1, 2. (a) Ngaa maalamon nga magdampig kay Jehova? (b) Ano ang binagbinagon naton sa sini nga artikulo?

MAALAMON gid nga magpabilin kay Jehova. Wala na sing mas gamhanan, maalam, ukon mahigugmaon sangsa aton Dios! Sin-o abi sa aton ang indi gusto magdampig sa iya? (Sal. 96:4-6) Pero, may mga kahimtangan nga napaslawan ang pila ka sumilimba ni Jehova nga magdampig sa iya.

² Sa sini nga artikulo, binagbinagon naton ang halimbawa sang mga nagsiling nga dampig sila kay Jehova pero naghimo man sila sing mga butang nga iya ginadumtan. Makatuon kita sa sini sing mga leksion nga makabulig sa aton nga magpabilin nga mainunungon kay Jehova.

3. Ngaa ginpaandaman ni Jehova si Cain, kag ano ang ginsiling ni Jehova sa iya?

³ Binagbinaga ang halimbawa ni Cain. Wala sia nagsimba sa iban nga dios kundi kay Jehova lang. Pero wala ginbaton sang Dios ang iya pagsimba, kay may malaut nga nakita sa iya tagipusuon. (1 Juan 3:12) Gani ginpaandaman ni Jehova si Cain: “Kon himuon mo ang maayo, indi bala nga kahamut-an ka man? Apang kon indi mo paghimuon ang maayo, ang sala nagabantay sa  puertahan sang imo tolda agod tukbon ka; apang madaug mo bala ini?” (Gen. 4:6, 7) Daw ginasilingan ni Jehova si Cain, “Kon maghinulsol ka kag magdampig sa akon, magadampig ako sa imo.”

4. Ano ang ginhimo ni Cain sang ginhatagan sia sing kahigayunan nga magdampig kay Jehova?

⁴ Kon bag-uhon ni Cain ang iya panghunahuna, kahamut-an sia liwat ni Jehova. Pero wala namati si Cain sa laygay. Nakahimo sia sing sala bangod sang iya indi maayo nga panghunahuna kag handum. (Sant. 1:14, 15) Sang pamatan-on si Cain, mahimo wala gid niya mahunahuna nga pamatukan niya si Jehova. Pero sang ulihi, daw indi mapatihan nga nagrebelde sia sa Dios kag ginpatay niya ang iya utod!

5. Ano nga panghunahuna ang mahimo mangin rason nga indi kita pagkahamut-an ni Jehova?

⁵ Pareho kay Cain, ang isa ka Cristiano mahimo nagasimba kay Jehova pero nagahimo man sing mga butang nga ginadumtan ni Jehova. (Jud. 11) Mahimo aktibo sia sa ministeryo kag regular sa mga miting sang kongregasyon, pero wala niya ginasikway ang imoral nga mga handum, makagod nga panghunahuna, ukon dumot sa iya utod. (1 Juan 2:15-17; 3:15) Ini nga panghunahuna nagaresulta sa sala nga mga buhat. Mahimo indi mahibaluan sang iban nga tawo ang aton ginahunahuna kag ginahimo, pero makita ni Jehova ang tanan nga butang kag nahibaluan niya kon indi bug-os ang aton pagdampig sa iya.—Basaha ang Jeremias 17:9, 10.

6. Paano kita ginabuligan ni Jehova para “madaug” naton ang aton sala nga mga handum?

⁶ Bisan makasala kita, wala man kita dayon ginasikway ni Jehova. Kon nagapalayo na kita kay Jehova, nagapangabay sia sa aton: “Magbalik kamo sa akon kag magabalik ako sa inyo.” (Mal. 3:7) Kon may ginapakigbatuan kita nga mga kaluyahon, gusto gid ni Jehova nga pamatukan naton ang malain. (Isa. 55:7) Kon himuon naton ini, indi gid niya kita pagpabay-an kag pabakuron niya kita sa espirituwal, emosyonal, kag pisikal para “madaug” naton ang aton sala nga mga handum.—Gen. 4:7.

7. Ngaa nadula ni Solomon ang iya maayo nga kaangtanan kay Jehova?

⁷ Madamo kita sing matun-an sa halimbawa ni Hari Solomon. Sang lamharon sia, nagdangop sia kay Jehova para giyahan sia. Ginhatagan sia sang Dios sing dalayawon nga kaalam kag gintugyan sa iya ang pagpatindog sang matahom nga templo sa Jerusalem. Pero nadula ni Solomon ang iya maayo nga kaangtanan kay Jehova. (1 Hari 3:12; 11:1, 2) Maathag sa Kasuguan sang Dios nga ang Hebreo nga hari indi dapat “magpangasawa sing madamo, agod indi magtalang ang iya tagipusuon.” (Deut. 17:17) Wala ini gintuman ni Solomon, kag 700 ang iya nangin asawa kag 300 ang iya nangin babayi. (1 Hari 11:3) Madamo sa iya asawa ang indi Israelinhon, nga nagasimba sa butig nga mga dios. Gani ginlapas ni Solomon ang sugo sang Dios nga indi dapat magpangasawa sing dumuluong.—Deut. 7:3, 4.

8. Ano ang ginhimo ni Solomon nga nagpaakig kay Jehova?

⁸ Bangod sang amat-amat nga pagsikway ni Solomon sa mga kasuguan ni Jehova, nakahimo sia sing serioso nga sala sang ulihi. Naghimo si Solomon sing mga halaran para sa diosa nga si Astoret kag sa butig nga dios nga si Kemos. Dayon ginsimba niya ining butig nga mga dios upod sa iya mga asawa. Ang malain pa, ginhimo niya ang mga halaran sa bukid nga nagaatubang sa Jerusalem nga ginpatindugan niya sang templo ni Jehova! (1 Hari 11:5-8; 2 Hari 23:13) Mahimo ginhunahuna ni Solomon nga pabulagbulagan ni Jehova ang iya paglapas basta padayon lang sia nga nagahalad sa templo.

9. Ano ang resulta sang indi pagpamati ni Solomon sa Dios?

 ⁹ Wala ginapabulagbulagan ni Jehova ang sala. Ang Biblia nagasiling: “Naakig gid si Jehova kay Solomon, bangod napahilayo ang iya tagipusuon kay Jehova . . . nga nagpakita sa iya sing duha ka beses, kag nagpaandam sa iya tuhoy sa sini gid nga butang, nga indi sia magsimba sa iban nga mga dios. Apang wala niya gintuman ang sugo ni Jehova.” Bangod sini, wala na sia ginkahamut-an kag ginsakdag sang Dios. Indi na bilog nga Israel ang gingamhan sang kaliwatan ni Solomon, kag madamo nga problema ang naeksperiensiahan nila sa sulod sang ginatos ka tuig.—1 Hari 11:9-13.

10. Ano ang mahimo makahalit sa aton maayo nga kaangtanan kay Jehova?

¹⁰ Pareho sa natabo kay Solomon, makahalit sa aton espirituwalidad ang pagpakig-abyan sa mga wala nagapati ukon nagapabalor sa mga talaksan ni Jehova. Ang pila sa ila mahimo nagapakig-upod sa kongregasyon pero maluya sa espirituwal. Ang pila mahimo aton mga paryente, kaingod, katrabaho, ukon kaeskwela nga wala nagasimba kay Jehova. Kon ang aton suod nga mga abyan wala nagapabalor sa mga talaksan ni Jehova, maimpluwensiahan nila kita, kag sa ulihi, madula ang aton maayo nga kaangtanan sa Dios.

11. Ano ang makabulig sa aton nga makadesisyon kon bala likawan naton ang isa ka abyan?

¹¹ Basaha ang 1 Corinto 15:33. Kalabanan nga tawo may maayo nga mga kinaiya, kag madamo man nga indi bahin sang kongregasyon ang wala nagahimo sing malain. Kon amo sini ang imo mga abyan, masiling mo bala nga maayo sila nga kaupdanan? Pamangkuta ang imo kaugalingon kon ano ang epekto sang imo pagpakig-upod sa ila sa imo kaangtanan kay Jehova. Mapabakod bala nila ini? Ano ang ara sa ila tagipusuon? Halimbawa, pirme bala nila ginaistorya ang parte sa uso nga pamayo, kuarta, gadyet, kalingawan, ukon pagtinguha nga magmanggaranon? Pirme bala nila ginapakalain ang iban? Nanamian bala sila maglahog sing binastos? Nagpaandam si Jesus: “Sa kabuganaan sang tagipusuon nagahambal ang baba.” (Mat. 12:34) Kon sa banta mo ang imo mga abyan makahalit sa imo kaangtanan kay Jehova, dapat may himuon ka gilayon! Butangi sing limitasyon ang imo pagpakig-upod sa ila, kag kon kinahanglanon, untati ang pagpakig-abyan sa ila.—Hulu. 13:20.

12. (a) Ano ang ginpahayag ni Jehova sa mga Israelinhon wala madugay paggua nila sa Egipto? (b) Ano ang ginsiling sang mga Israelinhon sa ginapatuman sang Dios nga sia lang ang dapat simbahon?

¹² May matun-an man kita sa natabo sa mga Israelinhon wala madugay pagkatapos  nga ginhilway sila sa Egipto. Nagtipon sila sa atubangan sang Bukid Sinai, kag nakita nila didto ang presensia ni Jehova sa tumalagsahon nga paagi. May nakita sila nga madamol nga panganod, dayon nagpanaguob, nagpangilat, kag may nabatian sila nga tuman kabaskog nga tunog nga daw budyong. (Ex. 19:16-19) Paagi sini, ginpahayag ni Jehova sa mga Israelinhon nga sia ang ‘Dios nga nagapatuman nga sia lang ang dapat simbahon.’ Ginpasalig niya sila nga mainunungon sia sa mga nagahigugma sa iya kag nagatuman sa iya mga sugo. (Basaha ang Exodo 20:1-6.) Daw ginasilingan ni Jehova ang iya katawhan, “Kon dampig kamo sa akon, dampig man ako sa inyo.” Ano ayhan ang himuon mo kon nabatian mo mismo ining pasalig ni Jehova nga Dios? Mahimo gid nga himuon mo man ang ginhimo sang mga Israelinhon. “Dungan [sila] nga nagsiling: ‘Handa kami nga himuon ang tanan nga ginsiling ni Jehova.’” (Ex. 24:3) Pero sang ulihi, may hitabo nga nagtilaw sa ila pagkamainunungon.

13. Ano nga hitabo ang nagtilaw sa pagkamainunungon sang mga Israelinhon?

¹³ Hinadlukan ang mga Israelinhon sa madamol nga panganod, kilat, kag sa iban pa nga makatilingala nga mga tanda halin sa Dios. Dayon ginpangabay nila si Moises nga magpakighambal kay Jehova sa Bukid Sinai. (Ex. 20:18-21) Pero, nadugayan si Moises sa ibabaw sang bukid. Daw indi na magbalik ang masaligan nga lider sang mga Israelinhon, kag daw indi na sila makahalin sa kamingawan. Ano ang ginhimo nila? Ginpakita nila nga nagatuo lang sila kon ara si Moises. Nabalaka sila kag ginsilingan nila si Aaron: “Himui kami sing isa ka dios nga manguna sa amon, kay wala kami makahibalo kon ano ang natabo kay Moises, ang tawo nga nagtuytoy sa amon pagua sa duta sang Egipto.”—Ex. 32:1, 2.

14. Bisan pa sang paglapas sang mga Israelinhon, ano ang ginhunahuna nila, kag ano ang ginhimo ni Jehova?

¹⁴ Nahibaluan sang katawhan nga ang pagsimba sa mga diosdios isa ka serioso nga sala kay Jehova. (Ex. 20:3-5) Pero nagsimba sila sa bulawan nga tinday nga baka! Bisan pa sang ila paglapas, ginpapati nila ang ila kaugalingon nga dampig sila gihapon kay Jehova. Gintawag pa gani ni Aaron ang ila pagsimba sa tinday nga baka nga “kapiestahan para kay Jehova”! Ano ang ginhimo ni Jehova? Para kay Jehova, ginluiban sia sang iya katawhan. Ginsilingan ni Jehova si Moises nga ang katawhan “naghimo sing malain” kag “nagsipak [sila] sa dalanon nga ginsugo [Niya] nga laktan nila.” Bangod sa “daku nga kaakig” ni Jehova, daw gusto niya papason ang bag-o pa lang nga pungsod sang Israel.—Ex. 32:5-10.

15, 16. Paano ginpakita ni Moises kag ni Aaron nga dampig sila kay Jehova? (Tan-awa ang piktyur sa umpisa sini nga artikulo.)

¹⁵ Wala ginpapas ni Jehova ang mga Israelinhon. Bangod sang iya kaluoy, ginhatagan niya sing kahigayunan ang iya mainunungon nga mga sumilimba nga magdampig sa iya. (Ex. 32:14) Sang makita ni Moises nga nagasininggit, nagakinanta, kag nagasinaot ang katawhan sa atubangan sang diosdios, gindugmok niya sing mapino ang bulawan nga tinday nga baka. Dayon nagsiling sia: “Sin-o ang dampig kay Jehova? Magpalapit kamo sa akon!” Kag “ang tanan nga Levinhon nagtipon” kay Moises.—Ex. 32:17-20, 26.

¹⁶ Bisan pa nadalahig si Aaron sa paghimo sang diosdios, naghinulsol sia kag nag-upod sia sa iban pa nga Levinhon sa pagdampig kay Jehova. Ginpakita sining mga mainunungon nga dampig sila kay Jehova kag gusto nila magpalayo sa mga makasasala. Maalamon gid ang ila ginhimo. Sadto nga adlaw, linibo ang napatay bangod sang pagsimba sa diosdios. Pero, ang mga nagdampig kay Jehova  ginpromisahan niya sing pagpakamaayo.—Ex. 32:27-29.

17. Ano ang ginatudlo sa aton sang ginsiling ni Pablo parte sa bulawan nga tinday nga baka?

¹⁷ Ginpatuhuyan ni apostol Pablo ang parte sa bulawan nga tinday nga baka kag nagpaandam sia: “Ini nga mga hitabo nangin mga halimbawa sa aton, agod indi kita . . . magsimba sa mga diosdios, subong sang ginhimo sang iban sa ila. Ginsulat ini [nga mga halimbawa] subong paandam sa aton nga nagakabuhi sa katapusan sang sistema sang mga butang. Gani ang nagahunahuna nga nagatindog mag-andam nga indi sia matumba.” (1 Cor. 10:6, 7, 11, 12) Ginpadaku ni Pablo nga bisan ang matuod nga mga sumilimba mahimo madalahig sa paghimo sang sala. Ang mga nagpadala sa pagsulay mahimo maghunahuna nga may maayo gihapon sila nga kaangtanan kay Jehova. Pero bisan pa nagasiling kita nga gusto naton mangin abyan si Jehova ukon mainunungon kita sa iya, wala ini nagakahulugan nga nahamut-an na kita ni Jehova.—1 Cor. 10:1-5.

18. Ano ang mahimo mangin rason nga mapahilayo kita kay Jehova, kag ano ang resulta?

¹⁸ Sang wala dayon makapanaug si Moises halin sa Sinai, nabalaka ang mga Israelinhon. Subong, kon magbatyag kita nga daw naulihi ang pag-abot sang adlaw sang paghukom ni Jehova kag sang bag-ong kalibutan, mahimo mabalaka man kita. Mahimo maghunahuna kita nga madugay pa ang katumanan sang mga promisa ni Jehova ukon indi na ini matuman. Kon pabay-an naton ini nga panghunahuna, mahimo unahon naton ang aton personal nga mga handum imbes nga ang kabubut-on ni Jehova. Sa ulihi, mapahilayo kita kay Jehova kag makahimo kita sang mga butang nga wala gid naton mapensaran nga himuon sang mabakod pa ang aton espirituwalidad.

19. Ano ang dapat naton pirme dumdumon, kag ngaa?

¹⁹ Dapat naton pirme dumdumon nga gusto ni Jehova nga tumanon naton sia sing bug-os tagipusuon kag sia lang ang simbahon. (Ex. 20:5) Kon indi naton paghimuon ang kabubut-on ni Jehova, ginahimo na naton ang kabubut-on ni Satanas, kag makahalit ini sa aton. Gani, nagsiling si Pablo: “Indi mahimo nga mag-inom kamo sa kopa ni Jehova kag sa kopa sang mga demonyo; indi mahimo nga magkaon kamo sa ‘lamesa ni Jehova’ kag sa lamesa sang mga demonyo.”—1 Cor. 10:21.

20. Bisan pa makasala kita, paano kita ginabuligan ni Jehova?

²⁰ Si Cain, si Solomon, kag ang mga Israelinhon sa Bukid Sinai may kahigayunan nga ‘maghinulsol kag magbag-o.’ (Binu. 3:19) Maathag nga wala dayon ginasikway ni Jehova ang mga nakasala. Ginpatawad pa gani niya si Aaron. Subong, mahimo kita paandaman ni Jehova paagi sa mga kasaysayan nga narekord sa Biblia, mga publikasyon nga nabase sa Biblia, ukon laygay halin sa aton mga kauturan. Kon pamatian naton ini, kaluuyan gid kita ni Jehova.

21. Ano ang dapat naton himuon kon ginatilawan ang aton pagkamainunungon kay Jehova?

²¹ May katuyuan ang wala tupong nga kaayo ni Jehova. (2 Cor. 6:1) Ginahatagan kita sini sing kahigayunan nga “sikwayon ang pagkadidiosnon kag kalibutanon nga mga kailigbon.” (Basaha ang Tito 2:11-14.) Samtang nagakabuhi kita “sa tunga sining karon nga sistema sang mga butang,” matilawan gid ang aton pagkamainunungon kay Jehova. Mangin handa kita pirme nga magdampig sa iya, bangod si Jehova nga Dios ang dapat naton kahadlukan, alagaron, kag unungan!—Deut. 10:20.