1, 2. (a) Ɛbɛ yɔɔ pɩwɛ ɖeu pɩdɩɩfɛyɩ se ɛyʋ ɛwɛɛ Yehowa hɔɔlʋʋ yɔɔ? (b) Tɔm ndʋ taa ɖɩkaɣ tazʋʋ ñʋʋ kʋnɛ kɩ-taa?

PƖWƐ ɖeu pɩdɩɩfɛyɩ se ɛyʋ ɛñɔɔnɩ Yehowa kpam. Nɔɔyʋ fɛyɩnɩ ɖoŋ, lɛɣtʋ nɛ sɔɔlɩm nɛ pɩtalɩ ɖɛ-Ɛsɔ! Ða-taa anɩ tɩsɔɔlɩ se ɛwɛɛ ɛ-hɔɔlʋʋ yɔɔ? (Keɣa 95:4-6) Paa mbʋ yɔ, kala naayɛ taa lɛ, Ɛsɔ sɛyaa nabɛyɛ tɩpɩzɩ nɛ pala mbʋ.

² Tɔm ñʋʋ kʋnɛ kɩ-taa ɖɩkaɣ yɔɔdʋʋ kɩɖaŋ weyi ɩwɩlɩɣ se nabɛyɛ maɣzaɣ se pɛwɛ Yehowa hɔɔlʋʋ yɔɔ, ɛlɛ toovenim taa lɛ, paawɛɛ nɛ palakɩ mbʋ pɩɖʋwaɣ-ɩ ɖɩwɩzɩyɛ yɔ, ɩ-tɔm. Ðɩkaɣ kpɛlɩkʋʋ lɔŋ sakɩyɛ kɩɖaŋ ɛnɩ ɩ-taa nɛ pɩsɩnɩ-ɖʋ nɛ ɖɩñɔɔnɩ Yehowa kpam.

3. (a) Ɛbɛ yɔɔ Yehowa kaayɔɔdɩnɩ Kayɩnɩ? (b) Nɛ suwe eheyi-i?

³ Maɣzɩ Kayɩnɩ kɩɖaʋ yɔɔ nɛ ŋna. Ɛtɩyɔɔdɩ se ɛsɛɣ Ɛsɔ nɔɔyʋ nɛ pɩtasɩnɩ Yehowa. Paa mbʋ yɔ, Yehowa tɩmʋ ɛ-sɛtʋ. Ɛsɔ kaana wɛtʋ kɩdɛkɛdɩtʋ natʋyʋ ɛ-laŋɩyɛ taa. (1 Yoh. 3:12) Peeɖe Yehowa heyi-i se: “Ye ña-taa ɛwɛ ɖeu, ŋŋkʋsʋʋ ña-ñʋʋ? Ɛlɛ ye ña-taa ɛfɛyɩ ɖeu kɔyɔ, kɩwɛɛkɩm wɛ ñɔ-nɔnɔɔ taa, pi-liu tɛɛ kɔtʋʋnɩ-ŋ, nɛ pɩwɛnɩ-ŋ se ŋñazɩ-pʋ.” (Kiɖe 4:6, 7) Tobi lɛ, Yehowa kaawɛɛ nɛ eheyiɣ Kayɩnɩ se: “Ye ŋlɛɣzɩ ñɛ-wɛtʋ nɛ ŋwɛɛ  mɔ-hɔɔlʋʋ yɔɔ yɔ, ma ɖɔɖɔ mɛwɛɣ ñɔ-hɔɔlʋʋ yɔɔ.”

4. Alɩwaatʋ ndʋ Yehowa kaaha Kayɩnɩ waɖɛ se ɛwɛɛ ɛ-hɔɔlʋʋ yɔɔ yɔ, ɛbɛ ɛlɛ laba?

⁴ Ye Kayɩnɩ eewelisini Yehowa yɔ, ɛ-tɔm kaakɛdɩnɩ-ɩ. Ɛlɛ ɛtɩmʋ Yehowa lɔŋ tasʋʋ. Ɛ-lɩmaɣza kɩdɛkɛda kɔma nɛ alʋlɩ lakasɩ kɩdɛkɛdɩsɩ. (Yak. 1:14, 15) Kayɩnɩ kaakɛ pɩɣa evelaɣ lɛ, pɩtɩla wiɖiyi ɛtɩmaɣzɩ kaaʋ se ɛkaɣ kaɖɩnʋʋ Yehowa. Ɛlɛ alɩwaatʋ wɛɛ nɛ tɩɖɛɣ lɛ, ɛkɔma nɛ ɛla mbʋ ɛtaamaɣzɩ pɩ-yɔɔ kaaʋ yɔ: Ɛkaɖɩnɩ Yehowa nɛ ɛkʋ e-neu.

5. Lɩmaɣza wena wɛnʋʋ pɩzɩɣ piyele nɛ Yehowa ɛɛmʋʋ ɖɛ-sɛtʋ?

⁵ Ɛzɩ Kayɩnɩ yɔ, sɔnɔ Krɩstʋ tʋ nɔɔyʋ pɩzɩɣ nɛ ɛpaɣzɩ wɛnʋʋ lɩmaɣza kɩdɛkɛda naayɛ nɛ halɩ ɛmaɣzɩ se eɖiɣni Yehowa sɛʋ. (Yud. 11) Nɔɔyʋ pɩzɩɣ nɛ ɛpaɣzɩ wɛnʋʋ wezuu kɩdɛkɛdʋʋ caɣʋ lɩmaɣza, yaa ɛpaɣzɩ e-koobu nɔɔyʋ paɖʋʋ. (1 Yoh. 2:15-17; 3:15) Nɔɔyʋ ɛwɛnɩ lɩmaɣza ana yɔ, pɩpɩzɩɣ pituzi-i nɛ ɛla kɩdɛkɛdɩm. Nɔɔyʋ pɩzɩɣ nɛ ɛwɛɛnɩ lɩmaɣza ana, ɛlɛ ɛwɛ kpekpeka tɔm susuu taa nɛ ɛɛfɛɣ kediɣzaɣ nakɛyɛ ɖɔɖɔ. Ɛyaa lalaa ɛɛnaɣ ndʋ ɖɩmaɣzɩɣ yaa mbʋ ɖɩlakɩ nabʋyʋ taa yɔ, ɛlɛ Yehowa naɣ pɩtɩŋa nɛ ɛsɩma ɖɔɖɔ se ɖɩwɛ ɛ-hɔɔlʋʋ yɔɔ yaa ɖɩfɛyɩ.​—Kalɩ Yereemii 17:9, 10.

6. Ye ɖɩwɛ Yehowa hɔɔlʋʋ yɔɔ yɔ, ɛzɩma ɛsɩɣnɩ-ɖʋ se ‘ɖɩñazɩ’ mbʋ pituzuu-ɖʋ se ɖɩtɔlɩ kɩdɛkɛdɩm taa yɔ?

⁶ Paa mbʋ yɔ, Yehowa ɛɛlɔʋ lidaʋ ŋgʋ ɛwɛnɩ ɖɔ-yɔɔ yɔ lɛɛ lɛɛ. Ye nɔɔyʋ ɛpaɣzɩ nɩŋgbanzɩ nasɩyɩ kpɛzʋʋ nɛ ɛñɩnɩɣ se eposini Ɛsɔ yɔ, Yehowa heyiɣ-i lɛɛ lɛɛ se: ‘Pɩsɩ mɔn-cɔlɔ, nɛ mankaɣ pɩsʋʋ ñɔ-cɔlɔ.’ (Mal. 3:7) Kɔzɩ kɔzɩ alɩwaatʋ ndʋ ɖɩkatɩɣ kala naayɛ yɔ, Yehowa sɔɔlaa se ɖɩpaɖɩ kɩdɛkɛdɩm. (Iza. 55:7) Ye ɖɩlakɩ mbʋ yɔ, ɛkaɣ wɛʋ ɖɔ-hɔɔlʋʋ yɔɔ nɛ ɛkpazɩ-ɖʋ ɖoŋ fezuu taa, lɩmaɣza taa nɛ tomnaɣ yɔɔ nɛ ɖɩpɩzɩ ‘ɖɩñazɩ’ mbʋ pɩpɩzɩɣ nɛ pituzi-ɖʋ nɛ ɖɩtɔlɩ kɩdɛkɛdɩm taa yɔ.​—Kiɖe 4:7.

7. Ɛzɩma pɩlaba nɛ Salomɔɔ lesi taabalɩyɛ kɩbanɖɛ nɖɩ ɖɩɩwɛ ɛ nɛ Yehowa pɛ-hɛkʋ taa yɔ?

⁷ Wiyaʋ Salomɔɔ kɩɖaʋ kpɛlɩkɩɣ-ɖʋ lɔŋ sakɩyɛ. Eyeba nɛ Yehowa ɖiyi-i e-evebitu taa. Ɛsɔ ha-ɩ lɛɣtʋ siŋŋ nɛ ɛɖʋ-ɩ tʋmɩyɛ se ɛma templo ŋgʋ kɩ-wayɩ fɛyɩ yɔ Yeruzalɛm tɛtʋ taa. Ɛlɛ Salomɔɔ yeba nɛ taabalɩyɛ nɖɩ ɖɩɩwɛ ɛ nɛ Yehowa pɛ-hɛkʋ taa yɔ ɖɩwɛɛkɩ. (1 Aw. 3:12; 11:1, 2) Ɛsɔ paɣtʋ kaayɔɔdɩ kpayɩ se Yuuda wiyaʋ nɔɔyʋ “etaakuu halaa nɛ ɛkaa,” pɩtɩkɛ mbʋ yɔ, “paawɛkɩ ɛ-laŋɩyɛ.” (Wp. 17:17) Salomɔɔ tɩña Ɛsɔ paɣtʋ, pʋyɔɔ ɛkpaɣ halaa 700. Pɩtasɩ lɛ, ɛɛwɛnɩ ɖɔɖɔ ɖaŋnaa 300. (1 Aw. 11:3) Ɛ-halaa sakɩyɛ taakɛ Izrayɛɛlɩ ñɩma nɛ pɛsɛɣaɣ cɛtɩm ɛsɔnaa. Pɩwɩlɩɣ se Salomɔɔ kaamanɩ ɖɔɖɔ paɣtʋ ndʋ Ɛsɔ kaaɖʋwa se abalaa ɩtaakpaɣ halaa mba patɩkɛ Izrayɛɛlɩ piya yɔ tɩ-yɔɔ.​—Wp. 7:3, 4.

8. Kɩwɛɛkɩm sɔsɔm mbʋ Salomɔɔ laba nɛ ɛɖʋnɩ pana Yehowa?

⁸ Ɛzɩma Salomɔɔ kaawɛɛ nɛ eposuu ɛ-tɩ nɛ Yehowa paɣtʋ pazɩ pazɩ yɔ, piyeba nɛ ɛkɔɔ ɛla kɩwɛɛkɩm sɔsɔm. Salomɔɔ ma ɛsɔ halɩñɩnʋ weyi payaɣaɣ se Astoorɛɛtɩ yɔ altaaru, nɛ ɛma lɛɛkʋ cɛtɩm ɛsɔ weyi payaɣaɣ se Kemɔɔsɩ yɔ, halɩ pɩtɩla pɩtɩkɛ kʋɖʋmʋʋ ɖeke ɛɛma ɛsɔ ɛnʋ. Mbʋ pɩlaba nɛ ɛtɩŋ ɛ-halaa wayɩ nɛ ɛpaɣzɩ sɩɩnaa latʋ. Lone sakɩyɛ kaawɛɛ se ɛpɩzɩɣ nɛ ɛma altaarunaa mba a-taa; ɛlɛ pʋʋ ŋgʋ kɩɩha ɛsa nɛ Yeruzalɛm tɛtʋ ndʋ tɩ-taa ɛɛma Yehowa templo yɔ, kɩ-yɔɔ ɛma altaarunaa mba! (1 Aw. 11:5-8; 2 Aw. 23:13) Pɩtɩla Salomɔɔ peɣzaɣ ɛ-tɩ se ye ewobi pɩ-yɔɔ nɛ ɛlaɣ kɩlaŋ templo taa yɔ, Ɛsɔ taa ɛɛtasɩɣ-ɩ wɩnʋʋ.

9. Salomɔɔ kizaa nɛ ɛtɩña Ɛsɔ paɣtʋ lɛ, ɛbɛ lɩ pɩ-taa?

 ⁹ Ɛlɛ Yehowa eehuuzuu ɛ-ɛsa kɩwɛɛkɩm yɔɔ kaaʋ. Bibl heyiɣ-ɖʋ se: “Mbʋ pʋyɔɔ [Yehowa] hɔyɛ wɩnɩ Salomɔɔ se ɛha siɣye [Yehowa] . . . , weyi ɛwɩlɩ-ɩ ɛ-tɩ tam nabʋlɛ yɔ nɛ ɛɖʋ-ɩ paɣtʋ se ɛtaatɩŋ agbaaɣdaa agɔlɩma wayɩ; nɛ ɛtɩɖɔkɩ paɣtʋ ndʋ [Yehowa] ɖʋ-ɩ yɔ.” Piyeba nɛ samtʋ ndʋ Salomɔɔ haɣaɣ Ɛsɔ yɔ, tɩtɩtasɩ ɛlɛ kɛdɩnʋʋ. Salomɔɔ sɩm wayɩ lɛ, Izrayɛɛlɩ kewiyaɣ tayɩ nɛ awiya wena atɔɔ kewiyitu pʋwayɩ yɔ, akatɩ kala ndɩ ndɩ pɩnzɩ sakɩyɛ.​—1 Aw. 11:9-13.

10. Ɛbɛ pɩzɩɣ nɛ pɩwɛɛkɩ ɖa nɛ Ɛsɔ ɖa-taabalɩyɛ?

¹⁰ Ɛzɩ Salomɔɔ yɔ, ye ɖɩɖʋʋ taabalɩyɛ nɛ ɛyaa mba paañaŋ yaa paanɩɣ Yehowa paɣtʋ taa yɔ, pɩpɩzɩɣ nɛ pɩcamɩ-ɖʋ fezuu taa. Ɛyaa mba, pa-taa nabɛyɛ pɩzɩɣ nɛ pɛwɛɛ ɛgbɛyɛ taa, ɛlɛ pɛfɛyɩ ɖoŋ fezuu taa. Nɛ lalaa ñapɩzɩɣ nɛ pɛkɛ ɖɔ-hɔʋ taa ñɩma, ɖo-kooka taa ñɩma, ɖa nɛ mba ɖɩlakɩ tʋmɩyɛ yɔ, yaa ɖo-sukuli taa taabalaa mba paasɛɣ Yehowa yɔ. Pɩwɩlɩɣ se ye ɖɩɖʋʋ taabalɩyɛ nɛ mba paañaŋ Yehowa paɣtʋ yɔ, alɩwaatʋ kaaɖɛɣ lɛ, papɩzɩɣ peyele nɛ ɖa nɛ Ɛsɔ ɖa-taabalɩyɛ cɛ.

11. Ɛbɛ pɩzɩɣ pɩsɩnɩ-ɖʋ nɛ ɖɩna se pɩpɔzʋʋ se ɖɩcɛ taabalɩyɛ naɖɩyɛ?

¹¹ Kalɩ 1 Kɔrɛntɩ 15:33. Ɛyaa sakɩyɛ wɛnɩ wɛtʋ kɩbandʋ hɔɔlɩŋ nɩɩyɩ taa, nɛ mba pɛfɛyɩ ɛgbɛyɛ taa yɔ, pa-taa sakɩyɛ ɖɔɖɔ ɩɩlakɩ mbʋ pɩkɛ kɩdɛkɛdɩm sɔsɔm yɔ. Ye mbʋ ña-taabalaa ɩwɛɛ, ŋpɩzɩɣ nɛ ŋtɔ se pɛkɛ taabalaa kɩbama toovenim na? Maɣzɩ nɛ ŋna se ɖoŋ weyi ña nɛ wɛ mɩ-taabalɩyɛ kaɣ wɛnʋʋ ña nɛ Ɛsɔ mɩ-taabalɩyɛ yɔɔ. Pakaɣ-ŋ sɩnʋʋ nɛ ña nɛ Ɛsɔ mɩ-taabalɩyɛ ɖɛɛnɩ ɛsɩndaa camɩyɛ na? Ŋsɩm mbʋ pɩwɛ pa-laŋa taa yɔ? Faawɩyɛ ŋgʋ palakɩ yɔ kɩ-taa, wondu kɩfatʋ, liidiye, aleɣya wondu, helim mʋʋ, yaa tomnaɣ yɔɔ ñɩm lɛɛbʋ tɔm pɔyɔɔdʋʋ paa ɛzɩmtaa? Ðoŋ ɖoŋ lɛ, pɔyɔɔdʋʋ tɔm kɩdɛkɛdɩtʋ lalaa yɔɔ yaa kʋzɔɔtʋ tɔm na? Yesu yɔɔdɩ kpayɩ se: “Laŋɩyɛ taa kɩlɩɣnɩ suu nɛ nɔɔ yɔɔdʋʋ.” (Mat. 12:34) Ye ŋnawa se taabalaa mba ŋwɛna yɔ pacamɩɣ taabalɩyɛ nɖɩ ɖɩwɛ ña nɛ Yehowa mɩ-hɛkʋ taa yɔ, pɩcɛyaa se ŋla mbʋ pɩpɔzʋʋ yɔ kpɛdɛyɛ, nɛ ŋcɛ taabalɩyɛ nɖɩ.​—Adu. 13:20.

12. (a) Izrayɛɛlɩ piya tɩɩlɩnɩ yomiye taa Ejipiti lɛ, tɔm ndʋ Yehowa heyi-sɩ kpayɩ? (b) Yehowa pɔzɩ Izrayɛɛlɩ piya se sɩñɔɔnɩ-ɩ kpam lɛ, suwe sicosaa?

¹² Mbʋ pɩtalɩ Izrayɛɛlɩ piya alɩwaatʋ ndʋ sɩtɩɩlɩnɩ yomiye taa Ejipiti yɔ, pɩpɩzɩɣ nɛ pɩkpɛlɩkɩ-ɖʋ lɔŋ lɛɛŋ. Samaɣ kaakpeɣli Sinayii pʋʋ tɛɛ nɛ Yehowa tɩŋnɩ  piti lakasɩ nasɩyɩ yɔɔ nɛ ɛwɩlɩ-kɛ se ɛwɛ kɔ-cɔlɔ. Mɩndʋ kaahuuzi Sinayii pʋʋ ŋgʋ kɩ-yɔɔ. Yehowa yeba nɛ tɛʋ paɣzɩ nazʋʋ nɛ kɩñɩlɩsɩɣ nɛ panɩɣ ɖɔɖɔ nabʋyʋ taŋ ɛzɩ pahʋlʋʋ nɔndɔʋ ɖoŋ yɔ. (Ejl. 19:16-19) Peeɖe Yehowa lɩzɩ ɛ-tɩ nɛ ɛwɩlɩ Izrayɛɛlɩ piya se ɛkɛ “Ɛsɔ weyi ɛwɛ sʋsɩ yɔ” yaa weyi ɛñɩnɩɣ se pɔñɔɔnɩ e-ɖeke yɔ. Eheyi-sɩ se ɛnʋ ñɔʋnɩ mba pɔsɔɔlɩ-ɩ nɛ pɔɖɔŋ ɛ-paɣtʋ yɔɔ yɔ. (Kalɩ Ejipiti Lɩʋ 20:1-6.) Toovenim taa lɛ, Yehowa caɣ se eheyi Izrayɛɛlɩ piya se: “Ye ɩwɛ mɔ-hɔɔlʋʋ yɔɔ yɔ, ma ɖɔɖɔ mankaɣ wɛʋ mɩ-hɔɔlʋʋ yɔɔ.” Ye ña Yehowa kaaheyaa se ɛkaɣ ñɔ-cɔlɔ wɛʋ, ɛzɩma ŋŋlaba? Pɩtʋʋ fɛyɩ se ŋŋlabɩ ɛzɩ Izrayɛɛlɩ piya yɔ. Samaɣ kpeekpe “kpɛndɩ nɔɔ kʋɖʋmaɣ nɛ kocosi se: ‘[Yehowa] tɔm ndʋ yɔ, ɖɩkaɣ labʋ ti-kpeekpe tɩ-yɔɔ.’” (Ejl. 24:3) Ɛlɛ pitileɖi lɛ, nabʋyʋ la, nɛ pɩtakɩ Izrayɛɛlɩ piya siɣsiɣ wɛtʋ siŋŋ.

13. Wɛtʋ ndʋ takɩ Izrayɛɛlɩ piya siɣsiɣ wɛtʋ?

¹³ Ɛzɩma Izrayɛɛlɩ piya kaana mɩndʋ tibi pʋʋ yɔɔ nɛ ɛsɔdaa yu kpemm, tɛʋ nazɩɣ nɛ sɩna ɖɔɖɔ piti lakasɩ lɛɛsɩ yɔ, piyeba nɛ sɔɔndʋ kpa-sɩ siŋŋ. Peeɖe sɩpɔzɩ Moyizi nɛ ɛlɛ tisi se ewoki Sinayii pʋʋ ñʋʋ taa nɛ ɛyɔɔdɩnɩ Yehowa sɩ-hɩɖɛ taa. (Ejl. 20:18-21) Moyizi kpa pʋʋ ñʋʋ taa lɛ, etitii lɔŋ. Ɛzɩ sɔɔndʋ kaapaɣzɩ Izrayɛɛlɩ piya kpaʋ kañɩmbusuu taa peeɖe se pe-ɖiyiyu kɩbanʋ tɩtasɩ pɔ-cɔlɔ wɛʋ na? Pɩwɩlɩɣ se alɩwaatʋ ndʋ Moyizi wɛɣ samaɣ cɔlɔ yɔ, kɛwɛɣnɩ tisuu nɛ alɩwaatʋ ndʋ ɛɛwɛɣ yɔ lɛ, ke-tisuu paɣzɩɣ hɛʋ. Pʋyɔɔ pɔpɔzɩ Aarɔɔnɩ se: “Lu-ɖʋ [ɛsɔ] nɔɔyʋ nɛ ɛɖɛɛ ɖɔ-nɔɔ, mbʋ pʋyɔɔ yɔ Moyizi weyi ɛlɩzɩ-ɖʋ Ejipiti yɔ, ɖɩɩsɩŋ se ɛ-tɔm tɛmnɩ we.”​—Ejl. 32:1, 2.

14. (a) Alɩwaatʋ ndʋ Izrayɛɛlɩ piya sɛɣaɣ sika neɣye yɔ, suwe sipeɣzaɣ sɩ-tɩ nɛ sɩyɔɔdʋʋ? (b) Nɛ suwe Yehowa ñamaɣzaa?

¹⁴ Samaɣ kaatɛm sɩm se Yehowa tɩsɔɔlɩ sɩɩnaa latʋ kaaʋ. (Ejl. 20:3-5) Paa mbʋ yɔ, pitileɖi lɛ, kapaɣzɩ sɛʋ sika neɣye. Paa Izrayɛɛlɩ piya kaanawa se sɩmanɩ Yehowa paɣtʋ yɔɔ yɔ, sipeɣzaɣ sɩ-tɩ nɛ sɩyɔɔdʋʋ se Yehowa hɔɔlʋʋ yɔɔ sɩwɛɛ. Halɩ Aarɔɔnɩ ya sika neɣye sɛtʋ ndʋ se “[Yehowa] hɩɖɛ ɖʋʋ kazandʋ!” Suwe Yehowa maɣzaa? Ɛmaɣzaa se samaɣ lesi ke-siɣsiɣ wɛtʋ. Eheyi Moyizi se “kalabɩ kɩwɛɛkɩm” nɛ “[kalɩ] lɔŋ nʋmɔʋ ŋgʋ mawɩlɩ-wɛ yɔ kɩ-taa.” Peeɖe Yehowa ‘pana mʋ miŋ’ nɛ ɛyɔɔdɩ se ɛɖɩzɩɣ Izrayɛɛlɩ samaɣ.​—Ejl. 32:5-10.

15, 16. Ɛzɩma Moyizi nɛ Aarɔɔnɩ pawɩlaa kpayɩ se pɛwɛ Yehowa hɔɔlʋʋ yɔɔ? (Cɔnɩ kiɖe tɛɛ kɩlɛmʋʋ.)

¹⁵ Ɛlɛ Yehowa kɛ pʋtɔdɩyɛ nayʋ, pʋyɔɔ ɛlabɩ lɩmaɣza se ɛɛɖɩzɩɣ Izrayɛɛlɩ samaɣ kpeekpe. Ɛ-pʋtɔdɩyɛ naʋ mbʋ pɩha waɖɛ ɛ-sɛyaa siɣsiɣ ñɩma se pawɩlɩ se pɛwɛ ɛ-hɔɔlʋʋ yɔɔ. (Ejl. 32:14) Moyizi na samaɣ wɛɛ nɛ kokou, keteɣ hendu nɛ kapaɣ sɩʋ kpelaɣ ŋga kɛ-ɛsɩndaa lɛ, ɛ-taa wɩɩ nɛ eyele nɛ pɔyɔkɩ-kɛ nɛ kapɩsɩ mʋlʋm. Nɛ Moyizi yɔɔdɩ se: “Weyi ɛkɛ [Yehowa] ɛyʋ yɔ, ɛkɔɔ nɛ ɛkpɛndɩ mɔ-yɔɔ.” Peeɖe lɛ, “Leevi pɩyalaa kpeekpe wolo nɛ pɛkpɛndɩ ɛ-yɔɔ.”​—Ejl. 32:17-20, 26.

¹⁶ Paa Aarɔɔnɩ kaayeba nɛ polu sɩʋ kpelaɣ yɔ, pʋwayɩ ekpiɖi ɛ-kɩwɛɛkɩm yɔɔ nɛ ɛla nɔɔ kʋɖʋmaɣ nɛ Leevi ñɩma nɛ pɛwɛɛ Yehowa hɔɔlʋʋ yɔɔ. Ɛyaa siɣsiɣ ñɩma panɛ pataayɔɔdɩ yem se pɛwɛ Yehowa hɔɔlʋʋ yɔɔ, ɛlɛ poposi pa-tɩ nɛ kɩwɛɛkɩm laɖaa ɖɔɖɔ. Pɩɩkɛnɩ lɩmaɣza kɩbana, mbʋ pʋyɔɔ yɔ, kɩyakʋ ŋgʋ ki-wiye ɛyaa Kudokiŋ sakɩyɛ sɩbɩ pa-sɩɩnaa latʋ yɔɔ. Ɛlɛ mba pɛwɛ Yehowa hɔɔlʋʋ yɔɔ yɔ, ɛyɔɔdaa se ɛkaɣ-wɛ wazʋʋ.​—Ejl. 32:27-29.

17. Sika neɣye yɔɔ tɔm ndʋ Pɔɔlɩ yɔɔdaa yɔ, lɔŋ weyi tɩkpɛlɩkɩɣ-ɖʋ?

 ¹⁷ Apostoloo Pɔɔlɩ yɔɔdaɣ sika neɣye nɖɩ ɖɩ-tɔm lɛ, ɛyɔɔdaa se: “Tɔm ndʋ yɔ tɩlaba se tikuli ɖɛ-ɛsa nɛ pɩɖaŋ-ɖʋ nɛ ɖɩtaasɔɔlɩ kɩdɛkɛdɩm. . . Ɩtaalaa sɩɩnaa ɛzɩ pa-taa nabɛyɛ kaalabʋ yɔ, ɛzɩ pamaʋ yɔ se: Samaɣ caɣ nɛ kɔtɔɔ nɛ kɔñɔɔ nɛ kakʋyɩ kapaa. Pɔ-tɔm kuli ɖɛ-ɛsa, pʋyɔɔ pama-tʋ takayaɣ kiɖeɖeɣa taa se papaɣ-ɖʋ, mba ɖa ɖɩñɔtʋʋnɩ ɛjaɖɛ tɛm yɔ. Mbʋ lɛ weyi ɛsaŋ ɛ-tɩ se ɛsɩŋaa kɔyɔ, ɛɖaŋ ɛ-tɩ nɛ ɛtaatɔlɩ.” (1 Kɔr. 10:6, 7, 11, 12) Ɛzɩ Pɔɔlɩ yɔɔdʋʋ yɔ, halɩ Ɛsɔ sɛyaa siɣsiɣ ñɩma pɩzɩɣ nɛ papaɣzɩ mbʋ pɩtɩtʋʋzɩ yɔ pɩ-labʋ. Mba pɔtɔlʋʋ kpaca ŋgʋ kɩ-taa yɔ, papɩzɩɣ nɛ pamaɣzɩ se pɩɩwɛɛkɩɣ pa nɛ Yehowa pa-taabalɩyɛ. Ɛlɛ, nɔɔyʋ ɛsɔɔlɩ yem se ɛkɛ Yehowa taabalʋ yaa ɛmaɣzɩɣ se ɛwɛ siɣsiɣ ɛ-ɛsɩndaa yɔ, pɩtɩwɩlɩ se toovenim taa lɛ, taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa.​—1 Kɔr. 10:1-5.

18. (a) Ɛbɛ pɩzɩɣ nɛ piposi-ɖʋ nɛ Yehowa? (b) Nɛ piyeki nɛ ɖɩpaɣzɩ labʋ we?

¹⁸ Ɛzɩ Izrayɛɛlɩ Piya ɛsa kaañɩŋʋʋ se Moyizi kpa Sinayii pʋʋ ñʋʋ taa nɛ ɛtɩpɩsɩ lɔŋ yɔ, mbʋ ɖɔɖɔ sɔnɔ Krɩstʋ ñɩma ɛsa pɩzɩɣ nɛ pɩñɩŋ se Yehowa tɔm hʋʋ kɩyakʋ yaa ɛjaɖɛ kɩfaɖɛ ɛɛkɔŋ lɔŋ. Pɩpɩzɩɣ nɛ pɩlakɩ-wɛ ɛzɩ lidaʋ tɔm ndʋ, pɩtɩkɛ lɛɛlɛɛyɔ tɩkaɣ labʋ yaa papaɣzɩ pɩtʋʋ se tɩɩkaɣ labʋ. Ye ɖɩtɩcɔnɩ wɛtʋ ndʋ ti-ɖeɖe lɔŋ yɔ, lɩmaɣza ana apɩzɩɣ ayele nɛ ɖɩɖɛzɩ tomnaɣ sɔɔlɩm labʋ nɔɔ nɛ ɖɩsɩɩ Yehowa sɔɔlɩm labʋ wayɩ. Pazɩ pazɩ lɛ, ɖɩpɩzɩɣ nɛ ɖiposi ɖa-tɩ nɛ Yehowa nɛ ɖɩkɔɔ ɖɩpaɣzɩ labʋ mbʋ ɖɩtaamaɣzɩ kaaʋ se ɖɩpɩzɩɣ nɛ ɖɩla alɩwaatʋ ndʋ ɖɩɩwɛ ɖoŋ fezuu taa yɔ.

19. (a) Toovenim tɔm kɩcɛyɩtʋ ndʋ pɩwɛɛ se ɖɩtaasɔɔ kaaʋ? (b) Nɛ ɛbɛ yɔɔ?

¹⁹ Ðɩtaasɔɔ kaaʋ se Yehowa sɔɔlaa se ɖɩsɛɛ e-ɖeke koŋ, nɛ ɖɩñamɩ-ɩ nɛ ɖa-laŋɩyɛ pilim. (Ejl. 20:5) Weyi eɖiɣni ɛ-tɩ posuu nɛ Yehowa sɛtʋ yɔ, toovenim taa lɛ, ɛpaɣzɩ labʋ Sataŋ sɔɔlɩm, nɛ paa pɩɩla ɛzɩma yɔ asɛyʋʋ pɩtɛŋnɩ-ɩ. Pʋyɔɔ Pɔɔlɩ tɔzɩ-ɖʋ tɔm tʋnɛ se: “Ɩɩpɩzɩɣ nɛ ɩñɔɔ [Yehowa] caɖaɣ nɛ aleewaa caɖaɣ. Ɩɩpɩzɩɣ nɛ ɩkaa [Yehowa] tɔɔnaɣ nɛ aleewaa tɔɔnaɣ.”​—1 Kɔr. 10:21.

20. Paa picoɖi-ɖʋ yɔ, ɛzɩma Yehowa pɩzɩɣ nɛ ɛsɩnɩ-ɖʋ?

²⁰ Tɔm ndʋ ɖɩpɩzɩɣ nɛ ɖɩyʋsɩ Bibl taa kɛdɛsɩ nzɩ sɩyɔɔdʋʋ Kayɩnɩ, Salomɔɔ nɛ Izrayɛɛlɩ piya tɔm, alɩwaatʋ ndʋ sɩɩwɛ Sinayii pʋʋ ñʋʋ taa yɔ, sɩ-taa yɔ, ndʋ yɔ: Pa-tɩŋa paawɛnɩ waɖɛ se ‘pekpiɖi nɛ papɩsɩ pa-laŋa.’ (Tʋma 3:19) Pɩwɩlɩɣ kpayɩ kpayɩ se mba pɩyʋtɩnɩ-wɛ yɔ, Yehowa ɛɛlɔʋ pɔ-yɔɔ lidaʋ lɛɛ lɛɛ. Aarɔɔnɩ hɔɔlʋʋ taa lɛ, Yehowa kpaɣ ɛ-kɩwɛɛkɩm nɛ ekpeɣ-i. Sɔnɔ, Yehowa pɩzɩɣ nɛ ɛtasɩ-ɖʋ lɔŋ pɩtɩŋnɩ Bibl taa kɛdaɣ nakɛyɛ yɔɔ, yaa ɛ-ɛgbɛyɛ takayɩsɩ yɔɔ, yaa ɛpɩzɩɣ ɖɔɖɔ nɛ ɛtɩŋnɩ ɖo-koobu Krɩstʋ tʋ nɔɔyʋ yɔɔ nɛ ɛlɛ tasɩ-ɖʋ lɔŋ kɩbaŋ. Ye ɖɩkpakɩɣ lɔŋ tasʋʋ mbʋ nɛ ɖɩlakɩnɩ tʋmɩyɛ yɔ, pɩtʋʋ fɛyɩ se Yehowa kaɣ ɖa-pʋtɔdɩyɛ naʋ.

21. Ye takɩm nabʋyʋ ɛtalɩ-ɖʋ yɔ, pɩwɛɛ se ɖɩtɛ ɖa-taa se ɖɩlakɩ we?

²¹ Lɩmaɣzɩyɛ kɩbanɖɛ naɖɩyɛ yɔɔ Yehowa naɣ ɖa-pʋtɔdɩyɛ. (2 Kɔr. 6:1) Ɛ-pʋtɔdɩyɛ naʋ haɣ-ɖʋ waɖɛ se ɖise ‘kɩwɛɛkɩm nɛ hadɛ cɩnɛ lakasɩ kɩdɛkɛdɩsɩ.’ (Kalɩ Tiiti 2:11-14.) “Ɛjaɖɛ ɖɩnɛ ɖɩ-yɔɔ”, ɖɩkaɣ katʋʋ wɛtʋ ndɩ ndɩ nɛ pɩtakɩ ɖe-siɣsiɣ wɛtʋ Yehowa ɛsɩndaa siŋŋ. Pɩwɛɣ ɖeu se ɖa-tɩŋa payɩ ɖɩtɛ ɖa-taa se ɖɩwɛɣ Yehowa hɔɔlʋʋ yɔɔ tam mbʋ pʋyɔɔ yɔ, ɛnʋ kɛnɩ ‘Ɛsɔ weyi pɩwɛɛ se ɖise sɔɔndʋ nɛ ɖɩla ɛ-tʋmɩyɛ nɛ ɖɩñɔɔnɩ-ɩ kpam yɔ’!​—Wp. 10:20.