1-2. (a) Wuarom es daut goot, opp Jehova siene Sied to sennen? (b) Waut woa wie en disen Artikjel unjasieekjen?

WUAROM es daut goot, Jehova tru to sennen? Kjeena haft soo väl Macht un es soo weis un leeftolich aus ons Gott. Doawäajen well wie aula opp siene Sied sennen un am tru bliewen (Psa. 96:4-6). Oba eenje von Gott siene Deena worden ontru, aus dee oppe Proow jestalt worden.

² En disen Artikjel woa wie Biespels von soone unjasieekjen, waut säden, daut see fa Jehova wieren, oba doawäajen soont deeden, waut Jehova haust. Wan wie ons daut unjastonen, woo sikj daut met dee romneem, dan kaun ons daut halpen, daut wie Jehova tru bliewen.

3. Wuarom proowd Jehova Kain to halpen, un waut säd hee to dän?

³ Denkj wie mol äwa Kain sien Biespel no. Hee bäd nich Aufjetta aun, oba Jehova haud doawäajen kjeenen Jefaulen aun am. Hee sach, daut doa waut schlajchtet en dän sien Hoat wia (1. Joh. 3:12). Jehova wull Kain halpen un säd to am: “Wan du waut goodet väahast, woascht du doch aunjenomen sennen, oba wan du nich goodet väahast, dan luat de Sind no eene Jeläajenheit bie die, un haft een velangen no die. Nu motst du  doano seenen, daut du nich von dee metjeräten woascht” (1. Mo. 4:6-7). Daut wia soo, aus wan Jehova to Kain säd: “Wan du die endascht un die opp miene Sied stalst, dan woa ekj uk opp diene Sied sennen.”

4. Waut deed Kain, aus Jehova am halpen wull, opp siene Sied to sennen?

⁴ Wan Kain sien denkjen jeendat haud, dan wudd Jehova wada eenen Jefaulen aun am jehaut haben. Oba Kain horcht nich no Jehova. Sien orrajchtet denkjen un siene Wenschen brochten am toom schlajchtet doonen (Jak. 1:14-15). Aus dee jinja wia, haft dee woomäajlich kjeenmol jedocht, daut hee sikj noch mol wudd jäajen Jehova stalen. Oba nu deed hee krakjt daut un muak sienen ieejnen Brooda doot.

5. Waut vonne Enstalunk kaun ons leicht von Jehova wajchbrinjen?

⁵ Biejlikj soo aus Kain wudd wie uk kjennen opp eenen orrajchten Wajch komen, wan wie uk sajen, daut wie Jehova deenen (Jud. 11). Wie kunnen ons biejlikj met orreine Jedanken aufjäwen ooda bejierich sennen ooda eenen Gloowesbrooda haussen (1. Joh. 2:15-17; 3:15). Wäa soo jesonnen es, kaun leicht en Sind faulen, wan dee uk pinkjlich prädicht un no de Toopkomes wankt. Aundre woaren daut veleicht nich mol en, waut wie denkjen ooda doonen, oba Jehova sitt aules un weet, aus wie von Hoaten fa am sent ooda nich (läs Jeremia 17:9, NW *; 17:10).

6. Woo halpt Jehova ons, daut wie nich von onse orrajchte Wenschen “metjeräten [woaren]”?

⁶ Jehova denkjt nich fuaz, daut fa ons kjeene Hopninj mea es. Wan wie enne Jefoa sent, waut orrajchtet to doonen, dan sajcht hee to ons: “Komt trigj no mie, dan woa ekj trigj no junt komen” (Mal. 3:7, NW). Jehova weet, daut wie jäajen Schwakheiten kjamfen motten, oba hee well, daut wie ons jäajen daut beese stalen (Jes. 55:7). Wan wie daut doonen, dan woat hee opp onse Sied bliewen un ons de Krauft jäwen, daut wie nich von onse orrajchte Wenschen “metjeräten [woaren]” (1. Mo. 4:7).

7. Woo wort Salomo Jehova ontru?

⁷ Wie kjennen väl von dän Kjennich Salomo lieren. En siene junge Joaren leet hee sikj von Jehova leiden. Gott jeef am groote Weisheit un jeef am de Oppgow, dän wundascheenen Tempel en Jerusalem to buen. Oba Salomo bleef Jehova nich tru (1. Kjen. 3:12; 11:1-2). Gott sien Jesaz säd, de Kjennich von Israel sull sikj “nich een Deel Frues aungonen, wiels dee kunnen am vom HARN wajch lenkjen” (5. Mo. 17:17). Salomo jehorcht nich un haud tolatst 700 Frues un 300 Näbenfrues (1. Kjen. 11:3). Väle von dee wieren nich Israeliten un bäden faulsche Jetta aun. Salomo hilt sikj aulsoo uk nich aun daut Jeboot, daut eena sikj nich sull met utlendsche Frues befrieen (5. Mo. 7:3-4).

8. Waut fa schlajchtet deed Salomo?

⁸ Soo bie sacht hieed Salomo opp, Jehova siene Jebooten to leewen, un schlieslich deed hee waut sea schlajchtet. Salomo bud eenen Aultoa fa de Jettin Astarte un oppet weinichste noch eenen aundren Aultoa fa dän Aufgott Kemosch. Doa bäd hee met siene Frues toop dise Aufjetta aun. Salomo bud dee Aultoaren mau rajcht opp eenen Boajch krakjt ver Jerusalem, wua hee Jehova sienen Tempel jebut haud (1. Kjen. 11:5-8; 2. Kjen. 23:13). Veleicht docht hee, daut Jehova  am fa sienen Ojjehuarsom nich bestrofen wudd, soo lang aus hee nich opphieed, am em Tempel Opfa to brinjen.

9. Waut kjeem doabie rut, daut Salomo nich no Jehova horcht?

⁹ Oba Jehova lat daut kjeenmol toch, wan wäa waut schlajchtet deit. De Schreft sajcht: “De HAR wort sea veläajen met Salomo, daut hee em Hoat wajch dreid von däm HARN, . . . dee sikj doch tweemol Salomo jewäsen haud. Salomo wia nich jehuarsom to daut waut de HAR am säd, daut hee nich no framde Jetta gonen sull”. Doawäajen haud Gott kjeenen Jefaulen mea aun am un stunt am nich mea bie. Salomo siene Nokomen kunnen nich äwa daut gaunze Volkj Israel rejieren un hauden fa hundade Joaren väl Trubbels (1. Kjen. 11:9-13).

10. Waut kaun ons von Jehova aufbrinjen?

¹⁰ Ons kaun daut uk soo gonen aus Salomo. Wie kjennen sea leicht von Jehova aufkomen, wan wie Frind haben, waut Jehova siene Väaschreften nich vestonen ooda nich no dee läwen. Daut kjennen biejlikj Frind en de Vesaumlunk sennen, waut em jeisteljen schwak sent, ooda Frintschoft, Nobasch, Oabeitspoatna ooda Schoolpoatna, waut nich Jehova deenen. Wan de Menschen, met dee wie emma toop sent, Jehova siene Väaschreften nich väl räakjnen, dan kjenn wie met de Tiet uk von Jehova aufkomen.

11. Waut kaun ons halpen, schlajchte Jesalschoft utem Stich to gonen?

¹¹ Läs 1. Korinta 15:33. De mieeschte Menschen haben waut goodet aun sikj un väle, waut nich enne Woarheit sent, fieren doawäajen nich een sea schlajchtet Läwen. Sent soone dan goode Jesalschoft? Woascht du kjennen Frint bliewen met Jehova, wan du met dee toop best? Woaren dee die halpen, Jehova noda to komen? Waut es fa dee daut wichtichste? Räden dee emma bloos von Jelt, niee Kjleeda, Komputasch, Fons, Tablets, Tietvedrief ooda aundre tietelje Sachen? Grunzen dee foaken äwa aundre ooda haben dee schwienschet Spos? Jesus säd: “Wuavon daut Hoat voll es, doavon rät daut Mul” (Mat. 12:34). Wan wie enwoaren, daut deejanje, wua wie väl met toop sent, ons kunnen von Jehova aufbrinjen, dan sell wie doa onbedinjt waut met doonen. Wie wudden sellen nich soo väl Tiet met dee toop sennen ooda äwahaupt nich mea (Spr. 13:20).

12. (a) Waut säd Jehova to de Israeliten, nodäm aus see von Ägipten frie wieren? (b) Waut säden de Israeliten, aus Jehova velangd, daut dee bloos am aunbäden sullen?

¹² Wie kjennen uk väl von daut lieren, waut de Israeliten beläwden nodäm aus see von Ägipten frie worden. Aus dee sikj  ver dän Sinai-Boajch vesaumelden, leet Jehova an daut weeten, daut hee doa wia. Dee sagen eene dunkle Wolkj, un daut deed lichten, rumlen un rieekjren un doa wia een Jelud, aus wan een Blosdinkj eendrajchtich un lud blosen wudd (2. Mo. 19:16-19). Krakjt doa säd Jehova to de Israeliten, daut hee velangd, daut see bloos am aunbäden sullen, un daut hee deejanje tru wia, waut am leewden un no siene Jebooten läwden (läs 2. Mose 20:1-6). Daut wia soo, aus wudd hee to sien Volkj sajen: “Wan jie wiesen, daut jie opp miene Sied sent, dan woa ekj opp june Sied sennen.” Waut wudd wie jedonen haben, wan Jehova ons soont vesproaken haud? Secha krakjt daut, waut de Israeliten deeden. Daut sajcht: “Aul daut Volkj stemd doamet en un säd: Aules waut de HAR von ons velangt, well wie doonen” (2. Mo. 24:3). Oba dan kjeem doa onverhofs waut opp, wua sikj daut proowd, aus dee Jehova wudden tru bliewen.

13. Woo worden de Israeliten oppe Proow jestalt?

¹³ De Israeliten ferchten sikj fa de dunkle Wolkj un daut lichten un aul daut aundre, waut Gott doa väabrocht. Doawäajen wullen dee haben, daut Moses met Jehova räden sull. Moses jinkj dan oppem Sinai-Boajch nopp (2. Mo. 20:18-21). Hee bleef doa lang bowen un de Menschen feelden sikj soo, daut see nu gaunz auleen en de Wiltnis wieren, onen äaren Leida. Woomäajlich veleeten dee sikj too sea doaropp, daut doa een menschelja Leida wia. Dee kjrieejen Angst un säden to Aaron: “Moak ons doch eenen Aufgott, dee ons veroppgonen woat. Wie weeten goanich mea waut met ons Moses, dee ons ut Ägipten brocht, jeworden es” (2. Mo. 32:1-2).

14. Waut bilden de Israeliten sikj en, un waut deed Jehova doamet?

¹⁴ Daut Volkj wist, daut daut eene Sind jäajen Jehova wia, Aufjetta auntobäden (2. Mo. 20:3-5). Oba meist fuaz bäden see een goldnet Kaulf aun. Dee jehorchten nich, oba dee bilden sikj en, daut see noch opp Jehova siene Sied wieren. Aaron nand daut mau rajcht “een Fast fa Jehova”, aus see daut Kaulf aunbäden deeden. Waut deed Jehova doamet? Hee jleicht daut nuscht. Jehova säd to Moses, daut Volkj haud “sikj vegonen” un haud sikj “wajch jedreit von däm Wajch”, dän hee an jeboden haud. Hee wia soo vestalt, daut hee mau rajcht met de Israeliten een Enj moaken wull, waut nich lang trigj een Volkj jeworden wieren (2. Mo. 32:5-10).

15-16. Woo weesen Moses un Aaron, daut see gaunz fa Jehova wieren? (See daut Bilt aum Aunfank.)

¹⁵ Oba Jehova haud Metleet met daut Volkj Israel un venicht dee nich. Hee jeef dee de Mäajlichkjeit to bewiesen, wäa opp siene Sied wia (2. Mo. 32:14). Aus Moses sach, woo de Menschen doa ver daut goldne Kaulf juchten, sungen un daunzten, schluach hee daut Kaulf to fienet Pulwa. Dan säd hee: “Een jiedra, dee fa däm HARN es, komt hia bie mie stonen”. Un “aule Leviten kjeemen un stalden sikj met” Moses (2. Mo. 32:17-20, 26).

¹⁶ Aaron haud daut goldne Kaulf jemoakt, oba am wort daut leet un hee stald sikj met de äwaje Leviten toop opp Jehova siene Sied. Dee wieren Jehova tru un weesen uk, daut see nich opp dee äare Sied wieren, waut jesindicht hauden. Daut wia kluak, wäajen dänselwjen Dach kjeemen dusende todood, waut daut goldne Kaulf aunjebät hauden. Oba dee, waut fa Jehova wieren, bleewen veschoond  un hee vespruak, daut hee dee säajnen wudd (2. Mo. 32:27-29).

17. Waut lia wie von daut, waut Paulus äwa de Jeschicht von daut goldne Kaulf schreef?

¹⁷ Waut kjenn wie doavon lieren? De Apostel Paulus säd: “Dit es fa ons aus Väabilt passieet, daut wie . . . nich Jetta deenen, soo aus mank jane eenje deeden, . . . un es fa ons jeschräwen worden, dee wie en de latste Tiet läwen, om ons to woarnen. Doawäajen, wäa doa meent, hee steit faust, saul oppaussen, daut hee nich felt” (1. Kor. 10:6-7, 11-12). Paulus muak dietlich, daut mau rajcht dee, waut Jehova tru deenden, schlajchtet doonen kunnen. Un dee wudden mau rajcht noch jleewen kjennen, daut Jehova doawäajen eenen Jefaulen aun an haud. Oba bloos wäajen eena Frint met Jehova sennen well ooda sajcht, daut eena dän tru es, bediet daut nich, daut Jehova uk eenen Jefaulen aun eenem haft (1. Kor. 10:1-5).

18. (a) Waut kunn ons von Jehova wajchbrinjen? (b) Woo kunn daut utkomen, wan eena von Jehova aufkjeem?

¹⁸ De Israeliten wieren besorcht, wäajen Moses lenja oppem Sinai-Boajch bleef, aus see jedocht hauden. Un wie sent veleicht besorcht, wäajen daut Enj von dise Welt lota kjemt, aus wie dochten. Veleicht denkj wie, daut de niee Welt, waut Jehova vesproaken haft, noch wiet auf es ooda daut dee bloos een Droom es. Wan wie doa nuscht met doonen, dan kjennen soone Jedanken ons leicht bat doa brinjen, daut wie dolla no tietelje Sachen hinjaraun sent aus Jehova sienen Wellen to doonen. Un met de Tiet kunn wie dan von Jehova aufkomen un Sachen doonen, waut wie kjeenmol wudden jedocht haben.

19. Waut sell wie emma en Denkj hoolen, un wuarom?

¹⁹ Jehova velangt, daut wie am en aules jehuarsom sent un bloos am aunbäden (2. Mo. 20:5). Daut sell wie emma em Denkj hoolen, wiels wan wie nich daut doonen, waut Jehova well, dan woa wie daut doonen, waut de Soton well, un daut woat ons schoden. Paulus säd: “Jie kjennen nich tojlikj von däm Harn sien Kuffel drinkjen un von de beese Jeista äat. Un jie kjennen uk nich aun beides tojlikj een Poat haben, aun däm Harn sien Desch un aun de beese Jeista äa Desch” (1. Kor. 10:21).

20. Woo kaun Jehova ons mau rajcht dan halpen, wan wie eenen Fäla jemoakt haben?

²⁰ Waut wia bie Kain, Salomo un de Israeliten biem Sinai-Boajch äwareen? Dee kjrieejen aula de Jeläajenheit, omtokjieren un daut rajchte to doonen (Apj. 3:19). Jehova jeft nich fuaz Hopninj opp, wan siene Deena eenen Fäla moaken. Biejlikj hilt hee Aaron sienen Fäla togood. Vondoag dän Dach woarnt Jehova ons biejlikj derch de Bibel, biblische Bieekja ooda derch onse Gloowesbreeda. Wan wie sienen Rot nokomen, dan kjenn wie secha sennen, daut hee ons woat Metleet, ooda Jnod, wiesen.

21. To waut sell wie ons gaunz eenich sennen, wan wie aufjeprooft woaren?

²¹ Wuarom wiest Jehova ons Jnod? (2. Kor. 6:1). Hee deit daut toom ons de Jeläajenheit jäwen, “de gottloose un weltliche Liedenschoften”, ooda Wenschen, auftosajen (läs Titus 2:11-14). Soo lang aus wie “en dise Welt” läwen, woaren doa emma wada Proowen oppkomen, wua wie bewiesen motten, daut wie Jehova gaunz tru sent. Well wie ons emma eenich sennen, opp Jehova siene Sied to bliewen, wäajen wie “sellen däm HARN . . . [onsen] Gott ieren un am auleen deenen. Siet am tru” (5. Mo. 10:20).