1. Omolwashike tatu vulu okutya iinima ayihe oyaJehova? (Tala kethano lyopetameko.)

IINIMA ayihe oyaJehova! Ombiimbeli otayi ti: “Egulu nomagulu gokombandambanda ogOmuwa, nevi noshaa shoka shi li mo.” (Deut. 10:14; Eh. 4:11) Jehova oye a shita aantu ayehe, nomolwaashono tu li aantu ye. (Eps. 100:3) Okutala kondjokonona yaantu, Kalunga okwi ihogololele oshigwana she shi ikalekelwa.

2. Oolye ya popiwa mOmbiimbeli ye li oshigwana shaJehova shi ikalekelwa?

² Pashiholelwa, Episalomi 135 otali ulike kaalongeli yaJehova aadhiginini yomuIsraeli shonale ye li “eliko lye.” (Eps. 135:4) Natango, embo lyaHosea olya hunganeka kutya yamwe mboka kaaya li Aaisraeli, oya li taya ka kala aantu yaJehova. (Hos. 2:23) Ehunganeko lyaHosea olya li lya gwanithwa, sho Jehova a kwatele mo naamboka kaaye shi Aajuda maapangeli pamwe naKristus. (Iil. 10:45; Rom. 9:23-26) “Oshigwana oshiyapuki” shika osha “hogololwa” kuJehova momukalo gwa tongomana. Osha gwayekwa nombepo ondjapuki nosha hogololwa shi ka kale nomwenyo megulu. (1 Pet. 2:9, 10) Ongiini kombinga yAakriste aadhiginini oyendji kunena mboka ye na etegameno lyoku  ka kala nomwenyo kombanda yevi? Jehova ote ya ithana wo ‘aantu’ ye nosho wo “aahogololwa” ye. — Jes. 65:22.

3. (a) Oolye ye na ekwatathano li ikalekelwa naJehova kunena? (b) Oshike tatu ka kundathana moshitopolwa shika?

³ Kunena “oshigunda oshishona” shoka shi na etegameno lyomegulu nosho wo ‘oonzi dhilwe’ ndhoka dhi na etegameno lyoku ka kala kombanda yevi, ayehe otaya longele Jehova ye li “oshigunda shimwe.” (Luk. 12:32; Joh. 10:16) Onkee ano, otwa hala okuulukila Jehova nkene twe mu pandula, sho tu na ekwatathano naye li ikalekelwa. Oshitopolwa shika, otashi ka kundathana omikalo dhi ili nodhi ili, moka tatu vulu okuulukila Jehova olupandu, sho tu na ekwatathano naye li ikalekelwa.

4. Omomukalo gumwe guni tatu vulu okupandula Jehova, sho e shi ningitha tashi wapa tu kale nekwatathano naye, nongiini Jesus a li a ningi oshinima sha faathana?

⁴ Ohatu ulukile Jehova kutya otwe mu pandula, moku mu iyapulila. Uuna tatu ninginithwa momeya, ohatu ulike montaneho kutya otwa hala okukala tatu longele Jehova nokuvulika kuye. (Heb. 12:9) Jesus naye okwa li a ningi oshinima sha faathana peninginitho lye, sho a ti: “Kalunga kandje, ondi hole okugwanitha ehalo lyoye!” (Eps. 40:7, 8) Okwi igandja a longe ehalo lyaJehova, nonando okuza sho a valwa okwa kala oshitopolwa shoshigwana shoka sha yapulilwa Kalunga.

5, 6. (a) Jehova okwa li u uvite ngiini, sho Jesus a ninginithwa? (b) Gandja oshiholelwa shoka tashi tu kwathele tu uve ko nkene Jehova ha kala u uvite, uuna tatu mu iyapulile, nonando iinima ayihe oye.

⁵ Jehova okwa li u uvite ngiini, sho Jesus a ninginithwa? Ombiimbeli otayi ti: ‘Jesus sho a ningithwa, okwa zi momeya mbalambala. Nena egulu olye eguluka, nokwa mono ombepo yaKalunga ya kuluka ya fa onguti e tayi mu lambele. Megulu nomwa zi ewi lya ti: “Nguka Omumwandje omuholike nde mu hokwa.”’ (Mat. 3:16, 17) Nonando Jesus okwa adhika nale gwaJehova, Jehova okwa li a nyanyukwa okumona Omwana a halelela okulonga ehalo Lye. Sha faathana, Jehova oha kala a nyanyukwa, uuna tatu mu iyapulile, note ke tu yambeka. — Eps. 149:4.

⁶ Natu shi thaneke ngeyi: Dhiladhila komulumentu e na oongala oombwanawa moshikunino she. Esiku limwe okamwanakadhona oka kutha yimwe yomoongala ndhoka e take yi mu pe yi li omagano. Mbela ongala ndjoka kaya li nale ye? Omolwashike ke yi mu pe yo oye nale? Tate omunahole ita ka dhiladhila nokuli komapulo ga tya ngawo. Pehala lyaashono, ote ke yi taamba nenyanyu, yi li euliko kutya oku holike kokamwana. Ota ka kala e yi lenga shi vulithe oongala adhihe ndhoka e na moshikunino. Sha faathana, Jehova ota ka kala a nyanyukwa, ngele otatu mu iyapulile nehalo ewanawa. — Eks. 34:14.

7. Maleaki okwa tsu ngiini omuthindo nkene Jehova ha kala u uvitile mboka taye mu longele nehalo ewanawa?

⁷ Lesha Maleaki 3:16. Ngele ino iyapulila natango Jehova noino ninginithwa, tala nkene sha simana oku shi ninga. Uushili owo kutya owa kala gwaJehova, okuza ngaa sho we ya momwenyo. Onkee ano, dhiladhila nkene tashi ka nyanyudha Jehova, ngele owe mu iyapulile nokulonga ehalo lye. (Omayel. 23:15) Jehova oha kala e wete mboka taye mu longele nehalo ewanawa, noha nyola omadhina gawo “membo” lye.

8, 9. Jehova okwa tegelela mboka omadhina gawo ga nyolwa “membo” lye ya ninge shike?

⁸ Ngele otwa hala omadhina getu ga  nyole “membo” lyaJehova, opu na shoka tu na okuninga. Maleaki okwa popi kondandalunde kutya otu na ‘okutila Omuwa noku mu simaneka’ nenge tu tye nokutedhatedha kedhina lye. Ngele otwa longele gumwe i ili nenge shimwe shi ili, otatu ka dhimwa mo membo lyopathaneko lyaJehova lyaanamwenyo. — Eks. 32:33; Eps. 69:28.

⁹ Okwiiyapulila Jehova okwa kwatela mo oshindji kaashi shi owala oku mu uvanekela okulonga ehalo lye nosho wo okuninginithwa. Oonkatu ndhoka ohatu dhi ningi owala palumwe, ihe natu dhimbulukwe kutya okulongela Jehova oshinima tashi tsikile notu na oku shi ninga onkalamwenyo yetu ayihe, ano ngashingeyi nosho wo monakuyiwa. — 1 Pet. 4:1, 2.

10. Eyooloko lini lya yela li na okukala pokati kaamboka taya longele Jehova naamboka itaaye mu longele?

¹⁰ Oshitopolwa sha tetekele, otwa kundathana iiholelwa yomOmbiimbeli ngaashi shaKain, Salomo nAaisraeli. Ayehe oya li ye wete taya longele Jehova, ihe iilonga yawo oya li kokule naye. Iiholelwa mbika otayi tu ulukile kutya mboka yaJehova shili, oye na okulonga uuyuuki nokutonda uuwinayi. (Rom. 12:9) Konima sho Maleaki a popi ‘embo’ lyaJehova, Jehova okwa popi “eyooloko pokati komuyuuki nomukolokoshi, pokati komuntu ngoka [te mu] longele . . . naangoka itee shi ningi.” — Mal. 3:18.

11. Omolwashike yalwe ye na okumona kutya tse otatu longele Jehova?

¹¹ Mpaka otapu landula ishewe omukalo gumwe moka tatu vulu okupandula Jehova, sho e tu hogolola tu kale aantu ye. Okuhuma komeho kwetu pambepo naku “monike kwaayehe.” (1 Tim. 4:15; Mat. 5:16) Ipula ngeyi: ‘Mbela yalwe oye wete ngaa kutya ngame omudhiginini kuJehova? Mbela ohandi kongo ngaa ompito ndi tseyithile yalwe kutya ngame Onzapo yaJehova?’ Jehova okwe tu hogolola tu li oshigwana she. Onkee ano, otashi ke mu yemateka noonkondo, ngele otwa kakadhala okulombwela yalwe kutya tse oye. — Eps. 119:46; lesha Markus 8:38.

12, 13. Yalwe ohaye shi ningitha ngiini oshidhigu kaantu ye ya dhimbulule mo kutya oye li Oonzapo dhaJehova?

 ¹² Shiyemateka, Oonzapo dhilwe odhe shi ningitha oshidhigu kaantu ye dhi ‘dhimbulule mo kutya otadhi longele Kalunga nenge hasho,’ shaashi otashi vulika tadhi holele “ombepo yuuyuni mbuka.” (1 Kor. 2:12) Ombepo ndjoka ohayi ningitha aantu ya gandje eitulomo ‘kuuhalu wuuntu.’ (Ef. 2:3) Pashiholelwa, nonando ohatu pewa omayele kombinga yoshinima shono, yamwe onkee ngaa natango ye hole okuzala nokwiiyopaleka momukalo ngoka inaagu hokiwa kuJehova. Ohaya zala oonguwo ndhoka dha ponda kolutu notadhi imonikila, nokuli nuuna ye li puututhi nAakriste ooyakwawo. Nenge tashi vulika ya kululwe nenge ya pandwe momikalo ndhoka inaadhi hokiwa kuJehova. (1 Tim. 2:9, 10) Shoka ohashi etitha iizemo yini? Uuna ye li mokati kaantu, otashi vulika shi kale oshidhigu ya dhimbululwe mo kutya otaya longele Jehova nenge oye na “uukuume nuuyuni.” — Jak. 4:4.

¹³ Opu na omikalo odhindji moka Oonzapo dhimwe hadhi ulike kutya inadhi yanda lela eihumbato lyuuyuni. Uuna dhi li puututhi nAakriste ooyakwawo, ohadhi ndanisa nokwiihumbata momukalo ngoka inaagu hokiwa kuJehova. Ohadhi tula wo omathano nokunyola omatyokosha ngoka taga holola iikala yuuyuni komakwatathano gopaintaneta. Otashi vulika inadhi geelwa megongalo omolweyono lya kwata miiti, ihe otadhi vulu okukala enwethomo ewinayi kwaamboka taya kambadhala okwoopalela Jehova. — Lesha 1 Petrus 2:11, 12.

14. Otu na okuninga shike sha simana, opo tu gamene uukuume wetu naJehova mboka wi ikalekelwa?

¹⁴ Uuyuni otawu humitha komeho “uuhalu wopantu okuhola mbyoka aantu taye yi tala notaye yi itangele.” (1 Joh. 2:16) Molwaashoka otu li oshigwana shaJehova, otatu londodhwa tu “ethe okudhina Kalunga nuuhalu wuuyuni, tse tu kale muuyuni mbuka meikwatonawa, muuyuuki nomokusimaneka Kalunga.” (Tit. 2:12) Onkee ano, oohapu dhetu, okulya nokunwa kwetu, okuzala kwetu nokwiiyopaleka, iilonga yetu nakehe shimwe tatu ningi, nayi ulukile yalwe kutya otatu longele Jehova oye awike. — Lesha 1 Aakorinto 10:31, 32.

15. Omolwashike tu na okuungaunga nooitaali ooyakwetu nombili nonohole?

¹⁵ Otatu vulu wo okuulukila Jehova olupandu, okupitila munkene tatu ungaunga nooitaali ooyakwetu. Nayo wo oyaJehova. Ngele otwa kaleke shoka momadhiladhilo, otatu ka kala aluhe tatu ungaunga naamwatate nonaamwameme nombili nonohole. (1 Tes. 5:15) Jesus okwa li a lombwele aalanduli ye a ti: “Ngele omu holathane, nena aantu ayehe otaa ka dhimbulula kutya one aalongwa yandje.” — Joh. 13:35.

16. Oshiholelwa shini shomOmpango yaMoses tashi ulike nkene Jehova u uvitile oshigwana she?

¹⁶ Opo tu shi thaneke nkene tu na okuungaunga nayalwe megongalo, natu tale koshiholelwa tashi landula. Pethimbo lyonale, iikwaniipangitho motempeli yaJehova, oya li hayi itulilwa, opo yi longithwe owala melongelokalunga lye. Ompango yaMoses oya li ya gandja uuyelele kombinga yankene iikwaniipangitho mbyoka yi na okusilwa oshimpwiyu, naamboka taye yi longitha nayi, oya li haya dhipagwa. (Num. 1:50, 51) Ngele Jehova okwa li a gamene iinima kaayi na omwenyo mbyoka ya li hayi longithwa moku mu longela, osha yela kutya ota ka gamena wo aapiya ye aadhiginini mboka a hogolola ye li aantu ye. Jehova okwa lombwele oshigwana she a ti: “Oongoka te mu gumu, ota gumu ondanda yeho lyandje.” — Sak. 2:8, NW.

17. Jehova oha kala a ‘tala nokupulakena’ kushike?

¹⁷ Maleaki okwa popi kutya Jehova oha kala a ‘tala nokupulakena’ nkene aapiya ye hayi ihumbatelathana. (Mal. 3:16) Jehova “oku ya shi mboka ye.” (2 Tim. 2:19) Oha kala e wete kehe okanima tatu ningi nenge tatu popi. (Heb. 4:13) Ngele itatu ungaunga nawa nooitaali ooyakwetu, Jehova oha kala e tu ‘tala noku tu pulakena.’ Uuna tatu yakula yalwe, tatu ya pe sha, tatu ya dhimine po nokukala nombili nayo, otatu vulu okukala nuushili kutya Jehova oku tu wete. — Heb. 13:16; 1 Pet. 4:8, 9.

18. Ongiini tatu vulu okuulukila Jehova olupandu, sho tu na naye ekwatathano li ikalekelwa?

¹⁸ Odhoshili kutya otwa halelela okuulukila Jehova kutya otwe mu pandula, omolwekwatathano li ikalekelwa ndyoka tu na naye. Otu shi shi kutya sho twe mu iyapulile, otwa ninga etokolo li li pandunge. Nokuli manga tu li “muuyuni mbuka u na aantu ya pilaala noya goyoka,” otwa hala aantu ya mone kutya ‘katu na oshipo notwa yela, tatu adhima mokati kawo, ngashika oonyothi tadhi adhima pombanda kegulu.’ (Fil. 2:15) Ohatu kambadhala okwiikaleka kokule nuuwinayi. (Jak. 4:7) Otu hole notwa simaneka ooitaali ooyakwetu, molwaashono otu shi kutya nayo oyaJehova. — Rom. 12:10.

19. Jehova oha yambeke ngiini oshigwana she?

¹⁹ Ombiimbeli oya uvaneka tayi ti: “[Jehova] ite ekelehi aantu ye.” (Eps. 94:14) Nonando otu kale monkalo ondhigu ya fa peni, Jehova ota ka kala pamwe natse. Nokuli neso itali vulu oku tu topola ko kohole ye. (Rom. 8:38, 39) Ombiimbeli otayi ti: “[Ngele] tatu si, otatu sile koshipala shOmuwa. Onkee ano, ngele otu na omwenyo nenge otatu si, otse oyOmuwa.” (Rom. 14:8) Odhoshili kutya otwa tegelela nondjuulukwe sho Jehova ta ka yumudha aapiya ye aadhiginini mboka ya sa. (Mat. 22:32) Nokunena ohatu nyanyukilwa omayambeko ogendji. Ombiimbeli otayi ti: “Oshigwana oshinelago osho shoka shi na Kalunga kasho [Jehova]; aanelago aantu mboka Omuwa e yi ihogololele.” — Eps. 33:12.