“邊個擁護耶和華？”
“要敬畏耶和華你嘅上帝，事奉佢，忠於佢”——申命記10:20
1,2．（甲）點解擁護耶和華係明智之舉？（乙）呢篇課文會討論乜嘢？
緊緊依附耶和華係明智之舉。喺力量、智慧、愛心方面，世上冇任何個體比得上我哋嘅上帝！我哋好想忠於佢，擁護佢。（詩篇96:4-6）不過，有啲崇拜上帝嘅人並冇真正擁護耶和華。
2 有啲聖經人物聲稱自己擁護耶和華，但同時又得罪佢。呢篇課文會討論呢啲人嘅事例。我哋從中可以學到好重要嘅教訓，幫助我哋繼續全心忠於耶和華。
耶和華察驗人心
3．點解耶和華想幫助該隱？佢同該隱講咗乜嘢？
3 請睇吓該隱嘅例子。雖然該隱冇崇拜任何假神，不過耶和華並冇接受佢嘅崇拜。點解呢？耶和華留意到，該隱嘅内心正不斷滋長邪惡嘅念頭。（約翰一書3:12）於是，耶和華提醒該隱話：“你如果去行善，唔係可以受顯揚咩？但係你如果唔去行善，罪就埋伏喺門口，要趁機捉住你。你能够制伏罪咩？”（創世記4:6,7）耶和華係想該隱清楚明白，如果佢聽從耶和華，願意悔改，耶和華就會幫助佢。
4．該隱本來可以選擇擁護耶和華，但係佢最終點做？
4 只要該隱調整自己嘅諗法，耶和華就會重新接納佢。但係，該隱冇聽從耶和華嘅勸告。錯誤嘅諗法同自私嘅慾望使佢採取錯誤嘅行動。（雅各書1:14,15）該隱起初可能冇諗過要對抗耶和華，不過佢居然無視上帝嘅警告，最終反叛上帝並殺死自己嘅弟弟！
5．乜嘢錯誤嘅諗法會導致我哋失去耶和華嘅悦納？
5 今日，一個崇拜耶和華嘅基督徒都可能會好似該隱噉踏上歧途。（猶大書11）例如，一個基督徒積極參與傳道工作，亦都經常參加聚會。不過同時，佢可能會任由不道德嘅幻想、貪婪嘅精神或者對其他人嘅怨恨喺内心不斷滋長。（約翰一書2:15-17；3:15）最終，呢啲錯誤嘅諗法會使佢犯下嚴重嘅罪。所以，就算其他人唔知道我哋嘅思想同行為，耶和華都能够洞悉一切，知道我哋係咪全心擁護佢。（請讀耶利米書17:9,10）
6．如果我哋堅決擁護耶和華，佢就會點樣幫助我哋“制伏”錯誤嘅慾望？
6 即使我哋開始偏離正道，耶和華都唔會馬上放棄我哋。佢會提醒我哋：“你哋要回頭歸向我，我就必定回頭眷顧你哋”。（瑪拉基書3:7）耶和華知道我哋要同自身嘅弱點鬥爭，佢希望我哋離棄惡事。（以賽亞書55:7）如果我哋噉樣做，耶和華就會幫助我哋。無論喺屬靈、感情抑或身體上，佢都會賜我哋所需嘅力量去“制伏”錯誤嘅慾望。（創世記4:7）
“唔好受迷惑”
7．所羅門點樣失去耶和華嘅悦納？
7 我哋能够從所羅門身上學到好多。所羅門喺年輕嘅時候，同耶和華有親密嘅關係。上帝賜俾佢非凡嘅智慧，並委任佢喺耶路撒冷建造一座宏偉嘅聖殿。但係所羅門最終失去耶和華嘅悦納。（列王紀上3:12；11:1,2）上帝嘅律法明文規定，以色列君王唔可以“為自己多立妃嬪，免得［佢］心裏偏離正道”。（申命記17:17）所羅門冇服從律法，結果娶咗700個妻子，300個妃嬪。（列王紀上11:3）所羅門亦都違反咗另一條律法，就係以色列人唔可以娶外邦女子為妻。所羅門有好多妻子都唔係以色列人，佢哋都崇拜假神。（申命記7:3,4）
8．所羅門得罪耶和華到乜嘢程度？
8 所羅門逐漸偏離耶和華對佢嘅要求，最終犯下嚴重嘅罪。所羅門為假神，例如亞斯他祿同基抹，建造祭壇。佢同妻子用呢啲祭壇向異教嘅神獻祭。耶路撒冷係耶和華聖殿所在之地，而所羅門偏偏要喺耶路撒冷前嘅一座山上建造呢啲祭壇。（列王紀上11:5-8；列王紀下23:13）所羅門可能自己呃自己，喺心入面諗：“只要我繼續喺耶和華嘅聖殿獻祭，耶和華就唔會介意我噉做。”
9．所羅門冇聽從上帝嘅警告，導致乜嘢惡果？
9 耶和華絶對唔會對惡事隻眼開隻眼閉。聖經話：“耶和華向所羅門發怒，因為佢嘅心偏離咗曾經兩次向佢顯現嘅以色列上帝耶和華。上帝曾經就呢件事吩咐佢唔好跟從其他神，但佢冇遵守耶和華嘅命令。”結果，所羅門失去上帝嘅悦納同支持。所羅門嘅後代唔能够統治整個以色列國族，喺之後嘅日子佢哋都要面對好多難題。（列王紀上11:9-13）
10．同邊啲人來往會破壞我哋同上帝嘅關係？
10 我哋從所羅門嘅教訓學到，如果同嗰啲唔認識或者唔尊重耶和華標準嘅人交往，就會嚴重威脅到自己嘅靈性。無論係會衆入面靈性軟弱嘅人，抑或係我哋不信嘅親人、鄰居、同事或者同學，如果我哋同佢哋密切來往，就會深受影響，最終破壞我哋同上帝嘅關係。
你嘅交往點樣影響你同耶和華嘅關係？（請睇第11段）
11．我哋選擇朋友嘅時候，可以諗吓邊啲問題？
11 請讀哥林多前書15:33。一般嚟講，每個人都有某啲美好嘅特質，而一個人就算唔信上帝都唔一定會做壞事。噉我哋係咪可以認為，同呢啲人親密來往都冇咩問題？我哋應該諗吓，同佢哋做朋友會對我哋同耶和華嘅關係有乜嘢影響。我哋可以問吓自己：“佢哋會唔會幫助我同耶和華有更親密嘅關係？佢哋最關心嘅係乜嘢？例如，佢哋嘅話題係咪幾乎都圍繞住衣着打扮、金錢、電子産品、娛樂消遣或者其他物質上嘅追求？佢哋係咪經常講人壞話？係咪好鍾意講一啲色情笑話？”耶穌話：“心所充滿嘅，口就講出嚟。”（馬太福音12:34）如果我哋意識到，同呢啲人來往會影響自己同耶和華嘅關係，噉就要盡快減少來往，甚至終止同佢哋嘅友誼。（箴言13:20）
耶和華係要求專一愛戴嘅上帝
12．（甲）以色列人離開埃及之後冇幾耐，耶和華同佢哋講咗乜嘢？（乙）上帝要求以色列人忠於佢嘅時候，以色列人點樣回應？
12 我哋可以從以色列人離開埃及之後冇幾耐所發生嘅事學到其他教訓。當時，耶和華向聚集喺西奈山下嘅民衆顯示佢嘅臨在，場面震撼驚人。民衆睇見烏雲蓋頂，雷電交加，濃煙滾滾，仲聽到持續不斷、好似號角噉嘅響聲。（出埃及記19:16-19）呢陣時，耶和華向以色列人表明，佢“係要求專一愛戴嘅上帝”，亦都向佢哋保證，佢會忠貞對待嗰啲愛佢，而且遵守佢誡命嘅人。（請讀出埃及記20:1-6）耶和華想以色列人知道，如果佢哋擁護佢，佢就會支持佢哋。你會點樣回應耶和華上帝呢個忠貞嘅承諾？你嘅回答好可能同以色列人嘅一樣。佢哋“同聲回答話：‘凡耶和華吩咐嘅話，我哋都樂意遵行。’”（出埃及記24:3）不過冇幾耐之後發生嘅事，就使以色列人嘅忠貞受到考驗。
13．乜嘢情況使以色列人嘅忠貞受到考驗？
13 以色列人對烏雲、雷電同其他顯示上帝力量嘅神迹感到恐懼。摩西就應民衆要求，上西奈山見耶和華，為民衆發言。（出埃及記20:18-21）摩西喺山上逗留咗好長時間。而家冇咗摩西喺身邊，民衆點做呢？睇嚟佢哋因為太過倚賴摩西，就變得憂慮不安，於是對亞倫講：“為我哋造個神像喺我哋前面引路喇，因為嗰個摩西，就係帶我哋出埃及嘅人，我哋根本唔知道佢遭遇咗乜嘢事。”（出埃及記32:1,2）
14．以色列人點樣欺騙自己？耶和華有乜嘢反應？
14 民衆知道，崇拜偶像會大大得罪耶和華。（出埃及記20:3-5）不過佢哋好快就開始崇拜一個金牛犢像！以色列人明知噉樣做就係違背上帝嘅吩咐，但佢哋仲係欺騙自己，以為自己擁護緊耶和華。亞倫居然仲話崇拜金牛犢係慶祝“耶和華嘅節日”！耶和華有乜嘢反應？耶和華“發怒”，話“民衆已經敗壞”，“偏離［佢］吩咐佢哋嘅當行之道”，佢甚至同摩西講，想消滅整個以色列國族。（出埃及記32:5-10）
15,16．摩西同亞倫點樣表明佢哋堅決擁護耶和華？（請睇吓課文開頭嘅圖片）
15 不過耶和華係仁慈嘅上帝，佢冇毁滅以色列人，而係俾機會佢哋表明自己忠於佢。（出埃及記32:14）摩西見到民衆喺金牛犢前又唱又跳、呼喊狂歡，就勃然大怒，將個像碎成粉末。佢跟住宣布話：“邊個擁護耶和華？邊個就嚟我呢度！”結果，“利未子孫都聚集到佢嗰度”。（出埃及記32:17-20,26）
16 雖然亞倫有份造個金牛犢像，不過佢願意悔改，同其他利未人一齊擁護耶和華。呢啲忠貞嘅人唔單止擁護耶和華，亦都同犯罪嘅人劃清界線。呢個真係明智之舉，因為就喺嗰日，幾千人因為崇拜偶像而失去生命。耶和華應許會賜福俾呢啲擁護佢嘅人。（出埃及記32:27-29）
17．保羅用金牛犢嘅事例提醒我哋乜嘢？
17 使徒保羅用金牛犢嘅事例提醒基督徒同工話：“呢啲事就成為我哋嘅鑑戒，要我哋……唔好拜偶像，好似佢哋有啲人拜偶像，……警戒我哋呢啲到咗呢個制度終結嘅人。所以，自以為企得穩嘅就要小心，以免跌倒。”（哥林多前書10:6,7,11,12）正如保羅指出嘅一樣，就算崇拜上帝嘅人都可能會做出一啲耶和華憎恨嘅事。佢哋做錯事嗰陣，可能以為自己同耶和華仲係有良好嘅關係。不過，一個人只係想成為耶和華嘅朋友，或者只係聲稱忠於上帝，唔代表佢一定得蒙上帝悦納。（哥林多前書10:1-5）
18．乜嘢會使我哋漸漸同耶和華疏遠？最終會點？
18 以色列人見摩西遲遲未從西奈山落嚟，就感到憂慮不安。同樣，如果耶和華審判嘅大日子同將臨嘅新世界冇我哋想像中咁快嚟到，我哋可能會感到焦慮。可能我哋會覺得，呢啲應許睇嚟好耐都唔會實現，或者聽起嚟好到令人難以置信。如果我哋冇調整自己嘅諗法，就會將物質追求睇得比耶和華嘅旨意更重要。噉樣，我哋就會漸漸同耶和華疏遠，最終會做出一啲自己都冇諗過會做嘅事。
19．我哋要謹記乜嘢？點解？
19 我哋要謹記，耶和華要求我哋全心服從同專一愛戴佢。（出埃及記20:5）撒但好希望我哋離棄耶和華。所以，保羅提醒我哋話：“你哋唔可以攞耶和華嘅杯飲，又攞邪靈嘅杯飲；唔可以喺‘耶和華嘅宴席’上食，又喺邪靈嘅宴席上食。”（哥林多前書10:21）
緊緊依附耶和華！
20．耶和華會點樣幫助犯錯嘅人？
20 聖經關於該隱、所羅門以及以色列人喺西奈山嘅記載都有一個值得留意嘅共通點。佢哋都有機會“悔改、回頭”。（使徒行傳3:19）好明顯，耶和華唔會即刻放棄嗰啲犯錯嘅人。亞倫雖然犯錯，但係都得到耶和華嘅寬恕。今日，耶和華嘅警告可能嚟自聖經、聖經出版物或者一個基督徒同工嘅仁慈勸告。如果我哋犯錯之後聽從呢啲警告，就可以確信耶和華會向我哋表現慈悲。
21．當我哋對上帝嘅忠貞受到考驗嘅時候，我哋要下定決心點樣做？
21 耶和華懷住美好嘅目的向我哋表現分外恩典。（哥林多後書6:1）佢俾機會我哋“摒棄唔敬虔嘅心同世俗嘅慾望”。（請讀提多書2:11-14）只要我哋生活喺呢個“現行嘅制度”，對耶和華嘅忠貞就會受到考驗。願我哋下定決心，全心擁護耶和華上帝，謹記“要敬畏耶和華［我哋］嘅上帝，事奉佢，忠於佢”！（申命記10:20）
