1, 2. a) Bõe yĩng tɩ d yetẽ tɩ ned sã n gãd a Zeova kãn-kãe, wilgdame t’a tara yam? b) Bõe yell la d na n gom sõs-kãnga pʋgẽ?

NED sã n gãd a Zeova kãn-kãe, wilgdame t’a tara yam. A Zeova pãngã, a yamã la a nonglmã ka to ye. D fãa pa rat n kell n sak Wẽnnaam a woto, n yɩ a poorẽ dãmb sɩda? (Yɩɩn. 96:4-6) La pĩnd wẽndẽ, wa n yɩɩ tɩlɛ ne neb sẽn da tũud a Zeova tɩ b yãk b sã n na n kell n zĩnda a poorẽ. Bʋko, kẽer pa kell n gãd-a kãn-kãe ye.

² Sõs-kãnga pʋgẽ, d na n goma neb a wãn yelle. Yaa neb sẽn da yet tɩ b bee a Zeova poorẽ, la b yaool n da maand a sẽn kisi. D tõe n dɩka yam b kibayã pʋgẽ, tɩ sõng-d tɩ d kell n maan sɩd ne a Zeova.

3. Bõe la a Zeova yeel a Kayẽ n na n keoog-a, la yaa bõe yĩnga?

³ D gom a Kayẽ yelle. A ra pa tũud wẽnnaam a to tɩ pa a Zeova ye. La a sẽn da tũud a Zeova to-to wã ra pa tat a Zeova yam ye. Bõe yĩnga? A Zeova yãame tɩ tʋls-wẽns n da paamd pãng a sũurẽ wã. (1 Zã 3:12) A Zeova keoog-a lame, n yeel-a yaa: “Fo sã n maan sẽn yaa sõama, f na n  tõog n zẽka f zugu, la f sã n ka maan sẽn yaa sõama, yel-wẽnã wũga fo rignoorẽ, la a rat n sooga foom, bee ne foom tɩ f tõog-a.” (Sɩng. 4:6, 7) A Zeova sẽn yeelã wilgda vẽeneg t’a sã n toeeme, n yãk yam n na n zĩnd yẽ poorẽ, yẽ me na n zĩnda ne-a.

4. Sẽn wa n yɩ tɩlɛ ne a Kayẽ t’a wilg a sã n sɩd bee a Zeova poorẽ wã, bõe la a maan-yã?

⁴ A Kayẽ sã n da sak n toeem yam, a ra na n le paam n taa a Zeova yam. La a pa tũ a Zeova saglgã ye. A tags-kɛgã la a tʋls-wẽnsã wa n baas n kɩtame t’a maan sẽn yaa wẽnga. (Zak 1:14, 15) A sẽn wa n yaa bilfã, tõe t’a ra zɩ n tags t’a na n kɩɩsa a Zeova ye. La ade, a maana a toog kae ne a Zeova saglga, n kʋ a yaoã!

5. Bõe n tõe n wa kɩt tɩ d kong a Zeova lohorem?

⁵ Wa a Kayẽ, kiris-ned me tõe n yetame t’a tũuda a Zeova, n yaool n maand bũmb kẽer a Zeova sẽn kisi. (Zʋʋd 11) A tõe n yit n moonda koɛɛgã, la a kẽnd tigissã n pa vaandẽ, n yaool n wae n tagsd yoob yelle, wall a yaa rat-wʋsg soaba, pa rẽ bɩ a tugd beem ne a tẽed-n-taaga. (1 Zã 2:15-17; 3:15) Woto fãa tõe n wa kɩtame tɩ ned maan sẽn yaa wẽnga. D taabã tõeeme n pa mi d sẽn tagsd bũmb ninsã, wall d sẽn maandã ye. La a Zeova yẽ mii bũmb fãa. Sã n pa ne d sũur fãa la d be a poorẽ, a miime.—Karm-y Zeremi 17:9, 10.

6. Wãn to la a Zeova sõngd tõnd tɩ d tõogd d tʋls-wẽnsã?

⁶ La baa d sã n wa maan yel-wẽnde, a Zeova pa yɩt tao-tao n daag tõnd n bas ye. Ned sã n wa sɩng bʋdgre, a Zeova keoogd-a lame. A yet-a lame yaa: ‘Lebg n wa mam nengẽ, tɩ mam me lebg n wa fo nengẽ.’ (Mal. 3:7) A Zeova miime tɩ d mi n maooda ne pãn-komsem. Rẽ n so t’a rat tɩ d zab ne sẽn yaa wẽngã. (Eza. 55:7) D sã n maan woto, a na n sõng-d lame, n kõ-d pãng la raood tɩ d “tõog” d tʋls-wẽnsã.—Sɩng. 4:7.

7. A Salomo maana wãn tɩ yẽ ne a Zeova zoodã wa sãame?

⁷ D tõe n dɩka yam wʋsg rĩm a Salomo kibarã pʋgẽ. A bi-bɩɩlmã wakate, a ra teega a Zeova bũmb fãa pʋgẽ, t’a wilgd-a a sẽn tog n maane. Wẽnnaam kõ-a-la yam wʋsgo, la a kɩt t’a me Zerizalɛm wẽnd-doogã. Yɩɩ roog sẽn yaa kãsenga, la neer wʋsgo. La a Salomo wa n maaname tɩ yẽ ne a Zeova zoodã sãame. (1 Rĩm. 3:12; 11:1, 2) Wẽnnaam tõogã ra wilgame tɩ Israyɛll rĩm “ka tog n peeg pagb wʋsg tɩ b wa kɩt t’a bʋdg ye.” (Tõo. 17:17) La a Salomo kɩɩsame, n kẽ kãadem ne pagb 700. A pʋg-rɩkdsã me ra yaa bãmb 300. (1 Rĩm. 11:3) A Salomo pagbã wʋsg ra yaa bu-zẽmse, n da pʋʋsd bõn-naandse. Dẽnd a kɩɩsa Wẽnnaam tõogã sẽn yeel me tɩ b pa segd n kẽ kãadem ne bu-zẽmsã.—Tõo. 7:3, 4.

8. A Salomo kɩɩsgã wẽnem taa zĩ-bʋgo?

⁸ A Salomo sẽn da kɩɩsd a Zeova noyã bilf-bilfã, wa n kɩtame t’a maan sẽn yaa wẽng wʋsgo. A mee tẽn-kug wẽn-naan-poak a Astarte la wẽn-naandg a Kemos waoogr yĩnga, n naag a pagb kẽer n da pʋʋsd-ba. Pʋd n yaa tãng sẽn kell n tees Zerizalɛm zug la a sẽn me tẽn-kug-kãensã wã, tɩ yaool n da yaa Zerizalɛm la a sẽn me a Zeova roogã. (1 Rĩm. 11:5-8; 2 Rĩm. 23:13) Tõe t’a Salomo belga a menga, n tẽed tɩ baa yẽ sẽn kɩɩsd a Zeova wã, a sã n ket n kʋʋd maand wẽnd-doogẽ wã n kõt-a, a na n sĩnd n geta a kɩɩsgã.

9. A Salomo sẽn pa kelg a Zeova keoogrã, baasa wãna?

⁹ La a Zeova pa tõe n sĩnd n get yel-wẽnd ye. Biiblã yeelame t’a Zeova ‘sũur yika ne a Salomo, yẽnda yamã sẽn  wẽnemd n bas-a wã yĩnga.’ B paasame yaa: ‘Sẽn-Ka-Saab sẽn yaa Israyɛll Wẽnnaamã yaool n dag n vẽnega b meng ne a Salomo naoor a yiibu. Sẽn-Ka-Saab rag n goma ne a Salomo yel-kãng wɛɛngẽ n yeel-a t’a ra sak n pʋʋs Wẽnnaam a to ye. La a Salomo ka sak Sẽn-Ka-Saab noorã ye.’ Kɩtame t’a kong Wẽnnaam lohormã. A kambã la a yagensã pa rɩ naam Israyɛll buudã fãa zug ye. Rẽ me, yel-beed ka tɛk n nams a roogã rãmb na maan yʋʋm kobse.—1 Rĩm. 11:9-13.

10. Bõe n tõe n wa sãam tõnd ne a Zeova zoodã?

¹⁰ Wa sẽn yɩ to-to a Salomo nengẽ wã, tõnd me sã n yõg zood ne neb sẽn pa mi a Zeova noyã, wall sẽn maand b toog kae ne a noyã, tõe n komsa d tẽebã, la sãam tõnd ne a Zeova zoodã. Tõe n yɩɩ neb sẽn wat tigissã la b pa tar zood sõma ne a Zeova ye. Tõe n yɩɩ neb me sẽn pʋd n pa tũud a Zeova. Wala makre, neb d sẽn kĩ ne, d yagse, d tʋmd-n-taas bɩ d karen-bi-taase. Sẽn yaa a soab fãa, d bãng tɩ d sẽn nong n be ne b rãmbã sã n pa tũud a Zeova noyã, b tũud-n-taarã tõe n wa sãama zood ning d sẽn tar ne a Zeova wã.

11. Bõe n na n sõng-y tɩ y bãng n tũus y zo-rãmbã?

¹¹ Karm-y 1 Korẽnt-rãmb 15:33. Neb n pa tũud a Zeova la b tar zʋg-sõma. Wʋsg meng yãka yam n pa maand sẽn yaa wẽng ye. Baa y sẽn wae n be ne b rãmbã sã n yaa woto, rat n yeelame tɩ b tõe n yɩɩ tũud-n-ta-sõma bɩ? Sok-y y meng yaa: ‘M sã n maand tũud-n-taar ne-ba, na n paasa maam ne a Zeova zoodã bɩ? Na n sõnga maam tɩ m maneg n nong a Zeova bɩ? Bõe n tar yõod bãmb nifẽ n yɩɩda? Bõe yell la b nong n gomda? Yaa futã la nag-teedã yelle, ligdã la reem toor-toorã, portaabl-dãmbã la taablɛt-rãmbã yell bɩ? B nonga neb wɩdg bɩ? B nonga gom-yood bɩ?’ D tẽeg t’a Zeezi ra yeelame tɩ “yaa bũmb nins sẽn pid sũurẽ wã n yit noorẽ wã.” (Mat. 12:34) Y sã n neẽ tɩ y sẽn nong n be ne b rãmbã tũud-n-taarã rat n sãama yãmb ne a Zeova zoodã bɩ y maan bũmb tao-tao. Boog-y y zoodã, wall sã n yaa tɩlɛ meng bɩ y tolg n lak y meng ne-ba.—Yel. 13:20.

12. a) Israyɛll nebã sẽn yi Eziptã poor bilfu, bõe la a Zeova yeel-ba? b) Wẽnnaam sẽn yeel Israyɛll nebã t’a ratame tɩ b tũ yẽ a ye tãa balã, b leokame tɩ bõe?

¹² Israyɛll nebã sẽn wa n yi Eziptã poor bilf me, bũmb n maane, tɩ d tõe n  dɩk yam a pʋgẽ. Nebã tigma Sinayi tãngã pendẽ t’a Zeova gom ne-ba. Yɩɩ yel-soalma. Nebã ra nee sawad-taok la sa-yãgb ne bug-zõos sẽn yit tãngã zugu, la b wʋmd sa-kelemse, la bʋrg sẽn yaa wa baorg peebg rãamd sẽn tar paasgo. (Yik. 19:16-19) B wʋma a Zeova koɛɛga. A yeel-b lame t’a ratame tɩ b tũ yẽ a ye tãa bala. A leb n wilgame t’a na n maana sɩd ne neb nins fãa sẽn nong yẽ, n sakd yẽ tõodã. (Karm-y Yikr 20:1-6.) Yaa wa a sẽn da yet-b yaa: “Yãmb sã n kell n zĩnd mam poorẽ, ma-me na n zĩnda ne-yã.” Yãmb sã n da beẽ be, y ra na n leoka a Zeova tɩ bõe? Yaa vẽeneg tɩ y ra na n leoka wa Israyɛll nebã. B naaga taab noor a ye n yeel yaa: “Tõnd na n maana bũmb nins fãa Sẽn-Ka-Saab sẽn yeelã.” (Yik. 24:3) La sẽn pa yã n kaoose, bũmb n maane, tɩ yɩ tɩlɛ tɩ b yãk b sã n na n kell n maana sɩd ne Wẽnnaam. Bõe n maane?

13. Bõe n maane, tɩ yɩ tɩlɛ tɩ Israyɛll nebã yãk b sã n na n kell n maana sɩd ne Wẽnnaam?

¹³ Israyɛll nebã sẽn yã yel-soalmã Sinayi tãngã zugã, rabeemã kẽ-b lame, tɩ b kong n kos a Moyiiz tɩ yẽ rʋ tãngã zug n gom ne a Zeova bãmb yʋʋr yĩnga. (Yik. 20:18-21) A Moyiiz rʋʋ tãngã zug n kaoose. Wõnda Israyɛll nebã sẽn da pa ne b taoor lʋɩtã, b ra getame tɩ b raag-b lame n base. B na n maana wãna? Wõnda yaa a Moyiiz sã n da be ne-b bal la b tar pɛl-kɛgeng la tẽebo. Wa n lebga yɩɩr wʋsg ne-ba, tɩ b tɩ yeel a Aarõ yaa: ‘Maan wẽnnaam n kõ tõnd t’a lʋɩ tõnd taoor n tɛ tõndo. Bala, Moyiiz-kãngã, rao ning sẽn yiis-a tõnd Ezipt tẽngã, tõnd ka mi bũmb ning sẽn paam-a ye.’—Yik. 32:1, 2.

14. Israyɛll nebã ra belga b mens n tẽed tɩ bõe, la a Zeova manesem yɩɩ wãna?

¹⁴ Israyɛll nebã ra miime tɩ ned sã n pʋʋs bõn-naandga, yaa yel-wẽn-kãsenga. (Yik. 20:3-5) La pa yã n kaoos la b maan sãnem nag-bila, n wõgemded a taoor n pʋʋsd-a ye. B sẽn maan woto wã, b kɩɩsa a Zeova noore. La b belga b mens n da tẽed tɩ b ket n bee a Zeova poorẽ. A Aarõ pʋd n yeelame tɩ tigrã b sẽn maan nag-bilã waoogr yĩngã yaa “tigr Sẽn-Ka-Saab waoogr yĩnga.” A Zeova sũur yɩɩ noog bɩ? Ayo! A yeela a Moyiiz tɩ nin-buiidã “sãama b mense,” la a paas tɩ b ‘basa sor ning yẽ sẽn wilg bãmbã.’ A Zeova sũurã kãbgame, hal t’a ra rat n sãam buudã tõre.—Yik. 32:5-10.

15, 16. Bõe la a Moyiiz ne a Aarõ maan-yã, tɩ wilg vẽeneg tɩ b bee a Zeova poorẽ? (Ges-y sõsgã sɩngrẽ fotã.)

¹⁵ A Zeova sẽn kõt sugrã yĩnga, a yãka yam n pa na n sãam buudã tõr ye. A kõo nin-buiidã sor tɩ b na n wilg b sã n ket n dat n zĩnda yẽ poorẽ. (Yik. 32:14) A Moyiiz sẽn sig n yã tɩ nebã kaasdame, n yɩɩndẽ la b saood nag-bilã taoorã, a rɩka nag-bilã, n wer-a t’a lebg zom-bãanega. Rẽ poore, a yeelame yaa: “Neb nins fãa sẽn dat Sẽn-Ka-Saabã, wa-y mam nengẽ ka.” La ‘Levi buudã fãa wa n tigma taab’ a Moyiiz nengẽ.—Yik. 32:17-20, 26.

¹⁶ Baa ne sẽn yaa a Aarõ n maan nag-bilã, a teka yam. Yẽ ne Levi buudã neb a taabã fãa wilgame tɩ yaa a Zeova poorẽ la b be. B sẽn tɩ tigim a Moyiiz nengẽ wã wilga vẽeneg tɩ b pa be bɛɛgdbã poorẽ ye. B sẽn bak toorã, b maana b mens neere. Bala, neb tusa sẽn pʋʋs bõn-naandgã la b kʋ baraarã. La neb nins sẽn zĩnd a Zeova poorẽ  wã yẽ põsame. Sẽn paase, a Zeova yeelame t’a na n ning-b-la barka.—Yik. 32:27-29.

17. A Poll sẽn lebg n tẽeg Israyɛll nebã sẽn pʋʋs nag-bilã, la a yeel bũmb ningã wilgda tõnd bõe?

¹⁷ Yam-bʋg la d tõe n dɩk kiba-kãngã pʋgẽ? Tʋm-tʋmd a Poll yeelame tɩ “bõn-kãens yaa mamsg tõnd yĩnga,” sẽn na yɩl tɩ d ra tol n yɩ “wẽn-naands pʋʋsdb” ye. A paasame yaa: “Bõn-kãens paama bãmba, tɩ yɩ mamsgo, la b gʋlsame n na n keoog tõnd dãmb sẽn mi tɩ wakatã taa a saabã. Woto yĩnga, bɩ ned ning sẽn tagsd t’a yasa yĩngrã gũus n da wa lʋɩ ye.” (1 Kor. 10:6, 7, 11, 12) A Poll gomdã wilgdame tɩ baa kiris-ned hakɩɩk tõe n wa maana sẽn yaa wẽnga. A tõeeme meng n tagsdẽ t’a Zeova sũur ket n yaa noog ne-a. La baa ned sã n dat n yɩ a Zeova zoa, wall a sã n yetẽ t’a maanda sɩd ne a Zeova, pa wakat fãa la rẽ wilgd t’a Zeova sũur sɩd nooma ne-a ye.—1 Kor. 10:1-5.

18. Bõe n tõe n wa kɩt tɩ d zãag d meng ne a Zeova, la rẽ tõe n wa baasa wãna?

¹⁸ A Moyiiz sẽn dʋ Sinayi tãngã zug n kaoosd n pa sigdã, wa n lebga yɩɩr wʋsg ne Israyɛll nebã. Tõnd me sã n wa getẽ tɩ dũniyã saab kaoosdame, tõe n wa lebga yɩɩr wʋsg ne-do. D tõe n wa getame t’a Zeova sẽn pʋlem bũmb ninsã pa na n pids mas-masã, wall d tagsdẽ tɩ b pidsg yaa toogo. D sã n pa gũusi, woto tõe n kɩtame tɩ d wa lʋɩɩs tõnd mengã sẽn datã taoore, t’a Zeova raabã leb poorẽ. Bilf-bilfã, d tõe n wa zãaga d meng ne a Zeova, n wa maand bũmb nins d sẽn da pa na n saag n maanã menga.

19. Bõe la d pa segd n yĩmi, la bõe yĩnga?

¹⁹ D ra tol n yĩm t’a Zeova ratame tɩ d tũ yẽ a ye tãa, la ne d sũur fãa ye. (Yik. 20:5) Bõe yĩng t’a rat woto? Bala, a nonga tõndo. D sã n pa maand a Zeova raabã, d maanda a Sʋɩtãan raabo, tɩ rẽ yaool n na n wã-do. Ad a Poll sẽn yeele: “Ka tõe n yũud Zu-soabã bõn-yũudlã, la y yũud zĩn-dãmbã me rẽnd ye. Yãmb ka tõe n naag n dɩt Zu-soabã dɩɩbo, la y leb n naag n dɩt zĩn-dãmb dɩɩb ye.”—1 Kor. 10:21.

20. Baa d sã n tudgi, bõe la a Zeova maanda, n na n sõng-do?

²⁰ A Kayẽ ne a Salomo la Israyɛll nebã me ra tõe n teka yam n kos sugri, la b toeeme. (Tʋʋ. 3:19) Ned sẽn tũud a Zeova sã n tudgi, a Zeova pa yɩt tao-tao n bas-a ye. D tags a sẽn kõ a Aarõ sugrã. Rũndã-rũndã me, a Zeova keoogda tõnd ne nonglem, n na n sõng tõnd tɩ d ra wa maan sẽn yaa wẽng ye. A tũnugda ne Biiblã, siglgã sɛbã, la baa d tẽed-n-taasã menga. A Zeova sã n keoog-d woto tɩ d sak n kelge, d tõe n kɩsa sɩd t’a na n zoee d nimbãaneg n kõ-d sugri.

21. Sã n wa yaa tɩlɛ tɩ d wilg yell ning pʋgẽ tɩ d sɩd bee a Zeova poorẽ, bõe la d segd n maane?

²¹ Wẽnnaam a Zeova sẽn wilgd tõnd a nimbãan-zoeerã bɩ a bark sẽn ka to wã pa zaalem ye. (2 Kor. 6:1) Kõta tõnd weer tɩ d paam n “bas wẽn-kɩɩsgo la dũniyã ratem wẽnsã.” (Karm-y Tit 2:11-14.) D sẽn be dũni-kãngã pʋgẽ wã, d miime tɩ yɛl kẽer pʋgẽ, na n yɩɩ tɩlɛ tɩ d wilg d sã n sɩd bee a Zeova poorẽ. Bɩ d mao wakat fãa, n kell n zĩnd a Zeova poorẽ. Bala, yẽ n yaa tõnd Wẽnnaam, tɩ d segd n zoe-a, n sak-a la d gãd-a kãn-kãe.—Tõo. 10:20.