1, 2. (a) Ke ka baka la’ng go le bohlokwa gore re be ka lehlakoreng la Jehofa? (b) Re tlo ithuta ka’ng sehlogong se?

GO BOHLOKWA gore re dule re le kgauswi le Jehofa. Ga go na motho yo a nago le matla, yo a lego bohlale le yo a re ratago go feta Modimo wa rena! Ruri ka moka ga rena re nyaka go ba ka lehlakoreng la Jehofa. (Ps. 96:4-6) Lega go le bjalo, ba bangwe ba bahlanka ba Modimo ba ile ba palelwa ke go dula ba le ka lehlakoreng la Jehofa.

² Sehlogong se, re tlo bolela ka mehlala ya batho bao ba ilego ba ipotša gore ba ka lehlakoreng la Jehofa mola ka lehlakoreng le lengwe ba be ba kweša Jehofa bohloko. Re tlo ithuta dilo tše bohlokwa mehlaleng ye e le gore re dule re botegela Jehofa ka mo go feletšego.

3. Ke ka baka la’ng Jehofa a ile a leka go lemoša Kaine, gona Jehofa o ile a re’ng go yena?

³ Nagana ka mohlala wa Kaine. Kaine o be a sa rapele medimo ya maaka, eupša Jehofa ga se a ka a amogela borapedi bja gagwe. Ka baka la’ng? Ka gobane Jehofa o ile a bona gore Kaine o be a kganyoga  go dira bokgopo. (1 Joh. 3:12) Jehofa o ile a lemoša Kaine a re: “Na nka se go phagamiše ge o ka fetoga wa dira botse? Eupša ge e ba o sa fetoge wa dira botse, go na le sebe seo se go laletšego mojako, gomme se tloga se go kganyoga; a wena o ka se fenya?” (Gen. 4:6, 7) Ge e le gabotse Jehofa o be a re go Kaine: “Ge o ka fetoga wa ema ka lehlakoreng la ka, le nna ke tla ema ka lehlakoreng la gago.”

4. Kaine o ile a dira’ng ge Jehofa a be a mo nea sebaka sa gore a eme ka lehlakoreng la gagwe?

⁴ Ge feela Kaine a be a ka fetoša tsela yeo a bego a nagana ka yona, Jehofa o be a tla mo amogela. Eupša Kaine ga se a ka a theetša Modimo. Dikgopolo tša gagwe tše di fošagetšego le dikganyogo tša gagwe tše sa lokago di ile tša mo dira gore a dire sebe. (Jak. 1:14, 15) Ge Kaine e be e sa le mofsa, mohlomongwe o be a sa lore gore ka letšatši le lengwe a ka tsoga a hlanogetše Jehofa. Lega go le bjalo, ge nako e dutše e eya, o ile a dira selo sa go makatša, o ile a hlanogela Modimo gomme a bolaya ngwanabo!

5. Ke dilo dife tšeo re ka di naganago tšeo di ka re dirago gore re se sa amogelwa ke Jehofa?

⁵ Go swana le Kaine, Mokriste a ka dira dilo tše di sa lokago gaešita le ge a ipotša gore o hlankela Jehofa. (Juda 11) Ka mohlala, motho a ka dula a eya tšhemong e bile a sa lofe le diboka, eupša ka nako e swanago a na le megabaru, a dula a nagana ka dilo tše di gobogilego le kamoo a hloilego Mokristegotee le yena. (1 Joh. 2:15-17; 3:15) Go nagana ka dilo tše bjalo go ka dira gore Mokriste a dire sebe. Ke nnete gore batho ba bangwe ba ka no se tsebe dilo tšeo re di naganago goba go tseba boitshwaro bja rena, eupša Jehofa yena o bona dilo ka moka e bile o tseba ge e ba re se ka lehlakoreng la gagwe ka dipelo tša rena ka moka.​—Bala Jeremia 17:9, 10.

6. Jehofa o re thuša bjang gore ‘re fenye’ dikganyogo tše mpe?

⁶ Gaešita le ge re dira diphošo, Jehofa ga a re felele pelo. Ge motho a dira dilo tšeo di tlago go mo dira gore a be kgole le yena, Jehofa o mo kgopela gore: ‘Boela go nna, le nna ke tla boela go wena.’ (Mal. 3:7) Jehofa o a kwešiša gore re na le mafokodi ao re lwago le ona. Eupša o nyaka gore re hloye se sebe. (Jes. 55:7) Ge e ba re dira bjalo, le yena o tla ema ka lehlakoreng la rena gomme a re thekga moyeng le maikwelong gotee le go re nea matla e le gore ‘re fenye’ dikganyogo tše mpe.​—Gen. 4:7.

7. Ke’ng seo se dirilego gore Solomone a se sa ba le tswalano e botse le Jehofa?

⁷ Re ka ithuta dilo tše dintši mohlaleng wa Kgoši Solomone. Ge Solomone e be e sa le yo mofsa, o ile a nyaka tlhahlo go Jehofa. Modimo o ile a mo nea bohlale a ba a mo nea le boikarabelo bja go aga tempele e kgolo kua Jerusalema. Eupša Solomone o ile a se sa ba le tswalano e botse le Jehofa. (1 Dikg. 3:12; 11:1, 2) Go senyegile kae? Molao wa Modimo o be o laetše gore kgoši ya Moheberu e “se ke [ya] ikatišetša basadi, e le gore pelo ya [yona] e se ke ya aroga.” (Doit. 17:17) Eupša Solomone o ile a se kwe molao woo, gomme a feleletša a nyetše basadi ba 700. E bile o be a na le basadi ba bangwe ba 300 ba direthe. (1 Dikg. 11:3) Ba bantši ba basadi ba gagwe e be e se Baisiraele e bile ba be ba rapela medimo ya maaka. Ka gona, Solomone o be a tshetše le molao wa Modimo wa gore Baisiraele ba se nyale basadi ba ditšhaba tše dingwe.​—Doit. 7:3, 4.

8. Solomone o ile a senyetša Jehofa go fihla bokgoleng bofe?

⁸ Ka ge Solomone a ile a se sa kwa melao ya Jehofa ganyenyane-ganyenyane, seo se ile sa mo dira gore a feleletše a dirile dibe tše dikgolo. Solomone o ile a agela medimo ya maaka dialetare. Medimo yeo e be e le Ashiterothe le Kemoshi. Ke moka o ile a thoma go rapela medimo  yeo gotee le basadi ba gagwe. Selo sa go šišimiša le go feta ke gore Solomone o ile a ba a kgetha go aga dialetare tšeo thabeng ya kgauswi le yeo go bego go agilwe tempele ya Jehofa! (1 Dikg. 11:5-8; 2 Dikg. 23:13) Mohlomongwe Solomone o be a iphora ka gore Jehofa o be a tla hlokomologa dilo tše mpe tšeo a bego a di dira ge feela a fela a dira dihlabelo ka tempeleng ya Modimo.

9. Go se kwe ga Solomone melao ya Jehofa go ile gwa feleletša ka’ng?

⁹ Eupša Jehofa ga a hlokomologe dilo tše mpe tšeo re di dirago. Beibele e re: “Jehofa a tukela Solomone bogale, ka gobane pelo ya gagwe e be e arogetše kgole le Jehofa . . . , yena yo a iponagaditšego go yena gabedi. Modimo o be a mo laetše gore a se ke a latela medimo e šele; eupša yena a se latele seo Jehofa a mo laetšego sona.” Se se ile sa dira gore Jehofa a se sa amogela Solomone le go mo thekga. Ke ka baka leo mmušo wa Isiraele o ilego wa feleletša o arogane gomme ka morago ga moo bana ba Solomone gaešita le ditlogolo tša gagwe ba lebeletšana le ditlamorago tše dintši tšeo di kwešago bohloko.​—1 Dikg. 11:9-13.

10. Ke’ng seo se ka dirago gore re se sa ba le segwera se sebotse le Jehofa?

¹⁰ Go swana le Solomone, ge e ba le rena re gwerana le batho bao ba sa ratego melao ya Jehofa e bile ba sa e hlomphe, ba ka senya segwera sa rena le Jehofa. Ba bangwe ba ka ba ba le ka phuthegong eupša ba se ba tia moyeng. Ba bangwe ke batho bao ba sa hlankelego Jehofa, e lego ba leloko, baagišani, bao re šomago le bona goba bao re tsenago le bona sekolo. Ge e ba batho bao re fetšago nako e ntši le bona ba sa phele ka melao ya Jehofa, ba ka dira gore re se sa ba le segwera se sebotse le Jehofa.

11. Ke’ng seo se ka re thušago go kgetha bagwera?

¹¹ Bala 1 Bakorinthe 15:33. Batho ba bantši ba na le dika tše dibotse. Le gona ga se gore batho bao ba sa hlankelego Jehofa ka moka ga bona ba dira dilo tše mpe. Mohlomongwe o tseba ba bangwe ba bona. Eupša na seo se ra gore o swanetše go gwerana le bona? Ipotšiše gore ge e ba o ka gwerana le bona seo se tla ama bjang tswalano ya gago le Jehofa. Na ba tla go thuša gore tswalano ya gago le Jehofa e tie le go feta? Ke dilo dife tšeo di lego bohlokwa go bona? Ba dula ba bolela ka eng? Na ba dula ba bolela ka fešene, tšhelete, dilo tša thekinolotši, boithabišo goba dilo tše dingwe tša manobonobo? Na ba dula ba seba ka ba bangwe? Na ba rata go dira metlae yeo e sa hlwekago? Jesu o lemošitše ka gore: “Molomo o bolela go tšwa go se se tletšego pelong.” (Mat. 12:34) Ge e ba o lemoga gore batho bao o fetšago nako le bona ba senya segwera sa gago le Jehofa, fokotša nako yeo o e fetšago o na le bona, e bile ge e ba go nyakega, etšwa go bona!​—Die. 13:20.

12. (a) Jehofa o ile a botša Baisiraele eng ka moragonyana ga gore ba tloge Egipita? (b) Baisiraele ba ile ba arabela bjang ge Jehofa a be a ba kgopela gore ba mmotegele?

¹² Re ka ithuta dilo tše dingwe go seo se ilego sa diragalela Baisiraele ka moragonyana ga gore Jehofa a ba lokolle Egipita. Ba ile ba kgobokana pele ga Thaba ya Sinai. Ge ba be ba le moo, Jehofa o ile a iponagatša go bona ka tsela e sa tlwaelegago. Jehofa o ile a dira gore go be le leru le lesoleso, medumo, magadima, muši le modumo o mogolo kudu wa lenaka. (Ek. 19:16-19) Ke moka, Jehofa o ile a botša Baisiraele gore ke “Modimo yo a nyakago boineelo bjo bo feletšego.” O ile a ba kgonthišetša gore o tla botegela bao ba mo ratago le go boloka melao ya gagwe. (Bala Ekisodo 20:1-6.) Ge e le gabotse, Jehofa o be a re go bona: “Ge e ba le eba ka lehlakoreng la ka, le nna ke tla ba ka lehlakoreng la lena.” Ge nkabe o be o le gona setšhabeng seo, o be o tla ikwa bjang ge o be o ekwa mantšu a a Jehofa? Ga go pelaelo gore o be o tla ikwa go swana le setšhaba sa Isiraele. Se ile “sa bolela ka lentšu letee sa re: ‘Mantšu ohle ao Jehofa a a boletšego re ikemišeditše go a dira.’” (Ek. 24:3) Lega go le bjalo, ka moragonyana ga moo, go ile gwa direga selo se sengwe seo se ilego sa leka potego ya Baisiraele.

13. Ke tiragalo efe yeo e ilego ya dira gore potego ya Baisiraele e lekwe?

¹³ Baisiraele ba ile ba tšhošwa ke tsela yeo Jehofa a ilego a bontšha matla a gagwe ka yona, ka gona Moshe o ile a ya Thabeng ya Sinai go yo ba bolelela go Jehofa. (Ek. 20:18-21) Moshe o ile a tšea nako e telele a le moo thabeng. Go be go bonagala eka Baisiraele ba kgakanegong kua lešokeng, go se na motho yo a ka ba hlahlago. Ba be ba tla dira’ng? Go bonagala tumelo ya Baisiraele e be e ithekgile ka gore Moshe o na le bona. Ba ile ba thoma go se sa dudišega gomme ba re go Arone: “Re direle modimo yo a tlago go re eta pele gobane ge e le Moshe yo, yena monna yo a re etilego pele a re ntšha nageng ya Egipita, ga re tsebe seo se mo diragaletšego.”​—Ek. 32:1, 2.

14. Baisiraele ba ile ba iphora ka go nagana’ng, gona Jehofa o ile a ikwa bjang?

¹⁴ Baisiraele ba be ba tseba gabotse gore go rapela medimo ya maaka ke sebe se segolo. (Ek. 20:3-5) Eupša go se go ye kae, ke ge ba rapela modimo wa seswantšho wa namane! Le ge go be go le molaleng gore Baisiraele ba be ba tshetše molao wa Modimo, ba ile ba iphora ka go nagana gore ba be ba sa dutše ba le ka lehlakoreng la Jehofa. Arone o ile a ba a bitša borapedi bjoo gore ke “monyanya wa Jehofa”! Jehofa o ile a ikwa bjang? O ile a nyama kudu. O ile a botša Moshe gore setšhaba sa Isiraele “se sentše” le gona “se arogile kapelapela tseleng yeo [A] se laetšego gore se sepele ka yona.” Jehofa o ile a ‘tuka bogale.’ O ile a ba a nagana le go fediša setšhaba seo ka moka.​—Ek. 32:5-10.

15, 16. Moshe le Arone ba ile ba bontšha bjang gore ba eme ka lehlakoreng la Jehofa? (Bona seswantšho seo se lego mathomong a sehlogo.)

¹⁵ Jehofa o ile a kgetha go se fediše Baisiraele. Ka ge a na le kgaugelo, o ile a fa Baisiraele ba bangwe bao ba bego ba mmotegela sebaka sa gore ba eme ka lehlakoreng la gagwe. (Ek. 32:14) Ka morago ga gore Moshe a bone Baisiraele ba hlabile mašata, ba opelela namane yeo le go bina pele ga yona, o ile a e šilakanya go fihlela e eba lerole. Ke moka o ile a goeletša ka gore: “Ke mang a emego ka lehlakoreng la Jehofa? A a tle mo go nna!” Go ile gwa ba le batho bao ba arabelago. Beibele e re “bohle ba Lefi ba mo kgobokanela.”​—Ek. 32:17-20, 26.

¹⁶ Le ge Arone e be e le yena a ilego a dira modingwana yoo, o ile a itshola gomme a ema le Balefi bao ba bego ba eme ka lehlakoreng la Jehofa. Balefi ba bao ba botegago ga se feela gore ba be ba eme ka lehlakoreng la Jehofa, eupša ba  be ba bontšha le gore ba be ba se ka lehlakoreng la Baisiraele ba go se kwe Modimo. Ruri ye e be e le phetho e botse ka gobane lona letšatšing leo, Jehofa o ile a fediša batho ba bantši ka baka la ge ba ile ba rapela modingwana yoo. Eupša o ile a holofetša go šegofatša bao ba bego ba le ka lehlakoreng la gagwe.​—Ek. 32:27-29.

17. Re ithuta’ng go seo Paulo a se ngwadilego?

¹⁷ Re ithuta’ng tabeng ye? Moapostola Paulo o itše: ‘Dilo tše e bile mehlala go rena, gore re se be ba barapedi ba medimo ya diswantšho, go etša ge ba bangwe ba bona ba bile bjalo. Mehlala ye e ngwaletšwe gore e be temošo go rena bao re fihletšwego ke bofelo bja mehla ye. Ka baka leo anke yo a naganago gore o eme a hlokomele gore a se we.’ (1 Bakor. 10:6, 7, 11, 12) Go etša ge Paulo a boletše, gaešita le batho bao ba hlankelago Jehofa ba ka dira dilo tše mpe. Bakriste bao ba ineelago sebeng ba ka nagana gore Jehofa o sa ba amogela. Eupša go no nyaka go ba mogwera wa Jehofa goba go ipotša gore o a mmotegela ga se ka mehla go bolelago gore Jehofa o a go amogela.​—1 Bakor. 10:1-5.

18. Ke’ng seo se ka dirago gore re be kgole le Jehofa, gona seo se ka ba le ditlamorago dife?

¹⁸ Ge Moshe a be a le kua thabeng ya Sinai, Baisiraele ba ile ba thoma go se sa dudišega ge ba bona a sa boe kapela go ya le ka mokgwa wo ba bego ba letetše ka gona. Ka mo go swanago, lehono le rena re ka thoma go belaela ge re bona eka letšatši la Jehofa la kahlolo le lefase le lefsa ga di fihle kapela. Go ka bonagala dikholofetšo tše di le kgole kudu le go phethagala goba e bile di ka se tsoge di phethagetše. Ge e ba re sa itlhokomele, go nagana bjalo go ka re dira gore re etiše pele dilo tša lefase le, go ena le go hlankela Jehofa. Ge nako e dutše e eya, re ka ba kgole le Jehofa gomme mafelelong ra dira dilo tšeo re tlago go itsholela tšona, tšeo re bego re ka se di dire ge re be re sa na le tswalano e botse le Jehofa.

19. Ke therešo efe e bohlokwa yeo re sa swanelago go e lebala, gona ka baka la’ng?

¹⁹ Le ka mohla ga se ra swanela go lebala gore Jehofa o nyaka gore re mo hlankele ka dipelo tša rena ka moka le gore re ineele go yena ka mo go feletšego. (Ek. 20:5) Ge re sa dire seo Jehofa a se nyakago, go ra gore re dira thato ya Sathane, gomme se se tla feleletša ka masetlapelo feela. Ke ka baka leo Paulo a re botšago gore: “Le ka se nwele senwelong sa Jehofa le senwelong sa batemona; le ka se jele ‘tafoleng ya Jehofa’ le tafoleng ya batemona.”​—1 Bakor. 10:21.

20. Jehofa a ka re thuša bjang gaešita le ge re dirile phošo?

²⁰ Re ithutile selo setee sa go swana go tšwa pegong ya Kaine, ya Solomone le ya Baisiraele ge ba be ba le Thabeng ya Sinai. Re ithutile gore batho bao ka moka ba ile ba hwetša sebaka sa gore ba ‘itshole gomme ba sokologe.’ (Dit. 3:19) Go molaleng gore Jehofa ga a akgofele go ahlola batho bao ba dirago diphošo. Tabeng ya Arone, Jehofa o ile a bontšha gore ke Modimo yo a lebalelago. Lehono, Jehofa a ka re lemoša a diriša pego ya Beibele, dikgatišo tšeo di theilwego Beibeleng goba Mokristegotee le rena. Ge re ka ela hloko ditemošo tšeo di tšwago go Jehofa, re ka kgodišega gore o tla re gaugela.

21. O swanetše go dira’ng ge potego ya gago go Jehofa e lekwa?

²¹ Botho bjo bogolo bjo Jehofa a nago le bjona bo na le morero. (2 Bakor. 6:1) Bo re nea sebaka sa gore “re gane dikganyogo tša lefase.” (Bala Tito 2:11-14.) Ge feela re sa phela lefaseng le la Sathane, re tlo lebeletšana le maemo ao a tlago go dira gore potego ya rena go Jehofa e lekwe. Eka ka mehla o ka dula o ikemišeditše go ema ka lehlakoreng la Jehofa, o dule o gopola gore o swanetše go ‘boifa feela Jehofa Modimo wa gago, o hlankele yena a nnoši le go mo kgomarela’!​—Doit. 10:20.