1, 2. (a) Nkamboonzi nitweelede kuba kubbazu lyaJehova? (b) Tulalanga-langaanzi muchiiyo eechi?

TWEELEDE kukakatila kuli Jehova. Taakwe muntu uuli amanguzu, busongo aluyando mbuuli mbabede Leza wesu. Toonse tulakuyanda kuba kubbazu lyakwe. (Int. 96:4-6) Pesi bamwi bakombi baLeza bakakachilwa kukakatila kuli Jehova akuba kubbazu lyakwe.

² Muchiiyo eechi, tulalanga-langa zikozyano zyabantu bakali kulyaamba kuti bali kubbazu lyaJehova pesi kumwi kabachita nzyatayandi. Zikozyano eezi zitugwasya kubona mbukuyandikana kukkala katusyomekede kuli Jehova.

3. Nkamboonzi Jehova naakachenjezya Kkayini alubo ngaali majwi ngaakamubuzya?

³ Atulange-lange chikozyano chaKkayini. Kkayini taakali kukomba bamwi baleza pesi wakali kukomba Jehova alikke. Leza taakayibotelwa pe nzila Kkayini njaakali kumukombaayo. Wakali kuyeeya zintu zibi mumoyo wakwe. (1 Joh. 3:12) Jehova wakachenjezya Kkayini kuti: “Ikuti naa wacinca akutalika  kucita kabotu, sena tokakkomaninwi? Pele kuti utacinci akucita kabotu, kozyiba kuti cibi cilikukkalilide amulyango, alimwi ciyanda kukweendelezya; pele sena uyoocizunda?” (Matl. 4:6, 7, NW) Muli amwi majwi, Jehova wakali kwaambila Kkayini kuti, “Kuti wachincha akusala kuba kubbazu lyangu andime ndiyooba kubbazu lyako.”

4. Kkayini wakachita biyeni nikuba kuti wakapedwe mweenya wakuba kubbazu lyaJehova?

⁴ Jehova wakali kunoobutambula bukombi bwaKkayini kaansinga Kkayini wakachincha mizeezo yakwe. Pesi Kkayini taakaswiilila pe. Kuyeeya zitali kabotu akuliyanda kwakapa kuti abisye. (Jak. 1:14, 15) Kachili mukubusi, kulakonzeka kuti Kkayini taakazi pe kuti uzoopapila Jehova. Mukuya kwachiindi, Kkayini wakazoochita zintu zyakatali kuyeeyelwa, wakapapila Leza akujaya mwanikaakwe.

5. Nziizili zintu zikonzya kupa kuti tubisizye Jehova?

⁵ Mbuuli Kkayini, muKristu ulakonzya kuchita zintu zibi kumwi kachitaanga ukomba Jehova. (Jud. 11) Muchikozyano, umwi ulakonzya kuba amizeezo yakutalilemeka, butangazu naakuti kutayanda umwi mukombinyina. (1 Joh. 2:15-17; 3:15) Mizeezo iili boobu ilakonzya kupa kuti tubisye. Kulakonzeka kuti muKristu musungu mumulimu wakukambawuka alubo kanjila miswaangano yambungano chiindi choonse. Bamwi balakonzya kutazibona nzituyeeya ambutulijata pesi Jehova ulazibona zintu zyoonse alubo ulabona kuti katutamukombi amoyo woonse.—Bala Jeremiya 17:9, 10.

6. Jehova utugwasya biyeni kuti ‘tuzunde’ zibi nzitulwana kuti twaba kubbazu lyakwe?

⁶ Jehova tafwambaani pe kutulekelezya kuti twabisya. Kuti bantu kabalikuchita zintu zipa kuti baleye munzila iilikabotu, Jehova ubaambila kuti: “Amuboole kulindime, lino ambebo nzooboola kulindinywe.” (Malk. 3:7) Jehova ulizizi zintu nzitulwana nkinkaako uyanda kuti tutantamuke bubi. (Is. 55:7) Kuchita oobo, kupa kuti Jehova abe kubbazu lyesu akutugwasya mubukombi, mumizeezo akutupa manguzu aakuti ‘tuzunde’ zibi nzitulwana.—Matl. 4:7.

7. Niinzi chakapa kuti Solomoni abisizye Jehova?

⁷ Tulakonzya kwiiya zintu zyiingi kuchikozyano chaMwaami Solomoni. Naakali muniini, Solomoni wakakumbila kuzulwidwa aJehova. Leza wakamupa busongo bwiingi amulimu wakuyaka tempele pati kuJerusalemu. Pesi Solomoni wakakachilwa kukkala kali mweenzinyina waJehova. (1 Bam. 3:12; 11:1, 2) Mulawu waLeza wakali kukasya kuti Mwaami muHebbrayo ‘abe abanakazi biingi kuti moyo wakwe utaleyi.’ (Dt. 17:17) Solomoni taakaswiilila pe mpawo wakakwata banakazi bali 700. Alubo wakazookwata bamwanakasuwa bali 300. (1 Bam. 11:3) Bakayintu biingi mbaakakwata teebakali maIsrayeli pe alubo bakali kukomba baleza bakubeja. Nkinkaako, Solomoni taakaswiilila mulawu waLeza nkaambo wakakwata banakazi bakatali maIsrayeli.—Dt. 7:3, 4.

8. Nziizili zibi Solomoni nzyaakabisizya Jehova?

⁸ Kuleya mbichaani-mbichaani munzila zyaJehova Solomoni nkwaakachita kwakapa kuti achite zibi zipati. Solomoni wakayaka chipayililo chaleza wachikayintu uutegwa Asitoreti achaleza wakubeja uutegwa Kkemoshi. Mpawo wakasaanguna kukomba baleza aaba bakubeja abakayintu bakwe. Wakayaka zipayililo eezyo kuchilundu chakalangene aJerusalemu  nkwaakayakide tempele lyaJehova! (1 Bam. 11:5-8; 2 Bam. 23:13) Kulakonzeka kuti Solomoni wakali kuyeeya kuti Jehova ulakonzya kumulekelela nkaambo wakachili kutuula zipayizyo kutempele.

9. Niinzi zyakachitika akaambo kakutaswiilila kwaSolomoni?

⁹ Jehova tabuyandi pe bubi. Bbayibbele lyaamba kuti: “Mpawo Jehova wakanyemena Solomoni, nkaambo kakuti moyo wakwe kuupambukide kuli-Jehova . . . , iwakalibonya kulinguwe ziindi zyobile, iwakamulailila aamakani aya ngaonya, kuti teelede kutobela mizimu myeenzu, nekubaboobo takatobede majwi ngaakamucenjezya Jehova.” Eezi zyakapa kuti Leza atamugwasyi. Bana baSolomoni teebakeendelezya bwaami boonse bwaIsrayeli alubo zyakapa kuti banjile mumapenzi kwaminyaka myiingi.—1 Bam. 11:9-13.

10. Niinzi chikonzya kupa kuti bweenzuma mbutulaabo aJehova bumane?

¹⁰ Chikozyano chaSolomoni chitondeezya kuti bantu mbitumvwananaabo batakombi Jehova akutobelezya malayilile aakwe, bapa kuti tuleye mubukombi. Kulakonzeka kuti bamwi balanjila miswaangano pesi kabatasimide pe mubukombi. Alubo bamwi balakonzya kuswaanizya nzubo zyesu, basimayakilane, mbitubelekaabo naakuti basichikoloma batakombi Jehova. Kuliswaanizya abantu batatobelezyi zyeelelo zyaJehova, kupa kuti tutabi beenzinyina baLeza.

11. Niinzi chiyootugwasya kuti tusale beenzuma balikabotu?

¹¹ Bala 1 BaKorinto 15:33, NW. Bantu biingi bali abube bulikabotu, nikuba bantu batakombi Jehova balakonzya kutachita zintu zibi loko. Ubonaanga bantu bali boobo balakonzya na kuba beenzinyokwe bali kabotu? Libuzye kuti, kuliswaanizya ambabo kupa kuti bweenzinyokwe aJehova bube biyeni? Buyoosima na? Bayeeya zintu zili biyeni? Muchikozyano, chiindi chiingi baambuula atala amafashoni mapya, mali, tunchina twamazubaano mbuuli mafooni, zyakulikondelezya azimwi zyanyika na? Baambuula majwi aatali kabotu na atala abamwi naakuti baambuula zintu zisesya zitali kabotu? Jesu wakati: “Mulomo ulagwisya aata mumoyo.” (Mt. 12:34) Kuti bantu mbumvwananaabo kabakonzya kupa kuti bweenzinyokwe aJehova bumane, toyelede kumvwananaabo pe.—Tus. 13:20.

12. (a) Ngaali majwi Jehova ngaakabuzya maIsrayeli nibakazwa kuEgepita? (b) MaIsrayeli bakavwiila kutyeni atala amajwi Jehova ngaakababuzya?

¹² Tulakonzya kwiiya zyiingi kuzintu zyakachitika maIsrayeli nibakazwa  muEgepita. Bantu bakabungana kunembo aChilundu chaSinayi. Achilundu eechi, Jehova wakalibonia munzila iigambya. Kwakaba joba lisiya mbi. Jehova wakapa kuti kube kudilima, tulabi, busi amusabilo mupati wakali mbuuli wamweembo. (Kul. 19:16-19) Muzintu eezi zyakachitika, Jehova wakalitondeezya kumaIsrayeli kuti ‘nguLeza uyanda kukombwa alikke.’ Wakabaambila kuti wakali kuyoosyomeka kubantu bamuyanda akubamba milawu yakwe. (Bala Kulonga 20:1-6.) Muli amwi majwi, Jehova wakali kwaambila maIsrayeli kuti: “Kuti mwasala kuba kubbazu lyangu andime ndilaba kubbazu lyanu.” Kaansinga wakali nduwe, wakali kunoovwiila biyeni kumajwi Jehova Leza ngakaamba? Amwi wakali kunoovwiila mbuuli maIsrayeli. Tubala kuti: “Boonse bakavuwa ajwi lyomwe, bati, Makani oonse Jehova ngaamba tulaacita.” (Kul. 24:3) Nikwakiinda mazuba mache biyo, kwakachitika chintu chakasunka kusyomeka kwamaIsrayeli.

13. Kusyomeka kwamaIsrayeli kwakasunkwa biyeni?

¹³ MaIsrayeli bakagamba nibakabona joba lisiya mbi, tulabi azitondeezyo ziyoosya zyakazwa kuli Leza. MaIsrayeli bakakumbila kuti Musa abe simwiimaakati chiindi nibakali kwaambuula aJehova kuChilundu chaSinayi. (Kul. 20:18-21) Musa wakakkala kwachiindi chilamfu muchilundu. Eezi zyaamba kuti maIsrayeli teebakachilikwe muntu ngubasyoma na uukonzya kubeendelezya munkanda? Amwi lusyomo lwamaIsrayeli lwakayeeme aali Musa. Bakatalika kukataazikana mpawo bakabuzya Aroni kuti: “Buka utucitile baleza bakutuzulwida, nkaambo oyo Musa, muntu iwakatupozya mucisi ca-Egepita, tatuzi camusikila.”—Kul. 32:1, 2.

14. MaIsrayeli bakalyeena biyeni alubo Jehova wakachitaanzi?

¹⁴ MaIsrayeli bakalizi kuti kukomba zifanikisyo kwakali kubisizya Jehova. (Kul. 20:3-5) Pesi bakatalisya kukomba ng’ombe yangolida. MaIsrayeli bakalyeena akuyeeya kuti bakachili kubbazu lyaJehova nikuba kuti bakali bachita chintu chibi. Aroni wakaamba kuti kukomba ng’ombe nkubakachita lyakali “ipobwe lya-Jehova”! Jehova wakamvwa biyeni? Wakanyema loko mpawo wakabuzya Musa kuti, bantu “babisya” akuti “bafwambaana kusiya inzila njindakabalailila.” Kazwide “bukali,” Jehova wakayeeya kunyonyoona chisi chipya chamaIsrayeli nchaakali wasala.—Kul. 32:5-10.

15, 16. Musa aAroni bakatondeezya biyeni kuti bakali kubbazu lyaJehova? (Langa chifanikisyo chili kumatalikilo achiiyo.)

¹⁵ Jehova wakasala kutabanyonyoona maIsrayeli. Kubafwida luzyalo kwakapa bakombi bakwe kuti babe kubbazu lyakwe. (Kul. 32:14) Musa naakabona maIsrayeli kabalikupululuzya, kwiimba akuzyana kunembo ang’ombe eeyi, wakayibweza wayiziya kusikila yaba busu. Mpawo wakabaambila kuti: “Kufumbwa uuli kulubazu lwa-Jehova aboole kulindime.” Mukusandula, “kwakamuyobolokela bana boonse ba-Levi.”—Kul. 32:17-20, 26.

¹⁶ Nikuba kuti Aroni nguwe wakabumba chifanikisyo eechi pesi wakachincha akuba kubbazu lyaJehova kali abamwi maLevi. Bantu aaba basyomeka, bakasala kuba kubbazu lyaJehova akulipambula kuli basikubisya. Nzibakachita zyakali kabotu nkaambo biingi bakafwa akaambo kakukomba chifanikisyo eecho. Bantu bakasala kuba kubbazu lyaJehova teebakafwa pe alubo Leza wakasyomezya kubalongezya.—Kul. 32:27-29, NW.

17. Twiyaanzi kumajwi Pawulu ngaakalemba atala akukomba ng’ombe yangolinda maIsrayeli nkubakachita?

 ¹⁷ Mwaapstolo Pawulu wakabelesya zyakachitikila maIsrayeli chiindi nibakakomba ng’ombe yangolida naakati: “Lino Makani aya atubeda incenjezyo, kuti tutabi . . . basikukomba mituni mbuli bamwi. [Makani aaya aanchenjezyo] akalembelwa kuti acenjezye ndiswe nitusikilwa mamanino aaciindi. Nkaambo kaako oyo uuyeeya kuti ndiimvwi kabotu acenjele kuti atawi.” (1 Kor. 10:6, 7, 11, 12) Mbuuli Pawulu mbakaamba, nikuba bakombi bakasimpe balakonzya kubisya. Bantu basunkwa kuchita zibi balakonzya kuyeeya kuti bachili abweenzinyina bulikabotu aJehova. Pesi kuyanda kuba beenzinyina baJehova naakuti kwaamba kuti tulasyomeka kulinguwe takwaambi kuti nzituchita Jehova ulaziyanda.—1 Kor. 10:1-5.

18. Niinzi chikonzya kupa kuti tutabi beenzinyina baJehova alubo ngaali mapenzi ngitukonzya kuswaana?

¹⁸ Mbuuli maIsrayeli mbubakakataazikana Musa naakanonoka kuzwa kuSinayi, bamwi maKristu balakonzya kukataazikana akuyeeya kuti buzuba bwaJehova bwakubeteka akweeta nyika mpya zyanonoka. Tulakonzya kubonaanga zisyomezyo eezi tazizoochitiki pe. Kuti teetwabambulula, maboneno aali boobu alakonzya kupa kuti tubikkile maanu kuzintu zyamunyika kutali kuyanda kwaJehova. Mukuya kwachiindi, eezi zilakonzya kupa kuti tutabi beenzinyina baJehova akuchita zintu zibi nzitwakatali kuyeeyela kuti kujana twazichita katuchisimide mubukombi.

19. Tweelede kuzibaanzi alubo nkamboonzi?

¹⁹ Tweelede kuziba kuti Jehova uyanda kuti tukombe nguwe alikke akuti tumukombe amoyo woonse. (Kul. 20:5) Kukachilwa kuchita kuyanda kwaJehova chaamba kuti tulikuchita kuyanda kwaSaatani alubo eezi zilakonzya kutweetelezya. Nkinkaako Pawulu wakaamba kuti: “Tamukonzyi kunywida cinywido ca-Mwami antoomwe acinywido camadaimona. Alimwi tamukonzyi kwaabilwa kuntafule ya-Mwami akuntafule yabadaimona abalo.”—1 Kor. 10:21.

20. Jehova utugwasya biyeni nitwaleya munzila zyakwe?

²⁰ Makani aamuBbayibbele aali atala aKkayini, Solomoni amaIsrayeli kuChilundu chaSinayi atondeezya kuti bakali kunookonzya kuchincha akuleka michito yabo mibi. Alubo bakapedwe mweenya wakuti ‘beempwe akusanduka.’ (Inc. 3:19) Zilaantanganana kuti Jehova tafwambaani kubalekelezya bantu baleya munzila zyakwe. Jehova wakamulekelela Aroni. Mazubaano, Jehova ulatuchenjezya kwiinda muzikozyano zyabantu baambidwe muBbayibbele, mumabbuku aapandulula Bbayibbele naakuti lulayo ndutupegwa amukombima. Kuswiilila makani aaya aanchenjezyo kupa kuti Jehova atufwide luzyalo.

21. Tweelede kupeekezya kuchitaanzi kuti twaba muzyiimo zisunka kusyomeka kwesu kuli Jehova?

²¹ Luzyalo lwaJehova lulatugwasya. (2 Kor. 6:1) Lutugwasya kuti ‘tukake bukkale bwakutayoowa Leza azisusi zyanyika.’ (Bala Tito 2:11-14.) Mbutulikupona “muciindi ecino casunu,” tuyooswaana zyiimo zisunka kusyomeka kwesu kuli Jehova. Atupeekezye kuba kuba kubbazu lyakwe nkaambo ‘Jehova Leza wesu nguwe ngutweelede kuyoowa, kumanina milimu akukakatila’!—Dt. 10:20.