1, 2. a) Bua tshinyi kulamata Yehowa mbualu bua meji? b) Netukonkonone tshinyi mu tshiena-bualu etshi?

KULAMATA Yehowa mbualu bua meji. Kakuena muntu udi ne bukole, meji, ne dinanga bu Nzambi wetu to! Nnganyi wa kutudi udi kayi musue kuikala ku luseke luende? (Mis. 96:4-6) Kadi bamue batendeledi ba Nzambi bakapanga bua kushala ku luseke lua Yehowa.

² Mu tshiena-bualu etshi netukonkonone bilejilu bia bantu bavua badiamba muvuabu ku luseke lua Yehowa, kadi eku benza malu avua amunyingalaja. Bilejilu abi bidi ne malongesha a mushinga adi mua kutuambuluisha bua kushala ne lulamatu lukole kudi Yehowa.

3. Bua tshinyi Yehowa wakadimuija Kayina? Ntshinyi tshiakamuambilaye?

³ Tuangatabi tshilejilu tshia Kayina. Kavua utendelela nzambi mukuabu to, anu Yehowa. Kadi Nzambi kakanyisha ntendelelu wende to. Malu mabi avua enda avula mu muoyo wende. (1 Yone 3:12) Yehowa wakadimuija Kayina ne: “Wewe mubange kuenza malu mimpe, kuakuanyishibua kabidi anyi? Kadi wewe kuyi  mubange kuenza malu mimpe, mpekatu mmukualamine ku tshiibi, ne dijinga diende ndia kukukokesha; kadi wewe neumupite bukole anyi?” (Gen. 4:6, 7) Yehowa uvua mu bulelela wambila Kayina ne: “Wewe munyingalale ne mulue ku luseke luanyi, meme panyi nendue ku luseke luebe.”

4. Ntshinyi tshivua Kayina muenze pavua Yehowa mumupeshe mpunga wa kuikala ku luseke luende?

⁴ Bu Kayina mushintulule lungenyi luende, Yehowa uvua mua kumuanyisha tshiakabidi. Kadi Kayina kakateleja mubelu to. Meji ne majinga ende mabi biakamufikisha ku dienza malu mabi. (Yak. 1:14, 15) Pamuapa pavua Kayina muana kavua wela meji ne: dimue dituku uvua mua kutombokela Yehowa to. Kadi mu kupita kua matuku, wakatombokela Nzambi, kushipaye muanabu wa tatu, wa mamu!

5. Mmalu kayi adi mua kunyanga malanda etu ne Yehowa?

⁵ Anu bu Kayina, lelu muena Kristo udi mua kuamba mudiye utendelela Yehowa kadi eku wenda wenza malu adi amunyingalaja. (Yuda 11) Tshilejilu, muena Kristo udi mua kutuma meji ende onso ku malu a masandi, ku lukuka, anyi udi mua kuikala mukine muena Kristo nende. (1 Yone 2:15-17; 3:15) Malu aa adi mua kumufikisha ku dienza mpekatu. Dîba dionso adi, udi mua kuikala uyisha bikole ne ubuela mu bisangilu bionso. Bantu bakuabu kabena mua kumona meji ne bienzedi bietu to, kadi Yehowa udi umona malu onso ne mmumanye bituikala katuyi bamulamate ne muoyo wetu mujima.​—Bala Yelemiya 17:9, 10.

6. Mmunyi mudi Yehowa utuambuluisha bua kutshimuna majinga mabi patudi tushala ku luseke luende?

⁶ Nansha nanku, Yehowa kena utulekela ne lukasa to. Padi malu adi muntu wenza atuadija kumusemeja kule ne Nzambi, Yehowa udi umusengelela ne: ‘Pingana kundi, ne meme nempingane kuudi.’ (Mal. 3:7) Yehowa mmusue tukine malu mabi, nangananga patudi tuluangana ne butekete buetu. (Yesh. 55:7) Tuetu benze nanku, neikale ku luseke luetu, utupesha bukole budi bukengedibua mu nyuma, mu lungenyi, ne ku mubidi, bua tutshimune majinga mabi.​—Gen. 4:7.

7. Mmunyi muakanyanga Solomo malanda ende ne Yehowa?

⁷ Tshilejilu tshia mukalenge Solomo tshidi mua kutulongesha malu a bungi. Patshivuaye nsonga, uvua ulomba Yehowa buludiki. Nzambi wakamupesha meji a bungi, kumupesha ne mudimu wa kuibaka ntempelo mulenga mu Yelushalema. Kadi Solomo wakanyanga malanda ende ne Yehowa. (1 Bak. 3:12; 11:1, 2) Mu Mikenji ya Nzambi muvua mukenji uvua ukandika mukalenge bua kusela “bakaji ba bungi, bua muoyo wende kawulu kupambuka.” (Dut. 17:17) Solomo kakawutumikila to, wakalua kusela bakaji 700. Kubanjijaye kabidi bakaji bakuabu 300. (1 Bak. 11:3) Bakaji bende ba bungi kabavua bena Isalele to, bavua batendelela nzambi ya dishima. Nunku, Solomo kakatumikila kabidi mukenji mukuabu wa kubenga kusela bakaji ba bisamba bikuabu.​—Dut. 7:1-4.

8. Mmushindu kayi uvua Solomo munyingalaje Yehowa?

⁸ Ku kakese ku kakese, Solomo wakajimija dinanga divuaye nadi bua mikenji ya Yehowa, kufikaye too ne ku dienza bubi bunene. Solomo wakibakila lupingu lua nzambi mukaji Ashatelota ne nzambi wa dishima Kemoshe bioshelu, pashishe wakalonda bakaji bende mu ditendelela nzambi ya dishima ayi. Wakibaka bioshelu abi pa mukuna uvua mutangilangane buludiludi ne Yelushalema mukavuaye muibake ntempelo wa Yehowa! (1 Bak. 11:5-8; 2 Bak. 23:13) Pamuapa Solomo uvua udishima ne: Yehowa uvua mua kulengulula dibenga kutumina diende bu muvuaye utungunuka ne kumulambula milambu ku ntempelo.

9. Ntshinyi tshiakenzeka pavua Solomo mubenge kuteleja madimuija a Nzambi?

 ⁹ Kadi Yehowa katu ubuikila mêsu pa mpekatu to. Bible udi wamba ne: “Yehowa wakakuatshila Solomo tshiji tshikole, bualu muoyo wende uvua musesuke kudi Yehowa . . . uvua mumumuenekele misangu ibidi ne uvua mumudimuije bua bualu buine ebu ne: kavua ne bua kulonda nzambi mikuabu to. Kadi kavua mutumikile tshivua Yehowa mumutumine dîyi bua kuenza to.” Ke bualu kayi Nzambi kakamuanyisha ne kakamuambuluisha kabidi to. Ndelanganyi ya Solomo kayakakokesha tshisamba tshijima tshia Isalele to, ne yakapeta ntatu mikole munkatshi mua bidimu bia bungi.​—1 Bak. 11:9-13.

10. Ntshinyi tshidi mua kuteka malanda etu ne Yehowa mu njiwu?

¹⁰ Anu mudi tshilejilu tshia Solomo tshileja, bumue bua ku malu manene atu ateka malanda etu ne Yehowa mu njiwu, nkudia bulunda ne bantu badi kabayi bamanye mikenji ya Yehowa anyi bayinemeka. Bamue badi mua kuikala mu tshisumbu kadi kabayi mu malanda makole ne Yehowa to. Bakuabu badi mua kuikala balela betu, bena mutumba netu, bena mudimu netu, anyi balongi betu badi kabayi batendelela Yehowa to. Mu mishindu yonso, balunda betu bobu kabayi banemeka mikenji ya Yehowa bikole, ndekelu wa bionso, badi mua kunyanga malanda etu ne Nzambi.

11. Ntshinyi tshidi mua kutuambuluisha bua kumanya ni bidi bikengela kuepuka mulunda kampanda?

¹¹ Bala 1 Kolinto 15:33. Bantu ba bungi batu ne imue ngikadilu mimpe, ne ba bungi batu kabayi Bantemu kabatu benza buenzavi to. Biobi nanku bua bantu baudi mumanyangane nabu, udiku mua kuamba ne: mbalunda bimpe anyi? Diebeja tshidi bulunda buebe nabu mua kuenzela malanda ebe ne Yehowa. Badiku mua kualengeja anyi? Mmalu kayi atubu basue bikole? Tshilejilu, batu anu basue kuakula nangananga bua mvuadilu ne didilengeja, bua makuta, bua ordinatere, telefone, tablete ne biamu bikuabu, bua dijikija lutetuku, anyi bua malu makuabu a ku mubidi anyi? Batuku basue kupetula bakuabu anyi kuela mineku ya bundu anyi? Yezu uvua mutudimuijilamu ne: “Mukana mudi muamba anu malu adi mavulangane mu muoyo.” (Mat. 12:34) Wewe mumone ne: balunda bebe mbafuane kunyanga malanda ebe ne Yehowa, angata dipangadika dia kukepesha dîba diudi upitshisha nabu, anyi biobi bikengela, kosa nabu bulunda.​—Nsu. 13:20.

12. a) Ntshinyi tshivua Yehowa muambile bena Isalele matuku makese yeye mumane kubapatula mu Ejipitu? b) Pavua Nzambi mulombe bena Isalele bua kumulamata anu yeye, ntshinyi tshiakambabu?

¹² Tshivua tshienzekele bena Isalele matuku makese Yehowa mumane kubapatula mu  bupika mu Ejipitu, tshidi mua kutupetesha malongesha makuabu. Bakadisangisha kumpala kua mukuna wa Sinai. Kuinaku, Yehowa wakadimuenesha kudibu mu mushindu wa dikema. Yehowa wakenza tshishima, kupatulaye ditutu difiike, makubakuba kudila, mipenyi kuela, muishi kumueneka, ne mutoyi mukole kumvuika muenze bu muadi wa mpungi. (Ekes. 19:16-19) Pashishe, Yehowa wakambila bena Isalele ne: udi ‘Nzambi udi ulomba bua bamulamate anu yeye.’ Kubajadikilaye ne: uvua ne bua kuikala ne lulamatu kudi bonso badi bamunange ne batumikila mikenji yende. (Bala Ekesode 20:1-6.) Mu bulelela, Yehowa uvua wambila bantu bende ne: “Nuenu bashale ku luseke luanyi, meme panyi nenshale ku luseke luenu.” Bu wewe mu bantu abu, uvua mua kuenza tshinyi? Kakuyi mpata, uvua mua kuikala muenze tshiakenza bena Isalele abu. “Bakandamuna ne dîyi dimue ne: ‘Tudi tuitaba bua kuenza mêyi onso adi Yehowa muambe.’” (Ekes. 24:3) Kadi matuku makese pashishe, bualu kampanda buvuabu kabayi batekemene buakenzeka, kutekabu lulamatu luabu mu diteta.

13. Mbualu kayi buvua buteke lulamatu lua bena Isalele mu diteta?

¹³ Bena Isalele bavua bumvue buôwa bua ditutu difiike, mipenyi, ne bimanyinu bikuabu bia dikema bivua Nzambi muenze. Bobu kulomba Mose bua akule ne Yehowa pa muaba wabu ku mukuna wa Sinai. (Ekes. 20:18-21) Mose kuya ku mutu kua mukuna, kuya lonso. Bena Isalele bavuaku mpindieu bakalame mu tshipela kabayi ne mulombodi wabu uvuabu beyemena anyi? Bidi bimueneka ne: ditabuja dia bena Isalele divua dikola pavuabu bamona Mose ne mêsu. Bakapampakana, kuambilabu Alona ne: “Utuenzele Nzambi waya kumpala kuetu, bualu katuena bamanye tshidi tshifikile Mose eu, muntu uvua mutupatule mu buloba bua Ejipitu.”​—Ekes. 32:1, 2.

14. Mmunyi muvua bena Isalele badishime? Yehowa wakumvua bishi bua tshivuabu benze?

¹⁴ Bena Isalele bavua bamanye ne: ditendelela mpingu mmpekatu munene kumpala kua Yehowa. (Ekes. 20:3-5) Kadi mu matuku makese tshianana, bakatuadija kutendelela kana ka ngombe ka or! Nansha muvuabu babenge kutumikila Nzambi patoke, bavua badishima ne: batshivua anu ku luseke lua Yehowa. Alona wakabikila too ne ntendelelu wa kana ka ngombe au ne: “tshibilu bua Yehowa”! Yehowa wakumvua bishi? Bavua bamuele mâyi ku makasa. Yehowa wakambila Mose ne: bantu bavua ‘badinyange’ ne ‘basesuke mu njila uvuaye mubelele mukenji bua kuendela.’ Mu “tshiji [tshiende] tshikole,” Yehowa wakajinga mene bua kubutula tshisamba tshipiatshipia tshia Isalele atshi.​—Ekes. 32:5-10.

15, 16. Mmunyi muvua Mose ne Alona baleje ne: bavua balamate ku luseke lua Yehowa ne muoyo mujima? (Tangila tshimfuanyi tshia ntuadijilu tshia tshiena-bualu.)

¹⁵ Yehowa wakapangadija bua kubutula bena Isalele. Luse luende luakapetesha batendeledi bende ba lulamatu mpunga wa kushala ku luseke luende. (Ekes. 32:14) Pakamona Mose muvua bena Isalele bela mbila, bimba, ne baja maja kumpala kua lupingu kabayi bukuatshi, wakavingutula kana ka ngombe ka or, kuluaku musenga. Pashishe wakamba ne: “Udi ku luseke lua Yehowa nnganyi? Alue kundi!” Nunku, ‘bena Lewi bonso bakanyunguluka’ Mose.​—Ekes. 32:17-20, 26.

¹⁶ Nansha muvua Alona muanji kubuelakana mu dienza lupingu alu, wakanyingalala, kulondaye bena Lewi bakuabu bavua ku luseke lua Yehowa. Bena lulamatu abu kabavua anu balamate patupu ku luseke lua Yehowa to, kadi bavua kabidi badiumbushe ku luseke lua benji ba mpekatu. Bavua benze malu ne meji; dituku adi, bantu binunu  bia bungi bakafua bua ditendelela dia mpingu. Kadi bavua balaye bavua ku luseke lua Yehowa dibenesha.​—Ekes. 32:27-29.

17. Tshilumbu tshia kana ka ngombe ka or tshidi Paulo mufunde tshidi tshitulongesha tshinyi?

¹⁷ Mupostolo Paulo wakakula bua tshilumbu tshia kana ka ngombe wamba ne: “Malu aa akalua bilejilu kutudi, bua tuetu . . . katulu batendeledi ba mpingu bu muvua bamue ba kudibu balue. Bakaafunda bua kutudimuija tuetu badi nshikidilu ya ndongoluelu ya malu mifikile. Nunku muntu udi wela meji ne: mmuimane adimuke bua kaponyi.” (1 Kol. 10:6, 7, 11, 12) Anu mudi Paulo muleje, nansha batendeledi balelela badi mua kuditua mu dienza malu mabi. Badi mene mua kuela meji ne: Yehowa utshidi ubanyisha. Kadi kujinga patupu bua kuikala mulunda wa Nzambi anyi kuamba patupu ne: tudi ne lulamatu kudiye, kakutu anu kumvuija ne: Yehowa udi bushuwa utuanyisha to.​—1 Kol. 10:1-5.

18. Tshidi mua kutusaka bua kumbuka ku luseke lua Yehowa ntshinyi? Mbipeta kayi biamueneka?

¹⁸ Anu bu muvua bena Isalele bapampakane bua muvua Mose munenge bua kutuluka ku mukuna wa Sinai, lelu bena Kristo badi mua kupampakana bua mudi dituku dia dilumbuluisha dia Yehowa ne bulongolodi bupiabupia butudi bindile bimueneka bu bidi binengakana. Bidi mua kumueneka bu ne: kutshidi bidimu bia bungi kumpala eku bua milayi eyi kukumbana anyi ne: kayakukumbana anu to. Tuetu katuyi badimuke, ngelelu wa meji wa nunku udi mua kutusaka bua kuteka malu a ku mubidi kumpala kua disua dia Yehowa. Ndekelu wa bionso, tudi mua kumbuka ku luseke lua Yehowa, tutuadija kuenza malu atuvua katuyi mua kuenza patuvua mu malanda makole ne Nzambi.

19. Mbualu kayi bua mushinga butudi katuyi ne bua kupua muoyo? Bua tshinyi?

¹⁹ Katupu muoyo ne: Yehowa udi utulomba bua tumutumikile ne muoyo mujima ne tumulamate anu yeye. (Ekes. 20:5) Tuetu balekele kutendelela Yehowa, mu bulelela, tudi tuenza disua dia Satana, ne bualu ebu nebutufikishe anu ku kabutu. Ke bualu kayi, Paulo udi utuvuluija ne: “Kanuena mua kuikala nunua dikopo dia Yehowa, nunua kabidi dikopo dia bademon to; kanuena mua kuikala nudia ku ‘mêsa a Yehowa,’ nudia kabidi ku mêsa a bademon to.”​—1 Kol. 10:21.

20. Mmunyi mudi Yehowa mua kutuambuluisha nansha patudi benze bubi?

²⁰ Mu muyuki wa mu Bible wa Kayina ne wa Solomo ne wa bena Isalele ku mukuna wa Sinai mudi malu adi apetangana. Bantu abu bavua ne mpunga wa ‘kunyingalala bua mpekatu ne kushintuluka.’ (Bien. 3:19) Bushuwa, Yehowa katu ulekela bantu badi benze bubi lukasa to. Mu tshilumbu tshia Alona, Yehowa wakamufuila luse. Lelu eu, Yehowa udi mua kutudimuija ku diambuluisha dia bualu kampanda bulonda mu Bible, dia mikanda yetu, anyi dia mubelu mulenga wa kudi muena Kristo netu. Tuetu tuteya ntema ku mavuluija aa, Yehowa neatuenzele malu ne luse.

21. Tudi ne bua kudisuika bua kuenza tshinyi padi lulamatu luetu kudi Yehowa luikale mu diteta?

²¹ Yehowa udi ne tshidiye utulejila ngasa wende. (2 Kol. 6:1) Mbua kutupetesha mpunga wa “kulekela malu adi kaayi a Nzambi ne majinga a panu.” (Bala Tito 2:11-14.) Bu mututshidi “munkatshi mua ndongoluelu wa malu udiku eu,” netutuilangane ne nsombelu yateka lulamatu luetu kudi Yehowa mu diteta. Tuikalayiku anu badiakaje bua kushala balamate ku luseke lua Yehowa bikole, bualu ‘Yehowa Nzambi wetu ke utudi ne bua kutshina, yeye ke utudi ne bua kuenzela mudimu, yeye ke utudi ne bua kulamata’!​—Dut. 10:20.