1, 2. a) ¿Tleka kinamiki matinemikan iuan toTajtsin? b) ¿Tlenon tikitaskej ipan yejuin tlamachtijli?

XAKAJ melak kojtik, tlamachilise niman tetlasojtlani ken toTajtsin. Ika yejon, kinamiki ika itech matopepechokan niman iuan matinemikan (Sal. 96:4-6). San ika, sekimej akin katkaj itekipanojkauan Jehová xokichiujkej yejon.

² Ipan yejuin tlamachtijli tikitaskej inneskayo sekimej tlaltikpakchanejkej akin kijtouayaj ika nemiyaj iuan Jehová, san ika, noijki kichiujtoyaj tlen kiyolkokouaya toTajtsin. Tlen tiueliskej intech, techpaleuis matiyolmelaujkanemikan itech Jehová.

3. ¿Tleka ononek ika Jehová makichikajkanotsa Caín, niman tlenon okijli?

³ Matikitakan tlenon ipan onochiuj Caín. Yejua kinemiliaya ika kiueyichiuaya Jehová, niman xakaj okse. Maski ijkon, Jehová xkiseliaya ken kiueyichiuaya, pampa okitak ika ipan iyojlo kipiaya tlen xkuajli (1 Juan 3:12). Kuakon, Jehová okimelajkaijli Caín: “Tla tikchiua tlen kuajli, ¿xok oksejpa mitstlakaitaskej? San ika, tla xtikchiua tlen kuajli, tlajtlakojli sa mitschiatok ipan puerta, niman kineki mitstlanis; san ika, tejua, ¿uelis tiktlanis?” (Gén. 4:6, 7). Kentla Jehová kijlitoskia ika, tla noyolkuepaya niman nemiya iuan, yejua noijki iuan nemiskia.

4. ¿Tlenon okichiuj Caín ijkuak ueliskia kitlapejpenis nemis iuan Jehová?

 ⁴ Caín ueliskia kuajli nemis ixpan Jehová tla kiyektlaliaya itlanemililuan. San ika, xokitlakamat tlen Jehová okijli. Pampa xkuajli tlen kinemiliaya niman tlen kinekiya, okichiuj tlen xkuajli (Sant. 1:14, 15). Ijkuak telpochtli katka, Caín kanaj xkeman okinemili ika kemantika kixnamikiskia Jehová. Maski ijkon, oajsik tonajli ijkuak okixnamik toTajtsin niman okimikti ikniuj.

5. ¿Tlenon uelis kichiuas ika Jehová maka sa matechseli?

⁵ Ijkon ken Caín, se tokniuj kanaj uelis kijtos ika kiueyichiua toTajtsin, san ika, ipan inemilis kichiujtika tlen xkuajli (Jud. 11). Kanaj melak tenojnotsa niman yauj nochi tlanechikoltin, san ika, noijki kitemiltijtika itsontekon ika auilnemilistli, ika kipiyas miyek tomin noso kanaj ika ken kitlauelita se tokniuj (1 Juan 2:15-17; 3:15). Yejuin uelis kichiuas matlajtlako. Kanaj oksekimej xkimatij tlenon tiknemiliaj noso tikchiuaj, san ika, Jehová kema kita nochi niman kimati tla yemelak iuan tinemij noso ka (xpoua Jeremías 17:9, 10). *

6. ¿Kenon Jehová techpaleuiya matikpopolokan nochi xkuakualtin ileuilistin?

⁶ Maski ijkon, Jehová xnimantsin kinemilia ika xok uelis toyektlaliskej. Tla yejua kita ika itiktlalkauijtokej, yejua techijlia yejuin: “Notech xuajmokuepakan, niman nejua nemotech ninokuepas” (Mal. 3:7). Yejua kineki matikmapeuakan tlen xkuajli, yejuin melak noneki ijkuak tikixnamiktokej itlaj tlen uelis kichiuas matitlajtlakokan (Is. 55:7). Tla ijkon tikchiuaj, yejua kijtoua ika techpaleuis niman techmakas kojtilistli tlen ika uelis tikpopoloskej nochi xkuakualtin ileuilistin (Gén. 4:7).

7. ¿Kenon Salomón xok okinek nouikas iuan Jehová?

⁷ Miyek tiuelij itech tlen okichiuj tekiuaj Salomón. Ijkuak telpochtli katka, okinokauili ika Jehová makiyekana, niman Jehová okimakak miyek tlamachilistli niman okinauati makichijchiua se ueyi teopan ipan Jerusalén. San ika, Salomón xok okinek nouikas iuan Jehová (1 Rey. 3:12; 11:1, 2). ITlanauatil toTajtsin kuajli kijtouaya ika tekiuajkej hebreos xkipiayaj ika nonamiktiskiaj iuan miyekej siuamej, ijkon xkinyoltilanaskiaj makikauakan toTajtsin (Deut. 17:17). San ika, Salomón xotetlakamat niman sakin ononamikti iuan 700 siuamej niman okinpix 300 itlakpasiuauan noso concubinas (1 Rey. 11:3). Miyekej itech yejon siuamej xkatkaj israelitas niman kinueyichiuayaj tajtsitsintin tlen xmelajkej. Ijkon, Salomón noijki xokitlakamat tlanauatijli tlen kijtouaya ika israelitas xkipiaya ika nonamiktiskej iuan siuamej akin xkatkaj israelitas (Deut. 7:3, 4).

8. ¿Kenon Salomón melak okiyolkoko Jehová?

⁸ Salomón okipolojtiaj ken kitlasojtlaya itlanauatiluan toTajtsin niman miyek okichiuj tlen melak xkuajli katka. Okichijchiuili inantsin Astoret se tlaixpan niman noijki itajtsin Kemós. Ompa, iuan isiuauan kominueyichiuaya xmelajkej tajtsitsintin. Hasta okinchijchiuili intlaixpan ipan se tepetl tlen onkatka ixpan Jerusalén, kampa okichijchiujka iteopan Jehová (1 Rey. 11:5-8; 2 Rey. 23:13). Kanaj sa no yejua onokajkayauj niman okinemili ika toTajtsin xkualaniskia tla xkikajkauaya ika konuenchiuaya ipan iteopan.

9. ¿Tlenon opanok pampa Salomón xokitlakamat toTajtsin?

⁹ San ika, Jehová xkeman san kipanoltia  tlajtlakojli. Biblia kijtoua: “Jehová melak okualan iuan Salomón, pampa iyojlo xok onkatka iuan Jehová [...] akin okpa ixpan ononexti niman kuajli okijlika yejuin, ika xkipiaya yas intech oksekimej tajtsitsintin. San ika, yejua xokitlakamat tlen Jehová okinauatijka”. Ipampa tlen okichiuj, toTajtsin xok okipaleui niman xok okiseli. Israel tlen san se tekiuajyotl katka, onotlajkoxelo, yejuin okijtosnek ika ikoneuan Salomón xok otlanauatijkej itech nochi Israel, niman melak miyek xiujtin okixnamijkej tlaueltin tlen melak okintlajyouilti (1 Rey. 11:9-13).

10. ¿Tlenon uelis kichiuas maka sa matouikakan iuan Jehová?

¹⁰ Ijkon ken ipan onochiuj Salomón, tla touikaj iuan akin xkasikamatij itlanauatiluan Jehová noso xkintlakaitaj, yejon uelis melak techijtlakos. Niman uelis yeskej sekimej akin nemij ipan tlanechikojli, san ika, xok kuajli nouikaj iuan Jehová. Noijki, uelis yeskej tochanejkauan, akin nisiuj iuan tichantij, noso akin imiuan titekitij noso akin imiuan tomachtiaj niman xkitekichiuiliaj Jehová. Maski san kenon, tla akin imiuan touikaj xkitlakaitaj itlanauatiluan Jehová, ajsis tonajli ijkuak xok tiknekiskej touikaskej iuan Jehová.

11. ¿Tlenon uelis techpaleuis matikitakan akinomej xok kipiya imiuan touikaskej?

¹¹ (Xpoua 1 Corintios 15:33). Miyekej tlaltikpakchanejkej kipiyaj kualneskayomej, niman maski xkiueyichiuaj Jehová kichiuaj tlen kuajli. Tla akin imiuan touikaj ijkomej, ¿kijtosneki ika xtechijtlakoskej? Noneki totlajtoltiskej tla pampa imiuan touikaj techpaleuiya matouikakan iuan Jehová. Noijki, noneki matiknemilikan tlenon kipiyaj ipan inyojlo. Se neskayotl, ¿nochipa tlajtouaj itech yenkuikej tlakentin, tomin, aparatos tlen yenkuikej, itech tlen ika timoyolpaktis niman okseki tlen uelis tijkouas? ¿Kuelitaj tetejteneuaskej noso kamanaloskej itech tlen tsokuiltik? Jesús kuajli otemelajkaijli: “Tlen kisa ipan tekamak ualeua ne ipan teyojlo kampa yejua ika tlatentok” (Mat. 12:34). Ijkon tej, tla tikitaj ika touikaskej iuan yakaj uelis kijtlakos ken touikaj iuan Jehová, nimantsin matikpatlakan tlen tikchiuaj niman maka melak matouikakan imiuan akin ijkomej, noso tla noneki, maka sa imiuan matouikakan (Prov. 13:20).

12. a) ¿Tlenon Jehová kuajli okimijli israelitas ijkuak san kemach okiskaj itech Egipto? b) ¿Kenon otenankilijkej israelitas ijkuak Jehová okimijli ika kinekiya san yejua makiueyichiuakan?

¹² Noijki uelis techmachtis miyek tlen opanok iuan israelitas ijkuak san kemach okiskaj itech Egipto. Ijkuak oajsikej ixpan tepetl Sinaí, Jehová melak okinmojkatlachialti ijkuak okimititi ika imiuan nemiya: onochijchiuj se moxtli tlen okapotsiuj, otlakomon, otlapetlan, otlapokis niman itlaj melak chikauak kakistiya kentla tla kipitsaskiaj se kuakoujtli (Éx. 19:16-19).  Ompa, Jehová okimijli israelitas ika yejua katka Jehová, inTajtsin akin kitlajtlani san yejua makiueyichiuakan. Noijki, kuajli okimijli ika yejua xkinkauaskia akin kitlasojtlaskiaj niman kitlakamatiskiaj itlanauatiluan (xpoua Éxodo 20:1-6). * Kema, Jehová kentla kimijlitoskia: “Tla tejua nouan tinemi, nejua noijki mouan ninemis”. Tla ompa tinemiskiaj, ¿kenon tiknankiliskia yejuin tlen Jehová kijtotoya kichiuas? Tikmatstokej ika titlanankiliskiaj ijkon ken israelitas. Biblia kijtoua ika “nochi kalpan san sekan otenankili: ‘Nochi tlajtoltin tlen Jehová yokijto, tejuamej tiknekij tikchiuaskej’” (Éx. 24:3). Maski ijkon, sakin itlaj panoskia kampa nesiskia tla yemelak yolmelaujkanemiyaj itech Jehová.

13. ¿Tlenon okichiujkej israelitas ijkuak Moisés nemiya ipan tepetl Sinaí?

¹³ Israelitas melak onomojtijkej ijkuak okitakej tlapetlanaltin, yejon moxtli kapotstik niman okseki kampa ones ikojtilis toTajtsin. Ika yejon, okitlajtlanilijkej Moisés ika yejua matlajto iuan Jehová (Éx. 20:18-21). Kuakon, yejua otlejkok ipan tepetl Sinaí, niman ompa onen miyek tonaltin. Pampa israelitas xkitstoyaj akin kinyekanaya, ¿san inselti yokiminkaujkaj ipan tlaluaktli? Nesi ika yejuamej san tlaneltokayaj ijkuak Moisés imiuan nemiya. Kuakon, onosiaujkaujkej niman okijlikej Aarón: “Xtexchijchiuili se toTajtsin akin tixpan mauiya, pampa xtikmatij tlenon ipan yonochiuj yejuin Moisés, yejon tlakatl akin otechkixti itech itlal Egipto” (Éx. 32:1, 2).

14. a) ¿Kenon onokajkayaujkej israelitas? b) ¿Tlenon okimachili Jehová?

¹⁴ Israelitas kimatiyaj ika se ueyi tlajtlakojli katka tikinueyichiuas tajtsitsintin (Éx. 20:3-5). Maski ijkon, yejuamej nimantsin opeuj kiueyichiuaj se uakaxkonetl tlachijchiujtli ika oro. Kimatstoyaj ika xkitlakamatstoyaj toTajtsin, san ika, sa no yejuamej onokajkayaujkej niman okinemilijkej ika ok nemiyaj iuan Jehová. Aarón hasta okijto ika kiiluichiuilijtoyaj toTajtsin. San ika, Jehová okimachili ika okikajkayaujkaj. Okijli Moisés ika israelitas melak xkuajli tlen okichiujkaj niman ika xokitlakamatkej tlen okimijli maka makichiuakan. Jehová melak okualan imiuan, hasta okinemili kipopolos nochi ikalpan (Éx. 32:5-10).

15, 16. ¿Kenon kuajli okiteititijkej Moisés niman Aarón ika nemiyaj iuan Jehová? (Xkita tlaixkopinajli kampa peua tlen tomachtijtokej).

¹⁵ Pampa Jehová melak teikneliani, xokinpopolo israelitas. Akin yemelak xkikauasnekiyaj, okimijli makichiuakan itlaj tlen kiteititiskia ika iuan nemiyaj (Éx. 32:14). Ijkuak Moisés okitak ika nochimej nijtotijtoyaj, nokuikatijtoyaj niman tsajtsitoyaj ixpan yejon uakaxkonetl, yejua okikuechtili niman okikauj ken tlalpoktli. Sakin okimijli: “¿Akinon nemi iuan Jehová? ¡Mauajla notech!”. Kuakon, “nochimej Levitas onosentlalijkej iyeualiujyan” (Éx. 32:17-20, 26).

¹⁶ Maski Aarón yejua akin okichijchiujka yejon uakaxkonetl, sakin onoyolkuep niman okitlapejpeni nemis iuan Jehová imiuan nochimej levitas. Yejuin tlakamej akin xokikaujkej Jehová xsan onenkej iuan toTajtsin, noijki onoxelojkej itech israelitas akin xoyolmelaujkanenkej. Melak  kuajli tlen okitlapejpenijkej, pampa ipan yejon tonajli melak miyekej israelitas omijkej pampa okiueyichiujkej se intajtsin tlen xmelauak katka. Niman akin onenkej iuan Jehová, okimijlikej ika kinteochiuaskiaj (Éx. 32:27-29).

17. ¿Tlenon techmachtia tlen Pablo okijkuilo itech uakaxkonetl tlachijchiujtli ika oro?

¹⁷ ¿Tlenon tiuelij itech yejuin? Apóstol Pablo kijtoua: “Nochi on tlen tlajtlamach onochiu para techititiaj ika ma ka [...] tikinueyilikan on tlamachijchiutin intajtsitsiuan ken sekimej yejuamej okichijkej”. Sakin okijto ika nochi yejuin “onotlajkuiloltlalij ipan on Yektlajkuilojli ken se ejemplo para ma ka no ijki tikchiuaskej, yejuan tinemij ipan in sa ika nochi tonaltin”, niman noijki okijto: “Yejua  ika on yejuan kinemiliaj melajkanemij, ma notakan sa no yejuamej para ma ka uetsiskej” (1 Cor. 10:6, 7, 11, 12). Ken techilnamiktia Pablo, hasta akin kiueyichiuaj toTajtsin uelis kichiuaskej tlen xkuajli. Akin kichiuaj se tlajtlakojli kanaj kinemiliaj ika ok nouikaj iuan Jehová. San ika, tla yakaj kineki nouikas iuan toTajtsin noso kijtoua ika itech melajkanemi, yejon xnochipa kijtosneki ika toTajtsin yemelak kiselia (1 Cor. 10:1-5, TNM).

18. ¿Tlenon ueliskia kichiuas matoxelokan itech Jehová, niman tlenon uelis topan panos tla ijkon tikchiuaj?

¹⁸ Ken yotikitakej, israelitas onosiaujkaujkej pampa Moisés ouejkauj ipan tepetl Sinaí. Ijkon ken yejuamej, akin tikchiuaj ken Cristo noijki uelis tosiaujkauaskej tla tiknemiliaj ika melak youejkauj yenkuik tlaltikpaktli niman yejon tonajli ijkuak Jehová teyolkuitis. Kanaj tikitaj ika melak ueyi poliui ika nochiuas nochi tlen tikchiaj noso ika nion xnochiuas pampa melak kualtsin kakisti. Tla xtotlajpiyaj, yejon tlanemililtin uelis kichiuas matiktejtemokan tlen tejuamej tiknekij niman xok tiktejtemoskej tlen Jehová kineki. Sakin, uelis toxeloskej itech toTajtsin niman tikchiuaskej tlen xkeman otiknemilijkaj tikchiuaskiaj.

19. ¿Tlenon xkeman kipiya tikilkauaskej, niman tleka?

¹⁹ Maka keman matikilkauakan ika Jehová kitlajtlani nochipa matiktlakamatikan niman san yejua matikueyichiuakan (Éx. 20:5). Tla xtikchiuaj tlen Jehová kineki, kuakon tikchiujtoskiaj tlen Satanás kineki, niman yejon san kichiuas maka kuajli matitlamitij. Ika yejon, Pablo techilnamiktia: “Xuelis nenkoniskej ipan icopa toTeko, niman no nenkoniskej ipan incopa on xkuajkualtin espíritus. Niman no xuelis nentlakuaskej ipan imesa on toTeko, niman nentlakuaskej ipan inmesa on xkuajkualtin espíritus” (1 Cor. 10:21).

20. ¿Kenon uelis techpaleuis Jehová ijkuak topopolouaj?

²⁰ Caín, Salomón niman israelitas, nochimej ueliskiaj noyolkuepaskiaj niman nopatlaskiaj (Hech. 3:19). Kuajli nestika ika Jehová xnimantsin kinkaua itekipanojkauan ijkuak nopopolouaj. Matikilnamikikan ika okitlapopolui Aarón. Aman, Jehová uelis kitekitiltis Biblia, toamatlajkuiloluan noso se tokniuj niman ijkon texchikajkanotsas. Ijkuak tikchiuaj tlen techijliaj, kuajli tikmatstokej ika Jehová techiknelis.

21. ¿Tlenon noneki tikchiuaskej ijkuak nonekis tikteititiskej tla yemelak tinemij iuan Jehová?

²¹ Itlasojtlalis Jehová tlen xtekaua, techpaleuiya (2 Cor. 6:1). Techkauilia “ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli” (xpoua Tito 2:11, 12). Ipan yejuin tlaltikpaktli nonekis tikteititiskej tla yemelak san tikueyichiuaj toTajtsin. Nochipa matokojtilikan tinemiskej iuan Jehová, pampa san yejua akin kinamiki matikmojkaitakan, akin kipiya tiktekichiuiliskej niman akin itech noneki topepechoskej (Deut. 10:20).