1. Naegbọn Jehovah sọgan dọ po jlọjẹ po dọ nulẹpo wẹ yin emitọn? (Pọ́n yẹdide he tin to bẹjẹeji hosọ ehe tọn.)

JEHOVAH tọn wẹ nulẹpo! Ewọ tọn wẹ “olọn lẹ, yèdọ olọn olọn lẹ tọn gọna aigba po nuhe tin to e ji lẹpo po.” (Deut. 10:14; Osọ. 4:11) Gbọnmọ dali, na Jehovah wẹ dá gbẹtọvi lẹ wutu, yemẹpo wẹ yin etọn. (Salm. 100:3) Ṣigba, to whenuho gbẹtọvi tọn blebu gblamẹ, Jiwheyẹwhe ko de pipli gbẹtọvi tọn tangan delẹ taidi nutindo etọn to aliho vonọtaun mẹ.

2. Mẹnu lẹ wẹ ko yin hiadogona to Biblu mẹ taidi mẹhe yin Jehovah tọn lẹ to aliho vonọtaun de mẹ?

² Di apajlẹ, Salmu lẹ 135tọ dlẹnalọdo sinsẹ̀n-basitọ nugbonọ Jehovah tọn lẹ to Islaeli hohowhenu tọn taidi “nutindo vonọtaun etọn.” (Salm. 135:4) Humọ, owe Hosea tọn dọ dọdai dọ mẹhe ma yin Islaelivi delẹ na lẹzun omẹ Jehovah tọn lẹ. (Hos. 2:23) Dọdai Hosea tọn mọ hẹndi to whenue Jehovah jẹ mẹhe ma yin Ju lẹ ṣinyan do mẹhe tindo todido nado yin gandutọgbẹ́ Klisti tọn lẹ mẹ ji. (Owalọ 10:45; Lom. 9:23-26) “Akọta wiwe” ehe yin “nutindo vonọtaun” de to aliho ayidego tọn de mẹ, podọ hagbẹ etọn lẹ yin yiyiamisisadode po gbigbọ wiwe po, bo yin dide nado nọgbẹ̀ to olọn mẹ. (1 Pita 2:9, 10) Etẹwẹ lo na nuhe dù Klistiani nugbonọ egbezangbe tọn he tindo todido aigba ji tọn lẹ? Jehovah sọ ylọ yelọsu dọ “omẹ” emitọn lẹ podọ “mẹdide” emitọn lẹ.—Isa. 65:22.

3. (a) Mẹnu lẹ wẹ to vivi haṣinṣan dagbe de tọn dù hẹ Jehovah to egbehe? (b) Etẹ ji wẹ mí na dọhodo to hosọ ehe mẹ?

 ³ To egbehe, “lẹngbọpa pẹvi” lọ he tindo todido olọn mẹ tọn gọna “lẹngbọ devo lẹ” he tindo todido aigba ji tọn, nọpọ́ bo wleawuna “lẹngbọpa dopo” he Jehovah nọ pọnhlan taidi omẹ etọn lẹ. (Luku 12:32; Joh. 10:16) E họnwun dọ mí jlo na do pinpẹn-nutọn sisosiso hia Jehovah na dotẹnmẹ he e na mí nado tindo haṣinṣan dagbe enẹ nkọ hẹ ewọ. Hosọ ehe na dọhodo aliho voovo he mẹ mí sọgan do pinpẹn-nutọn mítọn hia Jehovah te lẹ ji na gbégbò vonọtaun enẹ he e na mí.

4. Etẹwẹ yin dopo to aliho he mẹ mí sọgan dopẹna Jehovah te lẹ mẹ na haṣinṣan he e hẹn yọnbasi na mí nado tindo hẹ ewọ, podọ nawẹ Jesu wà onú mọnkọtọn de gbọn?

⁴ Mí nọ do pinpẹn-nutọn hia Jehovah gbọn míde kinklandowiwe hlan ewọ po ahun lẹpo po dali. Gbọn baptẹm osin tọn dali, mí nọ kẹalọyi to aliho he sọgbe mẹ podọ to gbangba dọ Jehovah tọn wẹ mí yin bo tindo ojlo nado nọ litaina ẹn. (Heb. 12:9) Na taun tọn, onú mọnkọtọn wẹ Jesu wà to whenue e dọna Jehovah to baptẹm etọn whenu dọ, “Jiwheyẹwhe ṣie E, yẹn nọ mọ awuvivi to ojlo towe wiwà mẹ.” (Salm. 40:7, 8) Jesu ze ede jo nado wà ojlo Jehovah tọn, dile etlẹ yindọ sọn jiji whenu etọn gbọ́n wẹ ewọ ko yin apadewhe akọta he yin kinklandowiwe hlan Jiwheyẹwhe de tọn.

5, 6. (a) Nawẹ Jehovah yinuwa gbọn to baptẹm Jesu tọn whenu? (b) Na apajlẹ de he dohia dọ Jehovah nọ yọ́n pinpẹn klandowiwe mítọn tọn, dile etlẹ yindọ ewọ tọn wẹ nulẹpo.

⁵ Nawẹ Jehovah yinuwa gbọn to baptẹm Jesu tọn whenu? Biblu dọmọ: “To whenuena Jesu ko yin bibaptizi godo, e tọ́n sọn osin lọ mẹ to afọdopolọji; podọ pọ́n! olọn hùndonuvo, bọ e mọ gbigbọ Jiwheyẹwhe tọn to tejẹ ja e ji taidi apoe de. Pọ́n! Ogbè de sọ wá sọn olọn bo dọmọ: ‘Ehe wẹ Visunnu ṣie, mẹyiwanna lọ, mẹhe yẹn ko kẹalọyi.’” (Mat. 3:16, 17) Mahopọnna dọ Jesu ko yin nutindo Otọ́ olọn mẹ tọn etọn tọn, homẹ Jehovah tọn hùn taun nado mọdọ Visunnu emitọn jlo nado wà ojlo Emitọn mlẹnmlẹn. Mọdopolọ, homẹ Jehovah tọn nọ hùn nado kẹalọyi klandowiwe mítọn, podọ ewọ na yí dona etọn do doyẹyigona mí.—Salm. 149:4.

⁶ Di apajlẹ, mí ni dọ dọ otọ́ de tindo akla susu bo na dopo viyọnnu etọn pẹvi. Enẹgodo, viyọnnu lọ desọn akla he otọ́ etọn na ẹn lọ go bo na otọ́ etọn. Be e ma yin otọ́ lọ tọn wẹ akla lọ ko yin dai ya? Nawẹ viyọnnu lọ sọgan sọ na ẹn nude he ko yin etọn gbọn? Kanbiọ mọnkọtọn lẹ ma tlẹ na ko wá ayiha mẹ na otọ́ owanyinọ de. Kakatimọ, homẹ etọn na hùn nado kẹalọyi nunina lọ taidi ohia owanyi he viyọnnu etọn tindo na ẹn tọn. Ayihaawe ma tin dọ akla he viyọnnu etọn na ẹn enẹ na họakuẹ to nukun etọn mẹ hú akla he pò to e si lẹpo. Homẹ Jehovah lọsu tọn nọ hùn eyin mí desọn ojlo mẹ bo klan míde do wiwe hlan ewọ mlẹnmlẹn.—Eks. 34:14.

7. Nawẹ Malaki zinnudo numọtolanmẹ he Jehovah nọ tindo na mẹhe desọn ojlo mẹ nado sẹ̀n ẹn lẹ ji gbọn?

⁷ Hia Malaki 3:16. Eyin a ma ko basi klandowiwe bo yí baptẹm, lẹnnupọndo nuhewutu e yin nujọnu nado ze afọdide mọnkọtọn ji. Na nugbo tọn, sọn whenue gbọ́n a wá gbẹ̀mẹ, Jehovah tọn wẹ a yin, kakajẹ gbẹtọvi he pò lẹ ji. Ṣigba, lẹnnupọndo lehe e na vivi na Jehovah taun do ji, eyin a klan dewe do wiwe hlan ewọ bo nọ wà ojlo etọn, na a kẹalọyi nupojipetọ-yinyin etọn wutu. (Howh. 23:15) Taidi kọdetọn de, Jehovah lọsu nọ kẹalọyi mẹhe desọn ojlo mẹ nado sẹ̀n ẹn lẹ, podọ e nọ kàn oyín yetọn do “owe oflin tọn” etọn mẹ.

8, 9. Etẹwẹ Jehovah nọ biọ sọn mẹhe oyín yetọn yin kinkando “owe oflin tọn” etọn mẹ lẹ si?

 ⁸ Taidi omẹ Jehovah tọn lẹ, onú delẹ yin dandan na oyín mítọn nido yin kinkando “owe oflin tọn” etọn mẹ. Malaki dọ madoadúdẹji dọ mí dona ‘dibusi Jehovah bo nọ lẹnayihamẹpọn do oyín etọn ji.’ Eyin mí ze míde jo nado nọ basi sinsẹ̀n hlan mẹdevo kavi nudevo depope, oyín mítọn na yin didesẹ sọn owe ogbẹ̀ tọn yẹhiadonu tọn Jehovah tọn mẹ.—Eks. 32:33; Salm. 69:28.

⁹ Enẹwutu, klandowiwe mítọn hlan Jehovah bẹ nususu hẹn hú opà vonọtaun de dido nado wà ojlo etọn podọ nado yí baptẹm osin tọn. Nuwiwa ehelẹ ma nọ yí whenu, podọ yé nọ yawu lẹzun otàn. Adà Jehovah tọn mẹ ninọ taidi omẹ etọn lẹ nọ biọ dọ mí ni to tonusena ẹn todin podọ zọnmii—dile e na dẹnsọ bọ mí na to ogbẹ̀.—1 Pita 4:1, 2.

10. Vogbingbọn he họnwun tẹwẹ dona tin to mẹhe to Jehovah sẹ̀n po mẹhe ma to mọwà po ṣẹnṣẹn?

¹⁰ Hosọ he jẹnukọn dọhodo kandai Biblu tọn he gando Kaini, Sọlomọni po Islaelivi lẹ po go ji. Yemẹpo wẹ sọalọakọ́n dọ emi to Jehovah sẹ̀n, ṣigba klandowiwe yetọn ma yin mlẹnmlẹn paali. Apajlẹ enẹlẹ hẹn ẹn họnwun hezeheze dọ mẹhe yin Jehovah tọn nugbonugbo lẹ dona nọ adà dodowiwa tọn mẹ gligli bo nọavùnte sọta kanyinylan. (Lom. 12:9) Abajọ, whenue Malaki donù “owe oflin tọn” lọ go godo, Jehovah dọho gando “vogbingbọn to dodonọ po mẹylankan po ṣẹnṣẹn, to mẹhe to Jiwheyẹwhe sẹ̀n po mẹhe ma to sinsẹ̀n ẹn po ṣẹnṣẹn” go.—Mal. 3:18.

11. Naegbọn e dona họnwun na mẹdevo lẹ dọ mí ze míde jo na Jehovah mlẹnmlẹn?

¹¹ Todin, aliho devo die he mẹ mí sọgan do pinpẹn-nutọn-yinyọnẹn mítọn hia Jehovah te na ewọ de mí taidi omẹ etọn lẹ wutu. Nukọnyiyi gbigbọmẹ tọn mítọn dona “họnwun hezeheze na gbẹtọ lẹpo.” (1 Tim. 4:15; Mat. 5:16) Kanse dewe dọ: ‘Be e họnwun na mẹdevo lẹ dọ n’ze dee jo na Jehovah mlẹnmlẹn ya? Be n’nọ dín dotẹnmẹ hundote lẹ nado do dee hia di Kunnudetọ Jehovah tọn de ya?’ Homẹ Jehovah tọn ma na hùn paali eyin to whenue e ko de mí taidi omẹ etọn lẹ godo, mí nọ whleawu nado do míde hia mẹdevo  lẹ taidi nutindo etọn.—Salm. 119:46; hia Malku 8:38.

12, 13. Nawẹ mẹdelẹ ko hẹn ẹn vẹawu nado yọ́n yé taidi Kunnudetọ Jehovah tọn lẹ gbọn?

¹² E blawu dọ na mẹdelẹ nọ hodo “gbigbọ aihọn tọn” wutu, e nọ vẹawu nado mọ ‘vogbingbọn lọ eyin yé to Jiwheyẹwhe sẹ̀n kavi ma to sinsẹ̀n ẹn.’ (1 Kọl. 2:12) Gbigbọ enẹ wẹ nọ yidogọna ‘ojlo agbasalan tọn mẹtọn’ lẹ. (Efe. 2:3) Di apajlẹ, mahopọnna ayinamẹ he ko yin nina do whẹho nusisọ́ tọn ji lẹpo, mẹdelẹ gbẹ́ nọ yiwanna aṣọ́dido delẹ he ma to jlẹkaji. Yé nọ do avọ̀ he nọ finyọ́n yé tánun-tánun lẹ po dehe nọ do agbasa hia lẹ po, etlẹ yin wá pipli dopọ Klistiani tọn lẹ tẹnmẹ. Kavi yé nọ pà oda kavi blá oda to aliho he zẹ̀pá mẹ. (1 Tim. 2:9, 10) Taidi kọdetọn de, whenue yé topọ po mẹdevo lẹ po, e sọgan vẹawu nado yọ́n mẹhe yin Jehovah tọn dovo na mẹhe yin “họntọn aihọn tọn.”—Jak. 4:4.

¹³ To aliho devo lẹ mẹ, Kunnudetọ delẹ ma nọ gbẹ́ walọyizan aihọn tọn lẹ dai po nujikudo po. Wedudu po walọyizan yetọn to nuwiwa pọmẹ tọn lẹ po whenu nọ zẹ̀ nuhe yin alọkẹyi na Klistiani lẹ go. Yé nọ ze fọto yedetiti tọn lẹ po linlẹn he ma sọgbe na gbẹtọ gbigbọnọ lẹ po do nọtẹn gbẹdido Intẹnẹt ji tọn lẹ ji. Mẹplọnlọ sọgan ko nọma yin dido yé go to agun Klistiani tọn mẹ na ylando sinsinyẹn de, ṣigba yé sọgan tindo nuyiwadomẹji agọ̀ do hagbẹ yetọn he to vivẹnudo nado hẹn walọyizan dagbe go to omẹ Jehovah tọn lẹ ṣẹnṣẹn lẹ ji.—Hia 1 Pita 2:11, 12.

14. Aliho nuyiwa tọn tẹwẹ yin dandan nado basi hihọ́na haṣinṣan vonọtaun mítọn hẹ Jehovah?

¹⁴ Aihọn lọ nọ yí egblemaku do ze “ojlo agbasalan tọn, ojlo nukun tọn po nutindo gbẹ̀mẹ tọn mẹtọn lẹ jijlá po” daga. (1 Joh. 2:16) Ṣigba, na Jehovah tọn wẹ mí yin wutu, mí yin avase na nado “gbẹ́ jijọ-madi-Jiwheyẹwhe po ojlo aihọn tọn lẹ po dai podọ nado nọ do wunza, dodowiwa po mẹdezejo na Jiwheyẹwhe po hia to titonu ehe mẹ.” (Titu 2:12) Hodidọ mítọn, nuyiwa mítọn na nuhe dù dùdù po nùnù po, aṣọ́dido, nusisọ́, gọna walọyizan mítọn gando azọ́n go—yèdọ nuhe mí nọ wà lẹpo—dona dohia mẹdevo lẹ dọ mí ze míde jo mlẹnmlẹn na Jehovah.—Hia 1 Kọlintinu lẹ 10:31, 32.

15. Naegbọn mí dona nọ yí homẹdagbe po owanyi po do yinuwa hẹ sinsẹ̀n-basitọ hatọ lẹ?

¹⁵ Pinpẹn-nutọn mítọn na haṣinṣan vonọtaun he mí tindo hẹ Jehovah nọ sọawuhia to lehe mí nọ yinuwa hẹ sinsẹ̀n-basitọ hatọ lẹ do mẹ. Jehovah tọn wẹ yelọsu yin. Eyin mí ma nọ wọnji nugbo enẹ go, mí na nọ yí owanyi po homẹdagbe po do yinuwa hẹ mẹmẹsunnu po mẹmẹyọnnu mítọn lẹ po. (1 Tẹs. 5:15) Jesu dọna hodotọ etọn lẹ dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin—eyin mì tindo owanyi to mìde ṣẹnṣẹn.”—Joh. 13:35.

16. Apajlẹ he tin to Osẹ́n Mose tọn mẹ tẹwẹ do numọtolanmẹ Jehovah tọn lẹ gando omẹ etọn lẹ go hia?

¹⁶ Nado yọ́n lehe mí dona nọ yinuwa hẹ ode awetọ do to agun mẹ, lẹnnupọndo apajlẹ he bọdego ji. Núzinzan he nọ nọ̀ tẹmpli Jehovah tọn mẹ lẹ yin kinklandowiwe, kavi yin didedovo mlẹnmlẹn na sinsẹ̀n-bibasi wiwe-ṣeke lọ. Osẹ́n Mose tọn basi zẹẹmẹ gigọ́ gando lehe núzinzan enẹlẹ na nọ yin nukunpedego do go, podọ mẹhe gbà osẹ́n lọ lẹ nọ yin hùhù. (Sọh. 1:50, 51) Eyin Jehovah nọ basi hihọ́na núzinzan he ma do gbọfufu bo nọ yin yiyizan na sinsẹ̀n-bibasi etọn lẹ sọmọ, nẹmunẹmu wẹ ewọ na basi hihọ́na sinsẹ̀n-basitọ nugbonọ he klan yede do wiwe hlan ẹn lẹ, yèdọ mẹhe ewọ ko de taidi omẹ etọn lẹ! To gbèdopo he Jehovah to hodọna omẹ etọn lẹ, e dọmọ: “Mẹdepope he doalọ mì go, doalọ nukunzìn ṣie go.”—Zek. 2:8.

17. Etẹwẹ Jehovah nọ ‘tuntoai bo nọ dotoai’ na?

¹⁷ E jẹna ayidego dọ Malaki do Jehovah hia taidi mẹhe “tuntoai bo to todoai” dile omẹ Etọn lẹ to nuyiwa hẹ ode awetọ. (Mal. 3:16) Na nugbo tọn, Jehovah “yọ́n mẹhe yin etọn lẹ.” (2 Tim. 2:19) Ewọ nọ mọnukunnujẹ nudepope he mí to wiwà bo to didọ lẹpo mẹ kitokito. (Heb. 4:13) Eyin mí gboawupo nado do homẹdagbe hia sinsẹ̀n-basitọ hatọ mítọn lẹ, Jehovah nọ ‘tuntoai bo nọ dotoai.’ Mí sọgan kudeji dọ Jehovah sọ nọ doayi e go eyin mí nọ hẹjómẹ, tlúalọ, jonamẹ bo nọ do homẹdagbe hia ode awetọ.—Heb. 13:16; 1 Pita 4:8, 9.

18. Nawẹ mí sọgan do pinpẹn-nutọn hia na gbégbò he mí tindo nado yin omẹ Jehovah tọn lẹ gbọn?

¹⁸ E họnwun dọ mí to jejeji nado do pinpẹn-nutọn-yinyọnẹn mítọn hia Jehovah na gbégbò he mí tindo nado yin omẹ etọn lẹ. Mí yọnẹn dọ nuyọnẹnnu wẹ e yin nado kẹalọyi dọ mí yin nutindo etọn lẹ gbọn didesọn ojlo mẹ nado klan míde do wiwe hlan ẹn dali. Mahopọnna dọ “whẹndo jijọ gbíngbánnọ po bublunọ de po ṣẹnṣẹn” wẹ mí to gbẹnọ te, mí jlo dọ gbẹtọ lẹ ni mọdọ mí yin ‘madoblọnọ po homẹvọnọ po, bo to wunhọ́n taidi hinhọ́n lẹ to aihọn lọ mẹ.’ (Flp. 2:15) Mí nọ nọavùnte gligli sọta nuylankan. (Jak. 4:7) Podọ, mí nọ yiwanna sinsẹ̀n-basitọ hatọ mítọn lẹ bo nọ na yé sisi, to yinyọnẹn mẹ dọ Jehovah tọn wẹ yelọsu yin.—Lom. 12:10.

19. Nawẹ Jehovah nọ suahọ mẹhe yin etọn lẹ gbọn?

¹⁹ Biblu dopagbe dọmọ: “Jehovah ma na jo omẹ etọn lẹ do.” (Salm. 94:14) Jidenamẹ nujikudo tọn ehe ma na gblá mahopọnna nugbajẹmẹji depope he sọgan jọ do mí go. Okú lọsu ma tlẹ sọgan glọnalina owanyi he Jehovah tindo na mí. (Lom. 8:38, 39) “Eyin mí to ogbẹ̀, mí to ogbẹ̀ na Jehovah, podọ eyin mí kú, mí kú na Jehovah. Enẹwutu, eyin mí to ogbẹ̀ podọ eyin mí kú, Jehovah tọn wẹ mí yin.” (Lom. 14:8) Po jejejininọ po, mí to nukọnpọnhlan azán he gbè Jehovah na hẹn họntọn nugbonọ etọn he ko kú lẹpo gọwá ogbẹ̀. (Mat. 22:32) Etlẹ yin todin, mí nọ duvivi dona susu lẹ tọn. Dile Biblu dọ do, “ayajẹnọ wẹ akọta lọ he Jiwheyẹwhe etọn yin Jehovah, yèdọ mẹhe ewọ ko de taidi nutindo etọn titi lẹ.”—Salm. 33:12.