1, 2. (a) Bwakinyi kwikala ku lupese lwa Yehowa nyi mwanda wi buwa kwatudi? (b) Mu uno mwisambo atukesambila kinyi?

KUSHALA pepi na Yehowa nyi mwanda wi buwa kwatudi. Ta kwi ungi muntu e na bukome, binangu na kifulo bu byadi nya! Kushi mpaka, twi nka na lukalo lwa kwikala na lulamato kwadi na kwikala mu bwipi mwaye. (Misambo 96:4-6) Anka bangi bantu babadi balangwile Efile Mukulu, ta mbobeshe kutungunuka na kukita bino nya.

² Mu uno mwisambo, atukesambila bileshesho bya bantu babadi abakula’shi be kulupese lwa Yehowa aku namu babadi abakitshi myanda yabadi bashikwe kwi Yehowa. Malongyesha a muulo atukapete mu bileshesho byabo ngalombene kwitukwasha bwatudya kushala na lulamato kwi Yehowa.

3. Bwakinyi Yehowa badi mutompe kukwasha Kaayine, na nkinyi kibadi mumulungule?

³ Bu kileshesho, nangushena pabitale Kaayine. Tabadi alangwila b’efile ba madimi nya, anka Yehowa tabadi mukumine lulangwilo lwaye. Bwakinyi? Yehowa bamwene’shi mwishimba dya Kaayine mubadi kinangu ki bubi. (1 Yowano 3:12) Yehowa badimwishe  Kaayine’shi: “Su okita bibuwa, tankakutambula su? Su opela kukita bi buwa, milwisho ngyaya i bu nyema mukubutamine pa kibelo, akyebe nkukwata. Byabya, bi buwa weitonte.” (Kibangilo 4:6, 7, EEM) Yehowa badi muleshe patooka’shi su Kaayine elanga ku milwisho na asangula bwadya kwikala ku lupese lw’Efile Mukulu, Aye namu badya kwikala ku lupese lwa Kaayine.

4. Kaayine badi mukite kinyi nsaa ibadi na mushindo wa kwikala ku lupese lwa Yehowa?

⁴ Su Kaayine badi mushintuule binangu byaye, Yehowa badi mulombene kukumina lulangwilo lwaye dingi. Anka Kaayine tamupushishe Efile Mukulu nya, na binangu byaye bibubi na lwabi lwaye bibadi nka abimukunkusha ku bikitshino bibubi. (Shake 1:14, 15) Kaayine pabadi ki mwana mukinga, pangi tabadi apwandjikisha’shi mulombene kutombokyela Yehowa nya. Anka kunyima badi mwilwankane elango dy’Efile Mukulu, aye nkumutombokyela, na kwipaa mukwabo mulume!

5. Mbinangu kinyi bilombene kwitukutshishwa kukuminyibwa na Yehowa?

⁵ Nka bu Kaayine, lelo uno mwina Kidishitu mulombene kwamba’shi alangwila Yehowa kadi abanga kukita myanda ibubi yabadi bashikwe kwi Yehowa. (Yunda 11) Mmulombene kwikala akitshi mudimo wa kulungula mukandu wibuwa na kutwela mu bisangilo byaso bya ku lubingo. Anka ingi nsaa, e kubanga kutadila bwa’shi binangu bi butete, lwabi, sunga binangu bya mushikwa bikale abiludika binangu byaye. (1 Yowano 2:15-17; 3:15) Byabya binangu mbilombene kutwala muntu mu kukita milwisho. Bangi bantu mbalombene kukutwa kuuka myanda yatunangushena sunga yatukitshi, anka Yehowa auku. Auku nsaa yatushi ku lupese lwaye n’eshimba dyetu dyoso.—Badika Yeelemiya 17:9, 10.

6. Yehowa etukwashaa bwa kukambila malaka e bubi naminyi?

⁶ Sunga nsaa yatukitshi bilubilo, Yehowa tetupelaa nka musango umune nya. Su twibatwele mwishinda di masaku, Yehowa etwitanyina’shi: “Alukiilaayi kwandi, ami naamu neealusha kwanudi.” (Malakii 3:7) Yehowa auku’shi twi na kubofula na tukwete kwikitshisha bwa kwikukambila. Anka akyebe’shi twikale na kitshibilo kya kushikwa kintu kyoso ki bubi. (Yeeshaya 55:7) Su tubakitshi byabya, etulaa’shi aketukwasha na kwitupa bukome bwatudi nabo lukalo bwatudya kukambila malaka eetu ebubi.—Kibangilo 4:7.

7. Salomone badi mushimishe bukuuku bwaye na Yehowa naminyi?

⁷ Pabadi Salomone ki nsongwalume, badi mu kipwano kibuwa na Yehowa. Efile Mukulu bapeele Salomone binangu bibungi na kumupa mudimo ukata wa kwibaka ntempelo e buwa bukile mu Yeelusaleme. Anka Salomone badi mushimishe bukuuku bwaye na Yehowa. (1 Banfumu 3:12; 11:1, 2) Miya y’Efile Mukulu ibadi ayamba’shi nfumu ta mulombene kwikala na “bakashi be bungi, tala bamulamûna kwi Yehowa.” (Miiya Ikituulwe 17:17, EEM) Salomone bakutshilwe kutumikila uno mwiya. Badi mwibakile bakashi 700 na makupi 300! (1 Banfumu 11:3) Bebungi ba ku bano bakashi babadi bantu ba milo yabene babadi abalangwila b’efile ba madimi. Byabya Salomone badi mukutwe kukookyela mwiya w’Efile Mukulu wa kupela kwibakila bakashi ba miilo yabene.—Miiya Ikituulwe 7:3, 4.

8. Salomone badi mwinyongoshe Yehowa naminyi?

⁸ Ku kapelakapela, Salomone badi mushimishe kifulo kyaye bwa miya ya Yehowa. Ku nfudilo a byoso, badi mukite myanda i bubi bukile. Badi mwibakye bilambwilo bya b’efile ba madimi Astartee na Kemoshe, aye nkubanga kulangwila bano b’efile ba madimi pamune na bakashi baye. Salomone badi mwibakye mpa na bino bilambwilo ku mwengye ubadi kumpala kwa kibundji kya Yeelusaleme, mubadi mwibakile Yehowa ntempelo! (1 Banfumu  11:5-8; 2 Banfumu 23:13) Pangi Salomone badi mwidimbe pa kunangushena’shi Yehowa mulombene kupela kubadika myanda yoso ibubi ibadi akitshi pa mwanda wa’shi kwete kumulambula milambu mu ntempelo.

9. Nkinyi kibadi kifikile Salomone pabadi mukutwe kuteemesha bibabadi bamudimushe kwi Efile Mukulu?

⁹ Anka Yehowa ta mukutwe kubadika milwisho yaye nya. Bible akula’shi: “Yehowa bafitshiile Salomone munda mwanda eshimba dyaaye dibaadi dyende kula na Yehowa.” Efile Mukulu batompele kukwasha Salomone. Yehowa “baadi mumumwekyele misuusa ibidi, na badi mumutumine eyi dya kuleka kulamata bangi b’efile; anka Salomone tabaalamine kibadi Yehowa mumutekye.” Pa mwanda wa byabya, badi mushimishe bukuuku bwaye n’Efile Mukulu na byoso bibadi amukwatshishena. Yehowa ta mutadile bwa’shi bana ba Salomone batungunukye na kumuna mwilo wa Isaleele oso ushima nya, na babadi bapete myanda i bukopo munda mwa bipwa bibungi.—1 Banfumu 11:9-13.

10. Nkinyi kilombene kulwisha kipwano kyetu kibuwa na Yehowa?

¹⁰ Su tubasangula bakuuku bashi’abapusha sunga kuneemeka miya y’Efile Mukulu, mbalombene kwitutakula mu kwambula binangu byabo na kulwisha bukuuku bwetu na Yehowa. Mbalombene kwikala mu kakongye, anka ta be na kipwano kibukopo na Yehowa nya. Sunga’shi be kwikala bakwetu ba mu kifuko, ba nkungishanyi netu, bena mudimo netu, sunga bena kalasa netu bashi’abalangwila Yehowa. Su bantu batushala nabo pamune tabatumikila miya ya Yehowa, be kwikala na bukitshishi kwatudi mu kipaso kyatudi balombene kushimisha mpa na kipwano kyetu n’Efile Mukulu.

11. Nkinyi kilombene kwitukwasha bwa kusangula ba kuuku?

¹¹ Badika 1 Beena-Kodinda 15:33. Bantu bebungi be na ndambo ya ngikashi ibuwa. Na bantu bashi’abalangwila Yehowa ta mbalombene kwikala abakitshi myanda i bubi nka nsaa yoso nya. Pangi we kuuka bantu be byabya. Bino abilesha’shi mbekale bakuuku bebuwa su? Byabya, be na bukitshishi kinyi ku kipwano kyobe na Yehowa? Abakukwasha bwa kwifubwila pepi n’Efile Mukulu su? Mmyanda kinyi i na muulo ngofu kwi baba bantu? Mmyanda kinyi yabesambaa? Abakambaa kwisamba pabitale bilamba bituukye binobino, makuta, twamo twa ku maasa, kukisha kwa kapapi, na bingi bintu bya uno mushindo su? Misusa ibungi abesambaa myanda ibubi ya bangi bantu su? Mbafule kwela miseku ya myanda ya bufu su? Yesu badi mwitudimushe’shi: “Akyamba mukanwa, nkino akituukila mwishimba.” (Mateo 12:34) Su bomono’shi bantu bokwete kushala nabo pamune bakwete kulwisha kipwano kyobe na Yehowa, kimba kya kukita! Peelesha nsaa ya kushala nabo, su abitungu leka kwikala nabo mu bukuuku.—Nkindji 13:20.

12. (a) Yehowa balungwile bena Isaleele mayi kinyi kapindji kapeela kunyima kwa’bo kutuuka mu Ejiipitu? (b) Bena Isaleele abambile naminyi nsaa ibebalungwile Efile Mukulu bwabadya kwikala na lulamato kwadi?

¹² Twi balombene kupeta dingi malongyesha ku myanda ibakitshikile kunyima kwa Yehowa kutusha bena Isaleele mu Ejiipitu. Nsaa ibadi bantu bebungye pamune kumpala kwa mwengye wa Sinaayi, Yehowa badi mwileshe kwabadi mu mushindo wi pabwao! Babamwene ekumbi difiita, kubadima, na mwishi, na babadi abapusha tupanda-panda na tuleo twi bukopo nka bu mpungi. (Efilu 19:16-19) Kunyima abapushishe Yehowa ebalungula’shi aye nyi “Efile Mukulu sha mukao.” Bebalayile’shi akekala na lulamato kwi boso bamufule na abakookyela miya yaye. (Badika Efilu 20:1-6.) Yehowa badi aukisha bena Isaleele’shi su abashala ku lupese lwaye, aye namu akekala ku lupese lwabo. Su bodya kwikala mu kyakya kisaka, bodya kupusha naminyi nsaa ibodya kupusha ano mayi a Yehowa? Pangi bodya kwaluula nka bino bibalulwile bena Isaleele’shi: “Byooso bibamba Yehowa, atwibikumbasha.” (Efilu 24:3) Anka kunyima kwa kapindji kwapeela, kubakitshikile mwanda ubadi utweshe lulamato lwa bena Isaleele mu kutompibwa. Mmwanda kinyi ubakitshikile?

13. Mmwanda kinyi ubadi utule lulamato lwa bena Isaleele mu kutompibwa?

¹³ Bena Isaleele abapushishe moo wibukopo pabo kumona ino myanda ayilesha bi bukome bwa kukaanya bw’Efile Mukulu, ngi bwakinyi Moyiise bayile ku mwengye wa Sinaayi mu kwisamba na Yehowa pa mbalo yabo. (Efilu 20:18-21) Anka nsaa ibakidile ngofu, Moyiise namu bayishishe kushi kwalukila kwi mwilo. Bibadi nka bu’shi mwilo ubashadile mu kabaaka kushi mukunkushi. Babadi balombene kukita kinyi? Bi kwikala’shi bena Isaleele babadi bakambe kukulupila kwi Moyiise muntu badi ebakunkusha. Babadi benyongole abo kulungula Aarone’shi: ‘Etukitshine efile atambuka kumpala kwetu, mwanda uno Moyiise, muntu mwitutuushishe mwiumbo dya Ejiipitu, taatuuku kibaamukitshikila.’—Efilu 32:1, 2.

14. Bena Isaleele babadi bedimbe abo banabene mu binangu naminyi, na Yehowa namu bakitshine naminyi?

¹⁴ Bena Isaleele abadi abauku’shi kulangwila ma nkishi kwi bubi. (Efilu 20:3-5) Anka bababangile kulangwila mwana a ngombe a oolo! Sunga mbibabadi bakutwe kutumikila mwiya wa Yehowa, babadi bedimbe abo banabene pa kunangushena’shi baki nka ku lupese lwa Yehowa. Aarone badi mpa na mwitanyine luno lulangwilo lwa mwana a ngombe bu “musangeelo bwa Yehowa”! Yehowa bakitshine naminyi? Balungwile Moyiise’shi mwilo “ubelwishisha” na’shi “ta mbayishe na kwenda kula n’eshinda dinadi mwibafundile.” Yehowa badi mufite munda ngofu mu kipaso kibadi mpa na mwele binangu bya kubutula mwilo ushima.—Efilu 32:5-10.

15, 16. Moyiise na Aarone abalesheshe’shi be ku lupese lwa Yehowa naminyi? (Tala kifwatulo ki ku mbangilo.)

¹⁵ Anka Yehowa nyi Efile Mukulu sha lusa. Baatshile kitshibilo kya kupela kubutula uno mwilo. Pamutwe pa byabya bapeele bena Isaleele mushindo wabadya kulesha’shi abakumina kwikala ku lupese lwaye. (Efilu 32:14) Nsaa ibadi Moyiise mumone mwilo ukwete kwela misaase, kunyimba, na kusha kumpala kwa nkishi, bafikile asaasula mwana a ngombe a oolo na kumufinga bu bukula. Kunyima belele musaase’shi: Mbananyi “bee [ku] lupese lwa Yehowa? Bafikye kwandji!” Na “bana balume boso ba Levi babeebungile bamwifunyisha.”—Efilu 32:17-20, 26.

¹⁶ Sunga mbibadi Aarone mupwe mwana a ngombe a oolo, badi mwinyongole, aye na bangi bena Levi boso, abakidile ku lupese lwa Yehowa. Bano bantu basha lulamato abalesheshe patooka’shi ta be ku lupese lwa bankitshishi ba milwisho nya. Kino nkitshibilo kya  binangu kibabatshile, mwanda kunyima nka mu dyadya efuku dimune, bantu binunu na binunu babadi balangwile mwana a ngombe a oolo abafwile. Anka bantu boso babakidile ku lupese lwa Yehowa abapandjile, Efile Mukulu namu kwibalaa’shi akebelela myabi.—Efilu 32:27-29.

17. Nkinyi akitulongyesha myanda ibabafundjile kwi Mpoolo pabitale mwana a ngombe a oolo?

¹⁷ Ndilongyesha kinyi dyatupete pa uno mwanda? Mpoolo mutumibwa bambile’shi: “Bino bibaakitshikile bwa kwitwikeela bu kileshesho” bwa’shi ‘tatwikalanga balangwidi ba nkishi.’ Mpoolo badi mupatuule’shi ino myanda “babeeyifundjile bwa kwitulambukisha atwe batabadi ku nfudiilo a bipungo. Byabya yaawa apwandikisha’shi mmwimane adimukye tala apona.” (1 Beena-Kodinda 10:6, 7, 11, 12) Nka bu bibalesheshe Mpoolo, mpa na bantu bakwete kulangwila Yehowa mbalombene kutwelakana mu kukita myanda i bubi. Mbalombene mpa na kunangushena’shi Yehowa ki nka mwibakumine. Anka sunga muntu akula’shi nkuuku a Yehowa sunga’shi e na lulamato kwadi bino tabilesha’shi Yehowa mmumukumine nya.—1 Beena-Kodinda 10:1-5.

18. Nkinyi kilombene kwitutakula bwa kwenda kula na Yehowa, na bino bi kwitutakula mu kukita kinyi?

¹⁸ Pabamwene bena Isaleele’shi Moyiise tafiki kwabadi mu nsaa ibabadi abakulupila, ababangile kwinyongola. Byabya su nfudilo a uno ndumbulwilo akutwa kufika bukidi bu byatukulupilanga, natwe namu twi balombene kubanga kwinyongola. Twi kubanga kwela binangu’shi myanda ibuwa yabadi betulee kwi Yehowa i kula ngofu sunga’shi ngikambe kwikala buwa mu kipaso kyayishi bya kulombana, na twi kubanga kukamba kwimena pa myanda yatukumina pamutwe pa kwimena ku myanda ayikumina Yehowa. Su twakutwa kudimuka, twi kubanga kwenda kula na Yehowa na kukita myanda yatushi’atupwandikishanga’shi twi balombene kwiyikita.

19. Mmwanda kinyi autungu’shi twikale atutentekyesha nsaa yoso, na bwakinyi?

¹⁹ Yehowa etutekye’shi tumukookyele mu myanda yoso na kumulangwila nka penda aye. (Efilu 20:5) Bwakinyi etutekye bwa kukita bino? Mwanda mmwitufule. Su tubakutwa kukita myanda yabetutekye kwi Yehowa, atukabanga kukita myanda ayisankisha Satana, na bino bi kwitupetesha bipeta bibubi. Mpoolo bambile’shi: “Ta nwi balombene kutoma ku kipulu kya Yehowa na kipulu kya kafilefile pamune nya; ta nwi balombene kudya ku meesa a Yehowa na ano a kafilefile pamune nya.”—1 Beena-Kodinda 10:21.

20. Yehowa mulombene kwitukwasha mpa na nsaa yatukitshi kilubilo naminyi?

²⁰ Kaayine, Salomone, na bena Isaleele boso bwabo abapetele mushindo wa kwinyongola na kushintuula mwikelo wabo. (Bikitshino 3:19) Abimweneka kalolo’shi, Yehowa takuminaa kusumbushenaa bantu bukidibukidi nka pa mwanda wa’shi ubakitshi kilubilo nya. Nangushena mushindo ubadi mufwile Aarone lusa. Lelo uno, Yehowa kwete kwitudimusha na kifulo kyoso bwa kwitukalwila mu kukita myanda ibubi. Kwete kufuba na Bible, mikanda yetu, na bena Kidishitu netu. Su tubateemesha ku myanda yabetudimusha kwi Yehowa, twi kwikala bashinkamishe’shi aketufwila lusa.

21. Abitungu tukite kinyi su lulamato lwetu kwi Yehowa lwi mu kutompibwa?

²¹ Kalolo kakata ka Yehowa ke na kepatshila. (2 Beena-Kodinda 6:1) Aketupa mushindo watudya “kuleka bubi na lwabi lwa bintu bya pa nsenga.” (Badika Tite 2:11-14.) Mu uno ndumbulwilo, amwikala nka myanda ayituulu lulamato lwetu kwi Yehowa mu kutompibwa. Ikala na kitshibilo kya kushala mu bwipi mwa Yehowa nsaa yoso, na tentekyesha’shi “Yehowa Efile Mukulu oobe ngi ootshiinyi, dingi oofubila, aye ngi oolamata”!—Miiya Ikituulwe 10:20.