“边个拥护耶和华？”
“要敬畏耶和华你嘅上帝，事奉佢，忠于佢”——申命记10:20
1,2．（甲）点解拥护耶和华系明智之举？（乙）呢篇课文会讨论乜嘢？
紧紧依附耶和华系明智之举。喺力量、智慧、爱心方面，世上冇任何个体比得上我哋嘅上帝！我哋好想忠于佢，拥护佢。（诗篇96:4-6）不过，有啲崇拜上帝嘅人并冇真正拥护耶和华。
2 有啲圣经人物声称自己拥护耶和华，但同时又得罪佢。呢篇课文会讨论呢啲人嘅事例。我哋从中可以学到好重要嘅教训，帮助我哋继续全心忠于耶和华。
耶和华察验人心
3．点解耶和华想帮助该隐？佢同该隐讲咗乜嘢？
3 请睇吓该隐嘅例子。虽然该隐冇崇拜任何假神，不过耶和华并冇接受佢嘅崇拜。点解呢？耶和华留意到，该隐嘅内心正不断滋长邪恶嘅念头。（约翰一书3:12）于是，耶和华提醒该隐话：“你如果去行善，唔系可以受显扬咩？但系你如果唔去行善，罪就埋伏喺门口，要趁机捉住你。你能够制伏罪咩？”（创世记4:6,7）耶和华系想该隐清楚明白，如果佢听从耶和华，愿意悔改，耶和华就会帮助佢。
4．该隐本来可以选择拥护耶和华，但系佢最终点做？
4 只要该隐调整自己嘅谂法，耶和华就会重新接纳佢。但系，该隐冇听从耶和华嘅劝告。错误嘅谂法同自私嘅欲望使佢采取错误嘅行动。（雅各书1:14,15）该隐起初可能冇谂过要对抗耶和华，不过佢居然无视上帝嘅警告，最终反叛上帝并杀死自己嘅弟弟！
5．乜嘢错误嘅谂法会导致我哋失去耶和华嘅悦纳？
5 今日，一个崇拜耶和华嘅基督徒都可能会好似该隐噉踏上歧途。（犹大书11）例如，一个基督徒积极参与传道工作，亦都经常参加聚会。不过同时，佢可能会任由不道德嘅幻想、贪婪嘅精神或者对其他人嘅怨恨喺内心不断滋长。（约翰一书2:15-17；3:15）最终，呢啲错误嘅谂法会使佢犯下严重嘅罪。所以，就算其他人唔知道我哋嘅思想同行为，耶和华都能够洞悉一切，知道我哋系咪全心拥护佢。（请读耶利米书17:9,10）
6．如果我哋坚决拥护耶和华，佢就会点样帮助我哋“制伏”错误嘅欲望？
6 即使我哋开始偏离正道，耶和华都唔会马上放弃我哋。佢会提醒我哋：“你哋要回头归向我，我就必定回头眷顾你哋”。（玛拉基书3:7）耶和华知道我哋要同自身嘅弱点斗争，佢希望我哋离弃恶事。（以赛亚书55:7）如果我哋噉样做，耶和华就会帮助我哋。无论喺属灵、感情抑或身体上，佢都会赐我哋所需嘅力量去“制伏”错误嘅欲望。（创世记4:7）
“唔好受迷惑”
7．所罗门点样失去耶和华嘅悦纳？
7 我哋能够从所罗门身上学到好多。所罗门喺年轻嘅时候，同耶和华有亲密嘅关系。上帝赐俾佢非凡嘅智慧，并委任佢喺耶路撒冷建造一座宏伟嘅圣殿。但系所罗门最终失去耶和华嘅悦纳。（列王纪上3:12；11:1,2）上帝嘅律法明文规定，以色列君王唔可以“为自己多立妃嫔，免得［佢］心里偏离正道”。（申命记17:17）所罗门冇服从律法，结果娶咗700个妻子，300个妃嫔。（列王纪上11:3）所罗门亦都违反咗另一条律法，就系以色列人唔可以娶外邦女子为妻。所罗门有好多妻子都唔系以色列人，佢哋都崇拜假神。（申命记7:3,4）
8．所罗门得罪耶和华到乜嘢程度？
8 所罗门逐渐偏离耶和华对佢嘅要求，最终犯下严重嘅罪。所罗门为假神，例如亚斯他禄同基抹，建造祭坛。佢同妻子用呢啲祭坛向异教嘅神献祭。耶路撒冷系耶和华圣殿所在之地，而所罗门偏偏要喺耶路撒冷前嘅一座山上建造呢啲祭坛。（列王纪上11:5-8；列王纪下23:13）所罗门可能自己呃自己，喺心入面谂：“只要我继续喺耶和华嘅圣殿献祭，耶和华就唔会介意我噉做。”
9．所罗门冇听从上帝嘅警告，导致乜嘢恶果？
9 耶和华绝对唔会对恶事只眼开只眼闭。圣经话：“耶和华向所罗门发怒，因为佢嘅心偏离咗曾经两次向佢显现嘅以色列上帝耶和华。上帝曾经就呢件事吩咐佢唔好跟从其他神，但佢冇遵守耶和华嘅命令。”结果，所罗门失去上帝嘅悦纳同支持。所罗门嘅后代唔能够统治整个以色列国族，喺之后嘅日子佢哋都要面对好多难题。（列王纪上11:9-13）
10．同边啲人来往会破坏我哋同上帝嘅关系？
10 我哋从所罗门嘅教训学到，如果同嗰啲唔认识或者唔尊重耶和华标准嘅人交往，就会严重威胁到自己嘅灵性。无论系会众入面灵性软弱嘅人，抑或系我哋不信嘅亲人、邻居、同事或者同学，如果我哋同佢哋密切来往，就会深受影响，最终破坏我哋同上帝嘅关系。
你嘅交往点样影响你同耶和华嘅关系？（请睇第11段）
11．我哋选择朋友嘅时候，可以谂吓边啲问题？
11 请读哥林多前书15:33。一般嚟讲，每个人都有某啲美好嘅特质，而一个人就算唔信上帝都唔一定会做坏事。噉我哋系咪可以认为，同呢啲人亲密来往都冇咩问题？我哋应该谂吓，同佢哋做朋友会对我哋同耶和华嘅关系有乜嘢影响。我哋可以问吓自己：“佢哋会唔会帮助我同耶和华有更亲密嘅关系？佢哋最关心嘅系乜嘢？例如，佢哋嘅话题系咪几乎都围绕住衣着打扮、金钱、电子产品、娱乐消遣或者其他物质上嘅追求？佢哋系咪经常讲人坏话？系咪好钟意讲一啲色情笑话？”耶稣话：“心所充满嘅，口就讲出嚟。”（马太福音12:34）如果我哋意识到，同呢啲人来往会影响自己同耶和华嘅关系，噉就要尽快减少来往，甚至终止同佢哋嘅友谊。（箴言13:20）
耶和华系要求专一爱戴嘅上帝
12．（甲）以色列人离开埃及之后冇几耐，耶和华同佢哋讲咗乜嘢？（乙）上帝要求以色列人忠于佢嘅时候，以色列人点样回应？
12 我哋可以从以色列人离开埃及之后冇几耐所发生嘅事学到其他教训。当时，耶和华向聚集喺西奈山下嘅民众显示佢嘅临在，场面震撼惊人。民众睇见乌云盖顶，雷电交加，浓烟滚滚，仲听到持续不断、好似号角噉嘅响声。（出埃及记19:16-19）呢阵时，耶和华向以色列人表明，佢“系要求专一爱戴嘅上帝”，亦都向佢哋保证，佢会忠贞对待嗰啲爱佢，而且遵守佢诫命嘅人。（请读出埃及记20:1-6）耶和华想以色列人知道，如果佢哋拥护佢，佢就会支持佢哋。你会点样回应耶和华上帝呢个忠贞嘅承诺？你嘅回答好可能同以色列人嘅一样。佢哋“同声回答话：‘凡耶和华吩咐嘅话，我哋都乐意遵行。’”（出埃及记24:3）不过冇几耐之后发生嘅事，就使以色列人嘅忠贞受到考验。
13．乜嘢情况使以色列人嘅忠贞受到考验？
13 以色列人对乌云、雷电同其他显示上帝力量嘅神迹感到恐惧。摩西就应民众要求，上西奈山见耶和华，为民众发言。（出埃及记20:18-21）摩西喺山上逗留咗好长时间。而家冇咗摩西喺身边，民众点做呢？睇嚟佢哋因为太过倚赖摩西，就变得忧虑不安，于是对亚伦讲：“为我哋造个神像喺我哋前面引路喇，因为嗰个摩西，就系带我哋出埃及嘅人，我哋根本唔知道佢遭遇咗乜嘢事。”（出埃及记32:1,2）
14．以色列人点样欺骗自己？耶和华有乜嘢反应？
14 民众知道，崇拜偶像会大大得罪耶和华。（出埃及记20:3-5）不过佢哋好快就开始崇拜一个金牛犊像！以色列人明知噉样做就系违背上帝嘅吩咐，但佢哋仲系欺骗自己，以为自己拥护紧耶和华。亚伦居然仲话崇拜金牛犊系庆祝“耶和华嘅节日”！耶和华有乜嘢反应？耶和华“发怒”，话“民众已经败坏”，“偏离［佢］吩咐佢哋嘅当行之道”，佢甚至同摩西讲，想消灭整个以色列国族。（出埃及记32:5-10）
15,16．摩西同亚伦点样表明佢哋坚决拥护耶和华？（请睇吓课文开头嘅图片）
15 不过耶和华系仁慈嘅上帝，佢冇毁灭以色列人，而系俾机会佢哋表明自己忠于佢。（出埃及记32:14）摩西见到民众喺金牛犊前又唱又跳、呼喊狂欢，就勃然大怒，将个像碎成粉末。佢跟住宣布话：“边个拥护耶和华？边个就嚟我呢度！”结果，“利未子孙都聚集到佢嗰度”。（出埃及记32:17-20,26）
16 虽然亚伦有份造个金牛犊像，不过佢愿意悔改，同其他利未人一齐拥护耶和华。呢啲忠贞嘅人唔单止拥护耶和华，亦都同犯罪嘅人划清界线。呢个真系明智之举，因为就喺嗰日，几千人因为崇拜偶像而失去生命。耶和华应许会赐福俾呢啲拥护佢嘅人。（出埃及记32:27-29）
17．保罗用金牛犊嘅事例提醒我哋乜嘢？
17 使徒保罗用金牛犊嘅事例提醒基督徒同工话：“呢啲事就成为我哋嘅鉴戒，要我哋……唔好拜偶像，好似佢哋有啲人拜偶像，……警戒我哋呢啲到咗呢个制度终结嘅人。所以，自以为企得稳嘅就要小心，以免跌倒。”（哥林多前书10:6,7,11,12）正如保罗指出嘅一样，就算崇拜上帝嘅人都可能会做出一啲耶和华憎恨嘅事。佢哋做错事嗰阵，可能以为自己同耶和华仲系有良好嘅关系。不过，一个人只系想成为耶和华嘅朋友，或者只系声称忠于上帝，唔代表佢一定得蒙上帝悦纳。（哥林多前书10:1-5）
18．乜嘢会使我哋渐渐同耶和华疏远？最终会点？
18 以色列人见摩西迟迟未从西奈山落嚟，就感到忧虑不安。同样，如果耶和华审判嘅大日子同将临嘅新世界冇我哋想象中咁快嚟到，我哋可能会感到焦虑。可能我哋会觉得，呢啲应许睇嚟好耐都唔会实现，或者听起嚟好到令人难以置信。如果我哋冇调整自己嘅谂法，就会将物质追求睇得比耶和华嘅旨意更重要。噉样，我哋就会渐渐同耶和华疏远，最终会做出一啲自己都冇谂过会做嘅事。
19．我哋要谨记乜嘢？点解？
19 我哋要谨记，耶和华要求我哋全心服从同专一爱戴佢。（出埃及记20:5）撒但好希望我哋离弃耶和华。所以，保罗提醒我哋话：“你哋唔可以攞耶和华嘅杯饮，又攞邪灵嘅杯饮；唔可以喺‘耶和华嘅宴席’上食，又喺邪灵嘅宴席上食。”（哥林多前书10:21）
紧紧依附耶和华！
20．耶和华会点样帮助犯错嘅人？
20 圣经关于该隐、所罗门以及以色列人喺西奈山嘅记载都有一个值得留意嘅共通点。佢哋都有机会“悔改、回头”。（使徒行传3:19）好明显，耶和华唔会即刻放弃嗰啲犯错嘅人。亚伦虽然犯错，但系都得到耶和华嘅宽恕。今日，耶和华嘅警告可能嚟自圣经、圣经出版物或者一个基督徒同工嘅仁慈劝告。如果我哋犯错之后听从呢啲警告，就可以确信耶和华会向我哋表现慈悲。
21．当我哋对上帝嘅忠贞受到考验嘅时候，我哋要下定决心点样做？
21 耶和华怀住美好嘅目的向我哋表现分外恩典。（哥林多后书6:1）佢俾机会我哋“摒弃唔敬虔嘅心同世俗嘅欲望”。（请读提多书2:11-14）只要我哋生活喺呢个“现行嘅制度”，对耶和华嘅忠贞就会受到考验。愿我哋下定决心，全心拥护耶和华上帝，谨记“要敬畏耶和华［我哋］嘅上帝，事奉佢，忠于佢”！（申命记10:20）
