1, 2. (a) Bilong wanem em i savetingting long stap long sait bilong Jehova? (b) Yumi bai skelim wanem samting long dispela stadi?

YUMI mas holimpas strong long Jehova. I no gat man i gat olgeta strong, savetingting, na pasin laikim olsem God bilong yumi! Yumi olgeta i laik stap long sait bilong Em. (Sng. 96:4-6) Maski i olsem, sampela wokman bilong Jehova i gat 2-pela tingting long stap long sait bilong em.

² Long dispela stadi, yumi bai skelim eksampel bilong ol man i tok ol i stap long sait bilong Jehova, tasol ol i mekim em i bel hevi. Ol dispela stori i kamapim ol gutpela skul bilong helpim yumi long stap gut long Jehova wanpela tasol.

3. (a) Bilong wanem Jehova i toktok wantaim Kein? (b) God i tokim Kein long mekim wanem?

³ Tingim stori bilong Kein. Em i tok olsem em i lotuim Jehova wanpela tasol. Maski i olsem, God i no orait long wok lotu bilong em. Ol tingting nogut i stap long bel na tingting bilong Kein. (1 Jon 3:12) Jehova i tokim Kein: “Sapos yu mekim gutpela  pasin, orait bai yu amamas, long wanem, mi orait long ofa bilong yu. Tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.” (Stt. 4:6, 7) I olsem Jehova i tokim Kein: “Sapos yu tanim bel na sanap strong long sait bilong mi, mi bai sanap long sait bilong yu.”

4. Jehova i laik helpim Kein long stap long sait bilong em, tasol Kein i mekim wanem?

⁴ Sapos Kein i rausim ol tingting nogut i stap long bel bilong em, Jehova bai orait long em. Tasol Kein i no bihainim tok bilong God. Tingting nogut na pasin bilong tingim laik bilong em yet i kirapim em long mekim sin. (Jems 1:14, 15) Taim Kein i yangpela yet, ating em i no bin ting olsem em bai bikhet long Jehova. Tasol em i mekim samting em i no ting em bai mekim—em i sakim tok bilong God na kilim brata bilong em!

5. Wanem kain ol tingting inap kirapim yumi long mekim sin?

⁵ Olsem Kein, Kristen inap tok olsem em i lotuim Jehova, tasol em i insait long pasin nogut. (Jut 11) Olsem, ating wanpela Kristen i tingting long mekim pasin pamuk, inapim laik bilong em yet, o em i heitim wanpela wanbilip. (1 Jon 2:15-17; 3:15) Ol kain tingting olsem inap kirapim em long mekim sin. Ating dispela Kristen i givim bel long autim tok na go oltaim long ol miting. Ol narapela i no inap lukim tingting na ol pasin hait em i wok long mekim, tasol Jehova i save lukim olgeta samting. Em i save olsem yumi givim bel olgeta long stap long sait bilong em, o nogat.—Ritim Jeremaia 17:9, 10.

6. Olsem wanem Jehova inap helpim yumi long sanap “strong na winim” ol pasin kranki?

⁶ Jehova i no save les kwik long yumi. Taim ol man i insait long ol pasin i no stret, Jehova i tok: “Yupela i lusim pasin nogut na kam bek long mi, mi tu bai mi lusim belhat na kisim bek yupela.” (Mal. 3:7) Jehova i laik bai yumi sakim ol pasin nogut, maski yumi pilim hatwok long daunim ol pasin kranki bilong yumi. (Ais. 55:7) Sapos yumi wok strong long daunim ol pasin kranki, God bai helpim yumi long sait bilong bilip na strongim yumi long sanap “strong na winim” ol pasin kranki.—Stt. 4:7.

7. Solomon i mekim wanem na em i no stap moa olsem pren bilong Jehova?

⁷ Yumi inap kisim planti gutpela skul long stori bilong King Solomon. Taim Solomon i yangpela mangi, em i save lukluk i go long Jehova long kisim ol tok bilong stiaim em. God i givim em gutpela savetingting na tokim em long wokim wanpela naispela tempel long Jerusalem. Tasol Solomon i sakim tok bilong God na em i no stap moa olsem pren bilong em. (1 Kin. 3:12; 11:1, 2) Lo Bilong God i tambuim king bilong ol Hibru long “maritim planti meri, long wanem, ol bai i mekim em i givim baksait long Bikpela.” (Lo 17:17) Tasol Solomon i sakim tok na maritim 700 meri. Na tu, em i gat 300 namba 2 lain meri. (1 Kin. 11:3) Planti bilong ol dispela meri i no bilong lain Israel na ol i save lotuim ol god giaman. Solomon i sakim lo bilong God na i maritim ol meri bilong ol narapela kantri.—Lo 7:3, 4.

8. Solomon i mekim wanem ol pasin nogut tru long ai bilong Jehova?

⁸ Isi isi Solomon i lusim Jehova na bihain em i mekim bikpela rong. Solomon i wokim alta bilong giaman god meri Astarte na narapela alta bilong god giaman Kemos. Em i bihainim ol meri bilong em na ol i lotuim ol god giaman. Solomon i wokim ol dispela alta antap long maunten long hap sankamap bilong Jerusalem, em ples em i bin wokim  tempel bilong Jehova long en! (1 Kin. 11:5-8; 2 Kin. 23:13) Ating Solomon i ting olsem Jehova i no inap tingim pasin bilong em long sakim tok sapos em i wok yet long mekim ol sakrifais long tempel.

9. Solomon i sakim tok bilong God na wanem samting i kamap?

⁹ Jehova i save givim strafe long man i mekim rong. Baibel i tok: “God, Bikpela bilong Israel, i bin kamap tupela taim long Solomon na i tambuim em long lotu long ol giaman god. Tasol Solomon i sakim tok bilong Bikpela na i givim baksait long em. Olsem na Bikpela i kros long Solomon.” God i no orait long Solomon na sambai long em. Ol king i kamap long lain bilong Solomon, ol i no inap bosim lain Israel olsem wanpela lain olgeta, na bikpela hevi i painim ol lain tumbuna i kamap bihain.—1 Kin. 11:9-13.

10. Wanem samting inap bagarapim pasin bilong yumi long stap gut long Jehova?

¹⁰ Olsem Solomon, yumi inap pundaun long sait bilong bilip sapos yumi poromanim ol man i no save rispektim ol lo bilong Jehova. Ating sampela i bung wantaim kongrigesen, tasol ol i slek long sait bilong bilip. Ol narapela em ol wanblut, ol neiba, ol wanwok, na ol wanskul em ol i no lotuim Jehova. Sapos ol poroman bilong yumi i no tingim ol lo bilong Jehova olsem bikpela samting, ol inap bagarapim pasin bilong yumi long stap gut long God.

11. Yumi mas tingim wanem ol samting taim yumi skelim pasin bilong ol lain yumi poromanim?

¹¹ Ritim 1 Korin 15:33. Planti man i save bihainim ol gutpela pasin, na planti husat i no wanbilip i no save insait long ol pasin nogut. Maski sapos ol wanbilip na ol man ausait i save bihainim ol gutpela pasin, yu ting ol inap stap gutpela pren bilong yu? Olsem wanem? Pasin bilong yu long poroman wantaim ol bai strongim pasin pren bilong yu wantaim Jehova? Wanem samting i stap long bel na tingting bilong ol? Olsem, ol i save stori planti long ol bilas, mani, ol fon na teblet samting, ol muvi na musik, o ol narapela samting bilong skin? Olsem wanem? Ol i save mekim ol tok bilong daunim ol narapela o mekim ol tok pilai doti? Jisas i tok: “Maus i save autim ol tingting i pulap long bel.” (Mat. 12:34) Sapos yu luksave olsem ol lain yu save bung wantaim inap bagarapim pasin pren bilong yu wantaim Jehova, orait yu mas lusim ol na no ken bung moa wantaim ol.—Snd. 13:20.

12. (a) Jehova i tok wanem long lain Israel bihain liklik long ol i lusim Isip? (b) Lain Israel i tok wanem taim God i tokim ol long no ken lotuim ol narapela god?

¹² Yumi inap kisim skul long samting i painim lain Israel taim ol i lusim Isip. Ol i go bung long Maunten Sainai na Jehova i  mekim ol samting bilong soim olsem em i stap tru. Bikpela klaut i kamap. Jehova i mekim na tanda, laitning, na smok i kamap. Na tu, ol manmeri i harim wanpela biugel i krai bikpela. (Kis. 19:16-19) Long dispela taim, Jehova i tokim lain Israel olsem ‘em i no inap larim wanpela giaman god i senisim em.’ God i kirapim ol long luksave olsem em bai stap gut long ol sapos ol i laikim em na bihainim ol lo bilong em. (Ritim Kisim Bek 20:1-6.) I olsem Jehova i tokim lain Israel: “Sapos yupela i stap long sait bilong mi, mi bai stap long sait bilong yupela.” Yu bai pilim olsem wanem sapos God Jehova i tok promis long stap gut long yu? Ating yu bai mekim wankain tok em lain Israel i mekim. “Olgeta wantaim i tok olsem, ‘Mipela bai i mekim olgeta samting olsem Bikpela i tok.’” (Kis. 24:3) Bihain liklik, wanpela samting i kamap na i traim pasin bilong ol long i stap gut long God.

13. Wanem samting i kamap na i traim pasin bilong lain Israel long stap gut long God?

¹³ Lain Israel i pret taim ol i lukim blakpela klaut, laitning, na ol narapela sain em God i kamapim. Olsem na ol i askim Moses long kamap mausman bilong ol na toktok wantaim Jehova long Maunten Sainai. (Kis. 20:18-21) Moses i stap antap long maunten inap longpela taim. Ating lain Israel i ting olsem ol bai stap long ples drai na ol i no gat wanpela man bilong lidim ol. I luk olsem lain Israel i save bilip taim ol i lukim Moses. Ol i tingting planti na ol i tokim Aron: “Mipela i no save wanem samting i bin kamap long Moses, dispela man i bin kisim yumi long Isip na bringim yumi i kam. Olsem na yu mas wokim wanpela god bai i go paslain long mipela na bringim mipela long rot.”—Kis. 32:1, 2.

14. (a) Lain Israel i holim wanem tingting kranki? (b) Jehova i pilim olsem wanem taim ol i givim baksait long em?

¹⁴ Lain Israel i save olsem Jehova i heitim tru pasin bilong lotu long ol god giaman. (Kis. 20:3-5) Tasol ol i lotuim bulmakau ol i wokim long gol! Lain Israel i bikhet long Jehova, tasol ol i ting olsem ol i stap yet long sait bilong em. Aron i kolim pasin bilong lotuim bulmakau gol olsem “bikpela kaikai bilong givim biknem long Bikpela”! Jehova i pilim olsem ol i givim baksait long em. Em i tokim Moses olsem lain Israel i “mekim planti pasin nogut” na “lusim rot [Em i] bin tokim ol long bihainim.” Jehova i “belhat tru” na em i tingting long pinisim lain Israel olgeta.—Kis. 32:5-10.

15, 16. Olsem wanem Moses na Aron i soim olsem ol i stap long sait bilong Jehova? (Lukim piksa long kirap bilong stadi.)

¹⁵ Jehova i senisim tingting na em i no pinisim lain Israel. Pasin marimari bilong em i opim rot na ol gutpela wokman bilong em i ken stap long sait bilong em. (Kis. 32:14) Moses i lukim lain Israel i singaut, singsing na danis long ai bilong bulmakau gol, olsem na em i kisim dispela bulmakau gol na kukim long paia. Moses i tok: “Husat man i laik bihainim Bikpela, orait em i mas i kam long mi.” Olsem na “ol man bilong lain Livai i kam sanap klostu long em.”—Kis. 32:17-20, 26.

¹⁶ Aron i helpim lain Israel long wokim bulmakau gol, tasol em i tanim bel na em i bung wantaim ol Livai na stap long sait bilong Jehova. Ol i kamapim klia olsem ol i stap long sait bilong Jehova, na tu, ol i no laik bung wantaim ol man i bikhet long God. Lain Livai i mekim gutpela disisen bikos long dispela de, planti tausen manmeri i lotuim god giaman ol i dai. Jehova i tok promis long blesim ol manmeri i stap long sait bilong em.—Kis. 32:27-29.

17. Taim Pol i stori long bulmakau gol, dispela i skulim yumi long wanem samting?

 ¹⁷ Aposel Pol i stori long lain Israel i bin wokim bulmakau gol na em i tok lukaut olsem: “Ol dispela samting i kamap olsem piksa yumi ken lukim, bai yumi no ken . . . kamap ol manmeri bilong lotuim ol imis olsem sampela bilong ol i bin mekim. . . . Ol man i bin raitim ol dispela stori bilong givim tok lukaut long yumi husat i stap nau long pinis bilong dispela taim. Olsem na man i ting em i sanap strong i stap, em i mas lukaut, nogut em i pundaun.” (1 Kor. 10:6, 7, 11, 12) Pol i kamapim klia olsem ol man i insait long lotu i tru inap mekim ol pasin i no stret. Ol Kristen i pundaun long traim inap ting olsem ol i stap gut yet long ai bilong Jehova. Maski yumi laik stap pren bilong Jehova o yumi tok yumi stap gut long em, dispela i no makim olsem Jehova i orait long yumi.—1 Kor. 10:1-5.

18. (a) Wanem samting inap mekim na yumi lusim Jehova? (b) Wanem samting inap kamap sapos yumi lusim God?

¹⁸ Lain Israel i tingting planti taim Moses i stap antap long Maunten Sainai inap longpela taim. Olsem tasol, de bilong Jehova long kotim ol manmeri na nupela taim i no kamap yet, na dispela i mekim na sampela Kristen inap tingting planti. Yumi inap pilim olsem ol dispela tok promis em ol driman nating tasol, o em samting we i no inap kamap long taim bilong yumi. Sapos yumi no holim stretpela tingting, yumi inap putim ol laik bilong yumi i stap namba 1 na laik bilong Jehova i stap namba 2. Isi isi, yumi inap lusim Jehova na insait long ol pasin nogut em yumi no bin ting yumi bai mekim.

19. Yumi mas tingim wanem bikpela samting? Bilong wanem?

¹⁹ Yumi mas tingim olsem Jehova i laik bai yumi bihainim tok bilong em na lotuim em wanpela tasol. (Kis. 20:5) Sapos yumi givim baksait long Jehova, dispela i makim olsem yumi mekim laik bilong Satan na hevi bai painim yumi. Pol i tok: “Yupela i no inap dring long kap bilong Jehova na long kap bilong ol spirit nogut wantaim. Na yupela i no inap kaikai long ‘tebol bilong Jehova’ na long tebol bilong ol spirit nogut wantaim.”—1 Kor. 10:21.

20. Sapos yumi mekim rong, olsem wanem Jehova inap helpim yumi?

²⁰ Stori bilong Kein, Solomon, na lain Israel long Maunten Sainai i kamapim klia wanpela samting. Rot i op long ol inap “tanim bel na senisim pasin bilong [ol].” (Apo. 3:19) Jehova i no save les kwik long ol man i mekim rong. Aron i tanim bel na Jehova i fogivim em. Long nau, Jehova i givim tok lukaut long yumi long rot bilong Baibel, ol pablikesen, o long rot bilong ol wanbilip. Taim yumi bihainim ol dispela tok lukaut, Jehova bai marimari long yumi.

21. Yumi mas mekim wanem sapos hevi i kamap na traim pasin bilong yumi long stap gut long Jehova?

²¹ I gat risen na Jehova i soim bikpela pasin helpim long yumi. (2 Kor. 6:1) God i laik bai yumi “givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun.” (Ritim Taitus 2:11-14.) “Nau long dispela taim” bilong pinis, yumi bai bungim ol hevi we inap traim pasin bilong yumi long stap gut long Jehova na lotuim em wanpela tasol. Olsem na oltaim yumi mas redi long sanap strong na ‘aninit long God, Bikpela bilong yumi, na lotu long em wanpela tasol. Yumi mas holimpas strong long em’!—Lo 10:20.