1, 2. (a) Naegbọn e do yin nuyọnẹnnu nado nọ adà Jehovah tọn mẹ? (b) Etẹwẹ mí na gbadopọnna to hosọ ehe mẹ?

NUHE sọgbe hẹ lẹnpọn dagbe wẹ e yin nado tẹdo Jehovah go. Mẹdepope ma tin he tindo huhlọn, nuyọnẹn kavi owanyi hugan Jiwheyẹwhe mítọn! Mẹnu to mí mẹ wẹ ma na jlo nado nọ adà etọn mẹ? (Salm. 96:4-6) Etomọṣo, sinsẹ̀n-basitọ Jiwheyẹwhe tọn delẹ ko biọ bẹwlu mẹ to whenue yé pannukọn ninọmẹ de he biọ dọ yé ni nọ adà Jehovah tọn mẹ.

² To hosọ ehe mẹ, mí na gbadopọnna apajlẹ mẹdelẹ tọn he sọalọakọ́n dọ emi to adà Jehovah tọn mẹ bo ka to nuhe nọ hẹn homẹgble e lẹ wà to ojlẹ dopolọ mẹ. Kandai ehelẹ bẹ nuplọnmẹ titengbe lẹ hẹn he na gọalọna mí nado gbọṣi nugbonọ-yinyin mẹ na Jehovah to gigọ́ mẹ.

3. Nawẹ Jehovah tẹnpọn nado gọalọna Kaini gbọn, podọ etẹwẹ Ewọ dọna ẹn?

³ Lẹnnupọndo apajlẹ Kaini tọn ji. Ewọ ma dohia dọ gbọnvona Jehovah, emi nọ sẹ̀n yẹwhe devo depope gba. Ṣigba, Jiwheyẹwhe ma kẹalọyi sinsẹ̀n-bibasi Kaini tọn. Okún kanyinylan tọn ko jẹ adọ̀dodò ji to ahun etọn mẹ. (1 Joh. 3:12) Jehovah tẹnpọn nado  gọalọna Kaini bo dọna ẹn dọmọ: “Eyin hiẹ jẹ dagbewà ji, be yẹn ma na do nukundagbe hia we wẹ ya? Ṣigba eyin hiẹ ma jẹ dagbewà ji, ylando pavava to họntonu towe, podọ ojlo sinsinyẹn etọn na duto ji we; ṣigba be hiẹ na dohuhlọn do e ji ya?” (Jen. 4:6, 7) Na taun tọn, nuhe Jehovah to didọna Kaini wẹ, “Eyin a lẹnvọjọ bo gbọṣi adà ṣie mẹ gligli, yẹnlọsu na nọ adà towe mẹ.”

4. Nawẹ Kaini yinuwa gbọn to whenue dotẹnmẹ hundote na ẹn nado nọ adà Jehovah tọn mẹ?

⁴ Jehovah na do nukundagbe hia Kaini whladopo dogọ, kiki eyin ewọ diọ pọndohlan etọn. Ṣigba, Kaini ma dotoaina ayinamẹ lọ. Pọndohlan agọ̀ po ojlo ṣejannabi tọn etọn po sisẹ́ ẹ nado wà nuylankan. (Jak. 1:14, 15) To jọja whenu etọn, Kaini sọgan ko nọma lẹn gbede dọ emi na wá diọnukunsọ Jehovah. Ṣigba to nukọn mẹ, ewọ wá wà nude he yè ma gán vẹ̀do e pọ́n, e ṣiatẹ sọta Jiwheyẹwhe bosọ hù nọvisunnu etọn titi!

5. Linlẹn nankọ lẹ wẹ sọgan zọ́n bọ mí na hẹn nukundagbe Jehovah tọn bu?

⁵ Taidi Kaini, to egbehe Klistiani de sọgan to walọ ylankan de zan bo ka nọ do ede hia to ojlẹ dopolọ mẹ taidi Jehovah sẹ̀ntọ. (Juda 11) Di apajlẹ, mẹde sọgan nọ kudlọ kléwhète tọn lẹ do fẹnnuwiwa ji, tindo ayilinlẹn nukunkẹn tọn lẹ, kavi numọtolanmẹ wangbẹna tọn lẹ gando Klistiani hatọ de go. (1 Joh. 2:15-17; 3:15) Linlẹn mọnkọtọn sọgan hẹn ẹn nado jai jẹ ylanwiwa mẹ. To ojlẹ enẹ lẹpo mẹ, mẹlọ sọgan tindo zohunhun to lizọnyizọn lọ mẹ bo nọ yì opli agun tọn lẹ to gbesisọ mẹ. Gbẹtọvi hatọ mítọn lẹ sọgan nọma yọ́n linlẹn po walọyizan mítọn lẹ po, amọ́ Jehovah nọ mọ nulẹpo, podọ eyin mí ma to adà etọn mẹ po ahun lẹpo po, ewọ nọ yọnẹn.—Hia Jelemia 17:9, 10.

6. Eyin mí gbọṣi adà Jehovah tọn mẹ gligli, nawẹ ewọ nọ gọalọna mí nado “dohuhlọn do” ayilinlẹn ylando tọn mítọn lẹ ji gbọn?

⁶ Eyin e tlẹ jọ domọ, Jehovah ma nọ gbẹ́ mí dai to afọdopolọji. Eyin mẹde ze afọdide delẹ he hẹn ẹn jẹla sọn Jehovah dè, ewọ nọ dotuhomẹna mẹlọ dọmọ: “Lẹkọwa dè e, yẹn nasọ lẹkọ do [dè we].” (Mal. 3:7) Titengbe to whenue mí to ahidi hẹ awugbopo lẹ, Jehovah nọ jlo dọ mí ni nọavùnte sọta ylanwiwa. (Isa. 55:7) Eyin mí wàmọ, ewọ lọsu na dohia dọ emi to adà mítọn mẹ, gbọn huhlọn nina mí to gbigbọ-liho, numọtolanmẹ-liho podọ to agbasa-liho dali, yèdọ nuhe sin hudo mí tindo nado “dohuhlọn do” ayilinlẹn ylando tọn mítọn lẹ ji.—Jen. 4:7.

7. Nawẹ Sọlomọni hẹn haṣinṣan dagbe he e tindo hẹ Jehovah gble gbọn?

⁷ Mí sọgan plọn nususu sọn apajlẹ Ahọlu Sọlomọni tọn mẹ. To jọja whenu etọn, Sọlomọni nọ lẹhlan Jehovah nado dín anademẹ. Jiwheyẹwhe na ẹn nuyọnẹn daho bosọ deazọ́nna ẹn nado gbá tẹmpli whanpẹnọ de do Jelusalẹm. Ṣigba, Sọlomọni wá hẹn họntọnjiji etọn hẹ Jehovah gble. (1 Ahọ. 3:12; 11:1, 2) Na taun tọn, osẹ́n Jiwheyẹwhe tọn jẹagọdo dọ ahọlu Heblu de ni “bẹ asi lẹ pli na ede, na ahun etọn nikaa lẹhlan apadopo sọn [Jiwheyẹwhe dè].” (Deut. 17:17) Sọlomọni vẹtoli bo dà asi 700 to godo mẹ. E sọ plan asimọwhlá 300 dogọ do owhé etọn gbè. (1 Ahọ. 11:3) Susu to asi etọn lẹ mẹ ma yin Islaelivi bo nọ sẹ̀n yẹwhe lalo lẹ. Gbọnmọ dali, Sọlomọni lọsu gbà osẹ́n Jiwheyẹwhe tọn lọ he jẹagọdo alọwiwle hẹ yọnnu jonọ lẹ.—Deut. 7:3, 4.

8. Obá tẹ mẹ wẹ Sọlomọni hẹn homẹgble Jehovah jẹ?

⁸ Na Sọlomọni gbẹkọ nubiọtomẹsi Jehovah tọn lẹ go vudevude wutu, to nukọn mẹ, ewọ wá jai jẹ nuṣiwa he ylan taun lẹ mẹ. Sọlomọni do agbà de na boṣiọ yẹwhe-yọnnu Aṣitolẹti tọn, podọ e whè gbau ewọ do agbà devo na yẹwhe lalo lọ Kemọṣi. E sọ hopódona asi etọn lẹ to sinsẹ̀n-bibasi kosi lẹ tọn mẹ to agbà enẹlẹ kọ̀n. Nupaṣamẹ taun wẹ e yindọ osó he ji ewọ do agbà enẹlẹ ai do lọ pannukọn  Jelusalẹm tlọlọ, yèdọ fie e ko gbá tẹmpli Jehovah tọn do! (1 Ahọ. 11:5-8; 2 Ahọ. 23:13) Vlavo Sọlomọni klọ ede gbọn linlẹn dali dọ Jehovah na miọnnukundo tolivivẹ emitọn dile e na dẹnsọ bọ emi na gbẹ́ zindonukọn nado to avọ́sinsan lẹ basi to tẹmpli mẹ.

9. Etẹ mẹ wẹ kọgbigbẹ́ avase Jehovah tọn lẹ go dekọtọn do na Sọlomọni?

⁹ Ṣigba, Jehovah ma nọ yí nukunpẹvi do pọ́n ylanwiwa gbede. Biblu dọmọ: “Jehovah sọ gblehomẹ sinsinyẹn do Sọlomọni go, na ahun etọn ko lẹ́ sọn Jehovah . . . dè wutu, yèdọ mẹhe ko sọawuhia ẹ whla awe bo ko sọ na ẹn avase gando onú ehe lọ go dọ ewọ ma dona hodo yẹwhe devo lẹ. Ṣigba, e ma setonuna nuhe Jehovah ko degbe etọn.” Taidi kọdetọn de, e hẹn nukundagbe po godonọnamẹ Jiwheyẹwhe tọn po bu. Kúnkan Sọlomọni tọn lẹ hẹn pọninọ he tin to ahọluduta Islaeli tọn mẹ lọ bu, bosọ pehẹ nugbajẹmẹji susu lẹ sọn whẹndo de ji jẹ devo ji.—1 Ahọ. 11:9-13.

10. Etẹwẹ sọgan ze haṣinṣan dagbe he mí tindo hẹ Jehovah do owù mẹ?

¹⁰ Dile e yindo to whẹho Sọlomọni tọn mẹ, dopo to owù daho hugan he sọgan bẹpla gbigbọnọ-yinyin mítọn lẹ mẹ wẹ họntọnjiji hẹ mẹhe ma nọ mọnukunnujẹ nujinọtedo Jehovah tọn lẹ mẹ kavi ma nọ na yé sisi lẹ. Mẹdelẹ sọgan nọ dogbẹ́ hẹ agun lọ, ṣigba bo sọgan nọma lodo to gbigbọ-liho. Mẹdevo lẹ sọgan yin hẹnnumẹ, kọmẹnu, azọ́nwatọgbẹ́ kavi wehọmẹvigbẹ́ mítọn he ma nọ sẹ̀n Jehovah lẹ. Depope he whẹho lọ yin, eyin mẹhe mí nọ dogbẹ́ hẹ pẹkipẹki lẹ ma nọ yí nukun nujọnu tọn do pọ́n nujinọtedo Jehovah tọn lẹ, to nukọn mẹ, yé sọgan wá hù haṣinṣan dagbe he mí tindo hẹ Jiwheyẹwhe sudo.

11. Etẹwẹ sọgan gọalọna mí nado yọnẹn eyin vlavo mí dona dapana mẹhe mí nọ dogbẹ́ hẹ de?

¹¹ Hia 1 Kọlintinu lẹ 15:33. Suhugan gbẹtọ lẹ tọn wẹ tindo jẹhẹnu dagbe delẹ, podọ susu mẹhe ma to agun mẹ lẹ tọn wẹ ma nọ doalọ to walọyizan ylankan lẹ mẹ tlọlọ. Eyin ehe yin nugbo gando mẹyinyọnẹn towe lẹ go, be a gán lẹndọ yé yin gbẹdido dagbe lẹ niyẹn ya? Kanse dewe dọ: Nuyiwadomẹji tẹwẹ gbẹdido hẹ yé na tindo do haṣinṣan ṣie hẹ Jehovah ji? Be yé na hẹn ẹn pọnte dogọ wẹ ya? Etẹwẹ tin to ahun yetọn mẹ? Di apajlẹ, be diblayin hodọdopọ yetọn lẹpo wẹ nọ saba gando nusisọ́, akuẹ, núzinzan lẹ, ayidedai kavi yanwle agbasa tọn devo lẹ go ya? Be yé nọ saba mọhodọdo mẹdevo lẹ go kavi yìn aslan gblewa tọn lẹ wẹ ya? Jesu na avase he sọgbe de dọmọ: “Sọn susugege nuhe tin to ahun mẹ lẹ tọn mẹ wẹ onù nọ dọtọ́n.” (Mat. 12:34) Eyin a doayi e go dọ mẹhe a nọ dogbẹ́ hẹ lẹ yin owùnu de na haṣinṣan towe hẹ Jehovah, yinuwa po nujikudo po bo na dogbó họntọnjiji mọnkọtọn lẹ kavi doalọtena yé eyin e biọ domọ.—Howh. 13:20.

12. (a) Etẹwẹ Jehovah hẹn họnwun na Islaelivi lẹ ojlẹ vude to whenue yé tọ́n sọn Egipti godo? (b) Nawẹ Islaelivi lẹ yinuwa gbọn to whenue Jiwheyẹwhe biọ mẹdezejo mlẹnmlẹn to yé si?

¹² Nujijọ he wá aimẹ ojlẹ vude to whenue Islaelivi lẹ yin tuntundote sọn kanlinmọgbenu Egipti tọn godo sọ bẹ nuplọnmẹ devo lẹ hẹn na mí. Gbẹtọ lọ lẹ pli dopọ to Osó Sinai kọ̀n. To finẹ, Jehovah dohia to aliho he jiawu bosọ họnwun de mẹ dọ emi to ṣẹnṣẹn yetọn. To azọ́njiawu-liho, aslọ titli de sọawuhia. Jehovah sọ hẹn hẹviosò nado dọnú, abì nado gbòdlán, azọ̀ nado gbàpe, podọ nuhe taidi nudidọ opẹ̀n tọn gángán he ma doalọte de yin sisè. (Eks. 19:16-19) To ninọmẹ ehe mẹ, Jehovah do ede hia Islaelivi lẹ taidi “Jiwheyẹwhe de he nọ biọ mẹdezejo mlẹnmlẹn.” Ewọ hẹn yé deji dọ emi na yin nugbonọ na mẹhe yiwanna emi bo nọ yìn gbedide emitọn lẹ. (Hia Eksọdusi 20:1-6.) Na nugbo tọn, nuhe Jehovah to didọna omẹ etọn lẹ wẹ yindọ, “Eyin mì dohia dọ adà ṣie mẹ wẹ mì tin te, yẹnlọsu na dohia dọ n’tin to adà mìtọn mẹ.” Nawẹ a na yinuwa gbọn eyin hiẹ wẹ Jehovah Jiwheyẹwhe dopà nugbonọ-yinyin tọn mọnkọtọn na? Matin ayihaawe, a na yinuwa kẹdẹdile Islaelivi lẹ wà do. Yé “yigbe to kọndopọ mẹ dọmọ: ‘Ohó he Jehovah ko dọ lẹpo wẹ míwlẹ wleawufo nado wà.’” (Eks. 24:3) Ṣigba, e ma dẹn bọ nujijọ madonukun de whlé nugbonọ-yinyin Islaelivi lẹ tọn pọ́n.

13. Ninọmẹ tẹlẹ wẹ whlé nugbonọ-yinyin Islaelivi lẹ tọn pọ́n?

¹³ Islaelivi lẹ dibu to whenue yé mọ aslọ titli lọ, abì lọ gọna ohia jiawu Jiwheyẹwhe tọn devo lẹ. Mose kẹalọyi obiọ yetọn nado yin hoyidọtọ yetọn to hodọdopọ yetọn lẹpo hẹ Jehovah whenu to Osó Sinai kọ̀n. (Eks. 20:18-21) Mose wá yì aga pete osó lọ tọn bo nọ finẹ na ojlẹ dindẹn. Todin, be Islaelivi lẹ ma gán wà nudepope to danfafa lọ ji ba matin nukọntọ dejidego yetọn wẹ ya? E taidi dọ eyin mẹlọ lẹ to Mose mọ to ṣẹnṣẹn yetọn wẹ yé nọ tindo yise. Yé jẹ nuhà ji bo dọna Aalọn dọmọ: “Basi yẹwhe de na mí he na deanana mí, na mí ma yọ́n nuhe na ko jọ do Mose ehe go, yèdọ dawe lọ he plan mí tọ́n sọn aigba Egipti tọn ji.”—Eks. 32:1, 2.

14. Etẹwẹ Islaelivi lẹ gbọn oklọ dali to linlẹn, podọ nawẹ Jehovah yinuwa gbọn?

¹⁴ Omẹ lọ lẹ yọnẹn dọ boṣiọ-sinsẹ̀n yin ylando sinsinyẹn sọta Jehovah. (Eks. 20:3-5) Ṣigba, e ma dẹn bọ yé jẹ sinsẹ̀n-basina oyìnvu sika tọn de ji! Mahopọnna nuyiwa tolivivẹ tọn he jẹ gànna-gànna enẹ, to linlẹn de mẹ, Islaelivi lẹ klọ yede bo lẹndọ emi gbẹ́ tin to adà Jehovah tọn mẹ. Nupaṣamẹ wẹ e yin dọ Aalọn tlẹ ylọ sinsẹ̀n-bibasi oyìnvu tọn yetọn dọ ‘hùnwhẹ de hlan Jehovah’! Nawẹ Jehovah yinuwa gbọn? E mọdọ yé ma yin nugbonọ na emi. Jehovah dọna Mose dọ mẹlọ lẹ “ko hẹn yede gblezọn,” podọ yé ko “zẹ̀ sọn aliho he [Emi] ko degbe etọn na yé nado gbọn lọ ji.” To “adi sinsinyẹn” etọn mẹ, Jehovah tlẹ lẹn nado và akọta Islaeli tọn he ṣẹṣẹ yin didoai lọ sudo.—Eks. 32:5-10.

15, 16. Nawẹ Mose po Aalọn po dohia dọ yé tin to adà Jehovah tọn mẹ gbọn? (Pọ́n yẹdide he tin to bẹjẹeji hosọ ehe tọn.)

¹⁵ Jehovah de ma nado sukúndona Islaelivi lẹ. Lẹblanu etọn hùn dotẹnmẹ dote na sinsẹ̀n-basitọ nugbonọ etọn lẹ nado gbọṣi adà etọn mẹ gligli. (Eks. 32:14) To whenue Mose yí nukun etọn lẹ do mọ nuyiwa he zẹ̀pá mẹlọ lẹ tọn—dile yé to awhádo, to hànji bo to wedu to boṣiọ de nukọn—ewọ hẹn oyìnvu sika tọn lọ zun afín. Enẹgodo, e dawhá dọmọ: “Mẹnu lẹ wẹ to adà Jehovah tọn mẹ? Mì gbọ yé ni wá dè e!” Podọ, “Levinu lẹpo sọ bẹ yede pli lẹdo e.”—Eks. 32:17-20, 26.

¹⁶ Dile etlẹ yindọ to tintan whenu Aalọn tindo mahẹ to awuwiwlena boṣiọ lọ mẹ, ewọ lẹnvọjọ bo hopódona Levinu he pò lẹ nado nọ adà Jehovah tọn mẹ. Gbọnvona dọ omẹ nugbonọ enẹlẹ nọ adà Jehovah tọn mẹ, yé sọ klan yede sọn ylanwatọ lẹ go to ojlẹ  dopolọ mẹ. Nudide nuyọnẹn tọn de wẹ enẹ yin; na to azán enẹ gbè, gbẹtọ fọtọ́n susu wẹ hẹn ogbẹ̀ yetọn bu na boṣiọ-sinsẹ̀n yetọn wutu. Ṣigba, Jehovah dopà nado dona mẹhe nọ adà etọn mẹ lẹ.—Eks. 32:27-29.

17. Etẹwẹ nuhe Paulu dọ gando nujijọ oyìnvu sika tọn lọ go plọn mí?

¹⁷ Apọsteli Paulu dọ̀n ayidonugo mítọn wá nujijọ oyìnvu sika tọn lọ tọn ji bo na avase dọmọ: “Onú ehelẹ lẹzun apajlẹ lẹ na mí, na míwlẹ ma nado . . . lẹzun boṣiọ-sẹ̀ntọ lẹ . . ., dile delẹ to yé mẹ basi do. [Apajlẹ lọ lẹ] yin kinkandai taidi avase de na míwlẹ, mẹhe ji opodo titonu lẹ tọn ko wá. Enẹwutu, mì gbọ mẹhe lẹndọ emi to ote ni payi, na e nikaa jai.” (1 Kọl. 10:6, 7, 11, 12) Dile Paulu hẹn ẹn họnwun do, sinsẹ̀n-basitọ nugbo lẹ lọsu sọgan wá doalọ to walọyizan ylankan lẹ mẹ. Mẹhe nọ joawuna whlepọn lẹ sọgan nọ lẹndọ yé gbẹ́ tindo teninọ dagbe to Jehovah dè. Ṣigba, eyin mẹde nọ jlo poun nado yin họntọn Jehovah tọn kavi nọ dọ poun dọ emi yin nugbonọ na ewọ, enẹ ma nọ zẹẹmẹdo to whelẹponu dọ Jehovah kẹalọyi mẹlọ nugbonugbo gba.—1 Kọl. 10:1-5.

18. Etẹwẹ sọgan sisẹ́ mí nado danbú sọn Jehovah dè, podọ kọdetọn tẹlẹ wẹ ehe sọgan hẹnwa?

¹⁸ Kẹdẹdile Islaelivi lẹ hanú to whenue kọlilẹ Mose tọn sọn Osó Sinai tọn ji to dindẹn do, mọdopolọ to egbehe, Klistiani lẹ sọgan nọ hanú dọ azán whẹdida Jehovah tọn po wiwá aihọn yọyọ lọ tọn po taidi nuhe to dindẹn. Hẹndi opagbe enẹlẹ tọn sọgan taidi nuhe pò to sọgodo he dẹn taun de, kavi odlọ he vivi de poun. Eyin mí ma nọ aṣeji gando linlẹn mọnkọtọn lẹ go, yé sọgan sisẹ́ mí nado jẹ yanwle agbasa tọn lẹ zedo otẹn tintan mẹ ji kakati nido yin ojlo Jehovah tọn. To nukọn mẹ, mí sọgan danbú sọn Jehovah dè bo wá doalọ to walọyizan delẹ mẹ, ehe mẹ mí ma na ko lẹn gbede dọ mí na wá doalọ te to whenue mí gbẹ́ tindo gbigbọnọ-yinyin dagbe de.

19. Nugbo titengbe tẹ go wẹ mí ma dona wọnji gbede, podọ etẹwutu?

¹⁹ Mí ma dona wọn gbede dọ Jehovah nọ biọ tonusise po ahun lẹpo po gọna mẹdezejo mlẹnmlẹn to mí si. (Eks. 20:5) Na nugbo tọn, nuyiwa depope he jẹla na sinsẹ̀n-bibasi Jehovah tọn nọ zẹẹmẹdo ojlo Satani tọn wiwà, podọ nugbajẹmẹji mẹ janwẹ enẹ sọgan dekọtọn do. Enẹwutu, Paulu flinnu mí dọmọ: “Mì ma sọgan to nùnù to kọfo Jehovah tọn mẹ podọ to kọfo aovi lẹ tọn mẹ gba; mì ma sọgan to mahẹ tindo to ‘tafo Jehovah tọn’ ji podọ to tafo aovi lẹ tọn ji gba.”—1 Kọl. 10:21.

20. Nawẹ Jehovah sọgan gọalọna mí gbọn, etlẹ yin to whenue mí ko ṣinuwa godo?

²⁰ Kandai Biblu tọn he gando Kaini, Sọlomọni po nuyiwa Islaelivi lẹ tọn to Osó Sinai kọ̀n po go lẹ tindo onú titengbe de to kọndopọ mẹ. Omẹ enẹlẹ tindo dotẹnmẹ lọ nado “lẹnvọjọ bo diọ.” (Owalọ 3:19) E họnwun dọ Jehovah ma nọ nọ̀ whlẹndo ji nado gbẹ́ mẹhe ṣinuwa lẹ dai. To whẹho Aalọn tọn mẹ, Jehovah do jonamẹ hia taun. To egbehe, Jehovah sọgan na mí avase gbọn kandai Biblu tọn de, owe sinai do Biblu ji lẹ kavi ayinamẹ owanyinọ Klistiani hatọ de tọn gblamẹ. Eyin mí setonuna avase ehelẹ, mí nọ deji dọ mí na duvivi lẹblanu Jehovah tọn.

21. Etẹwẹ mí dona magbe nado wà to whenue nugbonọ-yinyin mítọn na Jehovah yin whiwhlepọn?

²¹ Nukundagbe majẹhẹ Jehovah tọn tindo lẹndai de. (2 Kọl. 6:1) E hùn dotẹnmẹ dote na mí “nado gbẹ́ jijọ-madi-Jiwheyẹwhe po ojlo aihọn tọn lẹ po dai.” (Hia Titu 2:11-14.) Dile e na dẹnsọ bọ mí na gbẹ́ to gbẹnọ “to titonu ehe mẹ,” mí na pehẹ ninọmẹ delẹ he na whlé mẹdezejo mlẹnmlẹn mítọn na Jehovah pọ́n. Mì gbọ mí ni wleawufo to whepoponu nado gbọṣi adà etọn mẹ gligli, na ‘Jehovah Jiwheyẹwhe mítọn wẹ mí dona nọ dibusi, ewọ wẹ mí dona nọ sẹ̀n, podọ ewọ go wẹ mí dona tẹdo gligli.’—Deut. 10:20.