我哋屬於耶和華
“以耶和華為上帝嘅國家幾咁有福！蒙上帝揀選為産業嘅民族幾咁有福！”——詩篇33:12
1．點解話耶和華擁有一切？（請睇吓課文開頭嘅圖片）
一切都係屬於耶和華嘅！聖經話：“天同天上嘅天、地同地上嘅一切，都係耶和華你上帝嘅。”（申命記10:14；啟示錄4:11）因為耶和華創造人類，所以所有人都屬於佢。（詩篇100:3）不過，喺唔同嘅時代，耶和華用特别嘅方式揀選某啲人歸於佢。
2．邊啲人蒙揀選成為耶和華特别擁有嘅子民？
2 例如，詩篇135篇話，古代以色列嘅忠僕係耶和華嘅特别産業。（詩篇135:4）另外，何西阿書預告，有啲非以色列人都會成為耶和華嘅子民。（何西阿書2:23）耶和華開始揀選非猶太人同耶穌一齊喺天上作王嘅時候，何西阿嘅預言就應驗嘞。（使徒行傳10:45；羅馬書9:23-26）呢啲受聖靈膏立嘅人被稱為“聖潔嘅國族”，係耶和華 “特别擁有嘅子民”。（彼得前書2:9,10）嗰啲有希望喺地上生活嘅忠心基督徒又點呢？耶和華亦都稱佢哋為佢嘅“子民”同佢所“揀選嘅人”。（以賽亞書65:22）
3．（甲）今日邊啲人同耶和華享有特别嘅關係？（乙）呢篇課文會討論乜嘢？
3 今日，有希望到天上嘅“小群羊”同埋有希望喺地上永遠生活嘅“另外嘅綿羊”合成“一群”，成為上帝嘅子民。（路加福音12:32；約翰福音10:16）我哋衷心感激耶和華，因為佢俾我哋可以同佢享有呢個特别嘅關係。呢篇課文會討論，我哋可以點樣向耶和華表明自己珍視呢個殊榮。
獻身俾耶和華
4．耶和華俾我哋同佢享有親密嘅關係，我哋可以點樣表明自己感激佢？耶穌同樣點做？
4 我哋獻身俾耶和華，就表明自己衷心感激佢。通過水浸禮，我哋公開承認自己屬於耶和華，樂意服從佢。（希伯來書12:9）耶穌亦都通過受浸向耶和華表明自己“樂於遵行［佢］嘅旨意”。（詩篇40:7,8）儘管耶穌一出世就屬於一個獻咗身俾耶和華嘅國族，佢仲係獻出自己執行天父嘅旨意。
5,6．（甲）耶穌受浸嘅時候，耶和華有乜嘢感覺？（乙）耶和華對我哋嘅獻身又有乜嘢感覺？請舉例。
5 耶穌受浸嘅時候，耶和華有乜嘢感覺？聖經話：“耶穌受咗浸，隨即從水中上嚟。睇吓！天開咗，約翰睇見上帝嘅靈好似鴿子降喺耶穌身上。忽然有聲音從天上發出話：‘呢個係我嘅兒子，係我所愛嘅，係我所悦納嘅。’”（馬太福音3:16,17）雖然耶穌已經屬於天父耶和華，不過耶和華好高興睇到自己嘅愛子甘願獻出一生全心事奉佢。同樣，我哋獻身俾耶和華嘅時候，佢亦都會好開心，而且會大大賜福俾我哋。（詩篇149:4）
6 舉個例，假設一個男子喺佢嘅花園種咗好多好靚嘅花。有一日，佢嘅女摘咗一朵花送俾佢。啲花唔係屬於爸爸嘅咩？個女點可以將已經屬於爸爸嘅嘢送翻俾爸爸呢？一個仁慈嘅爸爸絶對唔會噉樣諗。相反，佢因為女兒出於愛心送禮物俾自己就感到好開心。雖然花園裏面有其他花，但係佢覺得個女送俾自己嘅呢朵花係最珍貴嘅。我哋甘心情願將自己獻俾耶和華，佢同樣會好開心。（出埃及記34:14）
7．我哋從瑪拉基書3:16睇出，耶和華點樣對待嗰啲甘心事奉佢嘅人？
7 請讀瑪拉基書3:16。點解獻身俾耶和華同埋受浸係咁重要嘅？其實，我哋每個人一出世就屬於耶和華。不過請諗吓，如果你將自己嘅一生獻俾耶和華，承認佢係宇宙嘅至高統治者並執行佢嘅旨意，耶和華一定會好欣慰。（箴言23:15）耶和華接納嗰啲甘願事奉佢嘅人，並將佢哋嘅名“記錄喺佢面前嘅册上”。
8,9．耶和華對嗰啲名字記錄喺佢册上嘅人有乜嘢要求？
8 我哋想自己嘅名被“記錄喺［耶和華］面前嘅册上”，就要履行一啲義務。瑪拉基特别提到，我哋必須“敬畏耶和華”、思量佢嘅名。我哋如果崇拜任何人或事物，我哋嘅名就會從耶和華嘅生命册上被抹去。（出埃及記32:33；詩篇69:28）
9 所以，我哋獻身俾耶和華唔係只係作出一個承諾或者接受一個浸禮。呢啲只需要做一次，但崇拜耶和華係一種生活方式。我哋每一日都必須以行動證明我哋服從耶和華。（彼得前書4:1,2）
拒絶世俗嘅慾望
10．事奉上帝嘅人必須點樣做，表明佢哋同唔事奉上帝嘅人有明顯嘅分别？
10 上一篇課文討論過該隱、所羅門同以色列人嘅事例。佢哋都崇拜耶和華，不過就冇專一愛戴佢。佢哋嘅事例清楚表明，嗰啲真正屬於耶和華嘅人既要堅決擁護正義，亦都要憎恨邪惡。（羅馬書12:9）耶和華話，“義人同惡人、事奉上帝嘅人同唔事奉上帝嘅人之間”會有明顯嘅分别。（瑪拉基書3:18）
11．點解我哋應該勇於向人表明自己全心崇拜耶和華？
11 我哋好感激耶和華揀選我哋做佢嘅子民。我哋要“等人人都可以睇得出”我哋喺屬靈上嘅進步。（提摩太前書4:15；馬太福音5:16）我哋可以諗吓：“其他人係咪可以睇出我全心忠於耶和華？我會唔會自豪噉話俾人知自己係耶和華見證人？”耶和華揀選我哋做佢嘅子民，但係我哋唔敢向人表明自己嘅身份，噉耶和華就會好傷心。（詩篇119:46；請讀馬可福音8:38）
你嘅生活方式係咪清楚表明你係一個耶和華見證人？（請睇第12、13段）
12,13．有啲人嘅行為點解令人好難辨認出佢哋係耶和華見證人？
12 好可惜，有啲基督徒同唔事奉上帝嘅人睇嚟冇乜嘢分别，因為佢哋效法“世界嘅靈”。（哥林多前書2:12）呢個世界嘅精神使人“順應肉體嘅慾望行事”。（以弗所書2:3）雖然組織喺衣着打扮方面俾咗我哋好多建議，但仲係有啲弟兄姊妹嘅衣着唔够端莊得體。佢哋偏愛緊身、暴露嘅衣服，或者奇特嘅髮型，甚至以噉樣嘅打扮去參加基督徒聚會同交往。（提摩太前書2:9,10）結果，人好難分辨佢哋係耶和華嘅子民，定係“同世俗友好”嘅人。（雅各書4:4）
13 喺其他方面，有啲見證人冇堅決棄絶世俗嘅品格。佢哋有啲人喺派對上嘅行為舉止同所跳嘅舞蹈超出咗基督徒所能接受嘅範圍。而有啲人就將唔符合基督徒身份嘅相片同評論放喺社交網站上。佢哋噉樣做可能並冇犯下嚴重嘅罪，不過會對其他努力保持良好品行嘅人造成不良嘅影響。（請讀彼得前書2:11,12）
唔好受嗰啲冇堅決擁護耶和華嘅人影響
14．我哋點樣做就表明自己專一愛戴耶和華？
14 呢個世界極力鼓吹“肉體嘅慾望、眼睛嘅慾望、炫耀財物嘅行為”。（約翰一書2:16）不過，由於我哋屬於耶和華，所以我哋會努力“摒棄唔敬虔嘅心同世俗嘅慾望，喺現行嘅制度本住健全嘅思想、正義、敬虔而活”。（提多書2:12）我哋嘅整個生活方式，包括言談、飲食習慣、衣着打扮、工作態度，都應該使人睇出我哋係專一愛戴耶和華嘅。（請讀哥林多前書10:31,32）
“熱切噉彼此相愛”
15．點解我哋要以愛心同仁慈對待弟兄姊妹？
15 信徒同工都係屬於耶和華嘅。我哋善待佢哋，就表明我哋珍視同耶和華嘅寶貴關係。我哋緊記呢一點，就會以愛心同仁慈對待我哋嘅弟兄姊妹。（帖撒羅尼迦前書5:15）耶穌同門徒講：“你哋如果彼此相愛，所有人就會因此知道你哋係我嘅門徒嘞。”（約翰福音13:35）
16．摩西律法嘅乜嘢例子表明耶和華好重視佢嘅子民？
16 有一個例子可以幫助我哋明白，喺會衆入面應該點樣彼此相待。耶和華聖殿入面擺設嘅器具都係專門為咗正確崇拜而獻上嘅。摩西律法具體説明咗要點樣管理呢啲器具，亦都明確提到違反嘅人會被處死。（民數記1:50,51）連呢啲用嚟崇拜嘅器具耶和華都咁重視，更何況係受佢揀選而又忠心事奉佢嘅人呢！有一次，耶和華向佢嘅子民講：“觸摸你哋嘅，就係觸摸我嘅眼珠。”（撒迦利亞書2:8）
17．耶和華“留意細聽”乜嘢？
17 有意思嘅係，瑪拉基描述耶和華會“留意細聽”佢嘅子民點樣彼此交談。（瑪拉基書3:16）耶和華的確“認識屬於佢嘅人”。（提摩太後書2:19）佢清楚了解每個人嘅一言一行。（希伯來書4:13）如果我哋冇仁慈對待自己嘅同工，耶和華一定會知道。我哋彼此表現慷慨好客、樂於寬恕同仁慈嘅精神，耶和華都肯定會留意到我哋所做嘅。（希伯來書13:16；彼得前書4:8,9）
“耶和華必不撇棄佢嘅子民”
18．耶和華揀選我哋成為佢嘅子民，噉我哋可以點樣向佢表示感激？
18 耶和華使我哋有殊榮成為佢嘅子民，歸佢所有，所以我哋好想為此感激佢。我哋甘心樂意獻身俾耶和華係最明智嘅做法。即使生活“喺呢一代歪邪不正嘅人當中”，我哋都希望世人可以睇出我哋係“毫無瑕疵嘅……喺世人當中如同明光照耀”。（腓立比書2:15）所以，我哋要堅決抗拒惡事。（雅各書4:7）我哋亦都要關愛同尊重我哋嘅同工，因為佢哋都係屬於耶和華嘅。（羅馬書12:10）
19．耶和華點樣獎賞嗰啲屬於佢嘅人？
19 聖經話：“耶和華必不撇棄佢嘅子民”。（詩篇94:14）無論我哋面對乜嘢難題，都要謹記呢個有力嘅保證。就算係死亡，都唔能够隔斷耶和華對我哋嘅愛。（羅馬書8:38,39）“因為我哋生係為耶和華而生，死係為耶和華而死。所以，我哋係生係死，都屬於耶和華。”（羅馬書14:8）我哋期待有一日，耶和華復活所有死去嘅忠僕。（馬太福音22:32）而家，我哋已經享有好多福分。正如聖經所講，“以耶和華為上帝嘅國家幾咁有福！蒙上帝揀選為産業嘅民族幾咁有福！”（詩篇33:12）
