1, 2. (a) Morwasinke ya karera nomulyo kuhama kwaJehova? (b) Yisinke natu ka zogera mosirongwa esi?

AYO MULYO tu kare pepi naJehova. Age yige gelike ga kara nononkondo dononene nounongo ntani ga tu hara unene. Eyi yiyo nye tuna harere kuhama kwendi. (Epis. 96:4-6) Nye vakareli vendi vamwe kwa hageka kuhama kwendi.

² Mosirongwa esi tatu ka zogera yihonena yavamwe ava ngava gazara asi kwa heme kwaJehova nye siruwo oso awo ngava rugana eyi ga nyenga. Ose kuvhura tu lirongere ko yirongwa eyi nayi tu vatera tu twikire kulimburukwa Jehova.

3. Morwasinke Jehova ga pukwililire Kaini ntani yisinke ga mu tanterere?

³ Tu tareni sihonena saKaini. Age kapi nga karere yikarunga yoyimpempa. Nye nampili ngoso, Jehova kapi ga tambwire ukareli wendi morwa age kwa kere nonkareso zondona. (1 Joh. 3:12) Jehova yipo ga mu pukwilire asi: “Ngano asi  ko rugana yoyiwa, ngano kuna kuzoragana, ano apa ono rugana yoyidona, nzo kuna ku rarere pevero ngwendi sikasama asi zi ku diinine po. Kuna hara zi ku pangere, nye ove zi funda.” (Gen. 4:6, 7) Monkango zimwe, Jehova kwa tanterere Kaini asi “nsene o litezurura nokuhama kwange, name ngani hama koge.”

4. Nampili ngomu Kaini ga kere nompito zokuhama kwaJehova, yisinke ga rugene?

⁴ Ngano Kaini ga rundwilire nkareso zendi, Jehova ngano ga tambwire ukareli wendi. Nye age kapi ga purakenene. Magazaro gomadona kwa mu twaredesere a ka ture nzo. (Jak. 1:14, 15) Apa ga kere mudinkantu, nampo kapi ga gazarere asi ezuva limwe nga rwanesa Jehova. Nye konyima zosiruwo, ga ya rwanesere Karunga nokudipaga mumbyendi.

5. Yisinke nayi ninkisa Jehova a dire kutuhafera?

⁵ Ngwendi Kaini, Mukriste kuvhura a gazare asi age kuna kukarera Jehova, nye siruwo oso age kurugana eyi ga nyenga Karunga. (Juda 11) Pasihonena, age kuvhura a liture mo mokuzuvhisa nokuza komapongo nkenye apa, nye siruwo oso age kugazara yininke yoruhonda nokudowokera emona ntani ga nyenga Mukriste mukwawo. (1 Joh. 2:15-17; 3:15) Oyo kuvhura kutwaredesa muntu a ture nonzo dononene. Vantu kuvhura va dire kudiva eyi atu gazara neyi atu rugana nye Jehova kumona nayinye ntani ga diva nsene asi kapi tuna hama kwendi nomutjima nagunye.—Resa Jeremiya 17:9, 10.

6. Ngapi omu nayi tu tompoka ‘kufunda po’ maupirankondo getu yipo tu hame kwaJehova?

⁶ Jehova kapi a tu sigilire nampili ngomu atu tura mapuko. Nye age kutukorangeda asi: “Tengureni kwange, makura name ngani tengwire kweni.” (Mara. 3:7) Age ga diva asi twa kara nomaupirankondo, nye age kuna tu harere tu nyokere po yoyidona. (Jes. 55:7) Nsene tu hama kwendi, nga tu vatera nokutukondopeka tu ‘funde po’ maupirankondo getu.—Gen. 4:7.

7. Ngapi omu Saromo ga zumbanesere elikwatakano lyendi naJehova?

⁷ Kuvhura tu lirongere ko yoyinzi kosihonena sahompa Saromo. Apa ga kere mudinkantu, age nga papara mavyukiso kwaJehova. Jehova kwa pere Saromo unongo ntani kwa mu pere hena sirugana sokutunga ntembeli moJerusarema. Nye ga ya zumbanesere elikwatakano lyendi naJehova. (1 Vah. 3:12; 11:1, 2) Veta zaKarunga kwa silikire vahompa woVaisraeli ‘mokukwara vakadi wovanzi, yipo va dire kuvatwara mepuko va tunde kwaHOMPA.’ (Deut. 17:17) Saromo kapi ga limburukwire veta zina, yipo ga kwere vakadi 700 nokugweda ko hena yihora 300. (1 Vah. 11:3) Sinzi sovakadi vendi kapisi Vaisraeli va kere ntani awo ngava karere yikarunga yoyimpempa. Yipo nye, Saromo kapi ga limburukwire koveta zaKarunga asi nokukwara si vakadi wokonomuhoko dapeke.—Deut. 7:3, 4.

8. Yininke musinke yoyidona ga rugene Saromo?

⁸ Saromo kwa ya hagekere kukwama nompango daJehova. Ano eyi kwa ya mu ninkisire a zone. Age kwa ya tungilire sizambero karunga gomukadi Asitarate ntani sikarunga Kemosi. Nage novakadi vendi ngava karere yikarunga oyo. Age kwa tungilire yizambero oyo pondundu ezi za  kere pepi naJerusarema oku za karerere ntembeli zaJehova. (1 Vah. 11:5-8; 2 Vah. 23:13) Saromo nampo kwa gazarere asi Jehova kapi na pakera mbili mapuko gendi morwa yeeyi ga twikilire kugava nonzambo kontembeli.

9. Yitundwamo musinke ya kere apa Saromo ga dilire kutambura mapukururo gaKarunga?

⁹ Jehova kapi a tarerere udona. Bibeli kutanta asi: ‘HOMPA yipo nye ga handukilire Saromo, morwa mutjima gwendi kwa tundire ko kwaKarunga ogu ga mu monekerere ruvali, ta mu tantere kuhamena yininke eyi asi, nokukwama si vakarunga vapeke. Nye age kapi ga pakerere mbili mpangera ozo zaHOMPA.’ Ngoyitundwamo, Karunga kwa handukilire Saromo ntani kapi ga mu haferere. Ano uhompa wendi kwa u gaunwine ntani vantu kwa ligwanekerere nomaudigu gomanzi.—1 Vah. 11:9-13.

10. Yisinke nayi vhura kutura elikwatakano lyetu naJehova mosiponga?

¹⁰ Kulikwata ukwawo novantu ava ava dili kukarera Jehova kuvhura kutura elikwatakano lyetu nendi mosiponga. Vamwe kuvhura va kare vakareli vaJehova, nye awo kapi va kara nelikwatakano lyewa nendi. Ano vamwe kuvhura va kare vanekoro ndi vamusinda vetu ndi varugani ndi vanasure vakwetu ava ava dili kukarera Jehova. Nsene asi vakwetu kapi va fumadeka nompango daJehova, ngayi kundama elikwatakano lyetu nendi momudona.

11. Yisinke nayi tu vatera tu horowore vakaume wovawa?

¹¹ Resa 1 Vakolinte 15:33. Vantu wovanzi kwa kara noyikara yoyiwa. Ntani nampili vamwe ava ava dili kukarera Jehova kapi ava rugana yoyidona nkenye apa. Nampo wa diva ko vamwe. Nye ayo ngoso kutanta asi awo vakaume wovawa ndi? Ngapi ava kundama elikwatakano lyoge naJehova? Awo kukuvatera o hedere pepi naJehova ndi? Yisinke va hara po unene? Pasihonena, awo kuzogera tupu kuhamena eyi yina kara momode ndi yimaliwa ndi yikwakonentu ndi yilihafeso ndi emona? Awo kuuyunga vakwawo momudona ndi? Awo kwa hara nomuteu dougova ndi? Jesus kwa rondwere asi: ‘Eyi ya zura momutjima, kana nako yiyo aka uyunga yooyo.’ (Mat. 12:34) Nsene o dimburura asi kukara-kara nawo kuvhura yi zonagwise po elikwatakano lyoge naJehova, sesupika siruwo esi o kara nawo ndi hagekesa po ukaume owo nsene kuvhura.—Yis. 13:20.

12. (a) Yisinke Jehova ga tanterere Vaisraeli konyima tupu zokuvamangurura moEgipite? (b) Yisinke va limbwilire Vaisraeli apa Jehova ga va pulire va hame kwendi?

¹² Ose kuvhura tu lirongere ko hena kweyi ya ya horokere apa Vaisraeli va va mangwilire moEgipite. Awo kwa pongere poNdundu zaSinayi makura Jehova tava monekere. Kondundu ozo kwa kere ko eremo lyesovagani nonombadi nendundumo ntani nezwi lyenene lyombendo. (Ex 19:16-19) Jehova makura ta va tantere asi age, “Karunga gesupa” ogu ga hara asi va mu karere gelike. Age hena kwa va tumbwidilire asi kapi nga va siga nsene va mu hara nokusikisa mo yipango yendi. (Resa Exodus 20:1-6.) Monkango zimwe, age kwa va tanterere asi “nsene va hama kwendi, nage nga hama kwawo.” Ngano yipo wa kere, ngano yisinke wa limbwilire apa Jehova ga pulire Vaisraeli va hame kwendi? Ove nampo ngano wa limbwilire ngwendi Vaisraeli pokutanta asi: “Nayinye eyi ana tanta Hompa, ngatu yi rugana.” (Ex. 24:3) Nye konyima, ulimburukwi wawo kwa ya u hetekere.

13. Yisinke ya hetekere ulimburukwi woVaisraeli?

¹³ Vaisraeli kwa kere nowoma apa va mwene eremo lyesovagani nonombadi. Makura tava pura Mosesa a ka va uyungire po kwaJehova koNdundu zaSinayi. (Ex. 20:18-21) Age kwa ka kere ko siruwo sosire. Ayo kwa monekere ngwendi kuna va sigilire momburundu va hana mupitisili. Vaisraeli kwa huguvarere unene mwaMosesa. Awo kwa kere nosinka makura yipo va tanterere Arona asi: “Tu ruganena karunga a tu pitisire komeho ose, yeeyi ogu mugara Mosesa, ogu ga tu gusa moEgipite, kapi tuna yi diva eyi yina ka mu gwana ko oko.”—Ex. 32:1, 2.

14. Ngapi omu Vaisraeli va likumbagerere vene, ntani ngapi ga lizuvhire Jehova?

¹⁴ Vaisraeli va yi divire asi ayo epuko kukarera yikarunga yoyimpempa. (Ex. 20:3-5) Nye awo kwa tamekere kukarera ntana zongorodo. Nampili ngomu va tezere po mpango zina awo kwa likumbagerere vene mokugazara asi awo kuna hama kwaJehova. Arona kwa tere eyi va rugene asi “sipito sokufumadeka Hompa.” Ngapi omu ga lizuvhire Jehova? Ayo kwa mu handukisire yipo ga tanterere Mosesa asi Vaisraeli “vana liretere vene ehudi. Vana genderere kuzumba nzira ezi na va tantera asi va zi kwame.” Jehova kwa ‘handukire unene’ yipo ga tokwere kuzonagura po muhoko goVaisraeli.—Ex. 32:5-10.

15, 16. Yisinke va rugene oMosesa naArona mokulikida asi awo kwa heme kwaJehova? (Tara efano pepenuno 17.)

¹⁵ Jehova, Karunga gonkenda. Age kwa tokwere mokudira kuzonagura po Vaisraeli. Ntani age ga va pere mpito va hame kwendi. (Ex. 32:14) Apa Mosesa ga mwene vantu kuna kuzigira nokudimba ntani nokudana komeho zontana zongorodo, age yipo ga zi swakerere nokuzikonka. Mosesa ta uyunga asi: “Nkenye ogu ana hama kwaHOMPA, a wize oku kwange!” Makura “Varevhi navenye tava ya mu pongere.”—Ex. 32:17-20, 26.

¹⁶ Nampili ngomu Arona ga rugene ntana zina, age kwa ya litezwilire nokuyahama kwaJehova kumwe noVarevhi vakwawo. Kugusa ko oyo, awo hena kwa ligusire  ko kovarwanesi. Alyo kwa kere etokoro lyewa, morwa ezuva olyo sinzi sava va dilire kulitezura kwa fire. Nye ava va heme kwaJehova kwa va tungikire.—Ex. 32:27-29.

17. Yisinke natu lirongera ko kononkango daPaurusa?

¹⁷ Kombinga zosihorokwa sina, mupositoli Paurusa kwa tente asi: ‘Nayinye eyi yokuturondora asi, tu dire kukarera vakarunga woyimpempa moomu ngava yi rugana mo vamwe. Ayo kwa yi tjangera yi kare erondoro lyetu, ose tuna ya karere pouhura wouzuni ou. Ano ogu ana kugazara asi age kuna sikama nawa-nawa, a takamese ga ha liganda.’ (1 Kol. 10:6, 7, 11, 12) Nonkango odo kulikida asi nampili vakareli vaJehova nawo kuvhura va rugane yirugana yoyidona nokugazara asi awo kuna hama kwaJehova. Kulitumbura nyamoge asi mukareli gwaJehova kapi ayi tanta asi ngoso ga ku tambura.—1 Kol. 10:1-5.

18. Yisinke nayi tu ninkisa tu sige Jehova ntani yitundwamo musinke ngayi kara?

¹⁸ Ngwendi moomu Vaisraeli va kere nosinka kweyi Mosesa ga ka kere koNdundu zaSinayi siruwo sosire, Vakriste naina nawo kuvhura va kare nosinka asi ezuva lyaJehova kapi lina kuwiza usimbu. Ntani matumbwidiro gendi kuvhura ga moneke ngwendi nzodi tupu. Nsene tu gazara ngoso, kuvhura tu tameke kukondjera emona mevango lyokukondjera yopampepo. Nsene kapi tuna kutakamesa, ose ngatu siga Jehova ntani ngatu tura mapuko gomanene aga twa dira kugazara rumwe asi ngatu ga rugana.

19. Yisinke twa hepa kudiworoka ntani morwasinke?

¹⁹ Twa hepa kudiwora nkenye apa asi Jehova kwa hara asi tu mu karere gelike nokumulimburukwa nonomutjima detu nadinye. (Ex. 20:5) Nsene tu dira kurugana eyi ga hara Jehova, ngatu rugana eyi ga hara Satana. Ano eyi ngayi tu retera maudigu. Eyi yiyo nye Paurusa ga tente asi: “Nokuwapa si mu nwe monkinda zaHompa, makura mu nwe hena monkinda zonompepo donondona. Ndi asi mu kare pompanda zaHompa, makura mu kare hena pompanda zonompepo donondona.”—1 Kol. 10:21.

20. Ngapi omu Jehova a tu vatere nsene tuna tura mapuko?

²⁰ Kaini naSaromo ntani Vaisraeli, navenye kwa kere nompito ‘zokulitezurura nokutengura kwaKarunga.’ (Yirug. 3:19) Yosili, Jehova kapi a genderere kusigilira vantu ava ava tura mapuko. Age kwa gusilire po Arona. Naina, age kutupukurura kupitira movanavazinyetu nomoyimbapiratjangwa ntani moyihorokwa yomoBibeli. Nsene tu tambura mapukururo, age nga tu fira nkenda.

21. Yisinke natu tokomena kurugana nsene ulimburukwi wetu kwaJehova kuna kuuheteka?

²¹ Nkenda zaJehova za kara nositambo. (2 Kol. 6:1) Azo kutupa mpito ‘tu zumbe udinikarunga nomadowo gouzuni ou.’ (Resa Titusa 2:11-14.) Ngomu tuna kuparuka “mouzuni ou,” ngatu twikira kuligwanekera nomaukaro aga ngaga heteka ulimburukwi wetu kwaJehova. Ngano tu tokomeneni kuhama kwaJehova nokudiworoka asi yige gelike natu ‘tjira po nokumukarera.’—Deut. 10:20.