1, 2. a) Náa numuu rí májánʼ nindxu̱u̱ dí makuwáanʼ náa níjniúu Dios rá. b) Ndiéjunʼ gúʼyáá náa artículo rígi̱ rá.

NIMBÁA nda̱wa̱a̱ tsáa gíʼdoo itháan tsiakii, nakro̱ʼo̱o̱ ga̱jma̱a̱ nandoo kaʼyulúʼ xóo Dios ndrígúlú. Ikha jngó, májánʼ nindxu̱u̱ rí muxuʼmámíjná o murajtumijná náa ikhaa ga̱jma̱a̱ makuwáanʼ náa níjniúu (Sal. 96:4-6). Maski ajndu xúʼko̱, tikhun xa̱bi̱i̱ Jeobá niniñaaʼ rí xkujndu maʼni dí xákuwa náa níjniúu.

² Náa artículo rígi̱, mbuʼyáá xkri̱da ndrígu̱ún xa̱bu̱ bi̱ nuthi rí kuwa náa níjniúu Jeobá mú kuwa runi rí naʼni gawúunʼ. Rí nigíʼniin ikhiin maʼsngúlú mbaʼa ikha rí mambáyulúʼ makuwáanʼ jmbu náa Jeobá.

3. Náa numuu rí Jeobá ndiyóoʼ maʼthúu̱n Caín ga̱jma̱a̱ ndiéjunʼ niʼthúu̱n xá.

³ Guʼyáá ga̱jma̱a̱ numuu Caín. Ikhaa na̱nguá ndiʼyamajkhún eʼwíínʼ dios, i̱ndó Jeobá. Mú, Jeobá tágruigú rí ndaʼyamajkuu, numuu rí ndiʼyoo rí náa awúu̱n a̱jkiu̱u̱n gíwanʼ dí ra̱májánʼ (1 Juan 3:12). Ikha jngó niʼthúu̱n Caín rí maxtáa náa níjniúu á mu nariʼkuminaʼ ga̱jma̱a̱ á mu naʼni rí májánʼ. Mú niʼthúu̱n rí á mu tsiriʼkuminaʼ, aʼkhá maʼniuu maʼni dí ra̱májánʼ. Nda̱wa̱á niraxu̱u̱: “Mú, lá ikháánʼ maʼngaaʼ matani ga̱jma̱ʼ xáʼ.” (Gén. 4:6, 7.) Xóo muʼthá,  Jeobá xtáa raʼthúu̱n rí á mu natanga̱a̱ a̱jkiu̱u̱n ga̱jma̱a̱ naxtáa náa níjniúu, ikhaa maxtáa ga̱jma̱á nindxu̱u̱.

4. Índo̱ Caín ma̱ndoo masngájma rí wíji̱ níjniúu Jeobá, ndiéjunʼ niʼni xá.

⁴ Caín i̱ndó mambaxúu ga̱jma̱a̱ Dios á mu nariʼkhu̱u̱ xóo endxa̱ʼwáminaʼ. Mú táʼdxawun xtágabu ndrígóo Jeobá. Rí ni̱jkha̱ kayáa maʼni dí ra̱májánʼ ninindxu̱u̱ rí nindxa̱ʼwáminaʼ ga̱jma̱a̱ rí nagua̱ʼa̱ maʼni (Sant. 1:14, 15). Lá nindxa̱ʼwáminaʼ mbá miʼtsú Caín índo̱ ninindxu̱u̱ dxámá rí makuximínáʼ náa Jeobá ráʼ. Mbáa na̱nguá. Mú nda̱wa̱á niʼni: Nikuximínáʼ náa Dios ga̱jma̱a̱ nixíyáa ndxájuu.

5. Ndiéjunʼ gáʼni rí muniʼñáʼ rambáxulú gajmiúlú Jeobá rá.

⁵ Xó má Caín, mbáa cristiano ma̱ndoo maʼthí rí ndaʼyamajkuu Dios mú ikhaa xtáa raʼni dí ra̱májánʼ (Jud. 11). Mbáa naʼtáraʼa wéñuʼ ga̱jma̱a̱ naxtáa xúgíʼ reunión, mú ikhú ma̱ngaa nandxa̱ʼwáminaʼ náa rí nubúunʼ xa̱bu̱, rí nandoo magiʼdoo wéñuʼ o asndu naguiyuʼ kaʼyoo ndxájuu (1 Juan 2:15-17; 3:15). Rígi̱ gáʼni rí maʼga̱ kayáa makudaminaʼ aʼkhá. Mbáa eʼwíínʼ tséyáá rí endxaʼwamíjna̱ o rí nuʼni, mú Jeobá ndaʼyoo xúgíʼ ga̱jma̱a̱ á mu kuwáanʼ káxi̱ náa níjniúu o na̱nguá (atraxnuu Jeremías 17:9, 10). *

6. Xú káʼnii gambáyulú Jeobá mu xajpátriguáanʼ náa aʼkhá rá.

⁶ Maski ajndu xúʼko̱, Jeobá tséniñulú nditháan. Índo̱ ndaʼyoo rí narájñulú náa ikhaa, naʼthúlúʼ ajngáa rígi̱: “Gagutangáanʼ náa ikhúúnʼ, ga̱jma̱a̱ ikhúúnʼ matangu̱ún náa ikháanʼla” (Mal. 3:7). Ikhaa nandoo rí maguiyulúʼ kuʼyáá dí ra̱májánʼ, mú itháan índo̱ nuʼni gajmiúlú rí naʼni majpátriguáanʼ (Is. 55:7). Á mu nuʼni, mambáyulúʼ ga̱jma̱a̱ maxnúlúʼ tsiakii rí gáʼyulu mu muʼni gajmiúlú aʼkhá (Gén. 4:7).

7. Xú káʼnii niʼnimbáti̱ga̱ Salomón rí nambáxu̱u̱ ga̱jma̱a̱ Jeobá rá.

⁷ Mbaʼa rí ma̱ndoo majmañulúʼ rí niʼni rey Salomón. Nákha ninindxu̱u̱ dxámá, ndiyáaʼ ikha ndrígóo Jeobá, bi̱ nixnúu ku̱ma̱ ga̱jma̱a̱ nirajkuáa ñawúunʼ maʼni templo náa Jerusalén. Mú Salomón niʼnimbáti̱ga̱ rí mambaxúu ga̱jma̱a̱ Jeobá (1 Rey. 3:12; 11:1, 2). Náa xtángoo ndrígóo Dios naʼthí rí xándoo dí reyes hebreos muguaʼdiin mbaʼin gu̱ʼu̱, mu a̱jkiu̱ún xáʼnijngamínáʼ (Deut. 17:17). Mú Salomón táʼnimbo̱o̱ ga̱jma̱a̱ nda̱wa̱á ninigúnʼ gajmíi̱n mbá 700 gu̱ʼu̱ ga̱jma̱a̱ mbá 300 concubinas (1 Rey. 11:3). Mbaʼin rí ikhiin na̱nguá ninindxu̱ún israelitas ga̱jma̱a̱ nduyamajkhún dios bi̱ ragájkhun. Ikha jngó Salomón ma̱ngaa táʼnimbo̱o̱ xtángoo náa naʼthí rí israelitas ragíʼmaa munigu̱nʼ gajmiún gu̱ʼu̱ bi̱ naguwáʼ i̱mba̱ níʼkhá (Deut. 7:3, 4).

8. Náa biʼyaa dí ra̱májánʼ niʼni Salomón rá.

⁸ Mañu mañúú, Salomón niʼnimbáti̱ga̱ ngajua rí nigiʼdoo náa xtángoo ndrígóo Dios ga̱jma̱a̱ niʼni dí ra̱májánʼ wéñuʼ. Niʼni mbá náa mixnáxi tsigijñaʼ náa mbiʼyamajkuíí dios a̱ʼgu̱ bi̱ nagumbiʼyuu Astoret ga̱jma̱a̱ i̱mba̱ náa mbiʼyamajkuíí dios bi̱ ragájkhun bi̱ nagumbiʼyuu Kemós. Ikhí ndiʼyamajkhún dios bi̱ ragájkhun gajmíi̱n gu̱ʼu̱ bi̱ nigui̱i̱n. Niʼni náa mixnáxi tsigijñaʼ náa mbá kúbá rí gíʼ mijngii náa Jerusalén, náa niʼni templo ndrígóo Jeobá (1 Rey. 11:5-8; 2 Rey. 23:13). Mbáa niʼni nduwaminaʼ índo̱ nindxa̱ʼwáminaʼ rí Dios manújngorámuʼ má xúʼko̱ rí táʼnimbo̱o̱ ga̱jma̱a̱ índo̱ gáxnáxi̱ má xúʼko̱ tsigijñaʼ náa templo.

9. Ndiéjunʼ ninindxu̱u̱ rí nigíʼnuu Salomón índo̱ táʼnimbo̱o̱ rí niʼthúu̱n Dios rá.

⁹ Mú Dios nditháan tsénujngurámuʼ aʼkhá ndrígúlú. Náa Biblia naʼthí: “Ga̱jma̱a̱ Jeobá ni̱jkha̱nú nikiʼnáa kaʼyoo Salomón, numuu rí a̱jkiu̱u̱n niʼni matsíngunʼ náa Jeobá [...],  bi̱ nisngájmaminaʼ a̱jma̱ nuthu náa ikhaa. Ga̱jma̱a̱ numuu rígi̱ niʼthúu̱n rí xáʼga̱ kidxu̱únʼ eʼwíínʼ dios; mú ikhaa táʼnimbánuu xúgíʼ rí Jeobá niʼthúu̱n maʼni”. Rí nirígá, Dios nánguá nimbáyúu ga̱jma̱a̱ nánguá nimbáxu̱u̱ ga̱jma̱a̱. Reino ndrígóo Israel niwiʼtáa a̱jma̱, ikha jngó bi̱ naguwáʼ náa Salomón na̱nguá nitañajunʼ náa xúgíʼ xuajen mba̱ʼu̱, ma̱ngaa nimíniʼ wéñuʼ dí ra̱májánʼ bi̱ niguwáʼ náa ikhaa (1 Rey. 11:9-13).

10. Ndiéjunʼ gáʼni rí ní xambáxulú gajmiúlú Jeobá rá.

¹⁰ Xó má nigíʼnuu Salomón, mbá rí migamíi nindxu̱u̱ rí mambáxulúʼ gajmiúlú bi̱ na̱nguá ekru̱ʼu̱u̱n o bi̱ na̱nguá eyamajkuíí xtángoo ndrígóo Jeobá. Mbáa tikhun rí ikhiin bi̱ kuwa náa congregación na̱nguá kuwa gujkhuʼ náa Dios. Mangiin bi̱ kuwa náa guʼulúʼ, bi̱ kuwa mijngii náa kuwáanʼ, bi̱ nuñajunʼ gajmiúlú o bi̱ nuʼnigajmaa gajmiúlú bi̱ na̱nguá eyamajkuíí Dios. Asndu xú káʼnii má, á mu bi̱ nambáxulúʼ gajmiúlú tséyamajkuíí xtángoo ndrígóo Dios, rúʼko̱ gáni rí mangáanʼ maʼga̱ randátígulú rí nambáxulúʼ gajmiúlú Jeobá.

11. Ndiéjunʼ gambáyulú muraʼwíí á mu muniʼñáʼ rambáxulú gajmiúlú mbáa rá.

¹¹ (Atraxnuu 1 Corintios 15:33). * Mbaʼin xa̱bu̱ ni̱ndxu̱ún míjínʼ, ga̱jma̱a̱ raʼkháa xúgínʼ bi̱ na̱nguá ni̱ndxu̱ún xa̱bi̱i̱ Jeobá nuni dí ra̱májánʼ. Á mu kuaʼdiin bi̱ nambáxulúʼ gajmiúlú bi̱ ni̱ndxu̱ún xúʼko̱, lá rígi̱ nandoo gáʼthúu̱n rí mambaxúlúʼ gajmiúlú xáʼni gacháanʼlú ráʼ. Gíʼmáanʼ muraximíjna̱ rí á mu nambáxulúʼ gajmiúlú ikhiin maʼni rí mambaxúlúʼ itháan májánʼ gajmiúlú Jeobá. Gundxaʼwamíjna̱ ndiéjunʼ rí gíwanʼ náa a̱jkiu̱ún. Mbá xkri̱da, lá nuthi má xúʼko̱ ga̱jma̱a̱ numuu rí itháan nuxi̱ʼ dí nagájnuu, numuu gitsíin, mbújkha̱a̱ o i̱ʼwáʼ ajua̱nʼ rí itháan nuxi̱ʼ ga̱jma̱a̱ i̱ʼwáʼ rí gíʼdoo numuu xáʼ. Lá nanigu̱nʼ mutha numún eʼwíínʼ o nuthi ajngá mbi̱ji̱ rí tsaga xáʼ. Jesús nixiéʼkhúlú ga̱jma̱a̱ ajngáa rígi̱: “Ri naguma naʼ aun akuin xabo, ika-ma igriyoʼ raun xabo” (Mat. 12:34). Ikha jngó, á mu nduʼyáá rí mambaxúlúʼ gajmiúlú mbáa mani̱ndxu̱u̱ mbá tsáʼkhá náa nambáxulúʼ gajmiúlú Jeobá, guraʼwíí májánʼ rí muʼni, á mu ndayóoʼ guniʼñáanʼ rambáxulú gajmiúlú xa̱bu̱ buʼko̱ (Prov. 13:20).

12. a) Ndiéjunʼ rí niʼthún kaʼwu Jeobá bi̱ israelitas nda̱wa̱á rí nigájnun náa Egipto rá. b) Xú káʼnii niriʼña̱a̱ israelitas índo̱ Jeobá niʼthún rí mbáwíi ikhaa eyoo mbuyamajkuíí xá.

¹² Ma̱ngaa ma̱ndoo majmañulúʼ mbaʼa ikha dí nirígá nda̱wa̱á rí israelitas niguma káwíin náa Egipto. Índo̱ niguánu náa ridoo kúbá Sinaí, Jeobá nisngájmaminaʼ ga̱jma̱a̱ mbá milagro náa ikhiin: Nimbájtuun, nijmídá, nixpíbiʼ, niʼni gúni ga̱jma̱a̱ niwáán mbá aʼwá gakhi̱i̱ wéñuʼ itháan ki xóo ewáán mbá chi̱ji̱ʼ  (Éx. 19:16-19). Ikhí Jeobá niʼthún israelitas rí nindxu̱u̱ ‹mbáa Dios bi̱ na̱nda̱ʼa̱ rí mbuyamajkuíí i̱ndó ikhaa›. Ma̱ngaa niʼthún rí maʼniún rí májánʼ á mu nandún kuyáá ga̱jma̱a̱ á mu nunimbu̱u̱n xtángoo ndrígóo (atraxnuu Éxodo 20:1-6). * Rí phú xtáa raʼthún nindxu̱u̱, rí á mu nakuwa má xúʼko̱ náa níjniúu ikhaa maxtáa gajmíi̱n. Á mu mangáanʼ nikuwáanʼlu ikhí, xú káʼnii gakumulú ga̱jma̱a̱ numuu rí nikudaminaʼ maʼni xá. Mbáa makumulúʼ xó má nikumu̱ún israelitas. Náa Biblia naʼthí rí “ga̱jma̱a̱ xúgíʼ xuajen niriʼña ga̱jma̱a̱ mbóó aʼwá: ‹Xúgíʼ ajngáa rí niʼthí Jeobá nanduxu munimbánii›” (Éx. 24:3). Ikha jngó, nguáthá mbiʼi nda̱wa̱á mbá nacha̱ ni̱ʼkha̱ mbaʼa xkujndu mu makujmaa á mu mbóó a̱jkiu̱ún eñún kuyáá Jeobá.

13. Ndiéjunʼ niʼni rí xáguajun jmbu israelitas rá.

¹³ Israelitas nimiñun índo̱ ndiyáá du̱u̱n skuniʼ, rí nixpíbiʼ ga̱jma̱a̱ i̱ʼwáʼ tsiakii ndrígóo Dios rí nikujmaa mbiʼi rúʼko̱. Ikha jngó ninda̱ʼa̱a̱ rí Moisés maʼga̱ gaʼtamíjná ga̱jma̱a̱ Jeobá (Éx. 20:18-21). Ikha jngó ikhaa nitsimuu náa kúbá Sinaí, ga̱jma̱a̱ ikhí nigajyúuʼ mba̱yu̱ʼ mbiʼi. Numuu rí bi̱ kayá edxu̱u̱ bi̱ nakumu̱ún kuyáá nda̱wa̱a̱ náa ikhiin, lá kuwa ndajkuíin náa ku̱ba̱ʼ mixooʼ xáʼ. Nakujmaa rí guáʼdáá fe índo̱ rí Moisés xtáa ga̱jma̱á ni̱ndxu̱ún. Ikha jngó táʼngu̱u̱n guguaʼthi̱i̱n ga̱jma̱a̱ nitháán Aarón: “Atani̱i̱ mbáa dios bi̱ maʼga̱ náa inuxu, numuu rí Moisés, xa̱biya̱ bi̱ niʼni magajnáaʼxu náa ku̱ba̱ʼ ndrígóo Egipto, na̱nguá eya̱a̱xu rí nigíʼnuu” (Éx. 32:1, 2).

14. a) Xú káʼnii nininduwami̱jná israelitas rá. b) Xú káʼnii nikumu̱u̱ Jeobá rá.

¹⁴ Bi̱ israelitas nduyáá májánʼ rí mbuyamajkuíí mbáa xándú nindxu̱u̱ mbá aʼkhá mba̱a̱ náa Jeobá (Éx. 20:3-5). Maski ajndu xúʼko̱, mbá nacha̱ ndiyamajkuíí mbáa aʼdá xédé bi̱ ki̱ʼni̱i̱ ga̱jma̱a̱ oro. Nduyáá májánʼ dí rígi̱ nasngájma rí tséyamajkuíí Dios, mú ikhiin nininduwami̱jná ga̱jma̱a̱ nikumu̱ún rí xóó kuwa náa níjniúu Jeobá. Aarón asndu niʼthí rí nindxu̱u̱ mbá “ndxo̱o̱ Jeobá”. Mú Dios ndiʼyoo rí nuni nduwaʼ. Niʼthúu̱n Moisés rí israelitas ninijngami̱jna̱ náa kamba̱a̱ rí niʼthún magún. Jeobá nigigaa kaʼñúún, ga̱jma̱a̱ asndu nindoo maʼni gámbáa xuajen rúʼko̱ rí ndiʼkhún nigíʼ (Éx. 32:5-10).

15, 16. Xú káʼnii nisngájma Moisés ga̱jma̱a̱ Aarón rí gajkhun nikuwa náa níjniúu Jeobá rá. (Atayáá timbá xtiʼkhu.)

¹⁵ Xó má Jeobá nigáwiinʼ a̱jkiu̱u̱n ikha jngó táʼni gámbíin mbá kayuʼ israelitas. Bi̱ niguájun jmbu má xúʼko̱ niniñuʼ rí makuwa mbu̱júu̱ náa níjniúu (Éx. 32:14). Índo̱ Moisés ndiʼyoo rí xa̱bu̱ xuajen kuwa rutsian, nuni ajmúú ga̱jma̱a̱ kuwa rundxa̱ʼwa̱ gakhi̱i̱ náa inuu aʼdá xédé bi̱ ki̱ʼni̱i̱ ga̱jma̱a̱ oro, nikumiguii asndu niʼni̱i̱ yujndaʼ. Nda̱wa̱á niʼthí: “Tsáa xtáa náa níjniúu Jeobá rá. ¡Aguwaʼ náa ikhúúnʼ!”. Ga̱jma̱a̱ “xúgínʼ levitas nigi̱ʼdi̱i̱ nigimbúun mbájndi náa ikhaa” (Éx. 32:17-20, 26).

¹⁶ Maski ajndu Aarón niʼnii xándú, nda̱wa̱á nitanga̱a̱ a̱jkiu̱u̱n ga̱jma̱a̱ nitanga̱a̱ náa Jeobá gajmíi̱n eʼwíínʼ levitas. Xa̱bekha bi̱ nikuwa jmbu bugi̱ raʼkháa i̱ndó nikuwa náa níjniúu Dios, ma̱ngaa nini wajímíjná gajmiún israelitas bi̱ na̱nguá nikuwa jmbu. Májánʼ rí niraʼwi̱i̱ nini, núkhú má mbiʼi rúʼko̱ mbaʼin israelitas nikháñun numuu rí ndiyamajkuíí mbáa xándú. Mú bi̱ niguájun náa níjniúu Jeobá nindrigú rí maguma tasjkurámiinʼ (Éx. 32:27-29).

17. Ndiéjunʼ eʼsngúlúʼ ajngáa rí niʼthí Pablo ga̱jma̱a̱ numuu rí nigíʼnuu aʼdá xédé bi̱ ki̱ʼni̱i̱ ga̱jma̱a̱ oro rá.

 ¹⁷ Apóstol Pablo niʼthí rí nigíʼnuu aʼdá xédé bi̱ nigumaa ga̱jma̱a̱ oro ga̱jma̱a̱ niʼthí rígi̱: “Rígi̱ ni̱jkha̱nú ninindxu̱u̱ mbá xkri̱da náa ikháanʼlu, mu [...] xuʼyamajkhún xándú, xó má nini tikhun rí ikhiin”. Nda̱wa̱á niʼthí rí xkri̱da rúʼko̱ nigumaraʼmáʼ “mu mbuʼyáá ikháanʼlu, bi̱ kuwáanʼ índo̱ mambá xúgíʼ dí xtáa rarígá náa numbaaʼ”, ga̱jma̱a̱ nda̱wa̱á niʼthí: “Ikha jngó, bi̱ naku̱mu̱u̱ rí wíji̱, gañewumínáʼ mú xájpatriga̱a̱” (1 Cor. 10:6, 7, 11, 12). Xó má niʼthí Pablo, asndu bi̱ nduyamajkuíí Jeobá ma̱ndoo maguánu muni dí ra̱májánʼ. Bi̱ tséʼngu̱u̱n gúni gaʼduunʼ tsáʼkhá mbáa nakumu̱ún rí xóó nambáxu̱u̱n má xúʼko̱ gajmiún Jeobá. Mú mbáa xa̱bu̱ bi̱ nandoo mambaxúu ga̱jma̱a̱ Dios o maʼthí rí xtáa jmbu náa ikhaa mú rúʼko̱ tsíyoo gáʼthúu̱n rí Dios nagruiguíi (1 Cor. 10:1-5).

18. Ndiéjunʼ gáʼni rí mutsíngulúʼ náa Jeobá ga̱jma̱a̱ ndiéjunʼ gamíi muguaʼnii rá.

¹⁸ Xó má ndiʼyáá, israelitas na̱nguá niʼngu̱u̱n guguaʼti̱i̱n índo̱ Moisés ndijyúuʼ mu mata̱nga̱a̱ náa kúbá Sinaí. Ikhaa má kayúʼ bi̱ ni̱ndxu̱lú cristianos, rí mbiʼi xúgi̱ ma̱ndoo maʼni rí xáʼngulú guguaʼthi̱i̱n numuu rí nakumulú rí mbiʼi ndrígóo Jeobá ga̱jma̱a̱ numbaaʼ nuxi̱ʼ ndajyúuʼ wéñuʼ mu ma̱ʼkha̱. Mbáa makumulúʼ rí nákhii mba̱yu̱ʼ eyóoʼ mu mambanúu o rí mingíjyúuʼ marigá. Á mu tsiñaumíjna̱, rí mundxaʼwamíjna̱ xúʼko̱, ma̱ndoo maʼga̱ kaguáanʼ muʼni rí nandoo xuyulúʼ ki xóo muʼni rí nandoo Jeobá. Nda̱wa̱á maʼni rí asndu mutsíngulúʼ náa Dios ga̱jma̱a̱ muʼni mbá rí nditháan tséndxaʼwamíjna̱ muʼni.

19. Ndiéjunʼ dí ragíʼmaa mambumulú nditháan, ga̱jma̱a̱ náa numuu rá.

¹⁹ Nditháan xámbumulú rí Jeobá na̱ndu̱ʼu̱lú rí muʼnimbulúʼ kuʼyáá mbá káxi̱ ga̱jma̱a̱ rí mbáwíí guʼyamajkuíí (Éx. 20:5). Á mu tséʼnilúʼ rí nandoo Dios, kuwáanʼ ru̱ʼni̱ rí nandoo Satanás, ga̱jma̱a̱ rúʼko̱ gáʼga kaguáanʼ mumíniiʼ. Ikha jngó Pablo naʼni marmáʼáan a̱jkiu̱lú: “Xándoo muwa̱a̱nla náa copa ndrígóo Jeobá ga̱jma̱a̱ náa copa ndrígu̱ún xa̱bu̱ wéñiʼ; xándoo muphiʼtsulá náa “mésóo Jeobá” ga̱jma̱a̱ náa mésuún xa̱bu̱ wéñiʼ” (1 Cor. 10:21).

20. Xú káʼnii gándoo gambáyulú Jeobá itháan índo̱ nakiéʼkulu rá.

²⁰ Rí naʼthí náa Biblia ga̱jma̱a̱ numuu Caín, Salomón mangiin israelitas rígá mbá dí gíʼdoo wéñuʼ numuu rí ma̱ndoo mambáyulúʼ dí mbiʼi xúgi̱. Xúgínʼ buʼko̱ nikhánún rí ma̱ndoo matangi̱i̱n ga̱jma̱a̱ rí muriʼkumijnáa (Hech. 3:19). Nakujmaa kaʼwu rí Jeobá tséniñuʼ mbá nacha̱ mbáa índo̱ nakiéʼkúun. Garmáʼáan a̱jkiu̱lú rí niʼni mba̱a̱ a̱jkiu̱u̱n kaʼyoo Aarón. Rí mbiʼi xúgi̱, Jeobá ma̱ndoo maʼtá múʼúnlu ga̱jma̱a̱ rí na̱ʼkha̱ raʼthí náa Biblia, náa i̱yu̱lú o xtágabu májánʼ rí gáxnulú mbáa ndxájulú. Índo̱ nuʼnimbulúʼ rí naʼthúlúʼ, nduʼyáá gajkhun rí magáwíinʼ a̱jkiu̱u̱n kaʼyulú.

21. Ndiéjunʼ gíʼmáanʼ muʼni índo̱ guraʼníí tsáʼkhá náa musngajmá á mu kuwáanʼ jmbu náa Jeobá rá.

²¹ Gíʼdoo mbá numuu rí Jeobá májánʼ a̱jkiu̱u̱n (2 Cor. 6:1). Naniñulú “muniʼñáʼ ruʼni dí xkawiʼ ga̱jma̱a̱ rí nagua̱ʼa̱ muʼni” (atraxnuu Tito 2:11-14). * Índo̱ kuwáanʼ “náa tapo̱o̱ dí rígá náa numbaaʼ rígi̱”, muraʼníí mbaʼa xkujndu náa makujmaa á mu i̱ndó Jeobá eʼyamajkuíí. Guʼni tsiakimíjna̱ mu makuwáanʼ má xúʼko̱ xawii ga̱jma̱a̱ jmbu náa níjniúu Jeobá, numuu rí gíʼmáanʼ mamiñúlú kuʼyáá ga̱jma̱a̱ rí xúniʼñáʼ nditháan (Deut. 10:20).