Mubonise Mukekecima Kwa “Batu ba Mufuta Kaufela”
JESU hanaaluta balutiwa bahae mwakukutaleza taba yende, naabataluselize kuli haki batu kaufela bane bakaamuhela taba ya Mubuso. (Luka 10:3, 5, 6) Halukutaza, lwakona kufumana batu babakona kuluhanyaukela kamba kulueza maswe. Haluipumana mwa miinelo yecwalo, kukona kulubela taata kubonisa mukekecima kwa batu bolukutaza ku bona.
Kuba ni mukekecima kutalusa kulemuha zebatokwa batu ni butata bobakopana ni bona, kubautwela butuku ni kubata kubatusa. Haiba lusabonisi mukekecima kwa batu bolukutaza ku bona, kuka lubela taata kuba ni tukufalelo ni kupeta hande bukombwa bwaluna. Kono halubonisa babañwi mukekecima, lukaba ni tukufalelo yetuna mwa bukombwa, sina feela mutu yakoteza mulilo kuli uzwelepili kutuka.—1 Mates. 5:19.
Lukona kubonisa cwañi mukekecima niha kuli taata kueza cwalo? Halunyakisiseñi mitala yemilaalu yeluswanela kulikanyisa, ili mutala wa Jehova, wa Jesu, ni wa muapositola Paulusi.
MULIKANYISE MUKEKECIMA WA JEHOVA
Jehova uitiisize ka lilimo zeñata-ñata batu niha banyefuzi libizo lahae. Uzwezipili kubonisa “sishemo ku babasina buitumelo ni ku babamaswe.” (Luka 6:35) Ubonisize sishemo seo ka kuba ni pilu-telele. Jehova ubata kuli “batu ba mufuta kaufela” bapiliswe. (1 Tim. 2:3, 4) Nihaike kuli Mulimu utoile bumaswe, uunga batu kuli ki ba butokwa, mi hatabeli kuli mutu ufi kamba ufi atimezwe.—2 Pit. 3:9.
Jehova waziba kuli Satani ufoufalize hahulu minahano ya batu babasa lumeli. (2 Makor. 4:3, 4) Batu babañata balutilwe lituto za buhata ni mibonelo yefosahalile kuzwa feela kwa bwanana, ili kutahisa kuli kubabele taata kuamuhela niti. Jehova ubata kutusa batu bao. Luziba cwañi cwalo?
Ka mutala, halunyakisiseñi mwanaangezi Jehova batu ba mwa Ninive. Kusina taba kuli batu bao neli ba mifilifili, Jehova naaize ku Jonasi: “Kana ni na haniswaneli kuutwela butuku Ninive muleneñi omutuna, mokunani batu babafitelela 120,000, ili babasazibi shutano ye mwahalaa sesilukile ni sesifosahalile?” (Jona. 4:11) Jehova naautwisisa kuli batu ba mwa Ninive nebasa zibi niti ka za hae, mi kabakaleo, abashwela makeke ka kuluma Jonasi kuli ayo balemusa.
Ka kuswana ni Jehova, ni luna luswanela kuunga batu kuba ba butokwa. Lwakona kumulikanyisa ka kuikataza kutusa batu babatabela kuteeleza, niha babonahala kuli habakoni kuamuhela niti.
MULIKANYISE MUKEKECIMA WA JESU
Jesu, ka kuswana ni Ndatahe, naashwelanga makeke batu bane basazibi Mulimu. Bibele ibulela kuli: “Habona buñata, abashwela makeke, kakuli nebaziyelehile ni kuhasana sina lingu zesina mulisana.” (Mat. 9:36) Jesu naautwisisa muinelo one bali ku ona batu; naaziba kuli batu bane bato teelezanga ku yena nebalutilwe lituto za buhata ni kuezwa maswe ki baeteleli babona ba bulapeli. Nihaike kuli Jesu naaziba kuli babañata nebasike baamuhela lushango lwahae bakeñisa miinelo yetaata yene batalimana ni yona, naazwezipili “kubaluta lika zeñata.”—Mare. 4:1-9.
Musike mwazwafa haiba mutu asaamuheli lushango lwaluna halu mupotela lwapili
Miinelo yebakopana ni yona batu mwa bupilo yakona kucinca, mi bakona kutabela kuteeleza kwa taba yende
Haiba batu bahana kuteeleza kwa lushango lwaluna, luswanela kulika kuutwisisa libaka habahana. Babañwi habatabeli Bibele kamba bulapeli bwa Bakreste bakeñisa kuli baboni batu babaipala kuba Bakreste habaeza lika zemaswe. Mwendi babañwi bataluselizwe litaba za buhata ka za luna. Mi babañwi bona basaba kuli haiba baamuhela lushango lwaluna, batu babapila ni bona kamba ba lubasi lwabona baka basheununa.
Batu babañwi bolukopananga ni bona mwa bukombwa bakona kuhana kuamuhela lushango lwaluna bakeñisa kozi yenee batahezi, ili yeebalembwalisize. Kaizeli yomuñwi yali mulumiwa yabizwa Kim, utalusa kuli: “Mwa sibaka sesiñwi selukutalezanga ku sona, batu babañata basinyehezwi ki maluwo abona kaufela mwa ndwa. Habazibi mobaka ipiliseza. Bazwafile mi habasepi mutu. Mwa sibaka seo, hañata lukopananga ni batu babasa amuhelangi lushango lwaluna. Zazi leliñwi hane nikutaza, muñaa ndu yomuñwi naanilwanisize, mane abata kunibulaya.”
Ki sika mañi sesitusize bo Kim kuzwelapili kubonisa mukekecima kusina taba kuli nebaezizwe maswe? Batalusa kuli: “Haniezwa maswe, nilikanga kuhupula manzwi afumaneha kwa liñolo la Liproverbia 19:11, aali: ‘Kutwisiso ya mutu ikuyula buhali bwahae.’ Kuhupula zebatalimani ni zona batu ba mwa sibaka selukutalezanga ku sona kunitusize kubabonisa mukekecima. Mi haki batu kaufela bolukopananga ni bona babahananga kuteeleza kwa lushango lwaluna. Mwa sibaka sesiswana seo, kunani batu babañwi babatabela bolupotelanga.”
Lukona kuipuza kuli: ‘Kana nenika amuhela taba ya Mubuso kambe ni na nenili mwa muinelo obali ku ona batu bonikutaza ku bona?’ Ka mutala, neluka eza cwañi kambe lutaluselizwe litaba za buhata zeñata ka za Lipaki za Jehova? Kambe neluli mwa muinelo ocwalo, mwendi ni luna neluka hana kuteeleza kwa taba yende mi neluka tokwa kuboniswa mukekecima. Haluhupula taelo ya Jesu ya kuli lueze babañwi sina molubatela kuli baluezeze, lukasusuezwa kubashwela makeke niha kuli taata kueza cwalo.—Mat. 7:12.
IMULIKANYISE MUKEKECIMA WA PAULUSI
Muapositola Paulusi naabonisize mukekecima nihaiba kwa batu bane bamuezize maswe. Ki lika mañi zenee mutusize kueza cwalo? Naahupulanga kuli ni yena naabanga mulwanisi. Naaize: “Sapili nenili munyefuli ni munyandisi ni wa kashwau. Kono nashemubiwa, kakuli nenieza cwalo ka kusaziba ni ka kutokwa tumelo.” (1 Tim. 1:13) Naaitebuha kuli Jehova ni Jesu neba mubonisize makeke amatuna. Mwendi naalemuhile kuli batu babañwi banaakutaza ku bona nebabonisa mikwa yeswana ni yanaanani yona pili asikaba kale Mukreste.
Ka linako zeñwi, Paulusi naakopananga ni batu bane batiiselize mwa lituto za buhata. Naaikutwanga cwañi? Liñolo la Likezo 17:16 litalusa kuli Paulusi hanaali mwa Atene, “moya wahae wafilikana habona kuli muleneñi utezi milimu ya maswaniso.” Nihakulicwalo, Paulusi naaitusisize taba yenee mufilikanyize yeo kufa bupaki. (Lik. 17:22, 23) Naacincanga mukutalezo wahae ka kuya ka simuluho ya batu banaakutaza ku bona ilikuli akone “kupilisa babañwi ka mokukonahalela kaufela.”—1 Makor. 9:20-23.
Lukona kulikanyisa Paulusi ka kuutwisisa batu babanani mubonelo kamba lituto zefosahalile bolukopananga ni bona, ni kubonisa maseme halu bataluseza “taba yende ya lika zende hahulu.” (Isa. 52:7) Kaizeli yomuñwi yabizwa Dorothy utalusa kuli: “Mwa sibaka selukutalezanga ku sona, batu babañata balutilwe kuli Mulimu unani buhali mi haaswaleli. Nibabazanga batu babacwalo kabakala kuli balumela ku Mulimu, mi hasamulaho, nibabonisanga zeibulela Bibele ka za tulemeno twa Jehova totunde ni zasepisize kuluezeza kwapili.”
‘MUZWELEPILI KUKOMA BUMASWE KA BUNDE’
Halunze luzwelapili kupila mwa “mazazi a mafelelezo,” lulibelela kuli mikwa yemaswe ya batu babañwi bolukutaza ku bona ‘ikatotobela’ hahulu. (2 Tim. 3:1, 13) Kono haluswaneli kutuhela kubabonisa mukekecima kamba kuzwafa kabakala mikwa yebanani yona. Jehova wakona kulufa maata kuli ‘luzwelepili kukoma bumaswe ka bunde.’ (Maro. 12:21) Kaizeli yali paina yabizwa Jessica utalusa kuli: “Hañata nikopananga ni batu babasina buikokobezo, ili baba lunyaziseza ni kulwanisa taba yelukutaza. Taba yeo fokuñwi yanifilikanyanga. Hanikalisanga kuambola ni mutu, nalapelanga mwa pilu kukupa Jehova kuli anituse kuunga mutu yo sina mwamuungela. Kueza cwalo kunitusanga kusanahana feela ka za moniikutwela, kono ninahananga monikona kutuseza mutu yeniambola ni yena.”
Luzweleñipili kubata batu ba lipilu zende bababata bupilo bobusa feli
Batu babañwi baamuhelanga niti hamulaho wa kuikataza kubatusa
Hape luswanela kunahana molukona kususueleza Bakreste babañwi. Bo Jessica batalusa kuli: “Haiba yomuñwi ku luna mwa bukombwa akopana ni muinelo ozwafisa, nilikanga kusaambola hahulu taba yeo. Kono niambolanga litaba zesusueza, inge cwalo lika zende zelupeta mwa bukombwa bwaluna, kusina taba kuli batu babañwi haba luamuhelangi.”
Jehova waziba miinelo yetaata yelukopananga ni yona mwa bukombwa. Ubanga ni tabo yetuna kulubona halulikanyisa makeke ahae! (Luka 6:36) Kono hakutalusi kuli Jehova ukazwelapili kubonisa mukekecima kwa batu ba lifasi kuya kuile. Lunani buikolwiso bwa kuli Jehova waziba nako yeswanela ya kufelisa lifasi le. Kono pili nako yeo isika fita kale, luswanela kukutaza ka putako. (2 Tim. 4:2) Haike luzweleñipili kueza musebezi olufilwe ka tukufalelo ni kubonisa mukekecima kwa “batu ba mufuta kaufela.”
