1, 2. (a) Kungani kukuhlakanipha kuba seluhlangotsini lwaJehova? (b) Sitawucoca ngani kulesihloko?

KUKUHLAKANIPHA kubambelela kuJehova. Kute lomunye lonemandla lamakhulu kunewaJehova, lohlakaniphile kunaye nalositsandza ngendlela yena lasitsandza ngayo. Ngubani kitsi longafuni kuba seluhlangotsini lwaJehova? (Hla. 96:4-6) Letinye tinceku taJehova tehluleka kuchubeka tiseluhlangotsini lwakhe.

² Kulesihloko, sitawucoca ngetibonelo tebantfu labebatsi baseluhlangotsini lwaJehova kepha babe benta tintfo latenyanyako. Letibonelo titasifundzisa tifundvo letitasisita sihlale setsembeke ngalophelele kuJehova.

3. Kungani Jehova etama kusita Khayini, futsi yini Jehova lamtjela yona?

³ Cabanga ngalokwenteka kuKhayini. Bekakhonta Jehova hhayi labanye bonkulunkulu, kepha Jehova akazange amemukele. Enhlitiyweni yakhe bekunemicabango lemibi. (1 Joh.  3:12) Jehova watsi kuKhayini: “Nawenta lokulungile, angeke yini utfole umusa? Kepha nawenta lokubi, sono siyakucatsamela ngasemnyango. Sifuna wena, kodvwa wena kufanele usincobe.” (Gen. 4:6, 7, NW) Ecinisweni, Jehova bekatsi kuKhayini: “Nangabe uphendvuka futsi uba ngakimi, nami ngitawuba seluhlangotsini lwakho.”

4. Yini Khayini layenta ngisho nome aniketwe litfuba lekuba seluhlangotsini lwaJehova?

⁴ Kube Khayini washintja indlela labecabanga ngayo, Jehova bekatamemukela. Kodvwa Khayini akazange asilalele siyalo sakhe. Imicabango lemibi kanye nesifiso sebugovu sambangela kutsi ente lokubi. (Jak. 1:14, 15) Nakasakhula, Khayini bekangacabangi kutsi ngekuhamba kwesikhatsi utawumelana naJehova. Ngekuhamba kwesikhatsi, Khayini wavukela Jehova futsi wabulala umnakabo, lokuyintfo labengacabangi kutsi uyoke ayente.

5. Nguyiphi indlela yekucabanga lengasenta singawutfoli umusa waJehova?

⁵ NjengaKhayini, umKhristu angacabanga kutsi ukhonta Jehova ngesikhatsi lesifanako abe enta tintfo Jehova latenyanyako. (Juda 11) Angaya njalo ensimini nasemihlanganweni, kodvwa abe atiphatsa kabi, abukhali futsi enyanya bazalwane bakhe. (1 Joh. 2:15-17; 3:15) Kucabanga ngalendlela kungamenta kutsi one. Labanye bantfu abati kutsi yini lesiyicabangako noma lesiyentako, kepha Jehova ubona konkhe. Uyabona nangabe singakatinikeli ngalokuphelele kuye.​—Fundza Jeremiya 17:9, 10.

6. Jehova angasisita njani kutsi sincobe tifiso tetfu letimbi nangabe siseluhlangotsini lwakhe?

⁶ Jehova akasheshi asilahle ngisho noma senta emaphutsa. Nangabe umuntfu akhwesha kuye, Jehova umncenga atsi: ‘Buyela kimi, nami ngiyawubuyela kuwe.’ (Mal. 3:7) Jehova ufuna simelane nalokubi ikakhulukati nangabe silwa kamatima kuze sincobe butsakatsaka betfu. (Isa. 55:7) Nasenta njalo, Jehova utawuba seluhlangotsini lwetfu futsi utasiniketa konkhe lesikudzingako kute ‘sincobe’ tifiso tetfu letimbi.​—Gen. 4:7.

7. Solomoni bamlahlekela njani buhlobo lobuhle naNkulunkulu?

⁷ Kunyenti lesingakufundza kulokwenteka eNkhosini Solomoni. Ngesikhatsi asemncane, Solomoni bekanebuhlobo lobuhle naJehova. Nkulunkulu wamupha kuhlakanipha futsi wamniketa umsebenti wekwakha lithempeli lelihle kakhulu eJerusalema. Kodvwa Solomoni walahlekelwa buhlobo lobuhle naJehova. (1 Khos. 3:12; 11:1, 2) Umtsetfo waNkulunkulu washo ngalokucacile kutsi inkhosi lengumHebheru bekungakafaneli itsatse “bafati labanyenti, ngobe loko [kungayidukisa] inhlitiyo yayo.” (Dut. 17:17) Solomoni akazange alalele futsi watsatsa bafati labangu-700 netintfombi letingu-300. (1 Khos. 11:3) Bafati bakhe labanyenti bebangesiwo ema-Israyeli futsi bebakhonta bonkulunkulu bemanga. Ngako Solomoni akazange awulalele umtsetfo waNkulunkulu ngekutsi ashade nebafati baletinye tive.​—Dut. 7:3, 4.

8. Solomoni wona kanganani kuJehova?

⁸ Kancane kancane, Solomoni wakhwesha kuJehova. Ngekuhamba kwesikhatsi wenta tintfo letimbi kakhulu. Solomoni wakhela nkulunkulukati Ashtarothe naKhemoshi emathempeli. Wahlanganyela nebafati bakhe ekukhonteni kwemanga. Wakha lamathempeli macondzana neJerusalema lapho bekakhe lithempeli laJehova khona. (1 Khos. 11:5-8; 2 Khos. 23:13) Kungenteka Solomoni watiyenga acabanga kutsi Jehova ngeke atinake tintfo letimbi latentako  yingci nje nangabe enta iminikelo ethempelini laJehova.

9. Waba yini umphumela wekutsi Solomoni angatilaleli tecwayiso taNkulunkulu?

⁹ Jehova akabubeketeleli bubi. LiBhayibheli litsi: “Simakadze watfukutselela Solomoni, ngobe inhlitiyo yakhe yayisukile kuSimakadze . . . , labeke watibonakalisa kuye emahlandla lamabili. Nome abemalele Solomoni kutsi alandzele labanye bonkulunkulu, noko Solomoni akazange awulalele umyalo waSimakadze.” Umphumela waloko waba kutsi Jehova akazange amemukela futsi amsekele. Titukulwane taSolomoni atizange tibuse sonkhe sive saka-Israyeli futsi taba netinkinga letimatima iminyaka leminyenti.​—1 Khos. 11:9-13.

10. Yini lengasenta silahlekelwe buhlobo betfu lobuhle naJehova?

¹⁰ Kukhetsa bangani labangatati timiso taJehova futsi labangatihloniphi, kungonakalisa indlela lesicabanga ngayo futsi kungasenta silahlekelwe buhlobo lobuhle naye. Kungenteka bayincenye yelibandla, kepha bete buhlobo lobuhle naJehova. Kungaba natihlobo tetfu, bomakhelwane, bantfu lesisebenta nabo noma lesifundza nabo labangamkhonti Jehova. Nangabe bantfu lesicitsa sikhatsi lesinyenti sinabo bangaphili ngetimiso taJehova, bangasenta silahlekelwe buhlobo lobuhle naye.

11. Yini lengasisita sibone kutsi kufanele siyekele kutihlanganisa nebantfu labatsite?

¹¹ Fundza 1 Khorinte 15:33. Bantfu labanyenti banebuntfu lobuhle, futsi labanye labangamkhonti Jehova abenti tintfo letimbi ngaso sonkhe sikhatsi. Mhlawumbe bakhona bantfu labanjalo lobatiko. Loko kusho kutsi kukahle yini kutihlanganisa nabo? Kutihlanganisa nabo kutabutsintsa njani buhlobo bakho naJehova? Batakusita yini kutsi usondzele kuye? Ngutiphi tintfo letibaluleke kakhulu kubo? Bavame kukhuluma ngani? Bavame kukhuluma ngetintfo letikufashini yini, ngemali, ngetintfo tebuchwephesha, ngetekutijabulisa noma ngaletinye tintfo letifana naleti? Bavame kukhuluma kabi yini ngalabanye? Jesu wasecwayisa watsi: “Umlomo ukhuluma loko lokugcwele enhlitiyweni.” (Mat. 12:34) Nangabe ubona kutsi bantfu lotihlanganisa nabo batokwenta ulahlekelwe buhlobo bakho naJehova,  kukuhlakanipha kutsi unciphise sikhatsi losicitsa nabo noma ungasatihlanganisi nabo sanhlobo.​—Taga 13:20.

12. (a) Yini Jehova layitjela ema-Israyeli nakasandza kuphuma eGibhithe? (b) Yini ema-Israyeli layenta nakeva kutsi Jehova ufuna kutsi atinikele kuye kuphela?

¹² Kunaletinye tifundvo lesingatifundza kulokwenteka ngemuva kwesikhashana ema-Israyeli aphuma eGibhithe. Bantfu babutsana, bema embikweNtsaba iSinayi lapho khona Jehova wefika watibonakalisa khona ngalokusimangaliso. Ema-Israyeli abona kwakheka lifu lelimnyama, eva kudvuma kwelitulu, kukhala kwelicilongo futsi abona umbane kanye nentfutfu. (Eks. 19:16-19) Kuma-Israyeli Jehova watichaza ngekutsi ‘unguNkulunkulu lonesikhwele.’ Wawacinisekisa kutsi utawuhlale etsembekile kubantfu labamtsandzako nalabagcina imiyalo yakhe. (Fundza Eksodusi 20:1-6.) Ecinisweni Jehova bekatjela bantfu bakhe kutsi: “Ngitanisekela nangabe nikhombisa kutsi niseluhlangotsini lwami.” Yini lobewungayenta nawuva setsembiso sekutsi Nkulunkulu Jehova utawetsembeka kuwe? Siyaciniseka kutsi bewungasho emavi lashiwo ngema-Israyeli. LiBhayibheli litsi: “Bonkhe bantfu baphendvula kanyekanye batsi: ‘Onkhe emavi lawakhulumile Simakadze siyakuwenta.’” (Eks. 24:3) Noma kunjalo, ngekushesha kwetsembeka kwema-Israyeli kwavivinyeka.

13. Yini leyavivinya kwetsembeka kwema-Israyeli?

¹³ Ema-Israyeli esaba ngenca yetintfo Jehova bekatentile nakatibonakalisa kuwo. Ngako Mosi waya eNtsabeni iSinayi futsi wawakhulumela kuJehova. (Eks. 20:18-21) Kwaphela sikhatsi lesidze Mosi akulentsaba. Ema-Israyeli bekadidekile njengoba besekete umholi labemetsemba. Kubonakala ngatsi ema-Israyeli beketsembele kakhulu kuMosi lebekangumholi wawo. Akhatsateka, futsi atsi ku-Aroni: “Kota, usentele nkulunkulu lotawuhamba embikwetfu, ngobe phela asati kutsi sekwente njani kulendvodza lenguMosi leyasikhipha eveni laseGibhithe.”​—Eks. 32:1, 2.

14. Ema-Israyeli atikhohlisa ngani, futsi yini Jehova layenta?

¹⁴ Ema-Israyeli bekati kutsi kukhonta titfombe bekusono lesikhulu kuJehova. (Eks. 20:3-5) Kodvwa ngekushesha besekacale kukhonta litfole lelentiwe ngeligolide. Bekatikhohlisa ngekucabanga kutsi aseluhlangotsini lwaJehova ngisho noma angamlaleli. Aroni waze wabita kukhonta kwelitfole ngekutsi “sibhimbi sekudvumisa Simakadze”! Yini Jehova layenta? Watjela Mosi kutsi, labantfu “sebonakele” futsi ‘sebaphambukile kuloko lengabayala ngako.’ Jehova watfukutsela kakhulu futsi waze wacabanga nekubhubhisa sonkhe sive sema-Israyeli.​—Eks. 32:5-10.

15, 16. BoMosi na-Aroni bakhombisa njani kutsi bebaseluhlangotsini lwaJehova? (Buka sitfombe lesisekucaleni kwalesihloko.)

¹⁵ Jehova wakhetsa kungawabhubhisi ema-Israyeli. Ngenca yekutsi unemusa, waniketa tikhonti takhe letetsembekile litfuba lekukhombisa kutsi tiseluhlangotsini lwakhe. (Eks. 32:14) Nakabona bantfu bagidza futsi abeva bahlabela baphindze bamemeta, Mosi wagaya lelitfole leligolide laba yimphuphu. Wabese utjela bantfu kutsi: “Lowo longakuSimakadze akete lapha kimi.” Ngemuva kwaloko, “onkhe emadvodzana aLevi abutsana ndzawonye eta kuye.”​—Eks. 32:17-20, 26.

¹⁶ Ngisho noma Aroni bekabe nesandla ekwakheni lelitfole, waphendvuka futsi watihlanganisa nemaLevi labekaseluhlangotsini  lwaJehova. Letikhonti taJehova letetsembekile betikhombisa kutsi tiseluhlangotsini lwaJehova futsi tiyatehlukanisa nalabo labenta lokubi. Loko bekukuhlakanipha ngobe ngalelolanga kwafa bantfu labanyenti ngenca yekukhonta titfombe. Labo lebebaseluhlangotsini lwaJehova betsenjiswa kutsi batawutfola tibusiso.​—Eks. 32:27-29.

17. Asifundzisani emavi aPawula lamayelana nelitfole leligolide?

¹⁷ Ngusiphi sifundvo lesisitfolako? Umphostoli Pawula watsi: “Letintfo taba sibonelo kitsi kuze . . . singakhonti titfombe njengalabanye babo. [Letibonelo] tabhalelwa kutsi tibe sicwayiso kitsi tsine lesesifikelwe kuphela kwalelive. Ngako loyo locabanga kutsi umile akacaphele angawi.” (1 Khor. 10:6, 7, 11, 12) Lamavi aPawula aveta kutsi ngisho nebantfu labakhonta Nkulunkulu bangatenta tintfo letimbi futsi bangahle bacabange kutsi Jehova solo usabemukela. Kodvwa kufuna kuba ngumngani waNkulunkulu noma kucabanga kutsi setsembekile kuye akusho kutsi Jehova utawuhlale asemukela.​—1 Khor. 10:1-5.

18. Yini lengasibangela kutsi sikhweshe kuJehova, futsi loko kungaba namiphi imiphumela?

¹⁸ Ema-Israyeli akhatsateka nakabona Mosi solo angabuyi entsabeni iSinayi. Ngendlela lefanako, nalamuhla emaKhristu angakhatsateka nakabona ngatsi sehlulelo saJehova siyephuta kanye nekutsi live lelisha solo alifiki. Singahle sicabange kutsi tetsembiso taNkulunkulu ngeke tifezeke noma titawephuta kugcwaliseka. Loko kungasenta kutsi sente loko lesikufunako esikhundleni sekwenta intsandvo yaJehova. Ngekuhamba kwesikhatsi singakhwesha kuJehova futsi sigcine sesenta tintfo lebesingacabangi kutsi siyoke sitente.

19. Nguliphi liciniso lokufanele sihlale silikhumbula, futsi kungani?

¹⁹ Kufanele sihlale sikhumbula kutsi Jehova ufuna sitinikele ngalokuphelele kuye, futsi simlalele ngalokusuka enhlitiyweni. (Eks. 20:5) Sitawube senta intsandvo yaSathane nangabe singasamkhonti Jehova futsi loko kungasiletsela inhlekelele. Kungako umphostoli Pawula asikhumbuta kutsi: ‘Ngeke sinatse indzebe yaJehova niphindze ninatse indzebe yemadimoni; ngeke nidle etafuleni laJehova niphindze nidle etafuleni lemadimoni.’​—1 Khor. 10:21.

20. Jehova angasisita njani ngisho noma sente liphutsa?

²⁰ Khayini, Solomoni kanye nema-Israyeli bekanelitfuba lekuphendvuka futsi bashintje indlela lebebenta ngayo. (Imis. 3:19) Kuyacaca kutsi Jehova akhasheshi asilahle nangabe sente liphutsa. Jehova wamtsetselela Aroni. Lamuhla, Jehova angasecwayisa asebentisa indzaba leseBhayibhelini, tincwadzi letisekelwe eBhayibhelini, noma lomunye umKhristu lotaseluleka ngelutsandvo. Nasitilalela letecwayiso, singaciniseka kutsi Jehova utasikhombisa umusa.

21. Yini lokufanele sitimisele kuyenta nangabe kwetsembeka kwetfu kuJehova kuvivinyeka?

²¹ Kunesizatfu lesenta Jehova asikhombise umusa wakhe lomkhulu. (2 Khor. 6:1) Usuke asinika litfuba lekutsi “sikulahle kungamhloniphi Nkulunkulu netifiso talelive.” (Fundza Thithusi 2:11-14.) Nangabe nje sisaphila “kulelive,” sitawubhekana netintfo letitawuvivinya kutinikela kwetfu ngalokuphelele kuJehova. Shengatsi singahlale sikulungele kuba seluhlangotsini lwaJehova ngobe ‘nguJehova Nkulunkulu wetfu lokufanele simesabe, simkhonte, futsi sibambelele kuye’!​—Dut. 10:20.