1. Малы ми вераны быгатӥськомы, ваньмыз Иеговалэн шуыса? (Учке статья кутсконысь туспуктэмез.)

 ВАНЬМЫЗ Иеговалэн — «ин но инъёслэн инъёссы, музъем но мар со вылын вань» (К. Зак. 10:14; Усьт. 4:11). Иегова адямиосты кылдытӥз бере, соос но солэн луо (Пс. 99:3). Но вань дауръёс ӵоже Инмар бырйиз соосты, кинъёс солэн нимысьтыз быръем калыкез луозы.

2. Кинъёс Иеговалэн нимысьтыз люкетэз луо?

² Кылсярысь, 134-тӥ Псаломын вашкала дыръёсы улӥсь оскымон израиль калык сярысь верамын, со нимысьтыз «узырлык луиз» шуыса (Пс. 134:4). Нош Осиялэн книгаяз азьло ик верамын вал, куд-огез израиль калыкысь луисьтэм адямиос но Иеговалэн калыкез пӧлы пырозы шуыса (Ос. 2:23). Осиялэн верамез быдэсмиз, куке Иегова мукет калыкъёсысь адямиосты бырйыны кутскиз, соос азьланяз Христосэн ӵош  мед кивалтозы шуыса (Ап. уж. 10:45; Рим. 9:23—26). Та «святой калык» — Иеговалэн нимысьтыз люкетэз (1 Пётр 2:9, 10). Соос, кинъёс со калык пӧлы пыро, святой духен зырӟемын но инмын улозы. Нош мар вераны луоз тросэз Инмарлы оскымон христианъёс сярысь, кудъёсыз музъем вылын улыны оско? Иегова соосты но «мынам калыке» но «мынам быръемъёсы» шуыса нима (Ис. 65:22).

3. а) Кинъёс туннэ Иеговаен нимысьтыз кусыпъёс возё? б) Мар сярысь вераськон мыноз та статьяын?

³ Инмын улыны оскись «пичи уллё» но музъем вылын улыны оскись «мукет ыжъёс» туннэ «одӥг уллё» луо (Лука 12:32; Иоанн 10:16). Иегова соосты одӥг калыкен лыдъя. Ми туж тау кариськомы Иеговалы сыӵе нимысьтыз дан понна! Та статьяын ми вераськомы со сярысь, кызьы ми солы тау кареммес возьматыны быгатомы.

4. Кызьы ми Иеговалы тау кареммес возьматыны быгатомы, солэн калыкез пӧлы пырыны луонлык понна? Кызьы Иисус Инмарлэсь эриксэ быдэсъяны дась луэмзэ возьматӥз?

⁴ Ми Иеговалы тау кареммес возьматӥськомы, куке вань сюлмысьтымы солы улонмес сӥзиськомы. Вуын пылатӥськыса, ми ватытэк ваньмыз азьын возьматӥськомы, Иегова милям кузёмы но милям солэсь кылзӥськеммы потэ шуыса (Евр. 12:9). Иисус но пылатӥськыкуз сое ик возьматӥз. Со вераз Иеговалы: «Инмаре, мынам Тынэсьтыд эриктэ быдэсъяса улэме потэ» (Пс. 39:8, 9). Иисус Иеговалы сӥзем калыкын вордӥськиз. Озьы ке но со аслэсьтыз улонзэ Иеговалы сӥзиз на.

5, 6. а) Кыӵе шӧдонъёсыз вал Иеговалэн, Иисуслэсь пылатӥськемзэ адӟыса? б) Вералэ пример, кудӥз возьматэ, кызьы Иегова сӥзиськеммы шоры учке.

⁵ Кыӵе шӧдонъёсыз вал Иеговалэн, Иисуслэсь пылатӥськемзэ адӟыса? Библиын верамын: «Пылатӥськем бераз соку ик Иисус вуысь потӥз — соку Со азьын инбам усьтӥськиз. Иоанн дыдык выллем васькись Инмарлэсь Духсэ адӟиз, Со Иисус вылэ лэзиськиз. Соку инмысен куара кылӥськиз: „Та Мынам Яратоно Пие, Со бордын Мынам ӟеч эрике“» (Матф. 3:16, 17). Иисус инмысь Атаезлэн вал ини, озьы ке но Иегова туж шумпотӥз, куке адӟиз, солэн Пиез солы гинэ ужаны-тыршыны мылкыд каре шуыса. Иегова озьы ик шумпотэ, куке ми солы улонмес сӥзиськомы, но со милемыз бакель каре (Пс. 149:4).

⁶ Пуктэ син азяды: атай нылызлы кык конфет сётэ. Нош нылыз одӥг конфетсэ атаезлы берен кузьма. Но со конфет атаезлэн ик ӧй вал-а? Кызьы нылыз атаезлы кузьманы быгатэ сое, мар сотэк но атаезлэн вал? Яратӥсь атай со сярысь уз но малпа. Со нылызлэсь кузьымзэ шумпотыса басьтоз но адӟоз, нылыз сое яратэ шуыса. Солэн кузьымез солы туж дуно потоз. Иегова но озьы ик шумпотэ, куке адӟе, кызьы ми вань сюлмысьтымы солы улонмес сӥзиськомы,  солы гинэ ужан-тыршон понна (Пот. 34:14).

7. Малахиялэн верамезъя, кызьы учке Иегова солы сюлмысь ужась-тыршисьёс шоры?

⁷ Лыдӟе Малахиялэсь 3:16. Тӥ улондэс Иеговалы ӧд сӥзе но ӧд пылатӥське на ке, малпаське, макем кулэ луись вамыш со. Зэм, музъем вылысь вань адямиос сямен ик, тӥ но вордӥськемдылэсь азьло ик ини Иеговалэн вал. Но малпалэ ай, макем шумпотоз Иегова, куке тӥ сое асьтэлэн кивалтӥсеныды лыдъяны кутскоды но улондэс солэсь эриксэ быдэсъянлы сӥзёды! (Мад. 23:15). Иегова тодэ солы сюлмысь ужась-тыршисьёсты но соослэсь нимъёссэс «буре ваён книгае» гожтэ.

8, 9. Мае Иегова возьма соослэсь, кинъёслэн нимъёссы «буре ваён книгае» гожтэмын?

⁸ Милям потэ ке, Иегова ниммес «буре ваён книгае» мед гожтоз шуыса, милемлы мар ке но кароно. Малахия верамъя, милемлы Иеговалэсь кышкано но солэн нимыз сярысь малпаськоно. Иеговалы сяна, кинлы ке яке малы ке эшшо йыбыртъяны кутскимы ке, милям ниммы Иеговалэн «улон книгаысьтыз» ӵушемын луоз (Усьт. 3:5; Пот. 32:33).

⁹ Иеговалы улонмес сӥзиськомы шуыса кылмес сётыны но пылатӥськыны гинэ ӧжыт. Сӥзиськон но пылатӥськон одӥг пол гинэ луэ, нош Инмарлы вань улытозямы ужано-тыршоно. Милемлы котькуд нунал возьматоно, ми Иеговалэсь кылзӥськиськомы шуыса (1 Пётр 4:1, 2).

10. Маин ог-огзылэсь висъяськыны кулэ Иеговалы ужаса-тыршыса улӥсьёс но солы ужатэк-тыршытэк улӥсьёс?

¹⁰ Кылемаз статьяын ми эскеримы Каинлэсь, Соломонлэсь но вашкала израиль калыклэсь примерзэс. Ваньзы соос малпазы, Иеговалы йыбыртъяло шуыса, но соос вань лулынызы-сюлмынызы солы оскымон ӧй вал. Соослэн примерысьтызы адӟиське: ми Иеговалы ужаськомы-тыршиськомы шуыса вераны гинэ тырмыт ӧвӧл. Милемлы кулэ ӟечез яратыны, нош уродэз адӟемпотостэм карыны (Рим. 12:9). Тунсыко, «буре ваён книга» сярысь веракуз, Малахия Иеговалэсь таӵе кылъёссэ гожтӥз: «Тӥ нош ик адӟыны быгатоды шонер улӥсьлэсь но сьӧлыклэсь кышкатэк улӥсьлэсь маин ог-огзылэсь висъяськемзэс, Инмарлы ужаса улӥсьлэсь но Солы ужатэк-тыршытэк улӥсьлэсь пӧртэмлыксэс» (Мал. 3:18).

11. Малы котырысь адямиос адӟыны кулэ, ми Иегова палан шуыса?

¹¹ Кызьы эшшо Иеговалы тау кареммес возьматыны быгатомы, милемлы солэн калыкез пӧлын луыны сётэм дан понна? Котырысь адямиос адӟыны кулэ, ми Иегова палан шуыса (Матф. 5:16; 1 Тим. 4:15). Юалэ асьтэлэсь: «Котырысь адямиос адӟо-а, мон Иеговалы быдэсак оскымон шуыса? Уг возьдаськиськы-а мон вераны, мон Иеговалэн Адӟись-Ивортӥсез шуыса, куке сыӵе луонлык кылдэ?» Малпалэ, макем Иегова ӝоже усьысал, ми солэн адямиосыз  луиськомы шуыса вераны дӥсьтымтэмес адӟысал ке (Пс. 118:46; лыдӟе Марклэсь 8:38).

12, 13. Малы куд-ог христианъёс шоры учкыса, шуг вераны, соос Иеговалэн ужась-тыршисьёсыз шуыса?

¹² Жаляса верано луэ, куд-ог христианъёс «та дуннелэн духезлы» сётскизы, но куддыръя шуг валаны, маин соос висъясько Иеговалы ужатэк-тыршытэк улӥсьёслэсь (1 Кор. 2:12). «Та дуннелэн духез» адямиосты «лулмугорлэн кулэяськонъёсызлы» тэрытскыса улыны косэ (Еф. 2:3). Кылсярысь, вылтус пумысен ӵемысь визь-кенешъёс сётъяло ке но, куд-огъёсызлэн сыӵе дӥськутсы но вылтуссы, кудӥзъя уд вера, соос зӥбыт-востэмесь шуыса. Соос туж сюбег яке мугорез умой ворсасьтэм дӥськут нулло но христиан пумиськонъёсы озьы ик ветло. Нош куд-огъёсыз йырсизэс йӧспӧртэм карыса нулло яке йӧспӧртэм ӵышкисько (1 Тим. 2:9, 10). Сыӵе адями шоры учкыса, шуг вераны, со Иеговалы яке «таизлы дуннелы эш» луэ (Иак. 4:4).

¹³ Иеговалэн куд-ог Адӟись-Ивортӥсьёсыз вылын та дуннелэн духез мукет сямен шӧдӥське. Шулдыръяськонъёсын эктэмзыя но асьсэды воземзыя уг луы вераны, соос христианъёс шуыса. Социальной сетьёсы интыям туспуктэмъёссы но гожъямъёссы шоры учкыса, соослэн Инмарен матысь кусыпъёссы шуыны уг луы. Соос секыт сьӧлык ӧз лэсьтэ, вылды, кудӥз понна кенешын кыл кутытэмын луысалзы, но соослэн  мылкыдзы люкетыны быгатэ со христианъёслы, кудъёсыз вань кужмысьтызы тыршо та дуннелэсь пӧртэм луыны. (Лыдӟе 1 Пётрлэсь 2:11, 12.)

14. Мар милемлы кароно, Иеговаен нимысьтыз кусыпъёсмес утеммы потэ ке?

¹⁴ Та дунне милесьтым мылкыдмес ӝутэ лулмугорлэн ортчыт кужмо кулэ каронъёсызъя, синъёслэн уродлы синмаськонзыя улыны но вылтӥяськыны (1 Иоанн 2:16). Но ми Иеговалэн адямиосыз, соин ик милемлы «сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь» куштӥськоно но «таяз улон даурын дун-шектэм, шонерлыко, вӧсяськыса» улоно (Тит. 2:12). Милям вераськонъёсмы, дӥськутмы, вылтусмы, уж, сиён но вина шоры учкеммы, мукет кылъёсын вераса, быдэс улонмы, возьматыны кулэ, ми Иеговалэн адямиосыз шуыса. (Лыдӟе 1 Коринфъёслы 10:31, 32.)

15. Малы милемлы тыршоно огъя оскисьёсмес яратыны но соослы ӟеч ужъёс лэсьтыны?

¹⁵ Иеговаен эшъяськыны луонлык понна тау кареммы адӟиськоз отысь, кызьы ми асьмеды возиськомы вын-агайёсынымы но сузэр-апайёсынымы. Соос но Иеговалэн адямиосыз. Ми сое тодамы возиськомы ке, котьку тыршомы соосты яратыны но соослы ӟеч ужъёс лэсьтыны (1 Фес. 5:15). Иисус вераз аслаз дышетскисьёсызлы: «Куспады яратонды луиз ке, тӥ Мынам дышетскисьёсы шуыса,  тӥледыз ваньмыз тодмалозы» (Иоанн 13:35).

16. Кызьы Моисейлэн законысьтыз адӟиське, Иегова аслэсьтыз ужась-тыршисьёссэ дунъя шуыса?

¹⁶ Ойдолэ эскеромы примерез, кудӥз возьматэ, кызьы учконо кенешысьтымы вын-агайёс но сузэр-апайёс шоры. Храмысь арбериосты Иеговалы йыбырттонын гинэ уже кутыны косэмын вал. Кызьы соосты уже кутоно, пыр-поч верамын вал Моисейлэн законаз. Нош кин ке солэсь уг кылзӥськы вал ке, сое кулон возьма вал (Лыд. 1:50, 51). Иегова сокем чакла вал ке сое, кызьы со арбериосты уже куто, соку макем со чакла сое, кызьы адямиос асьсэды возё солэн ужась-тыршисьёсыныз! Одӥг пол Иегова аслаз калыкезлы вераз, соос борды йӧтӥськись мурт, солэн синчеберез борды йӧтӥське шуыса (Зах. 2:8).

17. Мае адӟе Иегова?

¹⁷ Малахиялэн книгаяз верамын, Иегова «адӟе, кылэ» шуыса, мар солэн ужась-тыршисьёсыз ог-огзылы верало (Мал. 3:16). Бен, «аслэсьтызъёссэ Кузё-Инмар тодма» (2 Тим. 2:19). Солы ваньмыз тодмо: мар ми кариськомы но мар вераськомы (Евр. 4:13). Вын-агайёсынымы но сузэр-апайёсынымы асьмеды уродэн возиськомы ке, Иегова сое адӟе. Нош ми мукетъёссэ куно кариськомы, простить кариськомы, соослы шырыт но ӟеч сяммес возьматӥськомы ке, оскыны быгатӥськомы, сое но Иегова адӟе шуыса (Евр. 13:16; 1 Пётр 4:8, 9).

18. Кызьы ми тау кареммес возьматӥськомы Иеговалэн калыкез пӧлын луыны сётэм дан понна?

¹⁸ Ми туж тау кариськомы Иеговалы, милемлы солэн калыкез пӧлын луыны дан сётэмын шуыса. Улонмес Инмарлы сӥзьыны ужпум кутӥськомы ке, со самой визьмо ужпум. «Сьӧлыко, сӧриськем калык пӧлын» улыса но, ми быгатӥськомы «дун-шектэм» луыны но «шунды кадь пиштыса» улыны (Флп. 2:15). Соин ик ми тыршиськомы палэнскыны ваньмызлэсь, мае Инмар адӟемпотостэм каре (Иак. 4:7). Озьы ик, ми вын-агайёсмес но сузэр-апайёсмес яратӥськомы но гажаськомы, малы ке шуоно валаськомы, соос но Иеговалэн адямиосыз шуыса (Рим. 12:10).

19. Кызьы Иегова аслэсьтыз адямиоссэ бакель каре?

¹⁹ Библия оскытэ: «Кузё-Инмар Аслэсьтыз калыксэ уз кушты» (Пс. 93:14). Иегова кылзэ сётэ, мар гинэ медаз луы, со котьку милемын луоз шуыса. Кулон гинэ но уз люкеты солы милемыз яратыны (Рим. 8:38, 39). Римъёслы 14:8 верамын: «Улӥськомы-а — Кузё-Инмар понна улӥськомы, кулӥськомы-а — Кузё-Инмар понна кулӥськомы. Соин ик улӥськомы-а яке кулӥськомы-а,— асьмеос Кузё-Инмарлэн». Ми ӵыдытэк витиськомы со дырез, куке Иегова аслэсьтыз оскымон эшъёссэ улӟытоз (Матф. 22:32). Али но Инмар милемыз трос бакель каре. Псалтирьын 32:12 гожтэмын: «Шудо со калык, кинлэн Инмарез Кузё-Инмар луэ, адямиос, кудъёссэ Со Аслыз люкетлы бырйиз».