, ‘amɛtsui baagbá afã.’ (5 Mo. 17:17) Shi Solomon yeee mla nɛɛ nɔ. Ekɛ yei 700 sɔŋŋ bote gbalashihilɛ mli, ni ená hemɛi 300. (1 Maŋ. 11:3) Yei ni Solomon kɛbote gbalashihilɛ mli lɛ ateŋ mɛi babaoo jeee Israelbii ni amɛjáa amale nyɔŋmɔi. No hewɔ lɛ, eyeee Nyɔŋmɔ mla ni kɛɔ akɛ esaaa akɛ akɛ maŋsɛɛ yei boteɔ gbalashihilɛ mli lɛ hu nɔ.​—5 Mo. 7:3, 4.

8. Mɛɛ eshai ni yɔɔ hiɛdɔɔ Solomon fee kɛwo Yehowa mli la?

⁸ Fiofio lɛ, suɔmɔ ni Solomon yɔɔ kɛhã Yehowa mlai lɛ he bajɔ kwraa, ni efee eshai ni yɔɔ hiɛdɔɔ. Ema afɔleshãa latɛi ehã Ashtoret kɛ Kemosh, ni ekɛ eŋamɛi lɛ fee ekome kɛjá amale nyɔŋmɔi nɛɛ. Solomon náaa he ko he ko ni ebaama afɔleshãa latɛi nɛɛ yɛ, akɛ ja yɛ gɔŋ ko ni yɔɔ Yerusalem, he ni ema Yehowa sɔlemɔ shĩa lɛ yɛ lɛ hiɛ tuuntu lɛ nɔ! (1 Maŋ. 11: 5-8; 2 Maŋ. 23:13) Ekolɛ Solomon susu akɛ kɛ́ etee nɔ eshã afɔlei yɛ sɔlemɔ shĩa lɛ, Yehowa baaku ehiɛ efɔ̃ etoigbele lɛ nɔ.

9. Be ni Solomon gbo Nyɔŋmɔ nɔ toi lɛ, mɛni jɛ mli kɛba?

⁹ Shi Yehowa enaaa esha akɛ ejeee nɔ ko. Biblia lɛ kɛɔ akɛ: “Yehowa mli fu Solomon ejaakɛ etsui etsi ehe kɛje Yehowa . . . he, mɔ ni jie ehe kpo etsɔɔ lɛ shii enyɔ ni ebɔ lɛ kɔkɔ yɛ nɛkɛ sane nɛɛ nɔŋŋ he akɛ, ekayanyiɛ nyɔŋmɔi krokomɛi asɛɛ lɛ. Shi eyeee Yehowa famɔ lɛ nɔ.” Nɔ ni efee lɛ hewɔ lɛ, Nyɔŋmɔ kwa lɛ ni eyeee ebuaaa lɛ dɔŋŋ. Solomon seshibii lɛ yeee Israel maŋ muu lɛ fɛɛ nɔ dɔŋŋ, ni amɛna amane afii ohai abɔ.​—1 Maŋ. 11:9-13.

10. Mɛni baanyɛ afite wekukpaa ni yɔɔ wɔ kɛ Yehowa teŋ lɛ?

¹⁰ Tamɔ bɔ ni wɔna yɛ Solomon sane lɛ mli lɛ, kɛ́ wɔkɛ mɛi ni ehiii shi yɛ Yehowa mlai kɛ eshishitoo mlai anaa lɛ bɔ naanyo lɛ, amɛbaanyɛ amɛfite wɔ kɛ Yehowa teŋ. Mɛi nɛɛ ateŋ mɛi komɛi baanyɛ afee nyɛmimɛi ni hiɛ edɔɔɔ yɛ Yehowa sɔɔmɔ lɛ mli, ni amɛteŋ mɛi komɛi hu baanyɛ afee wɔwekumɛi, wɔkutsoŋbii, loo mɛi ni wɔkɛtsuɔ nii loo wɔkɛyaa skul ni sɔmɔɔɔ Yehowa. Bɔ fɛɛ bɔ ni sane lɛ ji lɛ, kɛ́ wɔkɛ mɛi ni kuɔ amɛhiɛ amɛshwieɔ Yehowa mlai kɛ eshishitoo mlai anɔ lɛ bɔ lɛ, fiofio lɛ, amɛbaanyɛ amɛfite wekukpaa ni yɔɔ wɔ kɛ Nyɔŋmɔ teŋ lɛ.

11. Mɛni baaye abua bo ni ona mɛi ni esa akɛ okɛbɔ naanyo?

¹¹ Kanemɔ 1 Korintobii 15:33. Mɛi pii jieɔ sui kpakpai komɛi akpo, ni jeee be fɛɛ be mɛi ni bɛ asafo lɛ mli lɛ baaa amɛjeŋ jogbaŋŋ. Ekolɛ oyɔse akɛ nakai mɛi ni okɛsharaa lɛ hu yɔɔ. Shi ani no tsɔɔ akɛ obaanyɛ okɛ amɛ abɔ naanyo? Ani amɛbaanyɛ amɛhã wekukpaa ni yɔɔ okɛ Yehowa teŋ lɛ mli awa? Ani ole amɛtsuiŋ? Mɛɛ nibii ahe amɛnyaa waa? Akɛ nɔkwɛmɔnɔ lɛ, mɛni amɛfɔɔ he wiemɔ? Ani amɛfɔɔ nibii tamɔ shika, atadei, kɔmpiutai, foŋ, kɛ tablɛti hei ni eba nɔ, kɛ nibii krokomɛi ni tamɔ nakai lɛ ahe wiemɔ? Ani amɛwieɔ mɛi ahe nyanyaanya? Ani amɛwieɔ yakayaka wiemɔi kɛyeɔ fɛo? Yesu wie akɛ: “Nɔ ni eyi tsui lɛ obɔ kɛteke nɔ lɛ, no naabu lɛ wieɔ.” (Mat. 12:34) Kɛ́ ona akɛ mɛi ni okɛbɔɔ lɛ baanyɛ afite okɛ Yehowa teŋ lɛ, esa akɛ ofee he nɔ ko oya nɔŋŋ! Okɛ amɛ akabɔ gbagbalii, ni kɛ́ no fɛɛ sɛɛ lɛ naagba lɛ yɛ lolo lɛ, okɛ amɛ akpa naanyobɔɔ.​—Abɛi 13:20.

12. (a) Be ni Israelbii lɛ shi Ejipt lɛ sɛɛ etsɛɛɛ lɛ, mɛni Yehowa kɛɛ amɛ? (b) Be ni Yehowa kɛɛ Israelbii lɛ akɛ amɛye lɛ anɔkwa lɛ, mɛni amɛkɛɛ?

¹² Agbɛnɛ hu, wɔbaanyɛ wɔkase nɔ ko kɛjɛ nɔ ni ba be ni Yehowa kpɔ̃ Israelbii lɛ kɛje nyɔŋyeli mli yɛ Ejipt lɛ sɛɛ lɛ mli. Maŋbii lɛ bua amɛhe naa yɛ Sinai Gɔŋ lɛ hiɛ. Kɛkɛ ni Yehowa jie ehe kpo etsɔɔ amɛ yɛ gbɛ ni yɔɔ naakpɛɛ kɛ gbeyei nɔ. Atatu kpii baha gɔŋ lɛ nɔ, nugbɔ shimɔ ni sarawai gbála, gɔŋ lɛ fɛɛ je lasu, ni amɛnu tɛtɛrɛmantɛrɛ gbɛɛmɔ ni naa wa waa diɛŋtsɛ. (2 Mo. 19:16-19) Kɛkɛ ni amɛnu Yehowa miikɛɛ akɛ ‘eji Nyɔŋmɔ ni biɔ ni ajá ekome too pɛ.’ Ewo amɛ shi akɛ, kɛ́ amɛsumɔ lɛ ni amɛye ekitãi lɛ anɔ lɛ, lɛ hu ebaaye amɛ anɔkwa. (Kanemɔ 2 Mose 20:1-6.) Yɛ gbɛ ko nɔ lɛ, Yehowa kɛɛ amɛ akɛ, “Kɛ́ nyɛhi migbɛfaŋ lɛ, mi hu mahi nyɛgbɛfaŋ.” Eji ofata Israelbii lɛ ahe be ni Yehowa Nyɔŋmɔ wo amɛ shi lɛ kulɛ, mɛni obaafee? Ekã shi faŋŋ akɛ, bo hu obaafee onii tamɔ bɔ ni Israelbii lɛ fee amɛnii lɛ. Amɛkɛ “gbee kome kɛɛ akɛ: ‘Nibii fɛɛ ni Yehowa ewie lɛ, wɔbaafee.’” (2 Mo. 24:3) Shi etsɛɛɛ kɛkɛ ni nɔ ko ba ni baahã Israelbii lɛ atsɔɔ kɛji amɛyɛ Yehowa gbɛfaŋ lɛɛlɛŋ.

13. Mɛni ka anɔkwa ni Israelbii lɛ yeɔ Yehowa lɛ?

¹³ Atatu kpii lɛ, sarawa gbálamɔ lɛ, kɛ naakpɛɛ nibii krokomɛi ni Israelbii lɛ na nakai gbi lɛ hã amɛtsui fã waa. No hewɔ lɛ, amɛkpa Mose fai ni lɛ eya Sinai Gɔŋ lɛ nɔ ni ekɛ Yehowa ayawie ehã amɛ. (2 Mo. 20:18-21) Mose yatsɛ waa yɛ gɔŋ lɛ nɔ. Efee tamɔ nɔ ni eshwɛ amɛ pɛ yɛ ŋa lɛ nɔ ni amɛbɛ hiɛnyiɛlɔ. Eeenyɛ efee akɛ, Israelbii lɛ kɛ amɛhiɛ fɔ̃ Mose nɔ fe nine. Amɛhao ni amɛkɛɛ Aaron akɛ: “Tee shi ni ofee nyɔŋmɔ ohã wɔ ní enyiɛ wɔhiɛ, ejaakɛ wɔleee nɔ ni eba nɛkɛ Mose nɛɛ, ni ji nuu lɛ ni nyiɛ wɔhiɛ kɛshi Ejipt shikpɔŋ lɛ nɔ lɛ nɔ.”​—2 Mo. 32:1, 2.

14. Be ni Israelbii lɛ gbo Yehowa nɔ toi lɛ, mɛɛ susumɔ ni ejaaa amɛná? Ni te Yehowa nu he ehã tɛŋŋ?

¹⁴ Israelbii lɛ le akɛ Yehowa kɛɛ amɛkajá amagai. (2 Mo. 20:3-5) Be ni Yehowa wo amɛ kitã nɛɛ sɛɛ etsɛɛɛ ni amɛbɔi shika tsinabi amaga jamɔ! Eyɛ mli akɛ amɛgbo Yehowa nɔ toi moŋ, shi loloolo lɛ amɛsusu akɛ amɛyɛ Yehowa gbɛfaŋ. Aaron po wie akɛ, ‘amɛmiiye gbi jurɔ amɛmiihã Yehowa’! Te Yehowa nu he ehã tɛŋŋ? Enu he akɛ amɛkpa yɛ esɛɛ. Ekɛɛ Mose akɛ, Israelbii lɛ “ebule amɛhe” ni ‘amɛgbá afã kɛje gbɛ ni efã amɛ akɛ amɛnyiɛ nɔ lɛ nɔ.’ Yehowa mli fu aahu akɛ eto eyiŋ akɛ ebaakpãtã Israel maŋ muu lɛ fɛɛ hiɛ.​—2 Mo. 32:5-10.

15, 16. Mɛni Mose kɛ Aaron fee kɛtsɔɔ akɛ amɛyɛ Yehowa gbɛfaŋ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁵ Akɛni Yehowa naa mɔ mɔbɔ hewɔ lɛ, ekpɛ eyiŋ akɛ ekpãtãŋ Israelbii lɛ fɛɛ ahiɛ. Moŋ lɛ, ehã amɛ hegbɛ koni amɛtsɔɔ akɛ amɛmiisumɔ ni amɛhi egbɛfaŋ. (2 Mo. 32:14) Be ni Mose na bɔ ni Israelbii lɛ bolɔɔ, ni amɛláa, ni amɛjoɔ yɛ shika tsinabi amaga lɛ hiɛ lɛ, egbɛlɛ amaga lɛ munyɔmunyɔ tamɔ mulu. Kɛkɛ ni ekɛɛ akɛ: “‘Namɔ yɔɔ Yehowa gbɛfaŋ? Eba miŋɔɔ!’ Ni Levibii lɛ fɛɛ bua amɛhe naa kɛba eŋɔɔ.”​—2 Mo. 32:17-20, 26.

¹⁶ Eyɛ mli akɛ Aaron ni fee shika tsinabi amaga lɛ moŋ, shi etsake etsui, ni lɛ kɛ Levibii krokomɛi lɛ fɛɛ hala akɛ amɛbaahi Yehowa gbɛfaŋ. Enɛ ni amɛfee lɛ tsɔɔ akɛ, amɛyeɔ Yehowa anɔkwa, ni amɛfataaa mɛi ni yeee anɔkwa lɛ ahe.  Nilee yɛ mli akɛ amɛfee nakai, ejaakɛ nakai gbi lɛ, mɛi akpei abɔ ni já shika tsinabi amaga lɛ gboi. Mɛi ni yɔɔ Yehowa gbɛfaŋ lɛ gboiii, moŋ lɛ, ewo amɛ shi akɛ ebaajɔɔ amɛ.​—2 Mo. 32:27-29.

17. Mɛni wɔkaseɔ yɛ nɔ ni Paulo wie yɛ shika tsinabi amaga lɛ sane lɛ he lɛ mli?

¹⁷ Mɛni wɔkaseɔ yɛ sane nɛɛ mli? Bɔfo Paulo kɛɛ akɛ, ‘Nibii nɛɛ bafee nɔkwɛmɔnii kɛhã wɔ, bɔ ni afee ni wɔkatsɔmɔ amagajalɔi tamɔ bɔ ni amɛteŋ mɛi komɛi fee lɛ.’ Ekɛfata he akɛ, aŋma sane nɛɛ kɛ saji krokomɛi ni tamɔ nakai lɛ “koni akɛbɔ wɔ mɛi ni yinɔ nɛɛ naagbee lɛ enina wɔ lɛ kɔkɔ. No hewɔ lɛ, mɔ ni susuɔ akɛ edamɔ shi lɛ akwɛ jogbaŋŋ koni ekagbee shi.” (1 Kor. 10:6, 7, 11, 12) Paulo wiemɔi lɛ hãa wɔnaa akɛ, mɛi ni jáa Yehowa lɛ po baanyɛ abɔi nibii gbohii feemɔ, ni ekolɛ amɛbaanu he po akɛ Yehowa yɛ amɛhe miishɛɛ lolo. Shi kɛ́ mɔ ko miisumɔ ni etsɔ Yehowa naanyo, loo ekɛ enaabu wie akɛ Yehowa naanyo ji lɛ lɛ, no etsɔɔɔ doo akɛ Yehowa náa mɔ lɛ he miishɛɛ.​—1 Kor. 10:1-5.

18. Mɛni baanyɛ ahã wɔkpa yɛ Yehowa sɛɛ? Ni mɛni baajɛ mli kɛba?

¹⁸ Be ni Israelbii lɛ nu he akɛ Mose eyatsɛ tsɔ yɛ Sinai Gɔŋ lɛ nɔ lɛ, amɛhao waa. Ŋmɛnɛ hu lɛ, Kristofoi komɛi yeɔ amɛtsui, ejaakɛ amɛnuɔ he akɛ Yehowa kojomɔ gbi lɛ kɛ jeŋ hee lɛ sɛɛ etsɛ tsɔ. Amɛteŋ mɛi komɛi nuɔ he akɛ shiwoi nɛɛ nako aba mli kwraa, ni ekolɛ amɛbaŋ mli po. Kɛ́ wɔná susumɔ ni tamɔ nɛkɛ lɛ, no baanyɛ ahã wɔkɛ wɔjwɛŋmɔ ama heloonaa nibii anɔ, moŋ fe ni wɔbaafee nɔ ni Yehowa sumɔɔ. Ni kɛ́ wɔkwɛɛɛ ni ahi lɛ, fiofio lɛ, wɔbaakpa yɛ Yehowa sɛɛ kwraa, ni wɔbaafee nibii gbohii ni be ko ni eho lɛ kulɛ wɔfeŋ kɔkɔɔkɔ lɛ.

19. Mɛɛ anɔkwa sane esaaa akɛ wɔhiɛ kpaa nɔ kɔkɔɔkɔ? Ni mɛni hewɔ?

¹⁹ Esaaa akɛ wɔhiɛ kpaa nɔ kɔkɔɔkɔ akɛ, Yehowa miisumɔ ni wɔjɛ wɔtsui fɛɛ mli wɔbo lɛ toi ni wɔjá ekome too pɛ. (2 Mo. 20:5) Kɛ́ wɔfeee nibii ni Yehowa sumɔɔ lɛ, belɛ wɔmiifee Satan suɔmɔnaa nii, ni kɛ́ eba lɛ nakai lɛ, wɔgbeŋ naa ekpakpa. Paulo wie akɛ: “Nyɛnyɛŋ Yehowa kɔɔpoo lɛ kɛ daimonioi akɔɔpoo lɛ fɛɛ naa nyɛnu; nyɛnyɛŋ ‘Yehowa okpɔlɔ lɛ’ kɛ daimonioi akpɔlɔ lɛ fɛɛ nɔ nii nyɛye.”​—1 Kor. 10:21.

20. Mɛɛ gbɛ nɔ Yehowa baanyɛ aye abua wɔ kɛ́ wɔtɔ̃ po?

²⁰ Kain, Solomon, kɛ Israelbii lɛ ná hegbɛ akɛ ‘amɛbaatsake amɛtsui ni amɛku amɛsɛɛ’ kɛba Yehowa ŋɔɔ. (Bɔf. 3:19) Enɛ hãa wɔnaa akɛ, kɛ́ mɔ ko kɔ gbɛ fɔŋ po lɛ, Yehowa yeee ehe oyai akɛ ebaakwa lɛ. Aaron fee esha, shi Yehowa kɛ ehe ke lɛ. Ŋmɛnɛ lɛ, Yehowa tsɔɔ Biblia lɛ, asafo lɛ woji lɛ, kɛ wɔnyɛmimɛi Kristofoi lɛ anɔ ebɔɔ wɔ kɔkɔ koni wɔkafee nibii ni ehiii. Kɛ́ wɔbo kɔkɔbɔi nɛɛ toi lɛ, Yehowa baana wɔ mɔbɔ.

21. Kɛ́ wɔkɛ shihilɛ ko ni baanyɛ aka anɔkwa ni wɔyeɔ Yehowa lɛ kpe lɛ, mɛni esa akɛ wɔfee?

²¹ Yiŋtoo ko hewɔ Yehowa toɔ etsui shi ehãa wɔ lɛ. (2 Kor. 6:1) Eesumɔ ni “wɔtsi wɔhe kɛje bu ni abuuu Nyɔŋmɔ kɛ je lɛŋ akɔnɔi ahe.” (Kanemɔ Tito 2:11-14.) Bei abɔ ni wɔyɔɔ jeŋ fɔŋ nɛɛ mli lolo lɛ, wɔkɛ shihilɛi ni baanyɛ aka anɔkwa ni wɔyeɔ Yehowa lɛ baakpe. Nyɛhãa wɔtswaa wɔfai shi akɛ, wɔbaahi Yehowa masɛi daa, ejaakɛ ‘Yehowa, wɔ-Nyɔŋmɔ lɛ gbeyei esa akɛ wɔshe, lɛ esa akɛ wɔsɔmɔ, ni lɛ ehe esa akɛ wɔkpɛtɛ’!​—5 Mo. 10:20.