1, 2. (a) Omolwashike shi li pandunge okugama kuJehova? (b) Oshike tatu ka kundathana moshitopolwa shika?

OSHI LI pandunge okugama kuJehova. Kapu na gumwe omunankondo, omunandunge nenge omunahole e vule Jehova. Olye gwomutse inaa hala okugama kombinga ye? (Eps. 96:4-6) Aapiya yaKalunga yamwe oya li ya ndopa okugama kuye, sho ya taalelwa koonkalo oondhigu.

² Moshitopolwa shika, otatu ka kundathana iiholelwa yaantu mboka ya li ye wete ya gama kuJehova, ihe pethimbo opo tuu mpoka oya li taya longo shoka inaashi mu opalela. Miiholelwa mbyoka otatu ilongo mo iinima ya simana, mbyoka tayi tu kwathele tu kale aadhiginini lela kuJehova.

3. Omolwashike Jehova a yi kuKain, nokwa li e mu lombwele shike?

³ Natu kundathaneni kombinga yaKain. Ka li ha longele iikalunga, ihe oJehova. Nonando ongawo, ka li a hokiwa kuKalunga, oshoka muye omwa li iikala iiwinayi. (1 Joh. 3:12) Jehova okwa li a lombwele Kain a ti: “Ngele to longo uuwanawa, nena oshipala shoye oshi li nawa, ihe ngele to longo uuwinayi, nena uulunde owe  ku langele posheelo. Owo wa hala oku ku pangela, ihe ou na oku u pangela.” (Gen. 4:6, 7) Niitya yimwe, Jehova okwa li ta lombwele Kain ta ti: “Ngele owi iyele ombedhi e to gama kombinga yandje, otandi ka gama wo kombinga yoye.”

4. Sho Kain a pewa ompito yokugama kuJehova, okwa ningi po shike?

⁴ Ando Kain okwa li a lundulula omadhiladhilo ge omawinayi, ando okwa kala a hokiwa kuJehova. Ihe Kain ka li a pulakene komayele ngoka a pewa. Omadhiladhilo ga puka nosho okwiihola mwene, oye mu ningitha a yone. (Jak. 1:14, 15) Pethimbo e li omugundjuka, Kain otashi vulika ka li a dhiladhila kutya ona ka yone kuJehova. Mokweendela ko kwethimbo, okwa longo shoka inaa dhiladhila, mokupilamena Jehova e ta dhipaga omumwayinamati.

5. Omadhiladhilo geni taga vulu oku tu ningitha kaatu kale twa hokiwa kuJehova?

⁵ Ngaashi Kain, Omukriste kunena otashi vulika a kale e wete ta longele Jehova, ihe paushili wo wene shoka ta longo inashi mu opalela. (Jud. 11) Pashiholelwa, gumwe otashi vulika a ethe a kale ta dhiladhila kombinga yomahalo ga puka, yolwiho nokombinga yokutonda Omukriste omukwawo. (1 Joh. 2:15-17; 3:15) Onkee ano, omadhiladhilo ngoka otaga vulu okuningitha omuntu a yone. Omuntu ngoka otashi vulika a kale nokuli ha yi muukalele nokokugongala pandjigilile. Odhoshili kutya yalwe otashi vulika kaaye shi shoka tatu dhiladhila naashoka tatu ningi, ihe Jehova oha mono iinima ayihe noha kala e shi shi uuna itaatu mu longele nomutima aguhe. — Lesha Jeremia 17:9, 10.

6. Jehova ohe tu kwathele ngiini tu ‘pangele’ omahalo getu guulunde, uuna twa gama kombinga ye?

⁶ Jehova ohe tu idhidhimikile. Uuna oonkatu dhetu tadhi tu hedhitha kokule naJehova, ohe tu lombwele ta ti: “Galukileni kungame, nangame tandi galukile kune.” (Mal. 3:7) Jehova okwa hala tu kale kokule nuuwinayi, unene tuu uuna tatu kondjitha omaunkundi getu. (Jes. 55:7) Ngele osho twa ningi, nena ota ka gama kombinga yetu moku tu pa ekwatho noonkondo ndhoka twa pumbwa, opo tu ‘pangele’ omahalo getu guulunde. — Gen. 4:7.

7. Salomo okwa li a kanitha ngiini ekwatathano lye ewanawa naJehova?

⁷ Otatu vulu okwiilonga oshindji koshiholelwa shomukwaniilwa Salomo. Pethimbo omugundjuka, okwa li e na ekwatathano ewanawa naJehova. Kalunga okwa li e mu pe uunongo nokwa li e mu pe oshinakugwanithwa sha simana shokutunga otempeli ombwanawa muJerusalem. Nonando ongawo, lwanima Salomo okwa kanitha ekwatathano lye naJehova. (1 Aak. 3:12; 11:1, 2) Ompango yaKalunga oya li ya popi kutya omukwaniilwa Omuhebeli ina kala e na “aanyekadhi oyendji, oshoka shika otashi mu pilamenitha Omuwa.” (Deut. 17:17) Salomo okwa pilamene Jehova, e ta hokana aakiintu 700 nokwa li e na natango oohonda 300. (1 Aak. 11:3) Oyendji yomaanyekadhi ye kaya li Aaisraeli, noya li haya longele iikalunga. Salomo ka li wo a vulika kompango yaKalunga, sho a hokana aakiintu oyendji aakwiilongo. — Deut. 7:3, 4.

8. Salomo okwa li a yematitha Jehova noonkondo ngiini?

⁸ Kashona nakashona, Salomo okwe ende ta kanitha ohole ye yokuhola oompango dhaJehova, nomokweendela ko kwethimbo oshe mu ningitha a yone sha kwata miiti. Salomo okwa li a tungu iiyambelo iyali, shimwe oshoshikalungakiintu Astarte nashimwe oshoshikalunga Kemosh. Okwa tameke okulongela iikalunga mbyoka pamwe naakulukadhi ye. Iiyambelo mbyoka okwe yi tungile kondundu ndjoka ya li nokuli komeho yaJerusalem, moka a tungila otempeli yaJehova. (1 Aak. 11:5-8; 2 Aak. 23:13) Otashi vulika Salomo a li i ifundjaleke mokudhiladhila  kutya Jehova ote ki idhimbika iilonga ye mbyoka iiwinayi, shampa owala ta tsikile okugandja omayambo kotempeli.

9. Sho Salomo inaa vulika komalondodho gaKalunga, oshe etitha iizemo yini?

⁹ Jehova ihi ipwililikile omayono. Ombiimbeli otayi ti: “[Jehova] . . .  nando okwa li a holokele Salomo Iwaali nokwe mu indike okulongela iikalunga iikwiilongo, Salomo ina vulika kOmuwa, ihe okwe mu pilamene. Omolwashoka Omuwa okwa geele Salomo.” Oshizemo? Jehova ka li we e mu hokwa noka li e mu ambidhidha. Onkee ano, oluvalo lwaSalomo kalwa li lwa mono uuthembahenda wokupangela oshigwana shaIsraeli, nolwa kala nokuli nokumona iihuna omimvo odhindji. — 1 Aak. 11:9-13.

10. Oshike tashi vulu okutula ekwatathano lyetu ewanawa naJehova moshiponga?

¹⁰ Ngaashi Salomo, oshinima shoka unene shi li eshongo kuupambepo wetu, okupanga uukuume naamboka kaayu uvite ko noinaya simaneka omithikampango dhaJehova. Yamwe yomuyo otashi vulika ya kale yomegongalo, mboka ya nkundipala pambepo. Omanga yamwe tashi vulika ya kale aapambele yetu, aashinda yetu, aaniilonga pamwe natse nenge aanasikola ooyakwetu mboka ihaaya longele Jehova. Ngele ookuume ketu kopothingo ihaya simaneke omithikampango dhaJehova, otaya vulu okuyona po ekwatathano lyetu ewanawa naye.

11. Oshike tashi vulu oku tu kwathela tu mone kutya ookuume yeni tu na okuyanda?

¹¹ Lesha 1 Aakorinto 15:33. Aantu oyendji oye na omaukwatya gamwe omawanawa, noyendji mboka ihaaya longele Jehova ihaya kutha naanaa ombinga miinima iiwinayi. Ngele ookuume koye osho ye li ngawo, mbela oto ka dhiladhila kutya oye li eendathano ewanawa? Onawa wu ipule kutya okweendathana nayo otaku ka guma ngiini ekwatathano lyoye naJehova. Mbela otaye ke li hwepopaleka? Oshike shi li momitima dhawo? Pashiholelwa, mbela oye hole unene okupopya kombinga yoonguwo ndhoka opo dha kondo, iimaliwa, oongodhi, omainyanyudho nenge iinima yilwe yopamaliko? Mbela olundji ohaya popile yalwe muuwinayi nokuninga omashendjo guugoya? Jesus okwe tu londodha a ti: “Shoka shu udhilila momutima, osho shoka okana take shi popi.” (Mat. 12:34) Ngele owa ndhindhilike kutya ookuume koye otaya tula ekwatathano lyoye naJehova moshiponga, katuka pandunge mokungambeka eendathano nayo. Nenge ngele osha pumbiwa, etha po okweendathana nayo. — Omayel. 13:20.

12. (a) Jehova okwa li a shilipaleke Aaisraeli shike, sho opo ya zi muEgipiti? (b) Aaisraeli oya li yi inyenge ngiini, sho Kalunga e ya pula ya kale aadhiginini kuye?

¹² Otatu vulu wo okwiilonga iitsa ya simana mwaashoka sha li sha ningwa po, konima  owala yokathimbo sho Aaisraeli ya mangululwa muEgipiti. Aantu oya li ya gongala pondundu yaSinai. Manga ya gongala mpoka, Jehova okwa li e ya ihololele momukalo omukumithi. Oya mono oshikogo oshiluudhe noyu uvu omindundumo. Opo nduno, oya mono oombadhi tadhi shela, olwithi noyu uvu enkuma tali hikwa tali kugagana. (Eks. 19:16-19) Momukalo nguka, Jehova okwi ihololele Aaisraeli e li ‘Kalunga omulaadhi,’ ano ngoka tu na okukala aadhiginini kuye. Okwe ya shilipaleke kutya ota ka kala omudhiginini kwaamboka ye mu hole nohaya vulika kiipango ye. (Lesha Eksodus 20:1-6.) Niitya yimwe, Jehova okwa li ta lombwele oshigwana she ta ti: “Ngele omwa ulike kutya omwa gama kungame, otandi ka gama wo kombinga yeni.” Mbela ando opo wa li, ando owi inyenge ngiini keuvaneko ndyoka lyuudhiginini lya za kuJehova Kalunga? Osha yela kutya ando owa ningi ngaashi Aaisraeli ya ningi. Oya li ya “yamukula ya ti: ‘Otatu ningi ayihe mbyoka Omuwa a popi.’” (Eks. 24:3) Nziya konima yaashono, uudhiginini wawo owa makelwa koshinima shoka ya li inaaya tegelela.

13. Oshike sha li sha makele uudhiginini wAaisraeli?

¹³ Aaisraeli sho ya mono oshikogo oshiluudhe, olwaadhi nosho wo omandhindhiliko galwe omakumithi ga za kuKalunga, oya kwatwa kehaluko. Oya pula Moses oye e ya kalele po, nokwa zimine oye a ka popye naJehova kondundu Sinai. (Eks. 20:18-21) Sho Moses a yi kondungu yondundu, okwa kala ko ethimbo ele. Mbela Aaisraeli oya li ye wete ye li mombuga kaaye na ngoka te ya kwatele komeho? Osha fa shi li ngeyi kutya eitaalo lyawo olya li unene li ikolelela kuMoses sho e li po. Onkee ano, Aaisraeli oya tameke okukala tayi ipula unene, noya lombwele Aaron ya ti: “Katu shi wo tuu shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.” — Eks. 32:1, 2.

14. Aaisraeli oya li taya dhiladhila shike, na Jehova okwi inyenge ngiini kwaashoka ya ningi?

¹⁴ Aaisraeli oya li ye shi kutya okulongela iikalunga eyono lya kwata miiti kuJehova. (Eks. 20:3-5) Ihe konima oya tameke okulongela ontana yoshingoli. Nonando oya li ya katuka onkatu ndjoka ombwinayi, Aaisraeli oya li taya dhiladhila kutya natango oya gama kuJehova. Omolwashike tatu tile ngawo? Omolwaashoka Aaron okwa li a popi kutya okulongela ontana ndjoka oku li ‘oshituthi shOmuwa.’ Jehova okwi inyenge ngiini? Molwaashono osha li she mu uvitha nayi, okwa lombwele Moses kutya aantu “oya yono” yo ‘oye etha ondjila ndjoka e ya lombwele.’ Jehova okwa li a “geele” noonkondo oshigwana shaIsraeli nokwa li nokuli ta dhiladhila oku shi komba po ashihe. — Eks. 32:5-10.

15, 16. Moses naAaron oya li yu ulike ngiini kutya oya gama kuJehova? (Tala kethano lyopetameko.)

¹⁵ Jehova okwa li a tokola kaa kombe po Aaisraeli. Omolwohenda ye, okwa li a pe aapiya ye aadhiginini ompito yu ulike kutya oya gama kombinga ye. (Eks. 32:14) Konima sho Moses a mono eihumbato ewinayi lyaantu, nkene taya igidha, taya imbi nokudhana komeho yontana, okwe yi kutha e te yi lungunitha po momulilo e tayi ningi omutoko. Opo nduno, okwe ya lombwele a ti: “Shaa ngoka a gama kOmuwa, ne ye kungame.” Opo ihe, “Aalevi ayehe noye mu gongalele.” — Eks. 32:17-20, 26.

¹⁶ Aaron ngoka naye a li a longele ontana yoshingoli, okwi iyele ombedhi e ta gama kAalevi ayehe mboka ya li kombinga yaJehova. Aantu mbaka aadhiginini kaya li owala ya gama kuJehova, ihe oya li wo yi itopola ko kaayoni. Shoka ya ningi osha li pandunge. Mesiku olyo tuu ndyoka, aantu omayovi  mboka ya li ya longele ontana yoshingoli oya kanitha oomwenyo dhawo. Mboka ya gama kuJehova, oya li yu uvanekelwa eyambeko. — Eks. 32:27-29.

17. Oohapu dhaPaulus kombinga yontana yoshingoli otadhi tu longo shike?

¹⁷ Omuyapostoli Paulus okwa li a popi kombinga yontana yoshingoli, e ta gandja elondodho tali ti: ‘Iinima ayihe ya tya ngeyi oyo iiholelwa yoku tu londodha, twaa simaneke iikalunga, ngaashi yamwe yomuyo ye shi ningi. Iiholelwa mbika oya nyolwa, yi tu londodhe. Oshoka otu li methimbo, uuna ehulilo li li popepi. Ngoka ta dhiladhila kutya okwa thikama, na kotoke, kaa gwile po.’ (1 Kor. 10:6, 7, 11, 12) Ngaashi Paulus e shi popi, naalongelikalunga yashili otaya vulu okutameka okulonga iilonga iiwinayi. Mboka hayi igandja komamakelo, otashi vulika ya dhiladhile kutya oye na natango ekwatathano ewanawa naJehova. Ngele omuntu okwa hala okuninga kuume kaJehova nenge okukala omudhiginini kuye, shoka itashi ti aluhe kutya okwa hokiwa kuye. — 1 Kor. 10:1-5.

18. Oshike tashi vulu oku tu hedhitha kokule naJehova, niilanduliko oyini?

¹⁸ Ngaashi owala Aaisraeli ya li ya lulilwa noye wete Moses a kala ko kondundu yaSinai, Aakriste kunena nayo otashi vulika ya kale ya lulilwa noye wete esiku lyaJehova lyepangulo nosho wo uuyuni uupe ya kala ko. Egwanitho lyomauvaneko ngaka otashi vulika li kale lya fa li li kokule lela nenge li kale lya fa itaali ka ningwa shili. Okudhiladhila kwa tya ngawo, otaku vulu oku tu ningitha tu pitithe komeho omahalo getu pehala lyehalo lyaJehova. Mokweendela ko kwethimbo, shoka otashi vulika shi tu hedhithe kokule naJehova, e tatu kutha ombinga miinima mbyoka inaatu dhiladhila nando onale, manga twa li tu na uupambepo wa kola.

19. Uushili wuni inaatu pumbwa nando okudhimbwa, nomolwashike?

¹⁹ Inatu dhimbweni nando kutya Jehova okwa tegelela tu vulike kuye nomutima aguhe noku mu longela oye awike. (Eks. 20:5) Ngele itatu longo ehalo lye, nena otatu longo ehalo lyaSatana, oshinima shoka tashi ke tu etela iilanduliko yinikitha oluhodhi. Onkene, Paulus okwe tu dhimbulukitha ta ti: “Itashi vulika, mu nwe moshitenga shOmuwa e tamu ka nwa ishewe moshitenga shoompwidhuli. Nenge mu lye koshililo shOmuwa e tamu ka lya ishewe koshililo shoompwidhuli.” — 1 Kor. 10:21.

20. Ongiini Jehova ta vulu oku tu kwathela, nokonima ngele twa yono?

²⁰ Kain, Salomo nosho wo Aaisraeli kondundu yaSinai, ayehe oya li ye na ompito ‘yokwiitedhulula nokugalukila kuKalunga.’ (Iil. 3:19) Odhoshili kutya mboka ya katuka onkatu ombwinayi, Jehova ohe ya pe ompito yi itedhulule. Pashiholelwa, sho Aaron i itedhulula, Jehova okwe mu dhimine po. Kunena, Jehova ohe tu pe omalondodho okupitila mOmbiimbeli, miileshomwa mbyoka ya kankamena kOmbiimbeli nenge momayele ngoka tashi vulika tu pewe kOmukriste omukwetu. Uuna tatu landula omalondodho gaJehova, otatu vulu okukala nuushili kutya ote ke tu sila ohenda.

21. Uuna uudhiginini wetu tawu makelwa, oshike tu na okutokola okuninga?

²¹ Jehova ohe tu sile ohenda nelalakano. (2 Kor. 6:1) Ohashi tu pe ompito “tu ethe okudhina Kalunga nuuhalu wuuyuni.” (Lesha Titus 2:11-14.) Manga tu li “muuyuni mbuka,” otu na okutaalela oonkalo ndhoka tadhi makele uudhiginini wetu. Onkee ano, natu ulike aluhe kutya otu li aadhiginini kuJehova. Natu ‘tileni Jehova Kalunga ketu, noye awike tu longeleni. Tu mu inekeleni.’ — Deut. 10:20.