1, 2. ა) მუშენ რე გონივრულ იეჰოვაშ მხარეს ვორდათ? ბ) მუს გუვარჩიენთ თე სტატიას?

გონივრულ რე იეჰოვაშ მხარეს ვორდათ, მუშენდა მითინ ვა რე ჩქინ ღორონთცალ ძალიერ, ბრძენ დო მოჸოროფე. მის ვა მაკორინე თეცალ პიროვნებაშ მხარეს გერნა! (ფსალმ. 96:4—6). მარა ღორონთიშ ნამთინე მსახურქ ვედეკინ თიშ მხარე, მუჟამსით თეშ კეთება რდუ საჭირო.

² თე სტატიას გუვარჩიენთ თინეფიშ მაგალითეფს, მით იჩიებუდ, ნამდა იეჰოვაშ მხარეს რდუ, მარა თეწკუმა ართო თიცალ მუდგარენს ორთუდ, მუთ გურს უტახუნდ იეჰოვას. თე შემთხვევეფშე დიბგურუანთ, მუ მიმეხვარებნა იეჰოვაშ ართგურეფქ ქუდოფსკიდათ.

3. მუშენ დო მუჭო გაფრთხილ იეჰოვაქ კაენი?

³ მორთ, გუვარჩუათ კაენიშ შემთხვევა. თინა იეჰოვაშ გარდა შხვა ღორონც ვამსახურუდ, მარა იეჰოვას ვა მოწონდ კაენიშ თაყვანიშცემა, მუშენდა თიშ გურ უბადობათ რდუ ეფშა (1 იოან. 3:12). იეჰოვაქ თინა გაფრთხილ: „ჯგირს გაკეთენქ-და, ქუმოიწონუანქ, მარა ჯგირს ვაგაკეთენქ-და, ცოდა გეიხე დო სკანჸურე მოურს.  გაკონტროლენქო თის?“ (დაბ. 4:6, 7). შხვანერო ქოფთქუათინ, იეჰოვა კაენს ურაგადუდ: „მინანიენქ დო ჩქიმ მხარეს მტკიცაშე ქიგედირთუქ-და, მა ხოლო სკან მხარეს ქიდეპკინენქ“.

4. მუჭო მიქცუ კაენქ, მუჟამსით უღუდ თიშ საშვალება ღორონთიშ მხარეს ქიგედირთკო?

⁴ კაენ მუშ აზროვნებას დოთირანდ-და, ხვალე თე შემთხვევას მიწონუანდჷ იეჰოვა. მარა თიქ ვემირჩქილუ რჩევა. არასწორ ფიქრეფქ დო ეგოისტურ სურვილეფქ თინა გლახა შედეგშა ქიმიჸონ (იაკ. 1:14, 15). შილებე ახალგაზრდობას კაენ შურო ვა ფიქრენდკო, ნამდა იეჰოვაშ წინააღმდეგ მიდეშ. მარა დრო ხანიშ უკულ, თიქ მითინ ვეფიქრენდუნ ფერ მუდგარენ გაკეთ — ღორონთიშ წინააღმდეგ ეჯანყჷ დო მუშ კვიდრ ჯიმა დოჸვილ.

5. მუნერ აზროვნებაქ შილებე მიმოდინაფუან იეჰოვაშ მოწონა?

⁵ კაენცალო, ამდღა ხოლო შილებე პიროვნება იეჰოვას ომსახურდას დო თეწკუმა ართო, გლახა შარას გერდას (იუდ. 11). მაგალთო, შილებე თინა უზნეობაშენ ფიქრენდას, ჰარამობას გიმირჩქინანდას ვარდა თანაქრისტიან ჯოგდას (1 იოან. 2:15—17; 3:15). ვა რე გამორიცხულ, თეცალ აზროვნებაქ პიროვნება ცოდაშა ქიმიჸონას. შილებე თინა აქტიურო მონაწილენდას მსახურებას დო კრებეფს ხოლო ვაჩილითუანდას. მართალ რე, შხვეფ ვარწყენა, მუს ფიფქრენთ დო მუჭო იფქციებუთ, მარა იეჰოვა ორწყე, ქიგვორეთ დო ვარ მთელ გურით თიშ მხარეს (წეკითხით იერემია 17:9, 10). *

6. მუჭო მიმეხვარებნა იეჰოვა, ცოდაქ ვებატონას ჩქინწკუმა, მუჟამსით თიშ მხარეს ქიგებდირთუთ?

⁶ თე ირფელიშ უმკუჯინუო, იეჰოვა ვა ჩქარენს, ვარია ქოთქუას ჩქინდე. მუჟამსით პიროვნება მუშ საქციელით იეჰოვას ეთხიებუნ, ღორონთ ურაგად თის: „დუმართით დო მა ხოლო დუგართუთ“ (მალ. 3:7). იეჰოვას ოკო თიშ მხარეს ქიდოფსკიდათ დო ვადვაჸუნათ გლახა ჩვევეფს, განსაკუთრებულო თიმწკუმა, მუჟამსით ვობრძოლუთ სისუსტეეფს (ეს. 55:7). თაშ ქიმიფქციებუთ-და, ღორონთ ჩქინ მხარეს იჸუაფ დო ქომჩანა სულიერ, ემოციურ დო ფიზიკურ ძალას, ნამდა ცოდაქ ვებატონას ჩქინწკუმა (დაბ. 4:7).

7. მუჭო მიოდინუ სოლომონქ ღორონთწკუმა ჯგირ ურთიერთობა?

⁷ ჩქი ბრელ მუთუნიშ გურაფა შემლებნა მეფე სოლომონიშ მაგალითშე. ახალგაზრდობას სოლომონი იეჰოვაშ ხემძღვანელობას გორუნდჷ. ღორონთიქ თის სიბრძნე ქიმეჩ დო იერუსალიმს დიდებულ ტაძარიშ აშენება ქუდავალ. მარა სოლომონქ მიოდინუ იეჰოვაწკუმა ჯგირ ურთიერთობა (1 მეფ. 3:12; 11:1, 2). ღორონთიშ კანონი განსაკუთრებულო ებრაელ მეფეს აფრთხილენდჷ, „ვამუჸონაფუდკო ბრელ ოსურ, ნამდა ვემეჩირთკო თიშ გურქ“ (კან. 17:17). მარა სოლომონქ ვედემორჩილ თე კანონს დო საბოლათ 700 ოსურ ქიმიჸონ. თეს გეძინელ, თის 300 ხარჭა ხოლო ჸუნდჷ (1 მეფ. 11:3). თიშ ოსურეფიშ უმენტაშ ვა რდეს ებრაელეფ დო ცრუ ღორონთეფს ომსახურდეს. თაშ ნამდა, სოლომონქ ვედემორჩილ ღორონთიშ კანონს, ნამუთ ებრაელ ვარდუნ ფერ ოსურეფიშ მოჸონაფაშ ნებას ვერზენდჷ (კან. 7:3, 4).

8. მუჭო შეცოდ სოლომონქ იეჰოვას?

⁸ მუჭო დრო მიკიშუნ, სოლომონ იეჰოვაშ მოთხოვნეფს ვამორჩილუდ დო საბოლათ დიდ ცოდა ჩედინ. თიქ დიო ქალღმერთ აშთორეთის გუკეთ სამსხვერლო დო უკულ ცრუ ღორონთ ქემოშის. თეგვარო, სოლომონქ მუშ ოსურეფს ქაკათ ცრუ თაყვინიშცემას. თიქ თე სამსხვერპლოეფ აშენ გვალას, ნამუთ პირდაპირ იეჰოვაშ ტაძარს მიოჯინედ იერუსალიმს (1 მეფ. 11:5—8; 2 მეფ. 23:13). შილებე სოლომონ თით იმშვიდენდკო დუც, ნამდა იეჰოვა თოლს დოწკურუნდჷ თიშ დაუმორჩილებლობაშე,  მუშენდა თინა აგრძელენდჷ ტაძარს შესაწირეფიშ კეთებას.

9. მუ შედეგიქ მაჸუნ სოლომონიშ დაუმორჩილებლობას?

⁹ იეჰოვა დღას ვაწკურუნს თოლს გლახა საქციელშე დო ცოდაშე. ბიბლიას ჭარ: „გერისხჷ იეჰოვაქ სოლომონშე, მუშენდა მეშორ თიშ გურქ იეჰოვას . . . ნამუთიქ ჟირშა ოძირ დუდ დო უწუ, ნამდა ვეკაჸუნკო შხვა ღორონთეფს. მარა თიქ ვეშიასრულ იეჰოვაშ ბრძანება“. ათეშენ ღორონთ უკვე ვეწონუანდ სოლომონს დო ვართ ოხვარუდ. სოლომონიშ მეკვირდეეფს მეუდინეს თიშ საშვალებაქ, იმეფესკო მთელ ისრაელს დო ტერიტორიაწკუმა დაკავშირებულ პრობლემეფ წანეფიშ დინახალე აწუხენდეს (1 მეფ. 11:9—13).

10. მუქ შილებე გამფუჭან იეჰოვაწკუმა ურთიერთობა?

¹⁰ მუჭოთ სოლომონიშ შემთხვევაშე ბძირითინ, ართ-ართ საფრთხე, ნამუთ ჩქინ სულიერობას ოცილუნ, რე თინეფწკუმა მეგობრობა, მიდგას ვარჩქილე ვარდა ვაფასენს იეჰოვაშ კანონეფს. შილებე თინეფ იეჰოვას ომსახურდან მარა სულიერო მოსუსტებულ რდან. შხვეფ შილებე ჩქინ ნათესეფ, მეზობელეფ, თანამშრომლეფ ვარდა კლასელეფ რდან, მარა იეჰოვაშ მოწმეეფ ვარდან. მუჭოდგა ვარდასინ, თინეფწკუმა ხოლოშიან ურთიერთობაქ, მიდგა იეჰოვაშ კანონეფს ვაფასენსინ, დრო ხანიშ უკულ შილებე იეჰოვაწკუმა ურთიერთობა გამფუჭან.

11. მუ მიმეხვარებნა თიშ გაგებას, მივოტუათ დო ვარ ნამთინე პიროვნებაწკუმა ურთიერთობა?

¹¹ წეკითხით 1 კორინთელები 15:33. * ამდღა ბრელს, მით იეჰოვაშ მოწმე ვა რენ, ჯგირ თვისებეფ უღჷ დო გლახას ხოლო მუთუნს ვართ. მარა შილებენო ქითქუას, ნამდა თინეფ ჯგირ მეგობრეფ რენა? ქოკითხით თქვან დუც: დუგაახლოვენსო იეჰოვას თინეფწკუმა მეგობრობა? მუ რე სინამდვილეს მნიშვნელოვან თინეფშო? ირიათო მიკაქუნალ, ფარა, გართობა დო მატერიალურ ნივთეფშე ხომ ვარაგადანა? ხშირას ხომ ვაკრიტიკენა შხვეფს ვარდა ხომ ვამოწონა უხამს ანეკდოტეფიშ რაგად? იესოქ თქუ: „პიჯი გურშა ინოშაყარელს იჩიებ“ (მათ. 12:34). შეზღუდით ვარდა გვალო მიოტეთ თიცალ კათაწკუმა მეგობრაბა, მით გოცილნა იეჰოვაწკუმა ურთიერთობას (იგავ. 13:20).

12. ა) მუქ მოხვად ისრაელეფიშ ეგვიპტეშ მონობაშე გათავისუფლებაშ უკულ? ბ) მუჭო უპასუხეს ისრაელეფქ ღორონთიშ მოთხოვნას, ქოჸოფედესკო თიშ ართგურ?

¹² ჩქი ისრაელეფიშ თი შემთხვევაშე ხოლო ბგურაფლენთ, მუჟამსით იეჰოვაქ თინეფ ეგვიპტეშ მონობაშე გათავისუფალ. ხალხიქ სინაშ გვალაშ წოხოლე ეკიშაყარ დო იეჰოვაქ გეგმეცხად თინეფს. ქიდიჭყჷ გურგინ დო ვალქ, გვალა უჩა მუნაფაქ  დოფორ დო საყვირიშ ძლიერ ხონარქ გორჩქინდ (გამ. 19:16—19). თე შემთხვევას იეჰოვაქ ისრაელეფს გეგმეცხად დო მუშ დუდ გაჩინებაფუ თიცალ პიროვნებათ, ნამუთ განსაკუთრებულ ართგურობას ითხინს. თიქ დარწმუნ ისრაელეფ, ნამდა თინეფიშ ართგურ იჸუაფუდ, მუჟამსით ქიჸოროფუანდეს თის დო ქიდეცვენდეს თიშ მცნებეფს (წეკითხით გამოსვლა 20:1—6). * ფაქტიურო იეჰოვაქ მუშ ხალხის უწუ: „ჩქიმ მხარეს ქიდეკინენთ-და, მა ხოლო თქვან მხარეს იპჸიქ“. თქვა მუჭო უპასუხენდით იეჰოვა ღორონთშე თეცალ დაპირებას? ალბათ ისრაელეფცალო მიქციებდით. თინეფქ იეჰოვას უპასუხეს: „იეჰოვაშ არძა სიტყვას შევასრულენთ“ (გამ. 24:3). მარა ჭიჭე ხანშა თიცალ მუდგარენქ ქუმოხვად, მუდგაქ გეგმოცად ისრაელეფიშ ართგურობა.

13. მუჭო გიმიცად ისრაელეფიშ ართგურობაქ?

¹³ ისრაელეფს აშკურნეს უჩა მუნაფაშა, გურგინ დო ვალშა დო შხვა სარკო ნიშნეფშა, ნამუთ ღორონთიქ ოძირ. ათეშენ მოსეს თხუეს, ღორონთშა თის დურაგადუაფუდკო სინაშ გვალას (გამ. 20:18—21). მოსექ თექ დიდ ხანს ქუდოსკიდ. ართ უცბას თეშ იძირედ, ნამდა ისრაელეფ უდაბნოს ხემძღვანელიშ გარეშე ქუდოსკიდეს. სინამდვილეს ისრაელეფ მანგარო რდეს დამოკიდებულ მუნეფიშ წინამძღოლ მოსეშა. თინეფქ მანგარო შეწუხეს დო აარონს უწუეს: „გამკეთით ღორონთ, ნამუთ ქეწმაჸუნუნა, მუშენდა ვამჩქუნა, მუქ აღოლ თე მოსეს, ნამუთიქ ეგვიპტეშე გიშამიჸონეს“ (გამ. 32:1, 2).

14. მუჭო იღორენდეს ისრაელეფ დუც დო მუნერ რეაქცია უღუდ იეჰოვას თინეფიშ საქციელშენ?

¹⁴ ხალხის უჩქუდ, ნამდა კერპეფიშ თაყვანიშცემა დიდ ცოდა რდუ (გამ. 20:3—5). მარა ჭიჭე ხანშა თინეფქ ოქროშ გინს ქუდუჭყეს თაყვანისცემა. თეცალ ურჩობაშ უმკუჯინუო, ისრაელეფ დუც იღორენდეს დო ფიქრენდეს, ნამდა იეჰოვა თინეფიშ მხარეს რდუ. აარონქ გინიშ თაყვანიშცემაშ გურშენ თქუ, ნამდა „იეჰოვაშ დღახუ“ რენია. მუჭო მიქცუ იეჰოვაქ? თიქ მოსეს უწუ, ნამდა ხალხ გლახათ იქციებუდ დო გეგნურთეს შარას, ნამდგათ ოკო გილართესკო. იეჰოვაქ თიშმანწარას გერისხ, ნამდა მთელ ისრაელიშ განადგურება მინდომ (გამ. 32:5—10).

15, 16. მუჭო ოძირეს მოსე დო აარონქ, ნამდა იეჰოვაშ მხარეს რდეს? (ქოძირით სურათ მა-17 გვერდის).

¹⁵ მარა იეჰოვაქ გეგნოჭყვიდ, ვა გუნადგურებუდკო ისრაელეფ. ღორონთიშ თეცალ ჭყოლოფაქ საშვალება ქიმეჩ თიშ ართგურ მსახურეფს, ქუდუკინეფდესკო თიშ მხარე (გამ. 32:14). მუჟამსით მოსექ ქოძირ, ნამდა ხალხ კერპის უბირდ დო უსხაპუნდუნ, თიქ თინეფიშ ოქროშ გინ მტვერო გინაშქვჷ. თეშ უკულ მოსექ ხონარმაღალო თქუ: „მით იეჰოვაშ მხარეს გერეთინ, ჩქიმდა ქუმორთით!“. არძა ლევიანქ მოსეშ მხარეშა გინილ (გამ. 32:17—20, 26).

¹⁶ მართალ რე, ოქროშ კერპი აარონქ უკეთ ისრაელეფს, მარა უკულ მინანუ დო ლევიანეფცალო იეჰოვაშ მხარე ქიდეკინ. თექ ჯგირო ქიძირ, მუჟამსით თე ართგურ კათაქ ქიმიოტუეს უბადოშ მაკეთებელეფ. თენა მართალო გონივრულ გადაწყვეტილება რდუ, მუშენდა თიმ დღას ანთასობით კოჩიქ მიოდინუ სიცოცხლე კერპთაყვანიშცემაშ გურშენ. თეშ გინაწონს, იეჰოვაშ მხარე დეკინესინ თინეფს კურთხევა ელუდ (გამ. 32:27—29).

17. მუს ბგურაფლენთ პავლეშ სიტყვეფშე, ნამუთ თიქ ოქროშ გინიშ გურშენ თქუ?

¹⁷ მოციქულ პავლექ მიშინუ ოქროშ გინიშ შემთხვევა დო თქუ: „თენა ჩქინო გაკვეთილ რე, მუშენდა . . . კერპეფიშ თაყვანიშცემა  ვედიპჭყათ, ნამთინეცალო. [თე მაგალითეფქ] ჩქინ გაფრთხილებერო იჭარ, მიდგას ქვეყინიერებაშ აღსასრულქ მუმანჭეს. ათეშენ, მით ფიქრენს, გერენ, კურცხას რდას, ნამდა ვა დანთხას“ (1 კორ. 10:6, 7, 11, 12). მუჭოთ პავლექ თქუნ, ჭეშმარიტ თაყვანიშმცემელეფქ ხოლო შილებე არასწორო მიქცუან. თინეფ, მით ცდუნებას დოჸუნან, ფიქრენა, ნამდა ღორონთიშ თოლს იშენით ჯგირ სახელ უღნა. შილებე იეჰოვაწკუმა მეგობრობაშ სურვილ მიღნა დო იფჩიებუთ, ნამდა თიშ ართგურ ვორეთ. მარა იეჰოვაშ მოწონება მიბღათინ, ხვალე თენა ვა რე დასაბაღ (1 კორ. 10:1—5).

18. მუჭო შილებე ღორონც დევეთხუათ დო მუ შედეგეფ მაჸუნუ თეს?

¹⁸ ისრაელეფქ შეწუხეს, მუჟამსით მოსეს სინაშ გვალაშე გიმულაქ დეგვიან. თეგვარო, ქრისტიანეფქ ხოლო შილებე შეწუხან თიშე ფიქრით, ნამდა იეჰოვას სასამართლოშ დღა დო ახალ ქვეყნიერება იგვიანუანს. შილებე ფიფქრენდათ, ნამდა თე დუნაპირებ ხოლო ბრელ ხანს ვეშისრულებ, ვარდა თენა ოცნება რე. თეცალ აზროვნებას დროულო ვემკვოჯინეთ-და, შილებე იეჰოვაშ ნებაშ შესრულებაშ მანგიორო ხორციელ სურვილეფიშ შესრულებაშა გინიბლათ. კურცხას ვეპჸუაფუთ-და, დრო ხანიშ მიკულაწკუმა ართო შილებე ღორონც დევეთხუათ დო თიცალ მუდგარენ გუვაკეთათ, ნამუსით მუთუნფერო ვა ვაკეთენთინ თი დროს, მუჟამსით სულიერო ჯგირო ვორდით.

19. მუქ ოკო ვაგმოჭყორდან დო მუშენ?

¹⁹ დღას ვაგმოჭყორდან, ნამდა იეჰოვა ჩქინდე მთელ გურით მორჩილებას დო ართგურობას ითხინს (გამ. 20:5). ღორონთიშ ნორმეფშე აკაფცხა გინორთაფა ნიშნენს, ნამდა სატანაშ ნებას ვასრულენთ, მუდგას გლახა შედეგეფ მაჸუნუ. პავლე გუმოშინანა: «შეოილებერ ვა რე, იეჰოვაშ სასმისშე ხოლო შუნდათ დო ქოთ დემონეფიშ სასმისშე. შეიოლებერ ვა რე „იეჰოვაშ სუფრაშე“ ხოლო ჭკუმუნდათ დო დემონეფიშ სუფრაშე ხოლო» (1 კორ. 10:21).

20. მუჭო მოხვარნა იეჰოვა თიშ უმკუჯინუო, ნამდა შილებე არასწორ ნაბიჯ გეგნობდგათ?

²⁰ კაენიშ, სოლომონიშ დო ისრაელეფიშ მაგალითეფშე, მუჟამსით თინეფქ სინაშ გვალაწკუმა დაშესინ, ართ მუდგარენს ბგურაფლენთ. არძას უღუდ თიშ საშვალება მუნანიებდესკო დო დუთირდესკო მუნეფიშ საქციელ (საქ. 3:19). არგამათ იძირე, ნამდა იეჰოვა ხეთეშე ვეჩიებ ვარიას თი კათაშე, მით არასწორ ნაბიჯის გინმოდგუნს. აარონიშ შემთხვევას იეჰოვაქ ქაპატუ თის. ამდღა ხოლო ღორონთიქ შილებე გუმაფრთხილან ბიბლიაშ, პუბლიკაციეფიშ ვარდა თანაქრისტიანიშ საშვალებათ. მუჟამსით თეცალ გაფრთხილებეფს ბღებულენთინ, ვორწყეთ მუჭო გიმირჩქინანს იეჰოვა ჭყოლოფას.

21. მუ ოკო მაფდან გინოჭყვიდილ, მუჟამსით იეჰოვაწკუმა ჩქინ ართგურობა გიმიცადებუ?

²¹ იეჰოვაშ გიმორჩქინელ ჭყოლოფას მუშ მიზან უღჷ (2 კორ. 6:1). თენა მარზენა თიშ საშვალებას, „ვარია ქოფთქუათ უღორონთობაშე დო ქვეყნიურ სურვილეფშე“ (წეკითხით ტიტე 2:11—14). * ამდღანერ ქვეყნიერებას შეფხვადუთ თიცალ სიტუაციეფს, სოდეთ ღორონთწკუმა ჩქინ ართგურობა გიმიცადებ. მორთ, ირიათო მზად ვორდათ, ნამდა მტკიცაშე ქიდეპკინათ ღორონთიშ მხარე, მუშენდა ბიბლია მირაგადნა: „გოშქურდას იეჰოვაშ, სქან ღორონთიშ, თის ემსახურ დო თიწკუმა რდა ხოლოს; თიშ სახელით დიფუჩე“ (კან. 10:20).