1, 2. (a) Ke hobaneng ha e le ntho e ntle hore re be ka lehlakoreng la Jehova? (b) Re tlo tshohlang sehloohong sena?

RE LOKELA ho ba metswalle e haufi ya Jehova. Hobane o matla, o bohlale ebile o rata batho mme ha ho na motho ya jwalo ka yena. Jwale ke mang ya sa batleng ho ba ka lehlakoreng la hae? (Pes. 96:4-6) Empa bahlanka ba bang ba Modimo ba ile ba hloleha ho mo tshepahalla.

² Sehloohong sena, re tlo bua ka mehlala ya batho ba neng ba ipolela hore ba ka lehlakoreng la Jehova empa ka nako e tshwanang ba etsa dintho tse mo utlwisang bohloko. Mehlaleng ena, re tla ithuta dintho tsa bohlokwa tse tla re thusa hore re dule re tshepahalla Jehova.

3. Ke hobaneng ha Jehova a ile a leka ho thusa Kaine, hona Jehova o ile a reng ho yena?

³ Mohlala o mong ke wa Kaine. Ke nnete hore o ne a rapela Jehova feela. Le ha ho le jwalo, Jehova ha a a ka a amohela borapedi ba hae. Hobane o ile a bona hore Kaine o ne a se a na le pelo e mpe. (1 Joh. 3:12) Ke ka hoo a ileng a leka ho mo thusa mme a re: “Haeba o fetoha hore o etse se molemo, na ho  phahamiswa ho ke ke ha e ba teng? Empa haeba o sa fetohe hore o etse se molemo, sebe se laletse monyako, ebile se a o lakatsa; na o tla se laola?” (Gen. 4:6, 7) Ha e le hantle Jehova o ne a re ho Kaine: “Haeba o baka e le kannete mme o ba ka lehlakoreng la ka, le nna ke tla ba ka lehlakoreng la hao.”

4. Kaine o ile etsang le hoja Jehova a lekile ho mo lemosa?

⁴ Jehova o ne a tla tshwarela Kaine haeba feela a ne a ka baka. Empa Kaine o ile a satalatsa molala. O ile a dihelwa ke menahano le ditakatso tse mpe tsa boithati. (Jak. 1:14, 15) E ka nna yaba ha Kaine a ntse a hola, o ne a sa nahane hore ka le leng, o tla hlanohela Jehova. Le ha ho le jwalo, Kaine o ile a etsa ntho e neng e so bonwe, a fetohela Modimo a ba a bolaya le ngwanabo.

5. Ke menahano efe e ka etsang hore Jehova a se ke a re amohela?

⁵ Le kajeno, Mokreste a ka ipolella hore o rapela Jehova ka botshepehi empa o fumane hore o ntse a etsa dintho tseo Jehova a di hloileng jwalo ka Kaine. (Juda 11) E ka nna yaba tjhe yena bonneteng o ntse a ya dibokeng le tshimong. Empa mohlomong o meharo, o hloile Mokrestemmoho le yena kapa o dula a nahana ka boitshwaro bo bobe. (1 Joh. 2:15-17; 3:15) Menahano ena e ditshila, e ka etsa hore motho a qetelle a wetse sebeng. Batho ba bang ba ka nna ba se ke ba tseba menahano le boitshwaro ba rona. Empa ha ho na ntho eo Jehova a sa e tsebeng ebile o a bona haeba re sa mo sebeletse ka dipelo tsohle.—Bala Jeremia 17:9, 10.

6. Jehova o re thusa jwang haeba re etsa boiteko bohle ba hore re hlole menahano e mebe?

⁶ Le ha ho le jwalo, Jehova ha a re felle pelo. Ha motho a se a qala ho ba mabathanyana feela, Jehova o re ho yena: ‘Kgutlela ho nna, mme ke tla kgutlela ho wena.’ (Mal. 3:7) Jehova o batla hore re leke ka matla ho lwantshana le menahano e mebe le mefokolo ya rona. (Esa. 55:7) Haeba re etsa boiteko bohle, le yena o tla ba ka lehlakoreng la rona mme a re fe matla ao re a hlokang hore re hlole menahano e mebe.—Gen. 4:7.

7. Setswalle sa Solomone le Jehova se ile sa senngwa keng?

⁷ Mohlala wa Morena Solomone o ka re ruta dintho tsa bohlokwa. Ha e sa le motjha, o ile a kopa tataiso ya Jehova. Yaba Modimo o mo fa bohlale bo tsotehang a ba a mo fa le mosebetsi wa ho haha tempele e ntle ka ho fetisisa e neng e le Jerusalema. Le ha ho le jwalo, setswalle sa hae le Jehova se ile sa senyeha. (1 Mar. 3:12; 11:1, 2) Molao wa Modimo o ne o re Morena “a se ke a ikekeletsa basadi, hore pelo ya hae e se ke ya kgeloha.” (Deut. 17:17) Solomone ha a a ka a mamela empa a nyala basadi ba 700. O ile a boela a tlisa dinyatsi tse 300 ha hae. (1 Mar. 11:3) Solomone o ile a tlola molao wa Modimo ka ho nyala basadi bao e seng Baiseraele ba neng ba rapela medimo ya bohata.—Deut. 7:3, 4.

8. Solomone o ile a boela a sitelwa Jehova jwang?

⁸ Hanyane ka hanyane Solomone o ile a tlola molao wa Modimo mme qetellong a etsa sebe se tshabehang. O ile a ya boholeng ba ho hahela medimo ya bohata e leng Ashtorethe le Kemoshe dialetare. Yaba o joena basadi ba hae borapeding ba bohata. O ile a ba a haha dialetare tseo hantle feela ka pela Jerusalema moo a neng a hahetse Jehova tempele teng. (1 Mar. 11:5-8; 2 Mar. 23:13) Mohlomong Solomone o ile a nna a ithetsa, a nahana hore ka ha o etsa mahlabelo tempeleng, Jehova o tla mamella manyala ao a  ntseng a a etsa.

9. Solomone o ile a etsahallwa keng ka lebaka la ho iphapanyetsa melao ya Jehova?

⁹ Ha ho mohla Jehova a iphapanyetsang tlolo ya molao. Bibele e re: “Jehova a tukela Solomone ka bohale, hobane pelo ya hae e ne e sekametse hole le Jehova . . . , ya hlahileng ho yena habedi. Mabapi le ntho ena a mo laela hore a se ke a latela medimo e meng; empa o ne a sa ka a boloka seo Jehova a se laetseng.” Ka hoo, Jehova a mo lahla ka lebaka la seo. Bahlahlami ba Solomone boreneng ha ba a ka ba hlola ba ba le tokelo ya ho busa naha yohle ya Iseraele mme seo sa tlisa masisapelo feela ka dilemo tse ngata.—1 Mar. 11:9-13.

10. Keng e ka senyang kamano ya rona le Jehova?

¹⁰ Le rona jwalo ka Solomone, haeba re ba le metswalle e sa utlwisiseng kapa e sa hlompheng melao ya Jehova, seo se ka senya kamano ya rona le yena. Bakrestemmoho le rona ba sa hlompheng melao ya Jehova, le bona ba ka senya kamano ya rona le Jehova. Re boetse hape re lokela ho itlhokomela hore re se ke ra tshwaetswa ke mekgwa ya beng ka rona, baahisane, basebetsimmoho kapa bao re kenang sekolo le bona hobane ha ba sebeletse Jehova.

11. Re ka tseba jwang hore metswalle ya rona ke batho ba hantle?

¹¹ Bala 1 Bakorinthe 15:33. Batho ba bang ba ntse ba itshwere hantle esita le hoja e se Dipaki Tsa Jehova. Haeba le wena o na le metswalle e jwalo, na seo se bolela hore ke metswalle e hantle? Ako ipotse hore na ebe setswalle sa lona se ama kamano ya hao le Jehova jwang. Na metswalle ena ya hao e o kgothalletsa hore o mamele melao ya Jehova? Ke dintho dife tseo metswalle ena ya hao e di ratang? Na ha e bula melomo feela, ho tswa feshene, tjhelete, difouno le dithabolete, menate kapa maruo. Na e rata ho dulellana le ho tshwayatshwaya ba bang diphoso kapa ho etsa metlae e nyontshang? Jesu o ile a fana ka temoso ena e reng: “Etswe molomo o bua ho tswa ho se tletseng pelong.” (Mat. 12:34) Haeba ka mora ho itlhahlobisisa o fumana hore metswalle ya hao e ka senya kamano eo o nang le yona le Jehova, kgaotsa setswalle seo.—Liprov. 13:20.

12. (a) Jehova o ile a reng ho Baiseraele nakwana ka mora hore ba tswe Egepeta? (b) Baiseraele ba ile ba etsang ha Jehova a re o batla boinehelo bo kgethehileng?

¹² Re ka ithuta dithuto tsa bohlokwa ho se ileng sa etsahala nakwana ka mora  hore Baiseraele ba tswe Egepeta. Baiseraele ba ne ba le haufi le Thaba ya Sinai. Yaba Jehova o itlhahisa ho bona ka tsela e hlollang. Ka tshohanyetso maru a teteana ha ba ha lefifi. Baiseraele ba bona mahadima le mosi, yaba ba utlwa diaduma le modumo o bohale o jwalo ka wa phala e letswang. (Ex. 19:16-19) Yaba ba utlwa Jehova a re ho bona: “Ke Modimo ya batlang boinehelo bo kgethehileng.” O ile a ba tshepisa hore o tla ba tshepahalla haeba ba mo rata ebile ba mamela ditaelo tsa hae. (Bala Exoda 20:1-6.) Ha e le hantle o ne a re ho bona: “Haeba le ka ba ka lehlakoreng la ka, le nna ke tla ba ka lehlakoreng la lona.” Wena o ne o ka reng ha Jehova a ne a ka tjho jwalo ho wena? Ha ho pelaelo hore o ne o ka araba jwalo ka Baiseraele. Ba ile ba “araba ka lentswe le le leng [ba] re: ‘Mantswe ohle ao Jehova a a buileng re ikemiseditse ho a phetha.’” (Ex. 24:3) Ho e so ye kae, ho ile ha etsahala ntho e ileng ya leka botshepehi ba Baiseraele.

13. Keng e ileng ya leka botshepehi ba Baiseraele?

¹³ Baiseraele ba ne ba nyarositswe ke seo ba neng ba sa tswa se bona ha Jehova a ne a itlhahisa ho bona ka tsela ena e hlollang. Ka hoo, Moshe o ile a nyolohela Thabeng ya Sinai ho ya ba buella ho Jehova. (Ex. 20:18-21) O ile a nka nako e telele a le moo thabeng. Ho bonahala eka Baiseraele ba ne ba tlalletswe ke thota ba se na moetapele. Mohlomong lebaka ke hore ba ne ba se ba itshetlehile haholo ka Moshe. Ba ile ba kgathatseha yaba ba re ho Arone: “Re etsetse modimo ya tla re etella pele, hobane ha e le Moshe enwa, monna ya re eteletseng pele ho tswa naheng ya Egepeta, ka sebele ha re tsebe se mo etsahaletseng.”—Ex. 32:1, 2.

14. Baiseraele ba ile ba ithetsa jwang, hona Jehova o ile a etsang?

¹⁴ Baiseraele ba ne ba tseba hantle hore Jehova ha a rate ha ba rapela ditshwantsho. (Ex. 20:3-5) Empa ho ntse ho le jwalo, ba ile ba qetella ba se ba rapela namane ya kgauta. Le hoja ho ne ho hlakile hore ba ne ba sitetswe Jehova, ba ile ba ithetsa ba itjwetsa hore ba ntse ba le ka lehlakoreng la hae. Ho hobe le ho feta ke hore, Arone o ile a ba a re ketso eo ke “mokete wa Jehova.” Nahana feela! Jwale Jehova o ile a etsang? O ile a utlwa ba mo tswile tlase. Jehova o ile a bolella Moshe hore Baiseraele ba entse ntho e nyonyehang, ba ‘kgelohile ka potlako tseleng eo a ba laetseng hore ba tsamaye ka yona.’ Jehova o ne a kwatile hoo a neng a bile a na le boikutlo ba ho bolaya setjhaba seo kaofela.—Ex. 32:5-10.

15, 16. Moshe le Arone ba ile ba bontsha jwang hore ba ka lehlakoreng la Jehova? (Sheba setshwantsho se qalong.)

¹⁵ Jehova ha a a ka a fedisa Baiseraele. Ho e na le hoo, o ile a ba hauhela, a ba fa monyetla wa hore ba kgutle mekgweng e mebe mme ba be ka lehlakoreng la hae. (Ex. 32:14) Ha Moshe a bona Baiseraele ba hweleditse, ba bina ba tantsha ba ya kwana le kwana ka pela namane, a fihla a pshatla namane eo ya kgauta. Yaba o re: “Ke mang ya ka lehlakoreng la Jehova? A tle ho nna!” “Yaba bara bohle ba Levi ba qala ho phuthehela ho” Moshe.—Ex. 32:17-20, 26.

¹⁶ Le hoja Arone a ile a di hula pele mmommoring ona, o ile a baka mme a joena Balevi ka ho ba ka lehlakoreng la Jehova. Ka ho etsa jwalo, Arone le Balevi ba ne ba sa batle ho qaphalletswa ke madi. Eo e ne e le qeto e ntle hakaakang, hobane letsatsing lona leo, ho ile ha bolawa batho ba dikete ka lebaka la ho rapela namane. Jehova o ne a tshepisitse bohle  ba ka lehlakoreng la hae hore o tla ba hlohonolofatsa.—Ex. 32:27-29.

17. Keng seo re ithutang sona ho Pauluse mabapi le namane ya kgauta?

¹⁷ Ha Pauluse a bua ka taba ena ya namane ya kgauta, o ile a re lemosa a re: “Dintho tsena e bile mehlala ya rona, hore re se ke ra ba . . . barapedi ba ditshwantsho, jwalo ka ha ba bang ba bona e ile ya ba barapedi ba ditshwantsho. Mme di ile tsa ngolwa hore e be temoso ho rona bao bofelo ba ditsamaiso tsa dintho bo ba fihletseng. Ka lebaka leo ya nahanang hore o eme a ke a hlokomele hore a se ke a wa.” (1 Bakor. 10:6, 7, 11, 12) Jwalo ka ha Pauluse a ile a lemosa, esita le bahlanka ba nnete ba Jehova ba ntse ba ka wela tlwara! dibeng. Ba ka ithetsa, ba itjwetsa hore Jehova o ntse a ba amohela. Hobane feela motho a batla ho ba motswalle wa Jehova kapa a ipolela hore o a tshepahala, seo ha se mo fe karanti ya hore Jehova o se a ntse a mo amohela.—1 Bakor. 10:1-5.

18. Keng e ka re suthisetsang hole le Jehova, hona ditlamorao e ka ba dife?

¹⁸ Baiseraele ba ile ba fela pelo ha ba bona eka Moshe o dieha ho kgutla thabeng ya Sinai. Ka tsela e tshwanang, le rona re ka nna ra fela pelo ha re bona eka bofelo bo dieha ho fihla. Re ka nna ra bona eka Jehova e ke ke ya ba motho wa mantswe a hae mabapi le dintho tseo a itseng o tla re etsetsa tsona nakong e tlang. Ha re sa itlhokomele, re ka nna ra iphumana re tshwasehile ka dintho tsa lefatshe lena ho e na le ho etsa thato ya Jehova. Qetellong re ka suthela hole le Jehova mme ra etsa dintho tseo le ka mohla re neng re sa nahane hore re ka di etsa.

19. Ke ntho efe ya bohlokwa eo re lokelang ho dula re e hopola, hona hobaneng?

¹⁹ Le ka mohla ha re a lokela ho lebala hore Jehova o lebelletse hore re mo sebeletse ka pelo yohle ebile o batla boinehelo bo kgethehileng. (Ex. 20:5) Ha re sa be ka lehlakoreng la Jehova, ho hlakile hore re tla be re le ka lehlakoreng la Satane, e leng se ka fellang ka masisapelo. Ke ka hoo Pauluse a ileng a re eletsa a re: “Le ke ke la nwa senwelo sa Jehova le senwelo sa bademona; le ke ke la ja ‘tafoleng ya Jehova’ le tafoleng ya bademona.”—1 Bakor. 10:21.

20. Jehova a ka re thusa jwang esita le ka mora hore re etse phoso eitseng?

²⁰ Re ka ithuta thuto ya bohlokwa tlalehong ya Bibele e buang ka Kaine, Solomone le Baiseraele ha ba ne ba le Thabeng ya Sinai. Ba ne ba na le monyetla wa hore ba bake mme ba sokolohe. (Lik. 3:19) Re kgothatswa ke ho bona hore ha bahlanka ba Modimo ba etsa diphoso, Jehova ha a potlakele ho ba fella pelo. Ka mohlala, Jehova o ile a tshwarela Arone. Kajeno Jehova a ka re lemosa a sebedisa Bibele, dingolwa tse thehilweng Bibeleng kapa Mokrestemmoho le rona. Ka hona, re kgodisehile hore haeba re mamela, Jehova o tla re hauhela.

21. Re lokela ho ikemisetsa ho etsang ha re lekwa hore re se ke ra tshepahalla Jehova?

²¹ Jehova o mohau haholo. (2 Bakor. 6:1) Ka lebaka leo, o re fa monyetla wa hore re tlohele mekgwa ya rona e mebe. (Bala Tite 2:11-14.) Hafeela re ntse re phela maemong ana a hlobaetsang, boinehelo ba rona ho Jehova bo tla dula bo ntse bo lekwa. Ka hona, e se eka re ka ikemisetsa ho dula re le ka lehlakoreng la Jehova Modimo, ka ha ke yena feela ‘eo re lokelang ho mo tshaba, ho mo sebeletsa le ho mo kgomarela.’—Deut. 10:20.