1. Kay ano nga may katungod hi Jehova ha pagsiring nga panag-iya niya an ngatanan? (Kitaa an retrato hini nga pahina.)

HI Jehova an tag-iya han ngatanan! Iya “an langit ngan an langit ha mga langit, an tuna ngan an ngatanan nga aada hini.” (Deut. 10:14; Pah. 4:11) Tungod kay hi Jehova an naglarang ha mga tawo, kita ngatanan panag-iya niya. (Sal. 100:3) Pero ha bug-os nga kasaysayan han tawo, an Dios nagpili hin espisipiko nga mga grupo hin mga tawo nga magigin panag-iya niya ha espesyal nga paagi.

2. Hin-o an gin-uunabi ha Biblia nga panag-iya ni Jehova ha espesyal nga paagi?

² Pananglitan, gin-uunabi han Salmos 135 an matinumanon nga mga magsiringba ni Jehova ha kadaan nga Israel sugad nga “iya kalugaringon nga pagtipig” o espesyal nga propyedad. (Sal. 135:4) Sugad man, an libro han Hosea nagtagna nga may pipira nga diri Israelita nga magigin katawohan ni Jehova. (Hos. 2:23) An tagna ni Hosea natuman han nagpili liwat hi Jehova hin mga diri Judio basi magin mga igkasi-magmarando han Kristo. (Buh. 10:45; Roma 9:23-26) Inin “baraan nga nasud” amo an “espesyal nga panag-iya” ni Jehova ha makatirigamnan nga paagi, kay an mga membro hini gindihogan pinaagi han baraan nga espiritu ngan ginpili basi mabuhi ha langit. (1 Ped. 2:9, 10) Kumusta man an kadam-an han matinumanon nga mga Kristiano yana nga may tunan-on nga paglaom? Gintatawag liwat  hira ni Jehova nga iya “katawohan” ngan iya “mga pinili.”​—Isa. 65:22.

3. (a) Hin-o an may espesyal nga relasyon kan Jehova yana? (b) Ano an hihisgotan hini nga artikulo?

³ Yana, an “gutiay nga panon” nga may langitnon nga paglaom, ngan an “iba nga mga karnero” nga may tunan-on nga paglaom an nagkukompwesto han “usa nga panon” nga gintatagad gud ni Jehova sugad nga iya katawohan. (Luc. 12:32; Juan 10:16) Karuyag gud naton ipakita kan Jehova an aton hilarom nga apresasyon kay gintugotan kita niya nga magkaada espesyal nga relasyon ha iya. Hihisgotan hini nga artikulo an iba-iba nga paagi nga maipapakita naton an aton pagpasalamat kan Jehova kay iginhatag niya ha aton inin espesyal nga pribilehiyo.

4. Ano an usa nga paagi nga mapapasalamatan naton hi Jehova kay ginhimo niya nga posible an pagkaada relasyon ha iya, ngan paonan-o hi Jesus nagbuhat hin puropariho hito?

⁴ Iginpapakita naton an aton apresasyon kan Jehova pinaagi han bug-os-kasingkasing nga pagdedikar han aton kalugaringon ha iya. Pinaagi han bawtismo ha tubig, pormal nga iginpapakilala naton ha publiko nga panag-iya kita ni Jehova ngan andam kita magpasakop ha iya. (Heb. 12:9) Hi Jesus nagbuhat hin puropariho hito. Han ginbawtismohan hiya, sugad hin nagsiring hiya kan Jehova: “Nalilipay ako hin pagsugot han imo kaburut-on, Oh Dios nakon.” (Sal. 40:7, 8) Iginpresentar ni Jesus an iya kalugaringon ha pagbuhat han kaburut-on ni Jehova, bisan kon tikang ha katawo bahin na hiya han nasud nga dedikado ha Dios.

5, 6. (a) Ano an gin-abat ni Jehova han nagpabawtismo hi Jesus? (b) Ig-ilustrar kon kay ano nga gin-aapresyar ni Jehova an aton dedikasyon, bisan kon hiya an tag-iya han ngatanan.

⁵ Ano an gin-abat ni Jehova han nagpabawtismo hi Jesus? An Biblia nasiring: “Katapos mabawtismohan hi Jesus, hinaw-as dayon hiya ha tubig, ngan naabrihan an langit, ngan nakita ni Juan an espiritu han Dios nga sugad hin sarapati nga nalusad ngada kan Jesus. May tingog liwat tikang ha langit nga nagsiring: ‘Ini an akon Anak nga hinigugma, nga akon nalilipayan.’” (Mat. 3:16, 17) Bisan kon hi Jesus panag-iya na han iya langitnon nga Amay, nalipay hi Jehova nga makita an pagin andam han iya Anak nga buhaton an Iya gud la kaburut-on. Nalilipay liwat hi Jehova nga karawaton an aton dedikasyon, ngan bibendisyonan kita niya.​—Sal. 149:4.

⁶ Ha pag-ilustrar, hunahunaa an usa nga lalaki nga nagtanom hin damu nga mag-opay nga bukad ha iya garden. Usa ka adlaw, an iya gutiay nga anak nga babaye nagkuha hin usa nga bukad ngan iginregalo ito ha iya. Diri ba panag-iya na niya an bukad? Paonan-o maihahatag han iya anak ha iya an usa nga butang nga panag-iya na man niya? An mahigugmaon nga tatay diri ngani maghuhunahuna hito nga mga pakiana. Lugod, malilipay hiya ha pagkarawat han regalo sugad nga kapahayagan han gugma han iya anak ha iya. Sigurado nga mas papabilhan niya ito nga usa nga bukad tikang ha iya anak kay han iba pa nga bukad ha iya garden. Nalilipay liwat hi Jehova kon kinaburut-on nga iginhahatag naton ha iya an aton eksklusibo nga debosyon.​—Eks. 34:14.

7. Paonan-o ginpabug-atan ni Malakias an inaabat ni Jehova para hadton kinaburut-on nga nag-aalagad ha iya?

⁷ Basaha an Malakias 3:16. Kon waray ka pa magdedikar ngan magpabawtismo, hunahunaa an pagkaimportante han pagbuhat hito. Ha tinuod la, tikang han ineksister ka, panag-iya ka na ni Jehova, pariho han iba pa nga mga tawo. Pero hunahunaa an daku nga kalipay ni Jehova kon magdedikar ka ha iya ngan magbuhat han iya kaburut-on, sugad nga pagkilala han iya pagkasoberano. (Prob. 23:15) Kilala ni Jehova adton kinaburut-on nga nag-aalagad ha iya, ngan iginsusurat niya an ira mga ngaran ha iya “basahon ha panumduman.”

8, 9. Ano an igin-oobligar ni Jehova hadton an mga ngaran iginsurat ha iya “basahon ha panumduman”?

 ⁸ An kahisurat han aton ngaran dida ha “basahon ha panumduman” ni Jehova sugad nga iya katawohan may kaupod nga mga obligasyon. Hi Malakias espisipiko nga nagsiring nga kinahanglan kita ‘mahadluk kan Jehova ngan maghunahuna ha iya ngaran.’ Kon magsisingba kita ha bisan hin-o o bisan ano labot ha Iya, magriresulta ito hin kapara han aton ngaran tikang han kan Jehova simboliko nga basahon han kinabuhi.​—Eks. 32:33; Sal. 69:28.

⁹ Salit an aton dedikasyon kan Jehova diri la nag-uupod han seryoso nga saad nga buhaton an iya kaburut-on ngan magpabawtismo. Ini nga mga pitad makausa la ginbubuhat ngan madagmit la magin bahin han naglabay. An aton pagdapig kan Jehova sugad nga iya katawohan nagkikinahanglan hin padayon nga pagsugot ha iya yana ngan ha tidaraon​—samtang buhi kita.​—1 Ped. 4:1, 2.

10. Ano nga matin-aw nga kaibahan an kinahanglan makita butnga hadton nag-aalagad kan Jehova ngan hadton diri nag-aalagad ha iya?

¹⁰ Ginhisgotan han nahiuna nga artikulo an mga asoy han Biblia mahitungod kan Cain, kan Solomon, ngan ha mga Israelita. Hira ngatanan nag-angkon nga nagsisingba kan Jehova, pero an ira debosyon ha iya diri eksklusibo. Ini nga mga ehemplo matin-aw nga nagpapakita nga adton tinuod nga panag-iya ni Jehova kinahanglan marig-on nga dumapig ha katadongan ngan mangalas ha karaotan. (Roma 12:9) Angayan la nga katapos unabihon ni Malakias an “basahon ha panumduman,” hi Jehova nag-unabi han “ginkakalainan han matadong ngan han maraut, han ginkakalainan niya nga nagaalagad ha Dios ngan niya nga diri nagaalagad ha iya.”​—Mal. 3:18.

11. Kay ano nga sadang makita han iba nga iginhahatag naton kan Jehova an aton eksklusibo nga debosyon?

¹¹ Salit iini an usa pa nga paagi nga maipapakita naton an aton apresasyon kan Jehova ha pagpili niya ha aton sugad nga iya katawohan. An aton espirituwal nga pag-uswag kinahanglan “makita gud han mga tawo.” (1 Tim. 4:15; Mat. 5:16) Pakianhi an imo kalugaringon: ‘An akon ba bug-os nga pagkamaunungon kan Jehova nakikita han iba? Namimiling ba ako hin mga higayon basi magpakilala nga Saksi ni Jehova ako?’ Masusubo gud hi Jehova kon katapos kita niya pilion sugad nga iya katawohan, mag-aalang kita nga  ipahibaro ha iba nga panag-iya kita niya.​—Sal. 119:46; basaha an Marcos 8:38.

12, 13. Ano an ginbubuhat han iba salit makuri na hira makilala sugad nga mga Saksi ni Jehova?

¹² Makasurubo, haros diri na makita ha pipira nga indibiduwal an ginkakalainan butnga han ira pag-alagad ha Dios ngan han ira diri pag-alagad ha iya kay nagsusubad hira ha “espiritu han kalibotan.” (1 Cor. 2:12) Ito nga espiritu nakakaaghat ha usa nga sundon an iya “makasasala nga mga hingyap.” (Efe. 2:3) Pananglitan, bisan pa han ngatanan nga sagdon may kalabotan ha pamado ngan pag-ayos, may pipira nga nagpipili la gihapon hin mga estilo nga diri desente. Nagsusul-ot hira hin mga bado nga sobra ka fitting ngan malaw-ay pagkit-on, bisan ha Kristiano nga mga katirok. O ginsusubad nira an diri kaangayan nga mga arot ngan mga estilo han buhok. (1 Tim. 2:9, 10) Sugad nga resulta, kon aada hira ha kadam-an, bangin makuri makilala kon hin-o an panag-iya ni Jehova ngan kon hin-o an “sangkay han kalibotan.”​—San. 4:4.

¹³ May iba pa nga paagi diin may pipira nga Saksi nga waray magsalikway hin bug-os ha kalibotanon nga panggawi. An ira pagsayaw ngan mga panggawi ha mga parti diri na kaangayan para ha mga Kristiano. Nagpu-post hira hin ira mga piktyur ngan nagkukomento ha social media nga nagpapakita han ira unudnon nga panhunahuna. Bangin waray hira madisiplina ha Kristiano nga kongregasyon tungod han seryoso nga sala, pero puydi hira magin maraot nga impluwensya ha kabugtoan nga nangangalimbasog nga matipigan an maopay nga panggawi.​—Basaha an 1 Pedro 2:11, 12.

14. Ano an kinahanglan naton buhaton basi maprotektaran an aton espesyal nga pakigsangkay kan Jehova?

¹⁴ Igin-aaghat gud han kalibotan “an hingyap han unod ngan an hingyap han mga mata ngan an paghambog han mga gintatag-iya han usa.” (1 Juan 2:16) Pero tungod kay panag-iya kita ni Jehova, ginsasagdonan kita nga “isalikway an pagin diri-diosnon ngan an kalibotanon nga mga hingyap, ngan magkinabuhi nga may maopay nga panhunahuna ngan pagkamatadong ngan debosyon ha Dios samtang adi kita hini nga sistema.” (Tito 2:12) Ha aton panyakan, pagkaon ngan pag-inom, pamado ngan pag-ayos, ngan pamatasan ha trabaho​—ha ngatanan naton nga ginbubuhat—​sadang makita han iba nga iginhahatag naton kan Jehova an aton eksklusibo nga debosyon.​—Basaha an 1 Corinto 10:31, 32.

15. Kay ano nga sadang kita magin buotan ngan mahigugmaon ha aton pagtratar ha mga igkasi-tumuroo?

¹⁵ An aton apresasyon ha espesyal nga pakigsangkay ni Jehova makikita ha aton pagtratar ha mga igkasi-tumuroo. Hira liwat panag-iya ni Jehova. Kon hihinumdumon naton ito nga kamatuoran, pirme kita magigin buotan ngan mahigugmaon ha aton pagtratar ha aton kabugtoan. (1 Tes. 5:15) Hi Jesus nagsiring ha iya mga sumurunod: “Tungod hini an ngatanan mahibabaro nga mga disipulo ko kamo, kon naghihigugmaay kamo.”​—Juan 13:35.

16. Ano nga ehemplo ha Mosaiko nga Balaud an nag-iilustrar han gin-aabat ni Jehova ha iya katawohan?

¹⁶ Basi ig-ilustrar kon paonan-o naton sadang trataron an usa kag usa ha kongregasyon, tagda an masunod. An mga garamiton ha templo ni Jehova igindedikar, o iginlain, para gud la ha putli nga pagsingba. Gindetalye han Mosaiko nga Balaud kon paonan-o aatamanon ini nga mga garamiton, ngan an mga diri masunod papatayon. (Num. 1:50, 51) Kon ginprotektaran gud ni Jehova an waray kinabuhi nga mga butang nga gin-gamit ha pagsingba ha iya, labi na gud nga puprotektaran niya an dedikado ngan maunungon niya nga mga magsiringba nga iya ginpili sugad nga iya katawohan! Makausa, hi Jehova nagsiring ha iya katawohan: “Hiya nga nakawkaw ha iyo nakawkaw han tawotawo han [akon] mata.”​—Sak. 2:8.

17. Ha ano hi Jehova naghahatag hin atensyon ngan ‘namamati’?

¹⁷ Makapainteres nga iginhulagway ni Malakias hi Jehova sugad nga naghahatag hin atensyon ngan ‘namamati’ samtang an Iya katawohan nag-iiristorya. (Mal. 3:16) Hi Jehova ‘nakilala ha iya mga gintatag-iya.’ (2 Tim. 2:19) Maaram gud hiya han tagsa nga butang nga aton ginbubuhat ngan ginyayakan. (Heb. 4:13) Kon diri kita nagigin buotan ha aton mga igkasi-tumuroo, hi Jehova naghahatag hin atensyon ngan ‘namamati.’ Kon maabiabihon kita, mahinatagon, mapinasayloon, ngan buotan ha usa kag usa, makakasiguro kita nga nakikita liwat ito ni Jehova.​—Heb. 13:16; 1 Ped. 4:8, 9.

18. Paonan-o naton maipapakita an aton apresasyon ha pribilehiyo nga magin katawohan ni Jehova?

¹⁸ Sigurado nga karuyag gud naton ipakita kan Jehova an aton apresasyon ha pribilehiyo nga magin iya katawohan. Nasasabtan naton nga maaramon gud an pagkilala nga panag-iya kita niya pinaagi han kinaburut-on nga pagdedikar han aton kalugaringon ha iya. Bisan kon nagkikinabuhi kita “ha butnga hinin maraot ngan matinalapason nga henerasyon,” karuyag naton nga makita han mga tawo nga kita ‘waray ikasaway ngan inosente, nga naglalamrag sugad hin mga sugâ ha kalibotan.’ (Fil. 2:15) Marig-on nga nakontra kita ha karaotan. (San. 4:7) Ngan ginhihigugma ngan ginrirespeto naton an aton mga igkasi-tumuroo ngan ginkikilala nga hira liwat panag-iya ni Jehova.​—Roma 12:10.

19. Paonan-o ginbabalosan ni Jehova adton mga panag-iya niya?

¹⁹ An Biblia nagsasaad: “Diri ni Jehova isisikway an iya katawohan.” (Sal. 94:14) Inin marig-on nga garantiya diri nagbabag-o anoman nga kalamidad an bangin mahitabo ha aton. Bisan an kamatayon diri makakaulang ha gugma ni Jehova ha aton. (Roma 8:38, 39) “Kon nabubuhi kita, nabubuhi kita para kan Jehova, ngan kon mamatay kita, mamamatay kita para kan Jehova. Salit buhi man kita o mamatay, kan Jehova kita.” (Roma 14:8) Ginpapamulat gud naton an panahon nga banhawon na ni Jehova an ngatanan niya nga maunungon nga kasangkayan nga namatay. (Mat. 22:32) Bisan yana nagpapahimulos kita hin damu nga bendisyon. Sugad han siring han Biblia, “bulahan an nasud nga hi Jehova amo an iya Dios, an katawohan nga ginpili nga iya kalugaringon nga panurundon.”​—Sal. 33:12.