‘Taqe kasta jaqenakatwa’ khuyaptʼayasiñasa
JESUSAJJ discipulonakapar kunjamsa yatiyapjjañapäna uk yatichkasajja, janiw taqe jaqenakajj Diosan Reinopat istʼañ munapkaniti sasaw säna (Luc. 10:3, 5, 6). Yatiyktan ukhajja, yaqhep jaqenakajj toqepjjestuwa, jan ukajj jan walinakwa lurapjjestu. Ukham luratajja, jaqenakat khuyaptʼayasiskakiñajj chʼamakïspawa.
Khuyaptʼayasir jaqejja, mayninakajj kuna yanaptʼsa munapjje, kuna jan walinsa uñjasipjje uk amuyiwa, jupanakat sinttʼasisajj yanaptʼarakiwa. Ukampis jan khuyaptʼayasirëjjsna ukhajja, janiw taqe chuymasa ni sumsa yatiyjjsnati. Maysa toqetjja, khuyaptʼayasirïñatak chʼamachastan ukhajja, nina jan jiwtʼañapataki lawanakampis apjjatksna ukhamawa (1 Tes. 5:19).
Khuyaptʼayañajj chʼamäni ukhajja, ¿kunas khuyaptʼayaskakiñatak yanaptʼistaspa? Aka yatichäwinjja, kunjamsa Jehová Diosata, Jesusata, apóstol Pablot yateqassna ukwa yatjjataskañäni.
JEHOVÁ DIOSAT KHUYAPTʼAYASIÑ YATEQASIÑÄNI
Diosajj walja waranqa maranakaw kuna jan walinaktï jaqenakajj Jupat sapki ukanak aguantawayi. Ukhamäkchisa, “jan yuspärasir jaqetsa jan wali jaqetsa khuyaptʼaya[siskakiwa]” (Luc. 6:35). Paciencianïsaw ukham luri, Jupajj “taqe kasta jaqenakan salvasipjjañap[wa]” muni (1 Tim. 2:3, 4). Diosajj jan walinak uñiskchisa, jaqenakarojj wali valoranitwa uñji, janiw khitin jiwañapsa munkiti (2 Ped. 3:9).
Jehová Diosajja, kunjamsa Supayajj jan creyentëpki ukanakan amuyunakap chʼamaktʼayi uk yatiwa (2 Cor. 4:3, 4). Jupanakat waljanirojj wawatpachaw Diosat kʼarinak yatichawayapjje, ukatwa Biblian yatichäwinakap jan istʼañ munapkiti. Ukampis Jehová Diosajj jupanakar wal yanaptʼañ muni. ¿Kunjamatsa uk yattanjja?
Nínive markankir jaqenakat parltʼañäni. Jan walinaksa lurapkchïnjja, Jehová Diosajj Jonás profetar akham sänwa: ‘Jukʼampiw nayan khuyapayasiñajajj Nínive markatakejj utjañapa, uka jachʼa markansti patak pä tunkani waranqa ukats jila jaqenakaw utji, jupanakajj janiw kupi amparampi chʼeqa amparapampi mayjätapsa amuyasipkiti’ sasa (Jon. 4:11, NM). Ninivitanakajj janiw kunsa Jupat yatipkänti, ukjja Diosajj yatïnwa, ukatwa jupanakat khuyaptʼayasisajj kuntï uka markampi lurañ amtkäna uk yatiyañapatak Jonasar khitäna.
Jiwasajja, Diosjamarakiw jaqenakar wali valoranit uñjtanjja. Ukatwa Jupat yateqasisajj istʼapkistu ukanakar yanaptʼañatak chʼamachastanjja, janis Diosar serviñ munapkaspa ukhamsa amuystanjja yanaptʼaskaktanwa.
JESUSAT KHUYAPTʼAYASIÑ YATEQASIÑÄNI
Jesusajj Awkipjamarakiw Diosat yateqañ munirinakat khuyaptʼayasïna. “Jaqenakar uñjasajj walpun sinttʼasïna, jupanakajj jan awatirini ovejanakjam qʼala usuchnoqata, ananukuta ukhamäpjjänwa” (Mat. 9:36). Jesusajja, jaqenakajj kunatsa ukhamäsipkäna ukjja sumwa amuyirïna. Uka jaqenakarojj religión pʼeqtʼirinakaw kʼarinak yatichapjjäna, tʼaqesiyapjjarakïna. Jesusar istʼir jutapkäna ukanakat waljanejja, jan walinakan uñjasisajj inas jupar jan arkjjapjjchispänti, uk yatkasasa, “kunayman toqenakat[wa] jupanakar yatichäna” (Mar. 4:1-9).
Mä jaqetï qalltan jan istʼañ munkistani ukhajj janiw aynachtʼañasäkiti
Niyakejjay jaqenakan jakäwipajj mayjtʼchejja, Diosan arunakap jan istʼañ munirinakajj qhepat istʼjjapjjaspawa
Jaqenakajj Bibliat jan istʼañ munapkistu ukhajja, ‘janiw Diosat yatiñ munapkiti’ sasin janiw jankʼak amuyañasäkiti. Jan ukasti kunatsa jan istʼañ munapki ukwa amuytʼañasa. Yaqhepanakajja, kʼari cristianonakar jan walinak lurir uñjasaw Bibliatsa cristianonakatsa jan yatiñ munapkaspati. Jan ukajj kuntï creyktan ukanakat kʼarinak istʼasaw jan munapkaspati. Jan ukajj ‘uta jakʼankirinakajasa familiaranakajas larusipjjetaspawa’ sasaw jan istʼañ munapkarakispati.
Yaqhepanakajja, inas jan walinakan uñjasipjjatapat jan istʼañ munapkchiti. Kim sat mä misionera kullakajj akham siwa: “Yatiyapkta ukat mä cheqanjja, waljaniw guerran tʼaqesiyat uñjasipjjatayna, taqe kunwa aptʼasipjjarakitayna. Janiw jutïritak kuna suytʼäwinïpkänsa, ukhaman uñjasisajj janiw khitirus confiyapkiti. Ukanjja jila partejj janiw Bibliat yatiñ munapkiti. Yamas mä kutejj jiwayañ kunwa munapjjetu” sasa.
Ukhamansa Kim kullakajj uñjaskchïnjja, ¿kunsa jaqenakat khuyaptʼayasiskakiñatak luri? Jupajj akham siwa: “Jaqenakajj jan wal uñjapjjetu ukhajja, kuntï Proverbios 19:11 qellqatan siski uka arunak amtañatakiw chʼamachasta, ukan akham siwa: ‘Yatiñan jaqejj janiw mäki coleraskiti’ sasa. Jaqenakajj kunjamansa uñjasipjje uk amtañaw khuyaptʼayañatak yanaptʼitu. Janiw taqenipunejj jan istʼañ munapkiti, uka cheqanjja revisitanakas utjapjjarakituwa” sasa.
Jiwasajj akhamwa jisktʼassna: ‘Nayatï Diosar jan uñtʼkirista ukhajja, ¿Testigonakajj yatiyir jutapjjaspa ukhajj kunjamakis jupanakar katoqerista? ¿Jupanakat walja kuti kʼarinak parlapjjetaspa ukhajj jupanakar istʼañ muniristti? ¿Janit khuyaptʼayatäñ munkiristjja?’ sasa. Jaqenakat khuyaptʼayasiñajj chʼamakïni ukhajja, Jesusan aka arunakapwa amtañasa, jupajj akham sänwa: “Kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” sasa (Mat. 7:12).
APÓSTOL PABLOT KHUYAPTʼAYASIÑ YATEQASIÑÄNI
Apóstol Pablojj jupar jan istʼañ munapkäna ukanakatsa khuyaptʼayasïnwa. Jupajj akham sänwa: “Nayrajj Dios contra jan wal parliri, markapar jan waltʼayañatak arknaqeri, jan respetasiri ukhamäyätwa. Ukampis jan yatisaw ukanak lurayäta, Diosar jan confiyataj layku, ukhampachas Cristojj nayat wal khuyaptʼayasitu” sasa (1 Tim. 1:13). Jehová Diosasa Jesusasa kunjamsa jupar khuyaptʼayapjjäna ukjja amtapunïnwa. Yatiykasajja, kunjamsa nayrajj Diosan arunakap yatiyirinakarojj uñjirïna uksa amtarakpachänwa.
Awisajja, apóstol Pablojj kʼari yatichäwinakar taqe chuyma creyir jaqenakampiw parlirïna. ¿Kunsa ukhajj lurirïna? Atenas markankkäna ukhajja, “walja idolonakampi phoqantatwa uka marka uñjäna, ukatwa jupajj wal colerasïna” sasaw Hechos 17:16 textojj qhanañchi. Ukampis kunatï jupatak jan walïkäna ukanakat parlasaw predikäna (Hech. 17:22, 23). Kunjamtï jaqenakajj jakapki ukarjamaw Pablojj yatiyirïna, ‘ukhamat mä qhawqhanirukis kunjamatsa salvañataki’ (1 Cor. 9:20-23).
Jan istʼañ muniri, jan ukajj kʼari yatichäwinakar creyir jaqenakampi jikisiñäni ukhajja, apóstol Pablotwa yateqassna. Kuntï jaqenakat yatktan ukanakat parlasaw ‘suma kusiskañ yatiyäwinak’ yatiysna (Is. 52:7). Dorothy kullakajj akham siwa: “Yatiyapkta uka cheqan jakasir jaqenakat waljanejja, Diosajj jan sinttʼasis juchañchiri ukhamawa sasaw creyipjje. Jupanakarojja, ‘walik Diosar creytajja’ sasaw nayraqat sista, ukatsti Diosajj kunja munasirisa ukwa Bibliampi yatiyta, jutïritak kuna suytʼäwitï utjki uksa yatiyaraktwa” sasa.
“KUNATÏ WALÏKI UKAMPI JAN WALIROJJ ATIPJAM”
Sapürutjamaw jukʼamp ‘qhepa urunakankjjtanjja’, ukhamïpansti yatiyktan uka jaqenakajj “jan walit jukʼampi jan waliruw sarapjjani” (2 Tim. 3:1, 13). Ukampis janiw ukanakajj khuyaptʼayasirïñatsa ni Diosar kusisit serviñatsa jarkʼañapäkistuti. Jehová Diosaw ‘kunatï walïki ukampi jan walir’ atipjaskakiñatak yanaptʼistani (Rom. 12:21). Jessica sat mä precursora kullakajj akham siwa: “Niya sapa kutiw jachʼa jachʼa tukuri, Testigonakar jiskʼachiri, kuntï yatiyktan ukar jiskʼachiri jaqenakamp jikista. Ukajj chuym ustʼayistaspawa. Nayajj Bibliat mä jaqempi parlañ qalltta ukhajja, ‘kunjamtï Jumajj uñjkta ukham jupar uñjañatak yanaptʼita’ sasaw Jehová Diosar chuyma manqhat mayista. Ukaw nayatak llakisiñat sipansa kunjamsa uka jaqer yanaptʼirista uk amuytʼañatak yanaptʼitu” sasa.
Diosar uñtʼañ munir jaqenakarojj thaqaskaktanwa
Jaqenakar yanaptʼañatak chʼamachasiskakiñäni ukhajja, tiempompejj yaqhepajja Bibliat yateqañ munjjapjjaspawa
Jiwasamp chika yatiyapki uka jilat kullakanakar kunjamsa chʼamañchtʼsna ukjja amuytʼañasarakiwa. Jessica kullakajj akham siwa: “Jan sum katoqapkitu ukhajja, uka toqet jan sinti lupʼiñatakiw chʼamachasta. Antisas kunatï chʼamañchtʼapkitaspa uka toqetwa parlta. Janis taqenejj sum istʼapkchitojja, kunatsa yatiyañajj wali wakiskiri ukanakatwa parlta” sasa.
Yatiykasajj kuna jan walinakansa uñjastan ukjja, Jehová Diosajj sum uñjaski. Jupat yateqasisin jaqenakat khuyaptʼayastan ukhajja wal kusispacha (Luc. 6:36). Cheqas janiw jaqenakat wiñayapun khuyaptʼayaskaniti. Kunapachas akapachar tukjani ukjja yatiwa. Uka uru puriniñapkamajja, jan qarjtas yatiyaskakiñasawa (2 Tim. 4:2). Ukhamasti, Diosan arunakap taqe chuyma yatiyasipkakiñäni, ‘taqe kasta jaqenakarus’ khuyaptʼayasipkakiñäni.
