1. Pamodi ki nu pode fla ma Jeová é dónu di tudu? (Odja fotu na komésu di studu.)

JEOVÁ é dónu di tudu kuza. Bíblia ta fla ma Jeová ‘é dónu di Séus, sin, Séus di Séus, Téra i tudu ki ten na el.’ (Deut. 10:14; Apo. 4:11) Nos tanbê é di Jeová pamodi é el ki kria-nu. (Sal. 100:3) Má, na tudu kes algen ki dja vive, Jeová skodje un grupu di pesoas pa ser di sel di un manera spesial.

2. Di akordu ku Bíblia, ken ki é kes dôs grupu ki Jeová skodje di manera spesial?

² Pur izénplu, Salmo 135 ta fla ma kes sérvu fiel di Deus na Israel antigu éra ‘se propriadadi spesial.’ (Sal. 135:4) Tanbê livru di Oseias dja flaba ma alguns di kes ki ka éra israelita ta ben fazeba párti di povu di Jeová. (Ose. 2:23) Kel profesia kunpri kantu Jeová kumesa ta skodje pesoas ki ka éra israelita pa ba governa ku Kristu na Séu. (Atos 10:45 ; Rom. 9:23-26) Kes skodjedu ku spritu santu ta txomadu di ‘nason santu’ i es é ‘propriadadi spesial’ di Jeová. (1 Ped. 2:9, 10) Má, i tudu kes sérvu di Jeová ki ten speransa di vive pa tudu ténpu na Téra?  Jeová tanbê ta txoma kel grupu di ‘nha povu’ i ‘kes ki N skodje’. — Isa. 65:22.

3. (a) Ken ki ten un amizadi spesial ku Jeová oji? (b) Kuzê ki nu sta ben odja na es studu?

³ Kes algen ki ta ba vive na Séu ta txomadu di ‘ribanhu pikinoti’, i kes ki ta ben vive na Téra ta txomadu di ‘otus ovelha’. Kel dôs grupu li ta adora Jeová djuntu sima un ribanhu. (Lucas 12:32; João 10:16 ) Nu krê mostra Jeová ma nu sta kontenti di faze párti di se povu i ten un amizadi spesial ku el. Na kel studu li, nu sta ben odja modi ki nu pode agradise Jeová pa es grandi priviléjiu.

4. (a) Modi ki nu pode agradise Jeová pamodi el da-nu xansi di ten amizadi ku el? (b) Modi ki Jizus faze mésmu kuza?

⁴ Un manera di agradise Jeová, é óras ki nu ta da nos vida pa el. Óras ki nu ta batiza, nu ta mostra pa tudu algen ma nu krê ser di Jeová i faze se vontadi. (Heb. 12:9) Jizus faze mésmu kuza kantu el batiza. El nase na un nason ki éra didikadu pa Jeová. Má simé, el da se vida pa Jeová. Éra sima ki el staba ta fla: ‘Faze bu vontadi, ó nha Deus, é nha dizeju’. — Sal. 40:7, 8, nóta di rodapé.

5, 6. (a) Modi ki Jeová xinti kantu Jizus batizadu? (b) Ki izénplu ta djuda-nu ntende kuzê ki Jeová ta xinti óras ki nu da nos vida pa el?

⁵ Modi ki Jeová xinti kantu Jizus batiza? Bíblia ta fla: ‘Dipôs ki el batizadu, Jizus sai lógu di agu, i na kel mésmu óra Séu abri, i el odja spritu di Deus ta dixi pa riba di el sima un ponba. Tanbê, un vós ki ben di Séu fla: “Kel-li é nha Fidju ki N ta ama txeu, ki ta da-m txeu alegria.”’ (Mat. 3:16, 17) Jizus dja éra di Jeová. Má Jeová fika txeu kontenti di odja Jizus ta da se vida di livri vontadi pa sirbi-l. Tanbê, Jeová ta fika txeu kontenti óras ki el ta odja-nu ta faze mésmu kuza. El promete ma el ta abensua-nu. — Sal. 149:4.

⁶ Si Jeová é dónu di tudu kuza, kuzê ki nu pode da-l? Odja un izénplu: Imajina ma un pai símia txeu midju na se órta. Un dia se fidju-fémia ta panha un di kes midju i el ta da se pai. Un pai ki gosta di se fidju ta fika txeu kontenti ku kel prezenti mésmu ki kel midju é di sel. Kel-la ta mostra ma se fidju-fémia gosta txeu di el. Pa kel pai, kel midju ki se fidju-fémia da-l ten más valor ki tudu kes otu midju ki sta na órta. É si tanbê ki Jeová ta xinti óras ki nu ta da nos vida pa nu sirbi-l. — Êxo. 34:14.

7. Modi ki Malakias ta djuda-nu ntende kuzê ki Jeová ta xinti óras ki un algen krê sirbi-l?

⁷ Lé Malaquias 3:16. Má nu meste da nos vida pa Jeová i batiza? Anos é di Jeová désdi ki nu nase. Má óras ki bu da bu vida pa Jeová, bu sta ta mostra klaru ma bu krê pa el ser bu Governanti i ma bu krê faze se vontadi. Bu ta konsigi imajina modi ki Jeová ta fika kontenti ku kel-li? (Prov. 23:15) Jeová konxe kes algen ki krê sirbi-l i el ta skrebe ses nómi na se ‘livru di rekordason’.

8, 9. Kuzê ki nu meste faze pa Jeová skrebe nos nómi na se ‘livru di rekordason’?

 ⁸ Ten alguns kuza ki nu meste faze pa Jeová poi nos nómi na se ‘livru di rekordason’. Malakias fla ma nu debe ten grandi ruspetu pa Jeová i pensa na se nómi. Si nu adora kalker otu algen ô algun otu kuza, Jeová ta tra nos nómi di livru di vida. — Êxo. 32:33; Sal. 69:28.

⁹ Kel-li ta mostra ma sô promete faze se vontadi i batiza ka ta txiga. Kes-li é kuzas ki nu ta faze sô un bês, má adora Jeová é un manera di vive. Nu krê obi ku Jeová gósi, na futuru i pa tudu nos vida. — 1 Ped. 4:1, 2.

10. Ki diferénsa klaru debe ten entri kes ki ta sirbi Jeová i kes ki ka ta sirbi-l?

¹⁰ Na kel otu studu, nu odjaba izénplus di Kain, Salumon i di israelitas. Es ta flaba ma es ta adoraba Jeová, má es ka foi lial. Kel-li ta inxina-nu ma sô fla ma nu ta adora Jeová ka ta txiga. Nu meste ôdia kes kuza ki é mariadu i ama kes kuza ki é dretu. (Rom. 12:9) Jeová fla ma tudu algen ta odja ‘diferénsa entri un algen justu i un algen mau, entri ken ki ta sirbi Deus i ken ki ka ta sirbi-l.’ — Mal. 3:18.

11. Pamodi ki nu ka debe ten vergónha di fla otus algen ma nos é di Jeová?

¹¹ Nu sta kontenti pamodi Jeová skodje-nu pa nu ser se povu. Pur isu tudu algen debe odja klaru ma nu sta di ladu di Jeová. (1 Tim. 4:15; Mat. 5:16) Pergunta bu kabésa: ‘Otus algen ta konsigi odja ma N ta sirbi sô Jeová? N ta xinti orgulhu di fla otus algen ma mi é un Tistimunha di Jeová?’ Imajina modi ki Jeová ta fikaba tristi si nu xinti vergónha di fla otus algen ma nos é di sel. — Sal. 119:46; lé Marcos 8:38.

12, 13. Modi ki alguns irmon ta mostra ma es é kuazi sima algen di mundu?

¹² É tristi di odja ma alguns irmon  ta imita ‘spritu di mundu’. Ten poku diferénsa entri es i kes algen ki ka ta adora Jeová. (1 Cor. 2:12) Spritu di mundu ta poi algen ta pensa sô na dizeju di karni. (Efé. 2:3) Pur izénplu, organizason dja da-nu txeu konsedju, má simé alguns irmon inda ta uza ropa ki ta mostra falta di ruspetu pa ses kabésa i pa otus algen. Es ta bisti ropa pertadu ô kurtu ki ta mostra pártis di korpu ki ka debe, mésmu óras ki es ta bai runions, asenbleias i kongrésus. Tanbê es ta korta kabélu i es ta faze pentiadu ki ta txoma txeu atenson i ki ta imita stilus di mundu. (1 Tim. 2:9, 10) Pur isu, óras ki es sta na meiu di otus algen, é difísil sabe ken ki é di Jeová i ken ki é ‘amigu di mundu’. — Tia. 4:4.

¹³ Tanbê ten otus kuza ki ta mostra ma kes irmon inda sta ligadu ku mundu. Pur izénplu, na fésta, alguns irmon ta badja i ta konporta di un manera ki é ka dretu. Otus ta poi fotus na redi sosial i es ta poi komentárius ki ta mostra klaru ma es ka ten un amizadi fórti ku Jeová. Talvês es ka faze ninhun pekadu gravi ki ta meste disiplina, má es pode ser un mau influénsia pa kes ki ta faze sforsu pa ser diferenti di mundu. — Lé 1 Pedro 2:11, 12.

14. Kuzê ki nu meste faze pa nu proteje nos amizadi ku Jeová?

¹⁴ Tudu kuza ki ten na mundu, fazedu pa pô-nu pensa na ‘dizeju di karni, dizeju di odju i izibi kuzas ki nu ten’. (1 João 2:16 ) Má anos é di Jeová, pur isu nos é diferenti. Nu ta ‘nega kuzas mariadu i dizejus di mundu i pa nu vive ku bon juís, justisa i pa nu adora Deus na meiu di es mundu’. (Tito 2:12 ) Tudu ki nu ta faze na vida, sima nos manera di bisti, pâpia, kume, bebe, i nos konportamentu na trabadju debe mostra klaru ma nos é di Jeová. — Lé 1 Coríntios 10:31, 32.

15. Pamodi ki nu debe mostra amor i bondadi pa kunpanheru?

¹⁵ Na manera ki nu ta trata nos irmon, nu ta mostra ma nu ta da valor pa nos amizadi ku Jeová. Es tanbê es é di Jeová sima nos. Si nu ka skese di kel-li sénpri nu ta trata-s ku amor i bondadi. (1 Tes. 5:15) Pamodi ki kel-li é inportanti? Jizus fla se sigidoris: ‘Através di kel-li tudu algen ta fika ta sabe ma nhos é nha disiplus: si nhos tiver amor pa kunpanheru.’ — João 13:35.

16. Ki izénplu na Lei di Muizes ta mostra ma Jeová ta ama se povu?

¹⁶ Ten un izénplu ki pode djuda-nu ntende modi ki nu debe trata otus na kongregason. Na ténplu di Jeová tinha alguns kuza ki es ta uzaba sô pa adorason. Lei di Muizes ta splikaba klaru modi ki levitas devia kuidaba di kes kuza. Ken ki ka sigiba kes orientason ta moreba. (Núm. 1:50, 51) Jeová ta preokupaba txeu ku manera ki es ta uzaba kes kuza pa adorason. Kel-li ta mostra ma pa Jeová inda é más inportanti nu trata dretu kes algen ki el skodje pa adora-l. El ta da-nu txeu valor, pur isu el ta fla: ‘Kel ki poi mô na nhos, poi mô na minina di nha odju.’ — Zac. 2:8.

17. Di ki manera ki Jeová ta ‘presta atenson i el ta obi’?

¹⁷ Malakias fla ma Jeová ta ‘prestaba atenson i ta obiba’ modi ki se povu ta trataba kunpanheru. (Mal. 3:16) Jeová ‘konxe kes algen ki é di sel’. (2 Tim. 2:19) El sabe tudu kuza ki nu ta pâpia i ki nu ta faze. (Heb. 4:13) Jeová ta obi i el ta presta atenson óras ki nu ta trata nos irmon ku amor. Má tanbê el ta odja óras ki nu ta resebe otus, óras ki nu ta da kuzas ki nu ten, ki nu ta púrdua i trata kunpanheru ku amor. — Heb. 13:16; 1 Ped. 4:8, 9.

18. Modi ki nu ta mostra ma nu sta kontenti di faze párti di se povu?

¹⁸ Nu krê mostra Jeová ma nu sta kontenti di faze párti di se povu. Nu sabe ma kantu nu da nos vida pa Jeová, kel-la foi midjór disizon ki dja nu toma. Sikrê nu sta ta vive na ‘meiu di un jerason mariadu i stragadu’ nu pode ser ‘sen fadja i sen kulpa i límia sima iluminador na mundu.’ (Fil. 2:15) Nu sta disididu na ka faze kuzas ki Jeová ta ôdia. (Tia. 4:7) Tanbê nu ta ama i nu ta ruspeta nos irmon pamodi es tanbê é di Jeová. — Rom. 12:10.

19. Modi ki Jeová ta abênsua se povu?

¹⁹ Bíblia ta promete ma Jeová ka ta bandona se povu. (Sal. 94:14) Ka ta nporta kuzê ki pode kontise, Jeová ta sta sénpri ku nos. Nen mórti ka ta poi Jeová ta skese di nos. (Rom. 8:38, 39) ‘Si nu vive, nu vive pa Jeová; si nu móre nu móre pa Jeová. Pur isu, ô nu vive ô nu móre, anos é di Jeová.’ (Rom. 14:8) Nu tene gana pa txiga ténpu ki Jeová ta ben resusita tudu se amigus lial. (Mat. 22:32) Mésmu gósi nu ta goza di txeu benson di Jeová. Sima Bíblia ta fla: ‘Filís é kel nason ki se Deus é Jeová, kel povu ki el skodje pa ser se propriadadi.’ — Sal. 33:12.