1. ¿Xiñee zanda guiníʼ Jiobá stiʼ guiráʼ xixé cosa? (Biiyaʼ dibuju ni zeeda ra ruzulú tema riʼ).

STIʼ Jiobá guiráʼ xixé cosa, stibe guibáʼ «dede guibáʼ ni jma nasoo, guidxilayú ne guiráʼ ni nuu luni» (Deut. 10:14; Apoc. 4:11). Ne cumu laabe bizaʼbe binni la? laaca stibe laanu (Sal. 100:3). Peru lu ca iza ni maʼ gudiʼdiʼ ca maʼ gulí Jiobá caadxi binni para gácacaʼ ti guidxi risaca para laa.

2. ¿Xi chupa grupu de binni ruzeeteʼ Biblia maʼ gulí Jiobá para gaca ti guidxi risaca para laa?

² Guzéʼtenu ti ejemplu, lu Salmo 135 ná guca ca israelita ni bizuubaʼ stiidxabe «ti guidxi risaca para laabe» (Sal. 135:4). Ne lu libru stiʼ Oseas riete zeeda gaca binni ni cadi naca de guidxi Israel xpinni Jiobá (Os. 2:23). Guca cumplir profecía riʼ dxi gulí Dios binni ni cadi judíu para guni mandarné Jesús guibáʼ (Hech. 10:45; Rom. 9:23-26). Ca binni ni bibí né espíritu riʼ riete lu Biblia nácacaʼ ti guidxi nayá, ti guidxi ni guleechú Jiobá para laa (1 Ped. 2:9, 10). Ne mayoriá de ca xpinni Cristu ni nabani tiempu riʼ, ni cabeza guibani lu Guidxilayú, laaca ruuyaʼ Dios laacabe casi xquidxi ni gulí (Is. 65:22).

3. a) ¿Tuu nga cani maʼ gulí Jiobá tiempu riʼ para gaca xpinni? b) ¿Xi zazíʼdinu lu tema riʼ?

 ³ Tiempu riʼ, grupuhuiiniʼ de dendxuʼ stiʼ Dios, cani napa esperanza cheʼ guibáʼ, ne ca «xcaadxi dendxu» ni cabeza guibani lu Guidxilayú riʼ, nácacaʼ tobi si ne cayúnicaʼ ni ná Jiobá (Luc. 12:32; Juan 10:16). Guiranu riuuláʼdxinu gudiʼnu xquíxepeʼ Dios pur maʼ gulí laanu para gácanu xpinni. Lu tema riʼ zazíʼdinu caadxi modo zanda gusihuínninu rudiʼnu xquíxepeʼ laabe pur privilegiu riʼ.

4. a) ¿Ximodo zanda gusihuínninu rudiʼnu xquíxepeʼ Jiobá pur rudii lugar laanu gaca xhamígunu laa? b) ¿Ximodo biʼniʼ Jesús ni?

⁴ Ti modo zanda gusihuínninu rudiʼnu xquíxepeʼ Jiobá nga ora gudiʼnu xquendanabáninu laa. Ora riuʼnísanu la? rusihuínninu nezalú xcaadxi maʼ stiʼ Jiobá laanu ne nuunu dispuestu guzúʼbanu stiidxabe (Heb. 12:9). Zacagá biʼniʼ Jesús dxi guyuunisa, casi ora ñábibe Bixhózebe: «Riecheʼ ora guneʼ ni naluʼ, Dios stinneʼ» (Sal. 40:7, 8). Neca maca naca Jesús parte de guidxi stiʼ Jiobá, bidiibe xquendanabánibe Jiobá ne zaqué bisihuínnibe maʼ nuube listu para gúnibe ni ná.

5, 6. a) ¿Xi biʼniʼ sentir Jiobá dxi guyuunisa Jesús? b) ¿Bizeeteʼ ti ejemplu ni rusihuinni ximodo runi sentir Jiobá ora rudiʼnu xquendanabáninu laa?

⁵ ¿Ximodo biʼniʼ sentir Jiobá dxi guyuu nisa Jesús yaʼ? Biblia ná: «Ne cásipeʼ guyuunisa Jesús ne biree ndaaniʼ nisa que, bixeleʼ guibáʼ ne biiyaʼ Juan zedayete espíritu stiʼ Dios casi ti paloma luguiáʼ Jesús. Ne óraque gucuá ti ridxi de guibáʼ, ná: “Ndiʼ nga Xiiñeʼ ni nadxieeʼ ne ni rusiecheʼ naa”» (Mat. 3:16, 17, TNM). Guizáʼ biecheʼ Jiobá ora biʼyaʼ ni biʼniʼ Xiiñiʼ, purtiʼ guyuu Xiiñibe dispuestu guni servir laasibe neca maʼ naca parte de guidxi stibe. Zacaca nga riecheʼ Jiobá ora rudiʼnu laa xquendanabáninu, ne zaguube ndaayaʼ laanu (Sal. 149:4).

⁶ Guidúʼyanu ti ejemplu ni zacané laanu guiénenu ximodo runi sentir Jiobá ora rudiʼnu laa xquendanabáninu. Guxuíʼlunu bizuhuaa ti hombre caadxi yaga guieʼ sicarú ndaaniʼ jardín stiʼ. Málasi ti dxi, bichuuguʼ dxaapahuiiniʼ stibe ti guieʼ ne bisigaʼdeʼ ni laabe. Neca hombre riʼ nga bizuhuaa ca guieʼ riʼ ne stícani la? riéchebe ora rusigaʼdeʼ dxaapahuiiniʼ stibe laabe guieʼ riʼ, purtiʼ zacá rusihuinni dxaapahuiiniʼ stibe nadxii laabe. Para hombre riʼ la? guieʼ ni bisigaʼdeʼ dxaapahuiiniʼ riʼ laabe nga ni jma galán. Zacaca nga runi sentir Jiobá ora ricaanu decisión de gudiʼnu xquendanabáninu laa para gúninu ni ná (Éx. 34:14).

7. ¿Ximodo racané libru de Malaquías laanu guiénenu xi runi sentir Jiobá pur ca xpinni ni runi ni ná né stale gana?

⁷ (Biindaʼ Malaquías 3:16). Cani caʼruʼ gudii xquendanabani Jiobá ne caʼruʼ chúʼnisa la? naquiiñeʼ guiníʼ íquecaʼ pabiáʼ risaca gúnicaʼ ni. Dede dxi nuunu ndaaniʼ jñaanu maʼ stiʼ Jiobá laanu. Peru guiníʼ íquenu pabiáʼ riéchebe ora ridúʼyanu laabe casi Rey stinu ne rudiʼnu xquendanabáninu laabe ne rúninu ni nabe (Prov. 23:15). Runibiáʼ Jiobá tuu nga cani runi ni ná né stale gana ne pur nga rucaabe lacaʼ lu «libru» stibe para guietenaláʼdxibe laacaʼ.

8, 9. ¿Xi rinabaʼ Jiobá ca binni ni maʼ cá lá lu libru stiʼ?

⁸ Para guicá lanu lu «libru» stiʼ Jiobá la? caquiiñeʼ gúninu caadxi cosa.  Malaquías guníʼ naquiiñeʼ guidxíbinu Jiobá ne guiníʼ íquenu lu labe. Pa guni adorarnu sti cosa o sti binni ne cadi Jiobá la? zuxhiabe lanu de lu libru simbólicu ni nápabe (Éx. 32:33; Sal. 69:28).

⁹ Gudiʼnu laanu Jiobá qué riníʼ ni guni prometérsinu laabe zúninu ni nabe ne chuʼnísanu. Ti biaje si nga rudiʼnu laanu Jiobá ne ti biaje si nga riuʼnísanu lu xquendanabáninu. Peru para gusihuínninu nuunu pur Jiobá ne nácanu xpínnibe la? naquiiñeʼ gusihuínninu ruzúʼbanu stiidxabe lu ca cosa ni rúninu guiráʼ dxi (1 Ped. 4:1, 2).

10. ¿Xi naquiiñeʼ guni ca binni runi adorar Jiobá para gusihuínnicaʼ maʼ gadxé laacaʼ de ca binni ni qué runi adorar Dios?

¹⁰ Lu tema gudiʼdiʼ que bizíʼdinu ni biʼniʼ Caín, Salomón ne ca israelita. Guirácabe guníʼcabe runi adorárcabe Jiobá si, peru cadi dxandíʼ bíʼnicabe ni. Ni biʼniʼ ca binni riʼ rusihuínnini pabiáʼ risaca guni ca xpinni Jiobá ni jneza ne gucaanacaʼ cosa malu (Rom. 12:9). Bizeeteʼ si Malaquías napa Jiobá ti «libru» ra cá lá ca binni runi ni ná la? guníʼ Jiobá «maʼ gadxé nga ti binni runi ni jneza ne maʼ gadxé nga ti binni malu, zuuyatu tuu nga tobi ni runi ni ná Dios ne tuu nga ni qué runi ni nabe» (Mal. 3:18).

11. ¿Xiñee naquiiñeʼ gudii xcaadxi cuenta maʼ bidiʼnu xquendanabáninu Jiobá?

¹¹ Ora rúninu stipa pur guʼyaʼ xcaadxi binni caniisinu en sentidu espiritual nga rusihuínninu cudiʼnu xquíxepeʼ Jiobá pur gulí laanu para gácanu xpinni (1 Tim. 4:15; Mat. 5:16). Guiníʼ íquenu ca pregunta riʼ: «¿Ñee rudii binni cuenta dxandíʼ nacaʼ leal Dios la? ¿Ñee rabeʼ xcaadxi binni nacaʼ ti testigu stiʼ Jiobá la?». Guizáʼ ziuu Dios triste pa ca binni ni maʼ gulibe para gácacaʼ xquídxibe qué gábicaʼ xcaadxi binni pa nácacaʼ xpínnibe (Sal. 119:46; biindaʼ Marcos 8:38).

12, 13. ¿Xiñee nuu biaje raca nagana gudii binni cuenta pa testigu stiʼ Jiobá tuuxa?

 ¹² Triste guininu ni, peru nuu Testigu rinanda modo zeʼ «espíritu sti binni guidxilayú» ne pur nga qué rihuinni pa cayúnicaʼ ni ná Dios (1 Cor. 2:12). Ca binni ni rinanda ni runi binni guidxilayú jma ricá íquecaʼ guyúbicaʼ puru para laasicaʼ (Efes. 2:3). Guzéʼtenu ti ejemplu, nuu tu laa cadi jneza modo racu lari ne cadi jneza modo ruzuchaahuiʼ neca gatigá ricaanu conseju de laaca ni. Nuu tu laa racu lari ni ruquiichiʼ laa, ni rusihuinni parte de cuerpu stiʼ ne racu cani dede né ora riecaʼ reunión. Ne nuu tu laa ridiʼdisú de modo runi guicha ique o modo rugá ni (1 Tim. 2:9, 10). Nga runi, qué rihuinni pa nácabe xpinni Dios ora maʼ nuucabe lade ca binni ni rinanda modo zeʼ guidxilayú riʼ (Sant. 4:4).

¹³ Nuu Testigu rusihuinni qué rucaanáʼ guiráʼ ni runi binni guidxilayú. Casi ora riécabe saa, ruyaacabe ne rúnicabe cosa ni cadi jneza guni ti xpinni Cristu. Rudxiibacabe foto stícabe lu red social ne rucaacabe comentariu ni rusihuinni cadi nácacabe ti binni espiritual. Zándaca qué huayaca disciplinárcabe purtiʼ qué huayuni cometércabe ti pecadu naroʼbaʼ, peru cadi nácacabe ti ejemplu galán para cani cayuni stipa pur guibani jneza (biindaʼ 1 Pedro 2:11, 12).

14. ¿Xi caquiiñeʼ gúninu para cadi gunítinu amistad ni nápanu né Jiobá?

¹⁴ Riuulaʼdxiʼ binni guidxilayú «guni ni na ique ne gapa irá ni guʼyaʼ, ne gaca tuuxa nezalú ca xcaadxi» (1 Juan 2:16). Peru laanu nácanu xpinni Jiobá, ne pur nga rábibe laanu cadi gúninu casi runi ca «binni ni qué runi respetar laabe, ne gucáʼnanu guiráʼ cosa malu ni riuulaʼdxiʼ binni guni», ne «gácanu binni nuu xpiaaniʼ, gúninu ni jneza ne gúninu ni ná Dios, ne maʼ cadi guibáninu modo nabani binni» (Tito 2:12, TNM). Guiráʼ ni gúninu lu xquendanabáninu, modo guininu, ni guidoʼno ne ni guideʼnu, lari gácunu ne modo guzuchaahuinu dede modo gúninu dxiiñaʼ, naquiiñeʼ guʼyaʼ binni maʼ bidiʼnu xquendanabáninu Jiobá (biindaʼ 1 Corintios 10:31, 32).

15. ¿Xiñee caquiiñeʼ gácanu nachaʼhuiʼ ne gannaxhiinu ca hermanu stinu?

¹⁵ Modo guni tratarnu ca hermanu stinu zusihuinni ni rudiʼnu xquíxepeʼ Jiobá purtiʼ maʼ gulí laanu para gácanu xpinni. Purtiʼ laaca gulí Dios laacabe para gácacabe xpinni. Pa qué guiaandaʼ ndiʼ laanu la? zácanu nachaʼhuiʼ ne laacabe ne zannaxhiinu laacabe (1 Tes. 5:15). Jesús gudxi ca xpinni ca diidxaʼ riʼ: «Pa ganaxhii saa tu zacá la? zanna binni xpinne laatu» (Juan 13:35).

16. ¿Xi ti ejemplu zeeda lu Ley stiʼ Moisés rusiidiʼ laanu xi runi sentir Jiobá pur ca xpinni?

¹⁶ Guidúʼyanu ti ejemplu ni zacané laanu gánnanu ximodo guni tratarnu ca hermanu stinu. Ca cosa ni biquiiñeʼ ndaaniʼ templu stiʼ Jiobá, bireechú cani para si iquiiñeʼ cani para gaca adorar Jiobá. Lu Ley stiʼ Moisés que cusiene ximódopeʼ naquiiñeʼ guiaapaʼ cani, ne naquiiñeʼ guuticabe cani qué chinanda Ley que (Núm. 1:50, 51). Pa zacá gupa Jiobá ca cosa ni biquiiñecabe para guni adorárcabe laa, ¿cadi jmaruʼ si zápabe ca xpínnibe ni maʼ bidii xquendanabani ne ni naca leal laabe la? Ti biaje gúdxibe xquídxibe: «Purtiʼ ni canaʼ laatu cagaʼnaʼ guié bizaluaʼ» (Zac. 2:8).

17. ¿Xi guiráʼ cosa ruuyaʼ Jiobá?

¹⁷ Ti cosa nabé risaca gánnanu nga guníʼ Malaquías ruuyaʼ Jiobá ne rucaadiaga ximodo runi tratarsaa ca xpinni (Mal. 3:16). Rihuinni dxíchica runibiáʼ Dios cada tobi de ca xpinni (2 Tim. 2:19). Rizaalaʼdxiʼ Jiobá guiráʼ cosa ni rúninu ne ni rininu (Heb. 4:13). Rudii Jiobá cuenta ora cadi nacháʼhuinu ne ca hermanu stinu. Peru nuunu seguru laaca ruuyabe ora runi perdonarsaanu, ora rácanu hospitalariu, ora rudiʼnu de ni nápanu ne ora nacháʼhuinu né xcaadxi (Heb. 13:16; 1 Ped. 4:8, 9).

18. ¿Ximodo rusihuínninu rudiʼnu xquíxepeʼ Jiobá pur privilegiu ni nápanu de gácanu parte de xquidxi?

¹⁸ Guiranu racaláʼdxinu gusihuínninu rudiʼnu xquíxepeʼ Jiobá pur privilegiu ni nápanu de gácanu parte de xquidxi. Nánnanu decisión ni jma galán gucuaanu nga dxi bidiʼnu xquendanabáninu Jiobá. Neca nabáninu «lade ca binni malu ni qué runi ni jneza», o binni qué iquiiñeʼ, racaláʼdxinu gúʼyacabe nácanu binni sin donda, ne ruzáʼninu «casi biaaniʼ ndaaniʼ guidxilayú» (Filip. 2:15, TNM). Rucáʼnanu guiráʼ cosa ni qué iquiiñeʼ (Sant. 4:7). Rannaxhiinu ne runi respetarnu ca hermanu stinu, purtiʼ laaca xpinni Jiobá laacabe (Rom. 12:10).

19. ¿Ximodo riguu Jiobá ndaayaʼ ca xpinni ni gulí?

¹⁹ Biblia cayabi laanu: «Qué lica zusaana Jiobá xquidxi» (Sal. 94:14). Intiica si guizaacanu nánnanu dxandíʼ ni ná ca diidxaʼ riʼ. Gastiʼ qué zanda guxheleʼ laanu de guendarannaxhii stiʼ Dios, nin guendaguti (Rom. 8:38, 39). «Purtiʼ pa nabáninu la? nabáninu para Jiobá, ne pa gátinu la? zátinu para Jiobá. Nga runi, pa nabáninu o pa gátinu la? stiʼ Jiobá laanu» (Rom. 14:8, TNM). Guiranu maʼ racaláʼdxinu guedandá dxi gusibani Jiobá de lade gueʼtuʼ guiráʼ ca xhamigu ni qué nusaana laa (Mat. 22:32). Dede yanna caguu Dios ndaayaʼ laanu. Casi ná Biblia, «nayecheʼ nuu guidxi ni napa Jiobá casi Dios stiʼ, guidxi ni maʼ gulibe para gaca herencia stibe» (Sal. 33:12).