1. Nkaambo nzi Jehova ncajisi nguzu zyakwaamba kuti zintu zyoonse nzizyakwe? (Amubone cifwanikiso icili kumatalikilo aacibalo.)

ZINTU zyoonse nzizya Jehova! ‘Ijulu, naaba majulu aamajulu, alimwi anyika kubikkilizya azintu zyoonse zili mumo.’ (Dt. 10:14; Ciy. 4:11) Aboobo, akaambo kakuti bakalengwa buya, bantu boonse mbiba Jehova. (Int. 100:3) Nokuba boobo, kuzwa ciindi bantu nobakatalika kupona, Leza wali kusala bantu bamwi kuba kulubazu lwakwe munzila iilibedelede.

2. Ino mbaani mu Bbaibbele ibaambidwe kuti mbantu ba Jehova munzila iilibedelede?

² Mucikozyanyo, lugwalo lwa Intembauzyo 135 lwaamba bakombi ba Jehova basyomeka bamu Israyeli yansiku kuti ‘ndubono lwakwe luyandisi.’ (Int. 135:4) Alimwi lugwalo lwa Hosea lwakasinsima kuti bantu bamwi ibatakali bana Israyeli bakali kuyooba bantu ba Jehova. (Hos. 2:23) Businsimi bwa Hosea bwakazuzikizyigwa ciindi Jehova naakabikkilizya abantu ibatakali ba Juda kuba abulangizi bwakulela antoomwe a Kristo. (Mil. 10:45; Rom. 9:23-26) “Cisi cisalala” eeci ‘nciinga ca Leza cilibedelede’ munzila yaalubazu, bantu bali mumo balinanikidwe amuuya uusalala alimwi bakasalwa kuyoopona kujulu. (1Pet. 2:9, 10) Ino mbuti kujatikizya Banakristo banji basyomeka mazuba aano ibajisi bulangizi bwakuyoopona  anyika? Jehova abalo ubaita kuti ‘mbantu’ bakwe alimwi akuti ‘mbasale bakwe.’—Is. 65:22.

3. (a) Ino mbaani ibajisi cilongwe cibotu a Jehova mazuba aano? (b) Ncinzi ncotutiilange-lange mucibalo eeci?

³ Mazuba aano, “katanga kaniini,” nkokuti aabo ibajisi bulangizi bwakuyoopona kujulu, alimwi ‘ambelele zimbi,’ aabo ibajisi bulangizi bwakuyoopona anyika, mbabali ‘mutanga lyomwe’ eelyo Jehova ndyabona kuti mbantu bakwe. (Lk. 12:32; Joh. 10:16) Masimpe, tweelede kumulumba kapati Jehova akaambo kakutupa coolwe cakuba acilongwe cibotu eeci anguwe. Mucibalo eeci, tulalanga-langa nzila ziindene-indene motukonzya kutondezya kulumba kwesu kuli Jehova akaambo kakutupa coolwe eeci cilibedelede.

4. Ninzila nzi yomwe motukonzya kumulumba Jehova akaambo kakupa kuti cikonzyeke kulindiswe kuba acilongwe anguwe, alimwi ino mbuti Jesu mbwaakacita oobo?

⁴ Tulatondezya kulumba kuli Jehova kwiinda mukulyaaba camoyo woonse kulinguwe. Kwiinda mukubbapatizyigwa mumaanzi, tulatondezya caantangalala kuti tuli ba Jehova alimwi akuti tuliyandide kulibombya kulinguwe. (Heb. 12:9) Oobu mbwaakacita Jesu ciindi naakabbapatizyigwa, aboobo munzila imwi, wakaambila Jehova kuti: “Ndilayanda kucita kuyanda kwako, O Leza wangu.” (Int. 40:7, 8, bupanduluzi buyungizyidwe) Jesu wakalyaaba kucita kuyanda kwa Jehova nokuba kuti kuzwa naakazyalwa wakali cibeela camusyobo uulyaabide kuli Leza.

5, 6. (a) Ino Jehova wakalimvwa buti ciindi Jesu naakabbapatizyigwa? (b) Amupe cikozyanyo icitondezya kaambo Jehova ncakukkomanina kulyaaba kwesu kulinguwe, nokuba kuti zintu zyoonse nzizyakwe.

⁵ Ino Jehova wakalimvwa buti ciindi Jesu naakabbapatizyigwa? Bbaibbele lyaamba kuti: “Lino naakamana kubbapatizyigwa, Jesu wakazwa mumaanzi; mpoonya julu lyakajaluka, eelyo wakabona muuya wa Leza ulaseluka mbuli nziba akuboola alinguwe. Alimwi kwakamvwugwa jwi kujulu lyakaamba kuti: ‘Ooyu Mwanaangu ngweyandisya, ngwekkomanina.’” (Mt. 3:16, 17) Nokuba kuti Jesu wakali kale kulubazu lwa Bausyi bakujulu, Jehova wakakkomana kubona kulyaaba kwa Mwanaakwe kutegwa acite kuyanda kwakwe cakumaninina. Mbubwenya buyo, Jehova ulakutambula kulyaaba kwesu, alimwi uyootulemeka kwiinda mukutupa cilongezyo.—Int. 149:4.

⁶ Mucikozyanyo, amweezyeezye kuti mwaalumi wakalima mapopwe manji mumuunda. Mpoonya bumwi buzuba, mwanaakwe musimbi watema popwe lyomwe akupa bausyi kacili cipego. Sena popwe eelyo talili lyabo bausyi mwana ooyo? Mbuti mwana mbwakonzya kupa bausyi popwe lyabo? Cakutadooneka, bausyi balalikkomanina popwe eelyo ilyazwa kumwanaabo kwiinda mapopwe aambi woonse aali mumuunda. Mbubwenya buyo, awalo Jehova ulakkomana ciindi notulyaaba kulinguwe cakumaninina.—Kul. 34:14.

7. Mbuti Malaki mbwaakatondezya mbwalimvwa Jehova kujatikizya baabo bamubelekela cakulyaaba?

⁷ Amubale Malaki 3:16. Ikuti naa tamunalyaaba akubbapatizyigwa, amubone mbociyandika kapati kubweza ntaamu eeyi. Masimpe, kuzwa ciindi nomwakamitwa, muli muntu wa Jehova antoomwe abantu boonse. Nokuba boobo, amuciyeeyele buyo mbocikonzya kumukkomanisya kapati Jehova, ikuti akaambo kakubikkila maano kubweendelezi bwakwe, mwalyaaba kulinguwe alimwi akucita kuyanda kwakwe. (Tus. 23:15) Awalo Jehova ulababikkila maano aabo ibamubelekela cakulyaaba, alimwi ulabalemba mazina aabo ‘mubbuku lyakwiibalusya.’

8, 9. Ino ncinzi Jehova ncayanda kuli baabo ibalembedwe mazina ‘mubbuku lyakwe lyakwiibalusya’?

 ⁸ Kutegwa mazina eesu alembwe ‘mubbuku lya Jehova lyakwiibalusya,’ kuli nzyeelede kucita. Malaki wakaamba cacigaminina kuti tweelede ‘kuyoowa Jehova alimwi akuzinzibala kuyeeya zina lyakwe.’ Kuti twatalika kukomba leza uumbi naa cintu cimbi cili coonse, cilakonzya kupa kuti mazina eesu amwaigwe mubbuku lya Jehova lyabuumi lyacikozyanyo.—Kul. 32:33; Int. 69:28.

⁹ Aboobo, kulyaaba kwesu kuli Jehova takugoleli buyo aakusyomezya kucita kuyanda kwakwe alimwi akubbapatizyigwa mumaanzi, pele kubikkilizya zinji. Kulyaaba akubbapatizyigwa kucitwa buyo ciindi comwe, mpoonya kulainda. Pele kutegwa tuzumanane kuba kulubazu lwa Jehova katuli bantu bakwe, tweelede kuzumanana kumumvwida lino alimwi akumbele, nkokuti kufwumbwa buyo kuti katucipona.—1Pet. 4:1, 2.

10. Ino ndwiindano nzi lweelede kuba akati kabantu babelekela Jehova alimwi abaabo ibatamubelekeli?

¹⁰ Mucibalo cainda twakalanga-langa zibalo zyamu Bbaibbele zyaamba Kaini, Solomoni, alimwi abana Israyeli. Boonse bakali kulitaminina kukomba Jehova, pele bukombi bwabo kulinguwe tiibwakali kuzwa ansi aamoyo. Zikozyanyo eezyi zilatondezya cakusalazya kuti aabo ibali kulubazu lwa Jehova ncobeni beelede kuzumanana kukakatila kubululami alimwi akutantamuka bubi. (Rom. 12:9) Cakweelela, Malaki naakamana kwaamba ‘zyabbuku lyakwiibalusya,’ Jehova wakaamba kujatikizya “lwiindano luliko akati kamuntu mululami amubi, akati kayooyo uubelekela Leza ayooyo uutamubelekeli.”—Malk. 3:18.

11. Nkaambo nzi bantu ncobeelede kuzyiba kuti tukomba buyo Jehova alikke, mbobatubonena buyo?

¹¹ Aboobo njeeyi aimbi nzila mbotukonzya kutondezya kulumba kuli Jehova akaambo kakutusala kuba bantu bakwe. Kuyaambele kwesu kumuuya kweelede ‘kubonwa abantu boonse.’ (1Tim. 4:15; Mt. 5:16) Amulibuzye kuti: ‘Sena kusyomeka kwangu kuli Jehova kulalibonya kubantu? Sena ndilaanguluka kwaambila bamwi kuti ndili Kamboni wa Jehova?’ Jehova inga wausa kapati ikuti naamana kutusala  kuba bantu bakwe, mpoonya katuwayawaya kwaambila bantu kuti tuzulilwa kulinguwe.—Int. 119:46; amubale Marko 8:38.

12, 13. Mbuti bamwi mbobapa kuti kacikatazya kubazyiba kuti Mbaakamboni ba Jehova?

¹² Cuusisya ncakuti, nobaba Bakamboni ba Jehova bamwi batobela “muuya wanyika.” Akaambo kaceeci, tabaindene abaabo ibatamukombi Jehova. (1Kor. 2:12) Ooyo ngomuuya uupa muntu kuyanda kucita “zisusi zyanyama.” (Ef. 2:3) Mucikozyanyo, nokuba kuti kwapegwa lulayo lunji kujatikizya makani aansamino alimwi akulibamba, bamwi bantu bacisama alimwi akulibamba munzila iiteelede. Balasama zisani zijata alimwi zibalangala izitondezya zizo zyamubili nokuba kumiswaangano ya Bunakristo. Balaciindizya mbobagelwa alimwi akubamba masusu. (1Tim. 2:9, 10) Akaambo kakucita boobo, ciindi nobali munkamu, cilakonzya kukatazya kuzyiba uuli kulubazu lwa Jehova alimwi ‘amulongwe wanyika.’—Jak. 4:4.

¹³ Munzila imwi, Bakamboni bamwi tabanaileka cakumaninina micito yanyika. Nzyanino alimwi amicito yabo kumapobwe tazitondezyi zintu zyeelede ku Banakristo. Balatuma mafwoto aabo alimwi akulemba zintu aa intaneti iziteeleli kubantu basimide kumuuya. Nokuba kuti tabanapegwa cisubulo cili coonse mumbungano ya Bunakristo akaambo kacibi cipati, balakonzya kuyunga beenzinyina munzila mbyaabi aabo ibasoleka kuzumanana abukkale bubotu akati kabantu ba Jehova.—Amubale 1 Petro 2:11, 12.

14. Ino ncinzi ncotweelede kucita kutegwa tukwabilile cilongwe cesu cibotu a Jehova?

¹⁴ Nyika isumpula kapati “zisusi zyanyama alimwi azisusi zyameso amambonwa akaambo kazintu nzyajisi muntu.” (1Joh. 2:16) Nokuba boobo, akaambo kakuti tuli bantu ba Jehova, tucenjezyegwa “kukaka bukkale bwakutayoowa Leza azisusi zyanyika akuti tweelede kupona cakulibatamika, cabululami alimwi acakubelekela Leza cakulyaaba mubweende bwazintu obuno.” (Tit. 2:12) Ŋambawido yesu, mbotulya alimwi ambotunywa, nsamino yesu, mbotulibamba alimwi ambotubeleka, nkokuti zyoonse nzyotucita zyeelede kubatondezya bamwi kuti tukomba buyo Jehova alikke.—Amubale 1 Bakorinto 10:31, 32.

15. Nkaambo nzi ncotweelede kubeendelezya calubomba alimwi acaluyando bakombima?

¹⁵ Kulumba kwesu kujatikizya cilongwe cilibedelede ncotujisi a Jehova kulalibonya munzila mbotubeendelezya bakombima. Abalo mbantu ba Jehova. Kuti katukabikkila maano kaambo aaka kayandika kapati, lyoonse tunoobeendelezya calubomba alimwi acaluyando bakwesu abacizyi. (1Tes. 5:15) Jesu wakaambila basikumutobela kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Joh. 13:35.

16. Ncikozyanyo nzi mu Mulawo wa Musa icitondezya mbwalimvwa Jehova kujatikizya bantu bakwe?

¹⁶ Kutegwa tutondezye mbotweelede kweendelezyanya mumbungano, atubone kaambo aaka. Zibelesyo izyakali mutempele lya Jehova zyakalaabidwe, naa kubikkwa ambali, kutegwa kazibelesyegwa buyo kubukombi busalala. Mulawo wa Musa wakapandulula cakusalazya mbozyakeelede kulanganizyigwa zibelesyo eezyi, alimwi kufwumbwa muntu iwatakali kutobela malailile wakeelede kujaigwa. (My. 1:50, 51) Ikuti naa Jehova wakali kuzikwabilila kapati zibelesyo zitaponi izyakali kubelesyegwa mubukombi bwakwe, sena takaindi kukwabilila bakombi bakwe ibalyaabide alimwi ibasyomeka aabo mbaakasala kuba bantu bakwe? Naakali kubandika kubantu bakwe, aciindi cimwi Jehova wakaamba kuti: “Kufwumbwa uumuguma nywebo uguma mboni yaliso lyangu.”—Zek. 2:8.

17. Ino ncinzi Jehova ‘ncabikkila maano akuswiilila?’

¹⁷ Malaki wakaamba Jehova kuti ‘ulabikkila maano akuswiilila’ ciindi bantu bakwe nobayanzana. (Malk. 3:16) Masimpe Jehova “ulibazyi aabo bazulilwa kulinguwe.” (2Tim. 2:19) Ulizizyi kabotu zintu zyoonse nzyotucita alimwi anzyotwaamba. (Heb. 4:13) Ciindi notutababikkili kapati maano bakombima, Jehova ‘ulabikkila maano akuswiilila.’ Notusamausya beenzu, notuba baabi, notulekelela, alimwi anotutondezya luse kuli umwi amweenzinyina, tulakonzya kuba masimpe kuti Jehova ulabona.—Heb. 13:16; 1Pet. 4:8, 9.

18. Mbuti mbotukonzya kutondezya kulumba kwesu kuli Jehova akaambo kabulemu mbwatupede bwakuba bantu bakwe?

¹⁸ Mubwini, tuliyandide kutondezya kulumba kwesu kuli Jehova akaambo kabulemu mbwatupede bwakuba bantu bakwe. Tulizyi kuti twakasala cabusongo kulyaaba kulinguwe. Nokuba kuti tupona “akati kazyalani lyabantu bampelenge alimwi bapilingene,” tuyanda kuti bantu babone kuti tuli ‘bantu banyina mulandu, ibanyina butongo,. . . ibamweka mbuli mimuni munyika eeyi.’ (Flp. 2:15) Tulabukaka bubi. (Jak. 4:7) Alimwi tulabayanda akubalemeka bakombima, nkaambo abalo mbantu ba Jehova.—Rom. 12:10.

19. Mbuti Jehova mbwabalumbula aabo ibali kulubazu lwakwe?

¹⁹ Bbaibbele lisyomezya kuti: “Jehova takabalekelezyi bantu bakwe.” (Int. 94:14) Cisyomezyo eeci cisinizyide cilabeleka nokuba kuti tulakonzya kucitikilwa penzi lili lyoonse. Noluba lufwu talukonzyi kusinkilila luyando ndwajisi Jehova kulindiswe. (Rom. 8:38, 39) “Ikuti naa tulapona, tuponena Jehova, alimwi ikuti naa twafwa, tufwida Jehova. Aboobo kufwumbwa naa tulapona naa twafwa, tuli bantu ba Jehova.” (Rom. 14:8) Caluyandisisyo, tulangila kumbele kubuzuba Jehova nayoobusya balongwe bakwe boonse basyomeka ibakafwa. (Mt. 22:32) Noliba lino, tulijisi zilongezyo zinji. Kweelana ambolyaamba Bbaibbele, “cilikkomene cisi cijisi Jehova kuba Leza wancico, ibantu mbaasala kuba lukono lwakwe.”—Int. 33:12.