Koragwo na Ũcayanĩri Kwerekera “Andũ a Mĩthemba Yothe”
RĨRĨA Jesu onagia arutwo ake kũhunjia ũhoro ũrĩa mwega, nĩ onanirie atĩ ti andũ othe mangĩetĩkĩrire ndũmĩrĩri ya Ũthamaki. (Luk. 10:3, 5, 6) O na ithuĩ rĩrĩa tũrahunjia no tũkore andũ matũcokerie ũũru o na kana matwĩke ũũru. Ma nĩ atĩ, maũndũ ta macio no matũme ũkorũo ũrĩ ũndũ mũritũ gũthiĩ na mbere gũcaĩra andũ arĩa tũhunjagĩria.
Mũndũ mũcayanĩri nĩ onaga mabataro na mathĩna marĩa andũ arĩa angĩ marĩ namo, akamaiguĩra tha, na agakorũo na wendi wa kũmateithia. O na kũrĩ ũguo, tũngĩtiga gũcaĩra andũ arĩa tũhunjagĩria, kĩyo gitũ no kĩnyihe na tũremwo kũmateithia. No o ta ũrĩa tuongagĩrĩra mwaki ngũ nĩguo ũthiĩ na mbere gwakana, noguo gũkorũo tũrĩ na ũcayanĩri gũtũmaga kĩyo gitũ ũtungata-inĩ gĩthiĩ na mbere kuongerereka.—1 Thes. 5:19.
Tũngĩka atĩa nĩguo tũkoragwo na ũcayanĩri o na rĩrĩa gwĩka ũguo arĩ ũndũ mũritũ? Rekei tuone ũrĩa tũngĩĩgerekania na Jehova, Jesu, na mũtũmwo Paulo.
WĨGEREKANAGIE NA ŨCAYANĨRI WA JEHOVA
Kwa ihinda rĩa mĩaka mĩingĩ, andũ nĩ makoretwo makĩhaka rĩĩtwa rĩa Jehova gĩko. O na kũrĩ ũguo, we nĩ “atugaga andũ arĩa matarĩ ngatho na arĩa oru.” (Luk. 6:35) Onanagia ũtugi wake na njĩra ya gũkirĩrĩria. Jehova endaga “andũ a mĩthemba yothe” mahonokio. (1 Tim. 2:3, 4) O na gũtuĩka Ngai nĩ athũire maũndũ moru, onaga andũ marĩ a bata na ndendaga o na ũmwe wao orũo nĩ muoyo wake.—2 Pet. 3:9.
Jehova nĩ oĩ atĩ Shaitani nĩ ahotete gũtumumaria meciria ma andũ arĩa matetĩkĩtie. (2 Kor. 4:3, 4) Andũ aingĩ maarutirũo maũndũ ma maheeni kuuma marĩ o anini na ũndũ ũcio nĩ ũtũmĩte ũkorũo ũrĩ ũndũ mũritũ harĩ o gwĩtĩkĩra ũhoro wa ma. Jehova nĩ endaga mũno gũteithia andũ ta acio. Tũmenyaga ũguo atĩa?
Ta wĩcirie ũrĩa Jehova onaga andũ a Nineve. O na gũtuĩka nĩ meekaga maũndũ moru, Jehova eerire Jona ũũ: “Niĩ na niĩ-rĩ, githĩ ndiagĩrĩirũo nĩ kũiguĩra Nineve tha, itũũra inene ũũ, rĩrĩ rĩĩ na andũ gũkĩra ngiri igana rĩa ngiri mĩrongo ĩĩrĩ thĩinĩ warĩo, arĩa matangĩmenya gũkũũrana guoko kwa ũrĩo kana kwa ũmotho?” (Jona 4:11) Jehova nĩ onaga atĩ andũ a Nineve matioĩ ũhoro wake, na ũndũ ũcio ũgĩtũma amaiguĩre tha, agĩtũma Jona amahe mũkaana.
O na ithuĩ tuonaga andũ marĩ a bata o ta ũrĩa Jehova amonaga. No twĩgerekanie nake na njĩra ya gũteithia arĩa mangĩtũthikĩrĩria twĩyendeire, o na angĩkorũo matironeka ta mangĩĩruta ũhoro wa ma.
WĨGEREKANAGIE NA ŨCAYANĨRI WA JESU
Jesu nĩ eegerekanagia na Ithe na njĩra ya kũiguĩra tha andũ arĩa maarĩ ahũtu kĩĩroho. Bibilia yugaga ũũ: “Rĩrĩa onire kĩrĩndĩ, akĩringwo nĩ tha tondũ nĩ gĩatihangĩtio na gĩgatiganĩrio ta ng’ondu itarĩ na mũrĩithi.” (Mat. 9:36) Jesu nĩ aaroraga maũndũ na njĩra ndikĩru akona atĩ andũ arĩa mokaga kũmũthikĩrĩria nĩ maarutĩtwo maũndũ ma maheeni na nĩ maahinyagĩrĩrio nĩ atongoria ao a ndini. O na gũtuĩka nĩ oĩ atĩ ti andũ othe arĩa maamũthikagĩrĩria mangĩetĩkĩrire kũmũrũmĩrĩra, aathire na mbere “kũmaruta maũndũ maingĩ.”—Mar. 4:1-9.
Ndũgakue ngoro mũndũ angĩaga gũthikĩrĩria kĩambĩrĩria-inĩ
Maũndũ nĩ macenjagia magatũma mũndũ acenjie ũrĩa onaga ũhoro wa ma
O na ithuĩ rĩrĩa andũ maga kwamũkĩra ndũmĩrĩri itũ na njĩra njega nĩ twagĩrĩirũo kũgeria gwĩciria kĩrĩa kĩratũma. Amwe no makorũo na mawoni moru kwerekera Bibilia kana Akristiano nĩ ũndũ wa kuona maũndũ moru marĩa mekagwo nĩ andũ meĩtaga Akristiano. No gũkorũo angĩ magaga gũthikĩrĩria ndũmĩrĩri itũ tondũ nĩ merĩtwo maũndũ ma maheeni matwĩgiĩ. Angĩ nao no gũkorũo nĩ metigagĩra kũnyũrũrio nĩ andũ a itũũra kana a famĩlĩ ciao mangĩtwamũkĩra.
Andũ amwe tũkoraga ũtungata-inĩ no mage gũtwamũkĩra nĩ ũndũ wa gũkorũo macemanĩtie na maũndũ maritũ ũtũũro-inĩ wao magatũma makue ngoro mũno. Mishonarĩ ũmwe wĩtagwo Kim oigire ũũ: “Gĩcigo-inĩ kĩmwe tũhunjagia gĩkoragwo na andũ aingĩ morirũo nĩ indo ciao ciothe nĩ ũndũ wa mbaara. Matikoragwo na mwĩhoko wa ihinda rĩũkĩte. Makoragwo marakarĩte na gũtirĩ mũndũ mehokaga. Kaingĩ gĩcigo-inĩ gĩkĩ nĩ tũcemanagia na andũ matendete ndũmĩrĩri ĩrĩa tũhunjagia. Hĩndĩ ĩmwe o na nĩ ndahũũrirũo ngĩhunjia.”
Mwarĩ wa Ithe witũ Kim ahotaga atĩa gũcaĩra andũ o na ekĩtwo ũndũ ta ũcio mũũru? Oigire ũũ: “Hĩndĩ ĩrĩa ndekwo ũndũ mũũru ndirikanaga Thimo 19:11 ĩrĩa yugaga: ‘Mũndũ e na ũgerekereri nĩũgiragia ahiũhe kũrakara.’ Gwĩciria maũndũ megiĩ andũ acio tũhunjagĩria nĩ kũndeithagia kũmacaĩra. Ningĩ ti andũ othe makoragwo na ũũru. Nĩ tũkoragwo na andũ ega mũno tũcokagĩra gĩcigo-inĩ o kĩu.”
No wĩyũrie ũũ: ‘Korũo nĩ niĩ ndĩroka kũhunjĩrio-rĩ, no thikĩrĩrie ndũmĩrĩri ya Ũthamaki?’ Kwa ngerekano, ĩ angĩkorũo wanerũo maita maingĩ maũndũ ma maheeni megiĩ Aira a Jehova? Kũngĩkorũo kũhaana ũguo, kwahoteka o nawe no ũrege gũthikĩrĩria na ũbatare kũiguĩrũo tha. Twaririkana watho wa Jesu wĩgiĩ gwĩka andũ arĩa angĩ o ta ũrĩa tũngĩenda gwĩkwo, ũndũ ũcio nĩ ũtũmaga tũcaĩre andũ arĩa angĩ o na rĩrĩa arĩ ũndũ mũritũ gwĩka ũguo.—Mat. 7:12.
WĨGEREKANAGIE NA ŨCAYANĨRI WA PAULO
Mũtũmwo Paulo nĩ aaiguagĩra nginya andũ arĩa maamũkagĩrĩra tha. Nĩkĩ? Nĩ aaririkanaga atĩ o nake noguo aahanaga mbere ĩyo. Oigire ũũ: “Tene ndaarĩ mũrumi Ngai na mũnyarirani na mũndũ ũtaarĩ gĩtĩo. O na kũrĩ ũguo, nĩ ndaiguĩrĩirũo tha tondũ ndeekaga maũndũ macio nĩ ũndũ wa kwaga ũmenyo na kwaga wĩtĩkio.” (1 Tim. 1:13) Nĩ aamenyaga atĩ Jehova na Jesu nĩ maamũiguĩrĩire tha na njĩra nene. Kwahoteka nĩ onaga andũ amwe aahunjagĩria magĩka ta ũrĩa eekaga mbere ĩyo.
Rĩmwe na rĩmwe Paulo nĩ aakoraga andũ maarũmĩtie biũ morutani ma maheeni. Eekaga atĩa? Atũmwo 17:16 yugaga atĩ rĩrĩa aarĩ Athene ‘nĩ aarakarire mũno ona atĩ itũũra rĩu rĩaiyũire mĩhianano.’ O na kũrĩ ũguo, ũndũ o ũcio wamũrakarĩtie noguo aahũthĩrire kũhunjia. (Atũm. 17:22, 23) Nĩ aagarũragĩra njĩra ciake cia kũhunjia nĩguo ahote kũhunjĩria andũ a mĩthemba yothe tondũ eendaga “kũngĩhoteka na njĩra o yothe, [ahonokie] amwe.”—1 Kor. 9:20-23.
Hĩndĩ ĩrĩa tũrahunjia nĩ tũkoraga andũ marĩ na mawoni matagĩrĩire kana mawĩtĩkio mahĩtanu. O ta Paulo, no tũhũthĩre maũndũ macio tũĩ mamegiĩ kũmateithia merute “ũhoro mwega wa maũndũ maagĩrĩru.” (Isa. 52:7) Mwarĩ wa Ithe witũ ũmwe wĩtagwo Dorothy oigire ũũ: “Andũ aingĩ gĩcigo-inĩ kĩrĩa tũhunjagia marutĩtwo atĩ Ngai ndarĩ tha na aikaraga agĩethagĩra andũ mahĩtia. Nyambaga ngamacokeria ngatho nĩ ũndũ nĩ metĩkĩtie Ngai arĩ kuo ngacoka ngamonia atĩ Bibilia yonanagia Jehova nĩ Ngai wendete andũ na ngamonia ciĩranĩro ciake cia ihinda rĩũkĩte.”
“TOORAGIA ŨŨRU NA NJĨRA YA GWĨKAGA WEGA”
O ũrĩa tũrakuhĩrĩria mũthia wa ‘matukũ ma kũrigĩrĩria’ no twĩrĩgĩrĩre atĩ andũ amwe tũhunjagĩria “marĩkĩragĩrĩria o kũũruha.” (2 Tim. 3:1, 13) No tũtiagĩrĩirũo kũreka ũndũ ũcio ũtũme tũtige kũiguĩra andũ arĩa angĩ tha kana ũtũme twage gĩkeno. Jehova no atũhe hinya wa ‘gũtooragia ũũru na njĩra ya gwĩkaga wega.’ (Rom. 12:21) Painia ũmwe wĩtagwo Jessica aatarĩirie ũũ: “Kaingĩ nĩ njemanagia na andũ matarĩ enyihia na nĩ matũhũthagia na makahũthia ndũmĩrĩri itũ. Ũndũ ũcio no ũrakarie mũndũ. Ngĩaria na mũndũ ta ũcio, hoyaga Jehova na ngoro ngamũũria andeithie kuona mũndũ ũcio ta ũrĩa aramuona. Ũndũ ũcio ũtũmaga ndige gwĩciria ũrĩa mũndũ ũcio atũma njigue ũũru na handũ ha ũguo ngeciria ũrĩa ingĩmũteithia.”
Tũthiaga na mbere gũcaria arĩa marĩ na mwerekera ũrĩa wagĩrĩire wa kũheo muoyo wa tene na tene
Andũ amwe nĩ metĩkagĩra ũhoro ũrĩa wa ma tũngĩthiĩ na mbere kwĩrutanĩria tũtegũkua ngoro
Ningĩ rĩrĩa tũrahunjia na aarĩ na ariũ a Ithe witũ nĩ twagĩrĩirũo gwĩciria ũrĩa tũngĩmekĩra ngoro. Jessica oigire ũũ: “Ũmwe witũ angĩcemania na ũndũ ũtanamũkenia tũkĩhunjia, ndiendaga tũwarĩrĩrie mũno. Handũ ha ũguo, nyendaga twarĩrĩrie maũndũ ma gũtwaka ta ũrĩa wĩra witũ wa kũhunjia ũragĩa na moimĩrĩro mega o na andũ amwe makĩregaga gũthikĩrĩria.”
Jehova nĩ oĩ wega moritũ marĩa tũcemanagia namo rĩrĩa tũrahunjia. Na githĩ ndakenaga mũno rĩrĩa twegerekania nake harĩ kũiguanĩra tha! (Luk. 6:36) O na kũrĩ ũguo, Jehova ndegũtũũra aiguĩrĩire andũ oru tha. Tũrĩ na ma atĩ nĩ oĩ ihinda rĩrĩa rĩagĩrĩire rĩa kũniina mũtabarĩre ũyũ. No mbere ya ihinda rĩu rĩkinyĩte, twagĩrĩirũo gũthiĩ na mbere kũhunjia na kĩyo. (2 Tim. 4:2) Kwoguo rekei tũthiĩ na mbere kũhunjia tũrĩ na kĩyo na tũcayagĩre “andũ a mĩthemba yothe.”
