1, 2. (a) Ndi ngani u ima na Yehova zwi tshi sumbedza vhuṱali? (b) Ri ḓo haseledza mini kha ino thero?

U IMA na Yehova zwi sumbedza vhuṱali. Mudzimu ndi ene ane a vha na maanḓa, vhuṱali na lufuno u fhira vhathu vhoṱhe! Ndi nnyi a sa ṱoḓi u ima na Yehova? (Ps. 96:4-6) Fhedzi vhaṅwe vhashumeli vha Yehova Mudzimu vho kundelwa u ima nae.

² Kha ino thero, ri ḓo haseledza nga ha tsumbo dza vhathu vhe vha ḓivhudza uri vha ima na Yehova, fhedzi vha tshi ita zwithu zwine a zwi vhenga. Ri nga guda zwithu zwa ndeme kha dzenedzi tsumbo zwine zwa nga ri thusa uri ri dzule ri tshi fulufhedzea kha Yehova nga vhuḓalo.

3. Ndi ngani Yehova o tsivhudza Kaini, nahone Yehova o mu vhudza uri mini?

³ Humbulani nga ha tsumbo ya Kaini. O gwadamela Yehova fhedzi. Fhedzi Mudzimu ho ngo takadzwa nga nḓila ye Kaini a vha a tshi mu gwadamela ngayo. Vhuvhi ho vha vhu tshi vho thoma u sima midzi mbiluni yawe. (1 Yoh. 3:12) Yehova o tsivhudza Kaini a ri: “Nandi? Wá ita zwivhuya, a si hone khofheni hu tshi ḓo tshá  naa? Wa hana zwivhuya, vothini hu dzumbama zwivhi; zwo lalela iwe; iwe-ha U zwi kunde.” (Gen. 4:6, 7) Nga maṅwe maipfi, Yehova o vha a tshi khou vhudza Kaini uri, “Arali na rembuluwa nahone na ima na nṋe, na nṋe ndi ḓo ima na inwi.”

4. Kaini o ita mini musi e na tshibuli tsha u sumbedza uri u ima na Yehova?

⁴ Arali Kaini a vhe o shandula mahumbulele awe, Yehova o vha a tshi ḓo dovha a mu takalela. Fhedzi Kaini ho ngo thetshelesa nyeletshedzo. Mahumbulele o khakheaho na nyemulo mmbi zwo ita uri a ite zwithu zwo khakheaho. (Yak. 1:14, 15) Musi Kaini a tshee muswa, a nga vha a songo vhuya a humbula uri u ḓo shandukela Yehova. Fhedzi nga u ya ha tshifhinga, o ita zwe zwa vha zwi songo lavhelelwa. O shandukela Mudzimu nahone a vhulaya murathu wawe!

5. Ndi mahumbulele afhio ane a nga ita uri ri si tshi takalelwa nga Yehova?

⁵ U fana na Kaini, Mukriste a nga ita zwithu zwo khakheaho naho a tshi vhona u nga u khou shumela Yehova. (Yuda 11) Sa tsumbo, muthu a nga humbula nga ha zwithu zwi songo kunaho, u vha na vhupangwa kana u vhenga Vhakriste ngae. (1 Yoh. 2:15-17; 3:15) Eneo mahumbulele a nga ita uri muthu a ite zwithu zwo khakheaho. Muthu a nga ita zwenezwo zwithu naho a tshi fhisea vhuḓinḓani na u ya miṱanganoni tshifhinga tshoṱhe. Vhaṅwe vhathu vha nga kha ḓi vha vha sa ḓivhi zwine ra zwi humbula na nḓila ine ra ḓifara ngayo, fhedzi Yehova u vhona zwoṱhe. U a ḓivha arali ri sa imi nae nga mbilu yoṱhe.—Vhalani Yeremia 17:9, 10.

6. Yehova uri thusa hani u ‘kunda’ nyemulo mmbi?

⁶ Naho ri tshi ita vhukhakhi, Yehova ha ṱavhanyi u ri fhelela mbilu. Musi muthu e kha vhuimo vhune ha ḓo mu dzhenisa khomboni, Yehova u a mu vhudza uri: “Vhuyelelani ha Nṋe, uri ndi kone u vhuyelela ha inwi.” (Mal. 3:7) Yehova u ṱoḓa ri tshi iledza zwithu zwivhi, zwihuluhulu musi ri tshi lwisana na vhushayanungo. (Yes. 55:7) Arali ra ita zwenezwo, Mudzimu u fulufhedzisa uri u ḓo ri thusa na u ri ṋea nungo dzine ra dzi ṱoḓa uri ri kone u ‘kunda’ nyemulo mmbi.—Gen. 4:7.

7. Ndi mini zwe zwa ita uri Salomo a si tsha vha khonani ya Yehova?

⁷ Ri nga guda zwinzhi kha tsumbo ya Khosi Salomo. Musi Salomo a tshee muswa, o vha a tshi ṱoḓa vhulivhisi kha Yehova. Mudzimu o mu ṋea vhuṱali nahone a mu ṋea mushumo wo khetheaho wa u fhaṱa thembele ya u naka ngei Yerusalema. Fhedzi Salomo ho ngo tsha vha khonani ya Yehova. (1 Dzikh. 3:12; 11:1, 2) Mulayo wa Mudzimu wo amba nga ho livhaho uri Khosi a yo ngo fanela u “dzea vhasadzi vhanzhi, uri mbilu [yayo] i sa ḓo pambuwa.” (Doit. 17:17) Salomo ho ngo thetshelesa nahone o fhedzisela o vhinga vhafumakadzi vha 700 na vhaṅwe vha 300 vha re dziphuli. (1 Dzikh. 11:3) Vhunzhi ha vhafumakadzi vhawe vho vha vhe si Vhaisiraele nahone vha tshi gwadamela midzimu i sili. Salomo o dovha a si thetshelese mulayo wa Mudzimu nga u vhinga vhafumakadzi vha vhatsinda.—Doit. 7:3, 4.

8. Salomo o sinyusa Yehova u swika kha vhuimo vhufhio?

⁸ Nga zwiṱuku nga zwiṱuku, Salomo ho ngo tsha thetshelesa milayo ya Mudzimu nahone zwenezwo zwo ita uri a ṋaṋe u ita zwithu zwo khakheaho. Salomo o fhaṱela aleṱare mudzimu wa tshifanyiso we a vha a tshi pfi Asiterothe na muṅwe mudzimu wa mazwifhi we a vha a tshi pfi Kamosi. O ṱanganela na vhafumakadzi vhawe kha u gwadamela midzimu ya mazwifhi kha dzenedzo aleṱare. O ṋaṋisa zwithu nga u fhaṱa dzenedzo aleṱare nṱha ha thavha ye ya vha yo livhana na Yerusalema he a vha o fhaṱela  hone Yehova thembele! (1 Dzikh. 11:5-8; 2 Dzikh. 23:13) Khamusi Salomo o ḓifhura nga u humbula uri Yehova ha nga iti tshithu nga zwithu zwi si zwavhuḓi zwe a vha tshi khou zwi ita, tenda a bvela phanḓa a tshi ṋekedza zwiṱhavhelo thembeleni.

9. Ho itea mini kha Salomo nge a si thetshelese Mudzimu?

⁹ Yehova ha tsinyi iṱo musi ho itwa vhukhakhi. Bivhili i ri: “Yehova a mbo sinyutshela Salomo nga u’ mbilu yawe ya shandukela Yehova we a vhonana nae’ kavhili, we a mu laya a mu dzivhisa zwenezwi zwe a tevhela midzimu i sili; ene a si tevhedze zwe Yehova a mu laya.” Nga nṱhani ha zwenezwo, Mudzimu o litsha u tikedza Salomo nahone a si tsha mu takalela. Vhana vha Salomo a vho ngo vhusa lushaka lwoṱhe lwa Isiraele nahone vho vha na thaidzo khulu lwa miṅwaha minzhi.—1 Dzikh. 11:9-13.

10. Ndi mini zwine zwa nga vhea vhushaka hashu na Yehova khomboni?

¹⁰ U fana na zwe zwa itea kha Salomo, zwithu zwine zwa nga vhea vhushaka hashu na Yehova khomboni ndi u konana na vhathu vha sa pfesesi kana vhane vha nyadza milayo ya Yehova. Vhaṅwe vha nga vha vha tshi ḓa miṱanganoni, fhedzi vha si na vhushaka ho khwaṱhaho na Mudzimu. Vhaṅwe vha nga vha hu mashaka ashu, vhahura vhashu, vhane ra shuma navho kana vhane ra dzhena navho tshikolo, vhane vha si vhe vhagwadameli vha Yehova. Arali vhathu vhane ra konana navho vha sa tshili u tendelana na milayo ya Mudzimu, nga u ya ha tshifhinga vha nga ita uri ri si tsha vha na vhushaka havhuḓi na Mudzimu.

11. Ndi mini zwine zwa nga ri thusa u ḓivha arali ri tshi fanela u fhelisa vhukonani?

¹¹ Vhalani 1 Vhakorinta 15:33. Vhathu vhanzhi vha na pfaneleo dzavhuḓi. Na vhathu vhanzhi vha sa shumeli Yehova a vha iti zwithu zwo khakheaho tshifhinga tshoṱhe. Arali khonani dzaṋu dzo tou ralo, naa ni nga humbula uri ndi khonani dzavhuḓi? Ḓivhudziseni nga ha nḓila ine vhukonani haṋu na ha vhenevho vhathu ha ḓo kwama ngayo vhushaka haṋu na Yehova. Naa vha ḓo ni thusa uri ni sendele tsini na Yehova? Ndi mini zwine vhenevho vhathu vha zwi dzhia zwi zwa ndeme? Sa tsumbo, naa vha dzula vha tshi khou amba nga ha fesheni, tshelede, zwishumiswa zwa thekinolodzhi, vhuḓimvumvusi kana zwiṅwe zwithu zwi vhonalaho? Naa vha dzula vha tshi khou sasaladza vhaṅwe? Naa vha ita miswaswo nga zwithu zwo bvaho? Yesu o tsivhudza a ri: “Zwo ḓalaho mbiluni ndi zwine mulomo wa amba zwone.” (Mat. 12:34) Arali na ṱhogomela uri honoho vhukonani vhu vhea vhushaka haṋu na Yehova khomboni, fhungudzani tshifhinga tshine na tshi fhedza ni navho nahone arali zwi tshi ṱoḓea fhelisani vhukonani.—Mir. 13:20.

12. (a) Ndi mini zwe Yehova a zwi vhudza Vhaisiraele musi vha tshi kha ḓi tou bva u vhofhololwa Egipita? (b) Vhaisiraele vho ita mini musi Mudzimu a tshi vha vhudza uri u ṱoḓa uri vha mu gwadamele nga u fulufhedzea?

¹² Hu na zwiṅwe zwine ra nga zwi guda kha zwe zwa itea musi Vhaisiraele vha kha ḓi tou bva u vhofhololwa Egipita. Vhathu vho vha vho kuvhangana phanḓa ha Thavha ya Sinai. Yehova o ḓivhonadza khavho nga nḓila yo khetheaho. Ho mbo ḓi vha na gole nga lwa vhuṱolo. Yehova o ita uri hu vhe na mibvumo, dzinḓadzi, vhutsi nahone ha vha na phosho i ngaho lufhalafhala. (Ek. 19:16-19) Vhaisiraele vho pfa Yehova a tshi vha ḓivhadza uri u Mudzimu ane a ṱoḓa u gwadamelwa nga u fulufhedzea na nga mbilu yoṱhe. O vha vhudza uri u ḓo fulufhedzea kha vhane vha mu funa na vhane vha tevhedza milayo yawe. (Vhalani Ekisodo 20:1-6.) Nga maṅwe maipfi, Yehova o vha a tshi khou vhudza vhathu vhawe uri, “Arali na ima na nṋe, na nṋe ndi ḓo ima na inwi.” Arali no vha ni henefho, no vha ni tshi ḓo ḓipfa hani musi ni tshi pfa zwe Yehova Mudzimu a zwi amba? A zwi timatimisi uri no vha ni tshi ḓo ita zwe zwa itwa nga Vhaisiraele. Vho “fhindula vhoṱhe nga ipfi ḽithihi vha ri: Zwoṱhe zwe Yehova a amba ri ḓo zwi ita.” (Ek. 24:3) Fhedzi hu sa athu u fhela na tshifhinga, ho itea zwithu zwi songo lavhelelwaho zwe zwa linga u fulufhedzea ha Vhaisiraele.

13. Ndi vhuimo vhufhio he ha linga u fulufhedzea ha Vhaisiraele?

¹³ Vhaisiraele vho tshuwiswa nga gole, dzinḓadzi na zwiṅwe zwiga zwi bvaho ha Mudzimu. Vho humbela Mushe uri a vhe muambeli wavho. Mushe o ya Thavhani ya Sinai u amba na Yehova. (Ek. 20:18-21) Mushe o fhedza tshifhinga tshilapfu e henengei nṱha ha thavha. Naa Vhaisiraele vho vha vho hanganea ngei sogani nga nṱhani ha uri murangaphanḓa wavho o vha e siho? Zwi vhonala u nga Vhaisiraele vho vha vho ḓitika tshoṱhe nga u vha hone ha Mushe. Vho thoma u vhilaela nahone vha vhudza Aroni vha ri: “Ri itele mudzimu wa u ri ranga phanḓa! Ngauri munna uyu, Mushe, we a ri pfulusa Egipita, a ri ḓivhi zwe a ṱangana nazwo.”—Ek. 32:1, 2.

14. Vhaisiraele vho ḓifhura nga u humbula mini, nahone Yehova o ita mini?

¹⁴ Vhathu vho vha vha tshi zwi ḓivha uri u gwadamela midzimu ya zwifanyiso zwi sinyusa Yehova. (Ek. 20:3-5) Fhedzi nga u bonya ha iṱo vho thoma u gwadamela ṋamana ya musuku! Naho Vhaisiraele vha songo thetshelesa mulayo wa Yehova, vho ḓifhura nga u humbula uri vha kha ḓi ima na Yehova. Ndi ngazwo na Aroni o amba uri u gwadamela havho yeneyo ṋamana ndi “vhuṱambo ha Yehova”! Yehova o ḓipfa hani? O ḓipfa o fheṱiwa. Yehova o vhudza Mushe uri vhathu vho “tshinya” nahone vho “laṱa nḓila ye [a] vha laya.” Yehova o vha o sinyuwa vhukuma lwe a vha a tshi ṱoḓa na u fhelisa lushaka lwoṱhe.—Ek. 32:5-10.

15, 16. Mushe na Aroni vho sumbedza hani uri vha ima na Yehova? (Sedzani tshifanyiso tsha u thoma.)

¹⁵ Yehova o khathutshela Vhaisiraele nahone ho ngo tsha vha fhelisa. Nṱhani hazwo, o vha ṋea tshibuli tsha uri vha sumbedze uri vha ṱoḓa u ima nae. (Ek. 32:14) Musi Mushe a tshi vhona vhathu vha tshi khou ṱavha mukosi, vha tshi khou imba na u tshina phanḓa ha ṋamana ya musuku, o mbo ḓi dzhia yeneyo ṋamana a i kanḓekanya ya sala i luphuse. Nga murahu a vhidzelela a ri: “Vha re vha Yehova nga vha ḓe ngeno.” Vhathu “vhoṱhe vha lushaka lwa Levi” vha ya khae.—Ek. 32:17-20, 26.

¹⁶ Naho Aroni hu ene o itaho ṋamana ya musuku, o rembuluwa nahone a ṱanganela na Vhalevi vhe vha khetha u ima na Yehova. Vhenevho vhathu vha fulufhedzeaho a vho  ngo sumbedza fhedzi uri vha ima na Yehova, fhedzi vho dovha vha sumbedza uri vha khou ḓisendedza kule na vhaitazwivhi. Vhukando he vha vhu dzhia vhu sumbedza vhuṱali; ho fa vhathu vhanzhi ḽeneḽo ḓuvha nge vha gwadamela ṋamana ya musuku. Fhedzi vhe vha ima na Yehova vho fulufhedziswa uri vha ḓo fhaṱutshedzwa.—Ek. 32:27-29.

17. Ri guda mini kha zwe Paulo a zwi amba?

¹⁷ Ri guda mini kha zwenezwi zwithu? Muapostola Paulo o ri: “Zwenezwo zwithu zwo vha tsumbo kha riṋe, uri ri si . . . [rabele] midzimu ya zwifanyiso, u fana na zwe vhaṅwe vhavho vha zwi ita. Zwo ṅwalwa uri zwi ri sevhe riṋe vhane ra khou tshila vhufheloni ha maitele a zwithu. Nga nṱhani ha zwenezwo, ane a humbula uri o ima a ṱhogomele a sa ḓo wa.” (1 Vhakor. 10:6, 7, 11, 12) Samusi Paulo o zwi sumbedza, na vhashumeli vha Mudzimu vha fulufhedzeaho vha nga ita zwithu zwo khakheaho. Vhane vha ita zwithu zwo khakheaho vha nga humbula uri vha kha ḓi takalelwa nga Yehova. Fhedzi u sokou ṱoḓa u vha khonani ya Yehova kana u amba uri u a fulufhedzea khae, a zwi ambi uri Yehova u a u takalela.—1 Vhakor. 10:1-5.

18. Ndi mini zwine zwa nga ri sendedza kule na Yehova, nahone masiandoitwa a hone ndi afhio?

¹⁸ Vhaisiraele vho vhilaela musi Mushe a tshi khou lenga u vhuya Thavhani ya Sinai. Nga hu fanaho, na Vhakriste vha nga vhilaela musi vha tshi vhona u nga vhufhelo vhu khou lenga u ḓa, u katela na shango ḽiswa ḽo fulufhedziswaho. Ri nga thoma u humbula uri vhumatshelo he Yehova a ri fulufhedzisa hone vhu tshee kule kana vhu sokou vha muḽoro zwawo. Arali ra sa ṱhogomela, u humbula nga yeneyo nḓila zwi nga ita uri u ita zwine Yehova a zwi funa zwi si tsha vha zwa ndeme kha riṋe. Nga u ya ha tshifhinga, ri nga ḓisendedza kule na Yehova nahone ra fhedzisela ri tshi khou ita zwithu zwe ra vha ri sa vhuyi ra humbula uri ri nga zwi ita.

19. A ro ngo vhuya ra fanela u hangwa mini, nahone ndi ngani?

¹⁹ Ri songo vhuya ra hangwa uri Yehova u ṱoḓa uri ri mu thetshelese nga mbilu yoṱhe na u mu shumela nga u fulufhedzea. (Ek. 20:5) Arali ri sa iti zwine Yehova a zwi funa, ri ḓo ita zwine Sathane a zwi funa nahone zwenezwo zwi ḓo ri huvhadza. Ndi ngazwo Paulo a tshi ri humbudza uri: “Ni nga si kone u nwa tshinwelo tsha Yehova na tsha madimoni; ni nga si kone u ḽa ‘ṱafulani ḽa Yehova’ na ṱafulani ḽa madimoni.”—1 Vhakor. 10:21.

20. Yehova a nga ri thusa hani naho ro ita vhukhakhi?

²⁰ Mafhungo a re Bivhilini ane a amba nga ha Kaini, Salomo na musi Vhaisiraele vhe Thavhani ya Sinai a a tshimbidzana. Vhenevho vhathu vhoṱhe vho vha vhe na tshibuli tsha u ‘rembuluwa na u shanduka.’ (Mish. 3:19) Zwi tou vha khagala uri Yehova ha ṱavhanyi u fhelela mbilu vhane vha ita zwithu zwo khakheaho. Yehova o hangwela Aroni. Ṋamusi Yehova a nga ri tsivhudza a tshi shumisa mafhungo a re Bivhilini, khandiso dzo thewaho Bivhilini kana Vhakriste nga riṋe. Ri nga vha na vhungoho ha uri Yehova u ḓo ri khathutshela arali ra thetshelesa musi a tshi ri tsivhudza.

21. Ri fanela u ḓiimisela u ita mini musi ri kha vhuimo vhune ha linga u fulufhedzea hashu?

²¹ Yehova u na tshiitisi tsha u ri sumbedza vhuthu hawe vhuhulu. (2 Vhakor. 6:1) Vhu ri ṋea tshibuli tsha “uri ri iledze vhuḓifari ha u sa ofha Mudzimu na nyemulo dza shango.” (Vhalani Tito 2:11-14.) Kha ano maḓuvha a vhufhelo hu ḓo dzula hu na vhuimo vhune ha linga u fulufhedzea hashu kha Yehova. U nga ri ri nga ḓiimisela u dzula ri tshi ima na Yehova nga u fulufhedzea. Ngauri ndi ‘Yehova Mudzimu washu ane ra fanela u mu ofha, u mu shumela na u mu nambatela’!—Doit. 10:20.