Wila “Bantu ya Mitindu Yonso” Mawa
NTANGU Yezu songaka balongoki na yandi mutindu ya kulonga nsangu ya mbote, yandi zabisaka bo nde bantu ta wila bo ve ntangu yonso. (Luka 10:3, 5, 6) Yo kele mutindu mosi ti kisalu na beto ya kusamuna. Bantu ya nkaka ya beto ke solulaka ti bo ke zitisaka beto ve to nkutu ke salaka mambu na nku. Kana bo ke sala mambu yai, yo lenda vanda mpasi na kuwila bo mawa mpi kulonga bo.
Muntu ya ke wilaka bantu mawa ke bakisaka bampusa ti bampasi ya bantu ya nkaka, ke kuditulaka na kisika na bo mpi ke sadisaka bo. Kansi nki ta salama kana beto wila ve bantu yina beto ke solulaka ti bo na kisalu ya kusamuna mawa? Beto ta vanda diaka ve kikesa, disongidila, beto ta vanda ve na kiese ya kulonga mpi ya kusadisa bo. Beto lenda fwanisa kikesa na beto ti tiya. Sambu tiya kupela mbote, beto fwete yika bankuni mingi. Mutindu mosi, sambu beto vanda kikesa mingi, beto fwete wila bantu mawa.—1 Batesalonika 5:19.
Inki mutindu beto lenda wila mpenza bantu mawa ata yo kele mpasi? Bika beto landa mbandu ya bantu yai tatu: Yehowa, Yezu mpi ntumwa Polo.
LANDA MBANDU YA MAWA YA YEHOWA
Banda ntama, bantu ke tubaka mambu ya luvunu sambu na Yehowa. Ata mpidina, yandi kele “mbote sambu na bantu ya me konda ntonda mpi bantu ya mbi.” (Luka 6:35) Inki mutindu yandi ke monisaka ntima-mbote? Yandi ke monisilaka bantu yonso ntima-nda. Yehowa ke zolaka nde “bantu ya mitindu yonso kuguluka.” (1 Timoteo 2:3, 4) Ata Nzambi ke buyaka mambu ya mbi, bantu kele mfunu mingi na meso na yandi mpi yandi ke zolaka ve nde bo fwa.—2 Piere 3:9.
Yehowa ke zabaka nde Satana muntu ke kusaka bantu. (2 Bakorinto 4:3, 4) Banda na kileke, bo me longaka bantu mingi malongi ya luvunu sambu na Nzambi. Yo yina, yo lenda vanda mpasi sambu bo ndima kieleka. Kansi Yehowa kele ti mpusa ya ngolo ya kusadisa bo. Inki mutindu beto me zaba yo?
Mu mbandu, yindula mutindu Yehowa kudiwaka sambu na bantu ya mbanza Ninive. Ata bo vandaka nku, Yehowa songaka Yonasi nde: “Keti mono fwete wa mpi ve mawa sambu na Ninive mbanza ya nene, yina kele ti bantu kuluta 120 000, yina me zaba nkutu ve mambu ya mbote mpi ya mbi?” (Yonasi 4:11) Yehowa wilaka bantu yai mawa sambu bo zabaka ve kieleka ya me tala yandi. Yo yina yandi tindaka Yonasi na kukebisa bo.
Beto ke tadilaka bantu mutindu Yehowa ke tadilaka bo. Bo kele mfunu mingi. Bonso Yehowa, beto kele ti mpusa ya ngolo ya kusadisa bo na kuzaba yandi ata yo ke monana nde bo ta ndima ve kieleka.
LANDA MBANDU YA MAWA YA YEZU
Bonso Tata na yandi, Yezu wilaka bantu mawa “sambu bo vandaka kuniokwama mpi kuyungana bonso mameme yina me konda ngungudi.” (Matayo 9:36) Yezu bakisaka kikuma yina salaka nde bo vanda mutindu yina. Bantwadisi ya mabundu na bo vandaka kusadila bo mambu ya mbi mpi kulonga bo mambu ya luvunu. Ata Yezu zabaka nde mambu ya nkaka ta sala nde bantu mingi yina vandaka kuwidikila yandi kukuma ve balongoki na yandi, yandi landaka kulonga bo mambu mingi.—Marko 4:1-9.
Kulemba ve nitu kana muntu me buya nsangu na mbala ya ntete
Ntangu mambu ya luzingu ke sobaka, bantu lenda ndima kieleka
Kana bantu ke ndima ve nsangu, beto fwete sosa kuzaba kikuma. Mbala ya nkaka bo ke vandaka ti mabanza ya mbi sambu na Biblia to sambu na Bakristu. Sambu bo ke monaka bantu ya nkaka yina ke kudibingaka Bakristu ke sala mambu ya mbi. Ziku bantu ya nkaka me waka mambu ya luvunu sambu na balukwikilu na beto. Bantu ya nkaka diaka lenda wa boma nde bantu ya dibuta to bantu ya ke zingaka pene-pene ti bo ta seka bo kana bo solula ti beto.
Bantu ya nkaka yina beto ke solulaka ti bo na kisalu ya kusamuna ke kutanaka ti bampasi yina ke yangisaka bo mingi. Kim, misionere mosi ke tuba nde bantu mingi na teritware na bo tinaka bitumba mpi vidisaka bima yonso. Bo ke vandaka ve ti kivuvu ya kieleka sambu na bilumbu ke kwisa. Yo yina bo ke kudiyangisaka mpi ke tudilaka ve ata muntu mosi ntima. Mbala mingi bantu ya teritware yai ke buyaka nde Bambangi ya Yehowa kusamuna. Kilumbu mosi ntangu Kim vandaka kusamuna bo bulaka yandi.
Inki mutindu Kim ke landaka kuwila bantu mawa ata ntangu bantu ke sadilaka yandi mambu ya mbi? Ntangu yonso yandi ke yibukaka Bingana 19:11, yina ke tuba nde: “Mayele ya kubakisa mambu mbote-mbote ya muntu ke kulumusaka kibeni makasi na yandi.” Ntangu yandi ke yindulaka mambu yina bantu ya teritware na bo kutanaka ti yo, yo ke sadisaka yandi na kuwila bo mawa. Bantu yonso ve yina yandi ke solulaka ti bo ke vandaka ntima ya mbi. Kaka na teritware yina, yandi zwaka bantu yina ndimaka nde yandi vutukila bo.
Kudiyula nde: ‘Kana mono zabaka ve kieleka, nki mambu mono zolaka kusadila Bambangi ya Yehowa yina me kwisa kulonga mono?’ Mu mbandu, nki mono zolaka kusala kana mono me waka mambu mingi ya luvunu sambu na bo? Ziku mono mpi zolaka kubuya nsangu mpi mono zolaka kuvanda ti mfunu nde bantu kuwila mono mawa. Yezu tubaka nde beto fwete sadila bantu ya nkaka mambu mutindu beto ke zola mpi nde bo sadila beto. Yo yina beto fwete kuditula na kisika ya bantu ya nkaka mpi kuvanda ntima-nda ata yo kele mpasi.—Matayo 7:12.
LANDA MBANDU YA MAWA YA POLO
Ntumwa Polo wilaka bantu mawa ata bayina sepelaka ve ata fioti ti nsangu na yandi. Sambu na nki? Yandi yibukaka mutindu yandi vandaka ntete. Yandi tubaka nde: “Mono vandaka ntete muntu ya ke vwezaka, ya ke monisaka bantu mpasi mpi ya kukonda luzitu. Ata mpidina, yandi wilaka mono mawa sambu mono vandaka kusala mambu kukonda kuzaba mpi kukonda lukwikilu.” (1 Timoteo 1:13) Polo zabaka nde Yehowa ti Yezu wilaka yandi kibeni mawa. Yandi lendaka kubakisa bantu yina zolaka kubuyisa kisalu na yandi, sambu yandi mpi vandaka kusala mutindu mosi.
Bantangu ya nkaka, Polo solulaka ti bantu yina vandaka kukwikila ngolo na malongi ya luvunu. Yandi kudiwaka nki mutindu? Bisalu 17:16 ke tuba nde ntangu Polo vandaka na Atene, yandi “waka makasi na kumona nde mbanza vandaka ya kufuluka ti biteki.” Kansi, Polo sadilaka mambu yina pesaka yandi makasi sambu na kulonga bantu. (Bisalu 17:22, 23) Yandi sobaka mutindu na yandi ya kulonga mpi yandi tubaka na mutindu ya kuswaswana na bantu ya mitindu na mitindu sambu yandi “gulusa bankaka na mitindu yonso.”—1 Bakorinto 9:20-23.
Ntangu beto ke longa bantu yina ke buyaka nsangu to ke kwikilaka na malongi ya luvunu, beto lenda landa mbandu ya Polo. Beto lenda sadila balukwikilu na bo sambu na kusadisa bo na kulonguka “nsangu ya mbote ya kima mosi ya kuluta mbote.” (Yezaya 52:7) Mpangi-nkento Dorothy ke tuba nde: “Bo me longaka bantu mingi na teritware na beto nde Nzambi kele nku mpi makambu ngolo. Mono ke sikisaka bantu yina sambu bo ke kwikilaka mpenza na Nzambi mpi na nima mono ke bendaka dikebi na bo na mambu yina Biblia ke tubaka sambu na zola ya Yehowa mpi balusilu na yandi sambu na bilumbu ke kwisa.”
“SALA MAMBU YA MBOTE SAMBU NA KUNUNGA MAMBU YA MBI”
Sambu nsuka ke finama, bikalulu ya bantu ya nkaka ta kuma “diaka mbi kuluta.” (2 Timoteo 3:1, 13) Kansi bikalulu ya mbi ya bantu fwete manisa ve kiese na beto to kukanga beto nzila ya kuwila bantu mawa. Yehowa ta pesa beto ngolo ya kusala “mambu ya mbote sambu na kununga mambu ya mbi.” (Baroma 12:21) Jessica, mupasudi-nzila mosi ke tuba nde mbala mingi yandi ke solulaka ti bantu ya lulendo yina ke sekaka beto ti nsangu na beto. Yandi ke yika nde: “Yo ke pesaka mpasi. Ntangu mono ke yantikaka disolo ti muwi, mono ke sambaka Yehowa na nsi ya ntima mpi ke lombaka yandi lusadisu sambu mono tadila muntu yango mutindu Yehowa ke tadilaka yandi.” Yo ke sadisaka Jessica na kutula ve dikebi na mawi na yandi kansi na kuyindula mutindu yandi lenda sadisa bantu.
Beto ke sosaka bantu yina ke zolaka kuzaba kieleka
Na nima ya ntangu, bantu ya nkaka ta ndima lusadisu na beto mpi ta longuka kieleka
Beto fwete pesa mpi bampangi na beto kikesa ntangu beto ke samuna ti bo. Jessica ke tuba nde ntangu yandi ke samunaka ti bampangi ya nkaka, kana mpangi mosi kusonga yandi mambu ya mbi yina yandi kutanaka ti yo na kisalu ya kusamuna, Jessica ke tudilaka yo ve dikebi. Kansi, yandi ke tubaka mambu ya mbote, mu mbandu mutindu bantu ke ndimaka nsangu na beto ata bankaka ke buyaka.
Yehowa ke zabaka mbote-mbote nde bantangu ya nkaka yo ke vandaka mpasi sambu beto samuna. Kansi yandi ke waka kiese kana beto ke wila bantu mawa bonso yandi! (Luka 6:36) Ya kieleka, Yehowa ta monisaka ve ntima-nda kimakulu mpi ta landa ve kuwila bantu ya nsi-ntoto yai mawa kimakulu. Beto ke ndima nde yandi me zaba mbote-mbote ntangu yina nsuka ta kwisa. Kansi na ntwala nde yo kwisa, beto fwete samuna kukonda kusukinina. (2 Timoteo 4:2) Yo yina, bika beto landa kusamuna ti kikesa mpi kuwila “bantu ya mitindu yonso” mawa.
