1, 2. (a) Dahaka dainai Iehova ena kahanai ita noho be aonega karana? (b) Inai atikol ai dahaka do ita herevalaia?

IEHOVA kahirakahira ita noho be aonega karana. Badina ia sibona be siahu, aonega bona lalokau Diravana! Daika be Iehova ena kahanai do ia noho? (Sal. 96:4-6) Momokani, Dirava ena hesiai taudia haida be Dirava idia badinaia lasi dainai hahetoho lalonai idia moru.

² Inai atikol lalonai, haida edia sivarai do ita herevalaia. Idia ese Iehova idia hesiai henia to ia ura henia lasi karadia idia karaia. Unai sivarai lalonai idia noho mai anina bada gaudia ese ita do ia durua Iehova ita badinaia noho totona.

3. Dahaka dainai Iehova ia ura Kaino ia durua, bona ia dekenai dahaka Ia gwau?

³ Kaino ena haheitalai mani ita laloa. Ia be dirava ma haida ia tomadiho henia lasi to Iehova sibona ia tomadiho henia. To, Iehova be Kaino ena tomadiho karana ia abia dae lasi. Badina iena kudouna ai kara dika be uhe bamona idia tubu noho. (1 Ioa. 3:12) Unai dainai Iehova ese Kaino dekenai ia gwau: “Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho,  oi do ia hadikaia totona. Kara dika be ia ura biagua oi, to oi ese do oi halusia be namo.” (Gen. 4:6, 7) Unai be hegeregere Iehova be Kaino dekenai ia gwau, “Bema oi helalo-kerehai bona egu kahanai oi noho, lau danu be emu kahanai do lau noho.”

4. Kaino be Iehova ena lalonamo ia abia diba, to dahaka ia karaia?

⁴ Kaino be Iehova ena lalonamo ia abia diba bema ena lalohadai kereredia ia hamaoromaoroa. To Kaino be ia gwau-edeede. Bona lalohadai kererena bona ura dikadia dainai ia kara dika. (Iam. 1:14, 15) Kaino ena matamata negana ai, reana ia laloa Iehova do ia gwau-edeede henia lasi. To, gabeai ia laloa lasi karana ia karaia​—Dirava ia gwau-edeede henia bona ena tadikakana ia alaia mase!

5. Edena bamona lalohadai dikadia dainai Iehova ena lalonamo ita haboioa diba?

⁵ Kaino bamona, hari Keristani tauna ta be dala kererena ia badinaia diba ena be ia gwau ia be Iehova ia tomadiho henia. (Iuda 11) Hegeregere, matabodaga urana ia abia diba, ia mataganigani, eiava ena Keristani tadikaka ta ia inai henia diba. (1 Ioa. 2:15-17; 3:15) Unai lalohadai dikadia ese kara dika badadia ia havaraia diba. To, reana ta be haroro gaukara ia goadalaia noho bona hanaihanai kongrigeisen heboudia dekenai ia lao. Taunimanima be iseda lalohadai bona kara do idia diba lasi, to Iehova be gau ibounai ia itaia bona ia diba ita be mai kudouna ibounai ida iena kahanai ita noho eiava lasi.​—Ieremia 17:9, 10 duahia.

6. Bema Iehova ena kahanai ita noho, edena dala ai ita ia durua diba kara dika lalohadaidia ita “halusia” totona?

⁶ To, Iehova be ita dekenai ia hesiku haraga lasi. Bema ta be ia karaia karana dainai Dirava amo ia daudau, Iehova be ia dekenai ia gwau: “Lau dekenai do [oi] giroa mai, bona lau be [oi] dekenai do lau giroa.” (Mal. 3:7 NWT) Hegeregere, iseda manoka gaudia hanaia totona ita hekwarahi neganai, Iehova ia ura kara dika ita dadaraia. (Isa. 55:7) Bema unai ita karaia Iehova be iseda kahanai do ia noho, bona ia gwauhamata ita do ia durua kara dika lalohadaidia “do [ita] halusia” totona.​—Gen. 4:7.

7. Edena dala ai Solomona ese ena hetura karana namona Iehova ida ia haboioa?

⁷ King Solomona ena haheitalai amo gau momo do ita dibaia. Solomona ia matamata negana amo, ia be hanaihanai Iehova amo heduru ia tahua. Dirava ese Solomona dekenai aonega bada ia henia bona ia ia abia hidi Ierusalema ai dubu helaga badana do ia haginia totona. To Solomona ese ena hetura karana Iehova ida ia haboioa. (1 Kin. 3:12; 11:1, 2) Dirava ena Taravatu ia gwau, Heberu king tauna ta ese “adavana momo do ia abia lasi, idia ese Lohiabada dekena amo iena lalona do idia veria garina.” (Deu. 17:17) Solomona be unai taravatu ia badinaia lasi, bona hahine 700 ia adavaia. Ma danu hesiai hahine ibounai 300 ia adavaia. (1 Kin. 11:3) Ia adavaia hahine momo be Israela hahinedia lasi, idia be dirava koikoidia idia tomadiho henia. Unai dainai, Solomona ese Dirava ena taravatu idau bese hahinedia adavaia lasi taravatuna, ia utua.​—Deu. 7:3, 4.

8. Solomona be dahaka kara dikana ia karaia?

⁸ Solomona be metairametaira Iehova ena taravatu ia dadaraia matamaia bona kara dika rohorohona ia karaia. Solomona ese hahine diravana, Asataroto, totona boubou patana ta ia haginia bona dirava koikoina Kemoso totona boubou patana ma ta ia haginia. Unuseniai iena adavana iboudiai ida kaivakuku idia tomadiho henia. Solomona ese unai boubou patadia be Ierusalema ena dina daekau kahanai ia noho ororo dekenai ia haginidia, Iehova ena dubu helaga ia haginia gabunai! (1 Kin. 11:5-8; 2 Kin. 23:13) Solomona be sibona ia koia reana ia laloa ia karaia kara dikana be  Iehova ese do ia laloa lasi badina dubu helaga ai boubou gaudia ia do henia noho.

9. Solomona be Dirava ena hereva ia badinaia lasi dainai dahaka ia vara?

⁹ To, Iehova be Solomona ena kara dika ia itaia vadaeni. Baibel ia gwau: “Lohiabada, Israela ena Dirava ese nega rua Solomona dekenai ia hedinarai, bona ia ese Solomona ia oda henia idau bese edia dirava do ia tomadiho henia lasi. To Solomona ese Lohiabada ena oda ia kamonai henia lasi.” Unai dainai, Dirava ena lalonamo bona heduru ia abia lasi. Bona Solomona ena bese ibounai be Israela ena basileia lalonai idia lohia lasi bona lagani momo lalonai hisihisi idia mamia.​—1 Kin. 11:9-13.

10. Dahaka ese iseda Dirava badinaia karana ia hadikaia diba?

¹⁰ Solomona bamona, bema Iehova ena hakaua herevadia idia laloa bada lasi o matauraia lasi taudia ita bamoa, unai ese iseda hetura karana Dirava ida ia hadikaia diba. Haida be reana kongrigeisen taudia idia bamoa to reana edia abidadama be ia goada lasi. Idia haida be Iehova idia tomadiho henia lasi varavara taudia, neiba, gaukara turadia, o sikuli turadia. Herevana dahaka, to bema ita bamoa momo taudia be Iehova ena hakaua herevadia idia laloa bada lasi, idia ese iseda Dirava badinaia karana idia hadikaia diba.

11. Dahaka ese ita ia durua diba iseda hebamo karana dekenai abia hidi maorona ita karaia totona?

¹¹ 1 Korinto 15:33 duahia. Taunimanima momo be mai edia kara namodia haida, bona Iehova idia tomadiho henia lasi taudia momo be kara dikadia lalonai idia vareai lasi. Bema kongrigeisen lalonai bona murimuri ai oi dibaia taudia be unai bamona, oi laloa idia be hebamo namona, a? Sibona oi nanadaia, idia lau bamoa neganai egu hetura karana Iehova ida do ia hadikaia, a? Egu hetura karana Dirava ida do ia hagoadaia, a? Dahaka gaudia idia laloa bada? Hegeregere, idia be dabua, moni, kompiuta, mobael fon bona tablet, moale karadia, o unai bamona gaudia ma haida idia herevalaia momo, a? Edia herevahereva lalonai ma haida hahisia herevadia o hevaseha dikadia idia gwauraia, a? Iesu ia gwau: “Kudouna dekenai idia honu gaudia be uduna ese ia gwauraia.” (Mat. 12:34) Bema oi itaia oi bamoa taudia edia kara be emu hetura karana Iehova ida ia hadikaia, aonega karana be idia oi bamoa momo lasi bona bema hegeregere unai bamona hetura karana oi hadokoa.​—Aon. 13:20.

12. (a) Israela taudia be Aigupito idia rakatania murinai, Iehova be idia dekenai dahaka ia gwau? (b) Israela taudia be Dirava ena oda herevana idia kamonai neganai, dahaka idia gwau?

¹² Iehova ese Israela taudia be Aigupito amo ia ruhaia ena sivarai amo diba ma haida ita abia diba. Taunimanima be Sinai Ororo dekenai idia haboua. Unuseniai, Iehova be hoa dalanai ia hedinarai. Ori koremana ta ia hedinarai. Iehova ese guba rahurahu, kevaru, kwalahu bona kibi ta ena regena  bada herea ia havaraia. (Eso. 19:16-19) Unai nega ai, Israela taudia idia kamonai Iehova be idia dekenai ia gwau: “Lau be Iehova emui Dirava, lau ura lau sibona umui tomadiho henia.” Idia dekenai ia gwauhamata, ia idia lalokau henia bona ena oda herevana idia badinaia taudia do ia hanamoa. (Esodo 20:1-6 duahia.) Unai be hegeregere, Iehova be idia dekenai ia gwau: “Bema umui be egu kahana ai umui mai, lau be umui ida do lau noho.” Iehova Dirava ena gwauhamata herevana dainai, dahaka do oi karaia? Israela taudia ese idia gwauraia herevana do oi gwauraia danu. Idia ibounai be “mai lalotamona ida idia gwau, “Iehova ese ia gwauraia hereva ibounai be mai ura ida do ai badinaia.” (Eso. 24:3 NWT) To daudau lasi murinai, Israela taudia dekenai ia vara gauna ese edia badinaia karana ia tohoa.

13. Dahaka ese Israela taudia edia badinaia karana ia tohoa?

¹³ Israela taudia be ori koremana, kevaru bona Dirava ena hoa karadia ma haida idia itaia neganai idia gari dikadika. Idia noinoi dainai Mose ese edia hereva ia abia dae bona Sinai Ororo dekenai ia daekau bona idia totona Iehova ia hereva henia. (Eso. 20:18-21) Mose be ororo ataiai ia noho bona ia diho mai haraga lasi. Israela taudia idia laloa idia be dala lasi heduru idia abia totona, badina taunimanima idia noho lasi gabuna ai, edia gunalaia tauna be idia danu ia noho lasi. Israela taudia be Mose sibona dekenai idia tabekau. Idia lalohekwarahi dainai, Arona idia hamaoroa, idia gwau: “Mose, Aigupito dekena amo ai ia hakaua tauna dekenai, be dahaka ia vara ai diba lasi. Unai dainai kaivakuku do oi karaia, ia ese ai do ia hakaua totona.”​—Eso 32:1, 2.

14. Israela taudia be edena dala ai idia sibona idia koia, bona Iehova be dahaka ia karaia?

¹⁴ Taunimanima idia diba, kaivakuku tomadiho henia karana be kara dika badana, Iehova ena matanai. (Eso 20:3-5) To gabeai, golo amo idia karaia boromakau idia tomadiho henia! Herevana unai gwau-edeede karana idia karaia, to edia kudouna ese idia ia koia badina idia laloa idia be Iehova ena kahanai idia do noho. Hegeregere, Arona ese unai kaivakuku tomadiho henia karana ia gwauraia, “Iehova dekenai aria ta”! To, Iehova ena hemami be edena bamona? Ia mamia ia idia koia. Iehova ese Mose ia hamaoroa, ena taunimanima be “idia kara dika vadaeni” bona “[Ia] oda henidia dalana be idia rakatania haraga vadaeni.” Iehova ia “badu” dikadika dainai, ia ura Israela bese matamatana ia hadikaia ore.​—Eso 32:5-10.

15, 16. Edena dala ai Mose bona Arona ese idia hahedinaraia idia be Iehova ena kahana ai idia gini? (Laulau ginigunana herevalaia.)

¹⁵ To gabeai, Iehova be ena lalona ia haidaua bona Israela besena ia hadikaia lasi. Ena hebogahisi karana ese mai momokani ida ia idia tomadiho henia taudia dekenai dala ia kehoa unai amo ena kahana ai idia gini diba. (Eso 32:14) Mose ia itaia taunimanima be sibona edia kara idia biagua lasi​—kaivakuku vairanai idia boiboi, ane idia abia bona idia mavaru​—vadaeni Mose be golo kaivakuku ia makohia maragimaragi ela bona pauda ai ia lao. Bena ia boiboi, ia gwau: “Lohiabada ena kahana taudia be lau dekenai do umui haboua mai.” Vadaeni, “Levi ena natuna taudia ibounai be Mose dekenai idia haboua.”​—Eso 32:17-20, 26.

¹⁶ Herevana, Arona ese golo kaivakuku ia karaia to gabeai ia helalo-kerehai bona Levi taudia ida Iehova ena kahanai idia gini. Dirava badinaia taudia be Iehova ena kahanai idia gini sibona lasi to idia ura lasi kara dika idia karaia taudia idia bamoa. Unai be abia hidi maorona. Unai dina ai, Dirava ese taunimanima tausen momo ia hamasedia, badina idia be kaivakuku idia tomadiho henia. To, Iehova ese ena kahanai idia gini taudia dekenai ia gwauhamata idia do ia hanamoa.​—Eso. 32:27-29.

17. Paulo ese ia herevalaia golo kaivakuku amo dahaka ita dibaia?

 ¹⁷ Golo kaivakuku sivaraina amo dahaka ita dibaia? Aposetolo Paulo ia gwau: “Vadaeni unai gaudia be haheitalai ita dekenai . . . Namo lasi kaivakuku umui tomadiho henia, idia haida idia karaia bamona. Unai gaudia be idia dekenai idia vara bona idia be haheitalai bamona, bona unai gaudia idia torea, inai nega oromana ena dokona ai ita noho taudia idia hadibaia totona. Unai dainai, bema tau ta ia laloa ia gini goada noho, namona be ia naria namonamo, dika ia moru.” (1 Kor. 10:6, 7, 11, 12) Paulo ese ia hahedinaraia, Dirava idia tomadiho henia taudia be kara dika badadia lalonai idia vareai diba. Hahetoho lalonai idia moru taudia idia laloa Iehova be idia ia lalonamo henia. To, bema ta ia ura Iehova ena turana ai ia lao o taunimanima vairanai ia hahedinaraia ia be Dirava badinaia tauna, unai ese ia hahedinaraia lasi ia be Iehova ese ia lalonamo henia.​—1 Kor. 10:1-5.

18. Dahaka ese ita ia veria diba Iehova amo ita daudau totona, bona ena dika be dahaka?

¹⁸ Mose be Sinai ororona amo ia diho mai haraga lasi dainai, Israela taudia idia lalohekwarahi. Unai hegeregerena, hari Keristani taudia be idia lalohekwarahi diba, badina idia laloa Iehova ena hahemaoro dinana bona tanobada matamatana be do ia mai haraga lasi. Reana, idia laloa Dirava ena gwauhamata be do ia vara haraga lasi o do ia guguru lasi. Bema ita naria namonamo lasi, unai bamona lalohadai ese iseda lalona ia veria diba, unai amo tauanina ena ura gaudia do ita atoa guna, to Dirava ena ura do ita laloa bada lasi. Bona metairametaira, Iehova amo do ita daudau. Bema ita laloa iseda hetura karana Dirava ida be ia goada dainai hahetoho lalonai do ita moru lasi, kara dikadia lalonai ita vareai diba.

19. Namona be dahaka ita laloatao, bona dahaka dainai?

¹⁹ Namona be ita laloatao, Iehova be ia ura mai kudouna ibounai ida ia ita badinaia bona ia sibona ita tomadiho henia. (Eso. 20:5) Bema ta be Iehova tomadiho henia karana ia badinaia lasi, unai ese ia hahedinaraia ia be Satani ena ura ia badinaia noho, bona unai ese dika sibona do ia havaraia. Unai dainai, Paulo ese ita ia hadibaia, ia gwau: “Iehova ena kapusi bona demoni edia kapusi be nega tamona umui inua diba lasi. Bona “Iehova ena pata” ai bona demoni edia pata ai nega tamona umui aniani diba lasi.”​—1 Kor. 10:21.

20. Kerere ita karaia neganai, Iehova be edena dala ai ita ia durua diba?

²⁰ Kaino, Solomona, bona Sinai Ororona ai Israela taudia edia sivarai amo mai anina bada gauna ta ita dibaia. Idia ta ta be edia kara dikadia amo idia ‘helalo-kerehai bona edia kara idia haidaua’ diba. (Kara 3:19) Oibe, Iehova be dala kererena ai idia raka taudia dekenai ia hesiku haraga lasi. Arona dekenai ia vara gauna amo ita diba, Iehova ese ena dika ia gwauatao. Hari, Iehova be Baibel sivaraidia, Baibel buka bona magasin o Keristani tadikaka taihu amo, ita dekenai sisiba herevadia ia henia. Unai sisiba herevadia ita badinaia neganai, Iehova ese ita do ia hebogahisi henia.

21. Iseda mauri ai idia vara gaudia ese eda Iehova badinaia karana idia tohoa neganai, dahaka ita karaia be namo?

²¹ Iehova ena hebogahisi be mai ena badina. (2 Kor. 6:1) Unai ese ita ia durua “Dirava ia ura lasi karadia bona tanobada ena ura idauidau do ita dadaraia” totona. (Tito 2:11-14 duahia.) Hari “inai nega oromana lalonai,” eda mauri ai idia vara gaudia ese iseda Iehova tomadiho henia karana idia tohoa diba. Namona be ita hegaegae iena kahana ai ita noho totona, bona ‘Iehova iseda Dirava ita gari henia, ia ita hesiai henia, ia ita badinaia momokani’!​—Deu. 10:20, NWT.