1, 2. (a) Dahme kahrehda e wia elen erpit en men iang Siohwa? (b) Dahme kitail pahn koasoiapene nan iren onop wet?

E WIA elen erpit kitail en mi karanih Siohwa. Sohte aramas emen me manaman, erpit, oh limpoak sang ih! Ni mehlel, kitail kin ahnsou koaros men loalopwoat ong ih oh men iang ih. (Mel. 96:4-6) Ahpw ekei me kin kaudokiong Koht sohte kin wia met.

² Nan iren onop wet, kitail pahn koasoiapene ekei irail ko me kin nda me dene irail men iang Siohwa ahpw ni ahnsowohte wia soahng kan me Siohwa ketin kalahdeki. Mehn kasukuhl kesempwal me kitail sukuhlkihsang arail mehn kahlemeng kak sewese kitail en loalopwoatohngete Siohwa.

3. Dahme kahrehda Siohwa ketin song en sewese Kain, oh dahme E mahsanihong ih?

³ Karasepe, medewehla duwen Kain. E sohte kin kaudokiong koht likamw kan, ahpw Siohwa sohte kupwurki eh kaudok. Dahme kahrehda? Siohwa ketin mahsanihada me mie mehkot suwed rehn Kain. (1 Sohn 3:12) Siohwa ketin katamankihong ih:  “Ma ke wia mehkot pwung, ke pahn pereperen; a pwehki omw wiadahr mehkot suwed, dihp rasehng mahn lawalo men me nektehn poar pohmw. E men kaunuhkada, ahpw ke uhdahn pahn powehdi.” (Sen. 4:6, 7) Siohwa ketin kasalehda ni sansal me ma Kain koluhla oh pilada en iang Ih, E pahn pil ketin iang Kain.

4. Dahme Kain wia ni ahnsou me Siohwa ketikihong ih ahnsou mwahu en iang ih?

⁴ Ma Kain wekidala eh madamadau, Siohwa pahn pil ketin kupwurki eh kaudok. Ahpw Kain sohte rong Koht, oh eh madamadau oh ineng sapwung kan kahrehiong ih en wiahda me suwed. (Seims 1:14, 15) Ni ahnsou me Kain pwulopwul, ele e sohte medewehda me e pahn uhwongada Siohwa. Ahpw ahnsou wet e pohnsehsehla sapwellimen Koht kehkehliko, uhwongada Koht, oh kemehla rie pwutako!

5. Soangen madamadau dah me kak kahrehiong kitail en sohla keniken rehn Siohwa?

⁵ Duwehte Kain, Kristian men rahnwet kakete nda me dene e kin kaudokiong Siohwa ahpw ni mehlel e kin wia soahng kan me Siohwa ketin kalahdeki. (Sud 11) Ele e kin pwerisek nan doadoahk en kalohk oh kalapw towehda mihting kan. Ahpw ni ahnsowohte, e kin mweidohng madamadau suwed kan, noahrok, de kailok en kaunda eh madamadau. (1 Sohn 2:15-17; 3:15) Soangen madamadau wet kak kahrehong emen en wiahda sapwung kan. Meteikan ele sohte ese dahme kitail kin medewe de wia, ahpw Siohwa ketin mwahngih met. E mwahngih me kitail sohte kin uhdahn men iang ih.​—Wadek Seremaia 17:9, 10.

6. Ia duwen Siohwa eh kin ketin sewese kitail en powehdi ineng sapwung kan?

⁶ Pil ni atail kin wiahda sapwung kan, Siohwa sohte kin ketin mwadangete sohla nsenohkin kitail. Ma kitail kin kohkohlahng nan irair keper ehu, Siohwa kin ketin mahsaniong kitail: “Kumwail pwurodohng rehi, oh I ahpw pahn sapahlwohng rehmwail.” (Mal. 3:7) Siohwa ketin mwahngih me kitail ahneki luwet kan me kitail kin pelipelian. Ahpw e kupwurki kitail en pelianda me suwed. (Ais. 55:7) Ma kitail wia met, e ketin inoukihda me e pahn ketin sewese oh ketikihong kitail kehl me kitail anahne pwehn powehdi atail ineng sapwung kan.​—Sen. 4:7.

7. Ia duwen Solomon eh sohla ahneki nanpwungmwahu rehn Siohwa?

⁷ Ni ahnsou me Solomon pwulopwul, e ahneki nanpwungmwahu rehn Siohwa. Koht ketikihong Solomon erpit laud oh ketikihong ih doadoahk kesempwal en kauwada tehnpas sarawi kaselel ehu nan Serusalem. Ahpw Solomon sohla ahneki nanpwungmwahu rehn Siohwa. (1 Nan. 3:12; 11:1, 2) Kosonned en Koht mahsanih me nanmwarki men en dehr pwoudiki “likend tohto, pwe met pahn kahrehiong eh pahn sohpeisang KAUN-O.” (Deud. 17:17) Solomon sapeikiong kosonned wet. Kedekedeo, e pwoudikihda serepein 700 oh pekehiki serepein 300! Tohto en lih pwukat wia mehn liki kei me kin kaudokiong koht likamw kan. Eri Solomon pil sapeikiong sapwellimen Koht kosonned en dehr pwoudiki mehn liki kan.​—Deud. 7:3, 4.

8. Ia duwen Solomon eh kansensuwedihada Siohwa?

⁸ Ekisekis, Solomon sohla poakohng sapwellimen Siohwa kosonned kan. Kedekedeo, e wiahda soahng kan me uhdahn suwed. E kauwada pei sarawi en koht lih Asdarde oh koht likamw Kemos, ih eri iang eh pwoud ko kaudokiong koht likamw pwukat. Solomon pil kauwada pei sarawi pwukat pohn nahna ehu mwohnte Serusalem, wasa me e kauwada sapwellimen Siohwa tehnpas sarawio!  (1 Nan. 11:5-8; 2 Nan. 23:13) Ele Solomon medewe me Siohwa pahn ketin pohnsehsehla soahng suwed koaros me e wiahda nin doken eh kin wiewia meirong kan nan tehnpas sarawio.

9. Dahme wiawi ni Solomon eh sohte peikiong sapwellimen Koht kehkehlik kan?

⁹ Ahpw Siohwa sohte kin ketin pohnsehsehla dihp kan. Paipel mahsanih: “Solomon sohte peikiong KAUN-O ahpw sohpeisang. KAUN-O eri ketin engiengda pahn Solomon.” Koht ketin song en sewese Solomon. Siohwa “ketin pwarohng Solomon pak riapak oh mahsanihong en dehr pwongih koht en liki kan, Solomon sohte peikiong KAUN-O.” Imwilahn met, Koht sohla ketin kupwurki oh sewese ih. Kadaudok en Solomon kan sohte kaunda wehin Israel pwon, oh irail ahneki kahpwal suwed erein sounpar tohto.​—1 Nan. 11:9-13.

10. Dahme kakete kauwehla atail nanpwungmwahu rehn Siohwa?

¹⁰ Ma kitail pilada en kompoakepahnki irail kan me sohte wehwehki de wauneki sapwellimen Koht koasoandi kan, irail kakete kamwakid atail madamadau oh kauwehla atail nanpwungmwahu rehn Siohwa. Ele irail wia kisehn mwomwohdiso, ahpw arail nanpwungmwahu rehn Siohwa sohte uhdahn kehlail. De irail kak wia kisehtail, mehn mpatail, iengatail tohndoadoahk de iengatail tohnsukuhl me sohte kin kaudokiong Siohwa. Ma aramas pwukat me kitail kin werekiong sohte kin mourki sapwellimen Siohwa koasoandi kan, irail kak kamwakid kitail laud me kakete kahrehiong kitail en sohla ahneki nanpwungmwahu rehn Koht.

11. Dahme kak sewese kitail en pilada kompoakepatail kan?

¹¹ Wadek 1 Korint 15:33. Pali laud en aramas kin ahneki ekei irair kaselel kan. Oh irail me sohte kin kaudokiong Siohwa ele sohte kin ahnsou koaros wia soahng suwed kan. Ele ke kin ese ekei aramas pwukat. Ia duwe, met wehwehki me irail werek mwahu kei? Ia duwen arail kamwakid omw nanpwungmwahu rehn Siohwa? Re kin seweseiuk en karanihala Koht? Dahme aramas pwukat kin uhdahn kesempwalki? Dahme re kin kalapw koasoia? Irail kin koasoiahte duwen sidail kapw kan, mwohni, computer, cellphone, tablet, mehn kamweit kan de soahng kan me duwehte met? Irail kin mwahuki kauwe meteikan? Irail kin mwahuki kamwan suwed? Sises ketin kehkehlikihong kitail: “Ewen aramas kin kapwadewei audepen eh mohngiong.” (Mad. 12:34) Ma ke diarada me irail kan me ke kin werekiong kin kaukauwe omw nanpwungmwahu rehn Siohwa, katikala omw werekiong irail, oh ma anahn, kauhdi omw kompoakepahnki irail.​—Lep. Pad. 13:20.

12. (a) Dahme Siohwa ketin mahsanihong mehn Israel ko mwurin arail kohkohsang Isip? (b) Dahme mehn Israel ko nda ni Koht eh ketin mahsanih me irail en loalopwoat?

¹² Kitail pil kak sukuhlkihsang dahme wiawi mwurin Siohwa eh ketin kasaledekihala mehn Israel ko sang Isip. Ni aramas ako ar pokonpene mwohn Nahna Sainai, Siohwa ketin kasalehiong irail ih ni ahl kapwuriamwei ehu! Irail kilangada depwek toantoal ehu, lioal, oh ediniei, oh re rongada nansapwe oh ngihl laud ehu me duwehte ngilen sowi. (Eks. 19:16-19) Irail eri rongada Siohwa eh ketin mahsanih me ih Koht emen me ketin kupwurki irail en kaudokiong ih kelehpw. E ketin inoukihda me e pahn ketin loalopwoatohng irail kan me kin poakohng ih oh peikiong sapwellime kehkehlik kan. (Wadek Eksodus 20:1-6.) Siohwa kin ketin mweidohng mehn Israel ko en ese me ma irail pahn ieiang ih, e pahn ketin ieiang irail. Ma ke mi nan pokono, ia omw pepehm ni omw rong sapwellimen Siohwa mahsen ko? Ele ke pahn ahneki pasapeng duwehte ahn mehn Israel ko me sapeng nda: “Se pahn kapwaiada mehkoaros me KAUN-O ketin mahsanih.” (Eks. 24:3) Ahpw sohte pwand mwurin mwo, mehkot wiawi me kasonge ahn mehn Israel ko loalopwoatohng Koht. Dahkot mwo?

13. Dahme kasonge ahn mehn Israel ko loalopwoat?

¹³ Mehn Israel ko masepwehkada ni arail kilang manaman kapwuriamwei en Koht, eri Moses kohdahla pohn Nahna Sainai oh wilianiraildi oh pato ong Siohwa. (Eks. 20:18-21) Re tehkada Moses eh pwand en pwuredi rehrail. Mwomwen me aramas ako pahn mihla nan sapwtehno ahpw sohte emen me pahn kaweid irail. Dahme irail pahn wia? Ele mehn Israel ko kin nohn koapworopworki arail sounkaweido, Moses. Irail pwunodada oh ndaiong Aaron: “Komw wiahiong kiht emen kohten me pahn kahluwei kiht, pwe se sehselahr dahme wiawihong ohl menet Moses, me kahreikitodo sang Isip.”​—Eks. 32:1, 2.

14. Dahme mehn Israel ko medewe me pitih iraildi oh dahme Siohwa ketin wia?

¹⁴ Mehn Israel ko ese me e sapwung en kaudokiong dikedik kan. (Eks. 20:3-5) Ahpw sohte pwand, irail tepida kaudokiong kouwol kohl men! Mendahki arail sapeikiong sapwellimen Siohwa kehkehliko, irail pein pitih irail ni arail medewe me re kin ieiang Siohwa. Aaron pil kahdaneki kaudok en kouwol wet “sarawi pwe en wauneki KAUN-O”! Dahme Siohwa ketin wia? E mahsaniong Moses me aramas ako “sapwungalahr” oh re wetsangehr nan ahl me E ketin “kilelehiong irail re en kin idawehn.” Siohwa uhdahn ketin engiengda pahrail me kahrehda e ketin medewedahr en kasohrehla wehio pwon.​—Eks. 32:5-10.

15, 16. Ia duwen Moses oh Aaron ara kasalehda me ira uhdahn iang Siohwa? (Menlau kilang tepin kilel.)

¹⁵ Ahpw Siohwa wia Koht emen me kin ketin mahk kalahngan. E ketin pilada en dehr kasohrehla wehio. Ahpw e ketikihong mehn Israel ko ahnsou mwahu en kasalehda me irail men iang ih. (Eks. 32:14) Mwurin Moses eh kilangada me aramas ako wie weriwer, kokoul, oh kahkahlek mwohn dikediko, e kamwutepene kouwol kohlo. Ih eri nda: “Mehmen me men iang KAUN-O, en kohdo rehi!” Oh “mehn Lipai ko koaros eri pokonpene oh kapilpene” Moses.​—Eks. 32:17-20, 26.

¹⁶ Mendahki Aaron me wiahda kouwol kohlo, e koluhla oh iangete mehn Lipai ko koaros, pilada en iang Siohwa. Irail me loalopwoat pwukat kasalehdahr ni sansal me re sohte men iang irail ko me wiahda dihp. Irail wiahda pilipil loalokong ehu, pwehki mwuhr rahnohte, me kid kei me kaudokiong kouwol kohlo  mehla. Ahpw irail ko me iang Siohwa pitila, oh Koht ketin inoukihda me e pahn ketin kapaiahda irail.​—Eks. 32:27-29.

17. Dahme kitail sukuhlkihsang dahme Pohl ntingihedi duwen kouwol kohlo?

¹⁷ Ia mehn kasukuhl ong kitail? Wahnpoaron Pohl nda: “Mepwukat wia karasaras kei ong kitail,” pwe kitail en dehr “wiahla me kin pwongih dikedik kan.” Pohl kawehwehda me soahng pwukat “ntingdier en wia mehn kataman ehu ong kitail me momour ni imwin koasoandi en mwehi wet. Eri, mehmen me kin medewe me e kin kesikesihnen en kanahieng pwe e de pwupwudi.” (1 Kor. 10:6, 7, 11, 12) Nin duwen me Pohl kasalehda, pil irail ko me kin kaudokiong Siohwa kakete iang pidada wia me suwed. Ele irail medewe me Siohwa kin ketin kupwukupwurehte irail. Ahpw mehnda ma aramas emen men wia kompoakepahn Siohwa de kose me e loalopwoatohng, met sohte kin ahnsou koaros wehwehki me Siohwa ketin kupwurki ih.​—1 Kor. 10:1-5.

18. Dahme kin kahrehiong kitail en peilahsang Siohwa, oh ia imwilahn met?

¹⁸ Ni Moses eh sohte kohdihdo sang Sainai ni ahnsowohte me mehn Israel ko kasik, irail pwunodada. Ma imwin koasoandi wet sohte leledo mwadang ni ahnsou me kitail kasik, kitail pil kakete pwunodada. Ele kitail pahn tepida medewe me ahnsou kohkohdo kaselel me Siohwa ketin inoukihda saikinte keren de sohte uhdahn mehlel, oh kitail kakete tepida medemedewehte dahme kitail mwahuki ahpw kaidehn dahme Siohwa ketin kupwurki. Ma kitail sohte kanahieng, kitail kakete peilahsang Siohwa oh wia soahng kan me kitail sohte kasik me kitail pahn wia.

19. Dahme kitail anahne ahnsou koaros tamataman oh dahme kahrehda?

¹⁹ Siohwa kupwurki kitail en peikiong ih ni unsek oh kaudokiong ih kelehpw. (Eks. 20:5) Dahme kahrehda e ketin mahsanih kitail en wia met? Pwehki e ketin poakohng kitail. Ma kitail sohte wia dahme Siohwa ketin kupwurki, kitail pahn wia dahme Sehdan mwahuki, oh met pahn kauwehla kitail. Pohl nda: “Kumwail sohte kak nim sapwellimen Siohwa kep oh pil kep en ngehn suwed kan; kumwail sohte kak iang tungoal ni ‘sapwellimen Siohwa tehpel’ oh pil ni tehpel en ngehn suwed kan.”​—1 Kor. 10:21.

20. Ia duwen Siohwa eh kin ketin sewese kitail pil ni atail wiahda sapwung ehu?

²⁰ Kain, Solomon, oh mehn Israel ko ahneki ahnsou mwahu en koluhla oh wekidala arail wiewia kan. (Wiewia 3:19) Siohwa sohte kin ketin mwadangete sohla nsenohki sapwellime aramas akan ihte pwehki irail wiahda sapwung ehu. Medewehla ia duwen eh ketin mahkohng Aaron. Rahnwet, Siohwa ketikihong kitail kehkehlik kadek kan pwehn pere kitail sang wiahda me sapwung. E ketin doadoahngki Paipel, neitail sawasepen Paipel kan oh pil Kristian teikan. Ni atail kin kapwaiada sapwellimen Siohwa kehkehlik kan, kitail kak kamehlele me e pahn ketin kasalehiong kitail mahk kalahngan.

21. Dahme kitail anahne wia ma atail loalopwoatohng Siohwa kin lelohng songosong?

²¹ Mie kahrepen sapwellimen Siohwa kadek sapan. (2 Kor. 6:1) E kihong kitail ahnsou mwahu en “soikala wiewia kan me kasohwauwih Koht oh ineng en sampah.” (Wadek Taitus 2:11-14.) Nan koasoandi suwed wet, ahnsou koaros pahn mie soahng kan me pahn kasonge atail loalopwoat ong Siohwa. Koasoanehdi teng ken ieiangete Siohwa ni unsek, oh tamataman me ‘ken lemmwiki KAUN-O, omw Koht, oh kaudokiong ihete. Loalopwoat ong ih!’​—Deud. 10:20.