Kwal̦o̦k Tũriam̦o ñan “Armej Otemjej”
KE JESUS ear katakin rũkal̦oor ro an kõn kilen aer kwal̦o̦k naan, ear ba bwe ejjab aolep iien armej ro renaaj kõn̦aan roñjake ennaan in kõn Aelõñ eo. (Luk 10:3, 5, 6, UBS) Ilo jerbalin kwal̦o̦k naan, emaroñ wõr jet armej reban kõn̦aan roñjake kõj ak emaroñ nana aer kõnnaan tok ñan kõj. Ilo m̦ool, wãween kein remaroñ kõm̦m̦an bwe en pen ñan ad kwal̦o̦k naan im kwal̦o̦k jouj im tũriam̦o ñan ro jej kwal̦o̦k naan ñan er.
Juon eo etũriam̦o ej bũrom̦õj kake ro rej iioon apañ im ej m̦õn̦õn̦õ in jipañ er. Ijoke ñe ej jino dikl̦o̦k ad kwal̦o̦k tũriam̦o ñan ro jej kwal̦o̦k naan ñan er, emaroñ jino dikl̦o̦k ad kijejeto im lo tõprak ilo jerbal in. Bõtab el̦aññe jej kwal̦o̦k tũriam̦o, enaaj l̦apl̦o̦k wõt ad kijejeto ilo jerbalin kwal̦o̦k naan ãinwõt juon kijeek eo jej anõkkaane bwe en kajoorl̦o̦k wõt!—1 Te. 5:19.
Ewi wãween ad maroñ kwal̦o̦k tũriam̦o meñe jet iien emaroñ pen ñan ad kwal̦o̦ke? Eokwe jen etale jilu waanjoñak ko jemaroñ anõki. Jenaaj etale waanjoñak ko an Jeova, Jesus, im rijjilõk Paul.
ANÕKE JEOVA ILO AN KWAL̦O̦K TŨRIAM̦O
Ium̦win elõñ to̦ujin iiõ in an Jeova kijenmej wõt meñe elõñ alen an armej ro kattoon etan. Meñe ãindein, ak Jeova ej kwal̦o̦k wõt “jouj ñan ro rejaje kam̦m̦oolol im ro rinana.” (Luk 6:35, UBS) Ej kwal̦o̦k an jouj ilo an kijenmej im meanwõd. Jeova ekõn̦aan bwe “armej otemjej ren bõk lo̦mo̦o̦r.” (1 Ti. 2:3, 4, UBS) Meñe Jeova ej diki men ko renana armej ro rej kõm̦m̦ani, ak ej kaorõk mour an armej im ejjab kõn̦aan bwe ren luuji mour ko aer.—2 Pi. 3:9.
Jeova emel̦el̦e kõn joñan an Setan lo tõprak ilo an tõlpilouk l̦õmn̦ak ko an armej ro rejjab tõmak. (2 Ko. 4:3, 4, UBS) Elõñ armej rej imminene kõn katak ko rejjab m̦ool jãn ke rar dik, im men in ekõm̦m̦an bwe en pen aer roñjake m̦ool eo. Bõtab Jeova elukkuun kõn̦aan jipañ armej rein. Etke jejel̦ã men in?
Jen etale wãween an kar Jeova l̦õmn̦ak kõn RiNineva ro ilo iien ko etto. Meñe rar kõm̦m̦ani men ko relukkuun nana, ak Jeova ear ba ñan Jona: “Im Ña, In jab tũriam̦okake Nineva, jikin kweilo̦k in el̦ap, eo ilo e elõñ jãn 120,000 armej ro re jab jel̦ã anmoon̦ jãn anmiiñ ke [rejjab jel̦ã ta eo em̦m̦an im enana, NW]?” (Jona 4:11) Alikkar bwe Jeova ear kwal̦o̦k an tũriam̦o kõn armej rein me rar jab jel̦ã kõn e. Kõn men in ear jilkinl̦o̦k Jona bwe en kakkõl er.
Ãinwõt Jeova, jej watõk mour ko an armej bwe raorõk. Jemaroñ anõke e ikijjeen ad kõn̦aan jipañ jabdewõt eo ej roñjake kõj meñe remaroñ jab lukkuun itoklimo.
ANÕKE JESUS ILO AN KWAL̦O̦K TŨRIAM̦O
Jesus ear ãinwõt Jemãn kõnke ear tũriam̦okake armej ro me rar pãd ilo aikuj. Baibõl̦ ej ba: “A ke Ej lo jar ko, Ej tũriam̦okake er, bwe rej parõk, im jeplõklõk ãinwõt jiip ko ejjel̦o̦k aer jabõt.” (Matu 9:36) Jesus ear lo ta eo ear pãd ilo bũruon armej ro. Ear kile bwe rũtõlin kabuñ ro rar katakin er kõn katak ko rejjab m̦ool im ear nana aer kõm̦m̦an ñan er. Innem meñe ear jel̦ã bwe elõñ iaan rein rar roñjake e renaaj kõtl̦o̦k bwe apañ ko ilo mour ko aer ren bõbrae aer erom rũkal̦ooran, ak Jesus ear wõnm̦aanl̦o̦k wõt im “katakin er kõn elõñ men ko.”—Mark 4:1-9, UBS.
Ñe juon armej ejjab kwal̦o̦k an itoklimo ilo jinoin, jen jab m̦õkaj im ebbeer
Emaroñ jino oktak wãween an armej ro l̦õmn̦ak kõn m̦ool eo ñe eoktak men ko rej iiooni ilo mour ko aer
Ñe armej ro rejjab kõn̦aan roñjake ennaan eo jej kwal̦o̦k ñan er, jej aikuj kajjioñ mel̦el̦e kõn armej rein im kajitũkin kõj make kõn unin aer jab kõn̦aan roñjake kõj. Bõlen jet emaroñ jab em̦m̦an wãween aer l̦õmn̦ak kõn Baibõl̦ eo, ak kõn kabuñ kõn wõt joñak ko renana an ro rej ba bwe rej Kũrjin. Ak bõlen ro jet rar roñ mel̦el̦e ko rejjab m̦ool kõn katak ko ad. Meñe ro jet renaaj m̦õn̦õn̦õ in roñjake kõj ak remaroñ iioon wõt jum̦ae jãn ro ilo bukwõn ko aer ak jãn baam̦le ko aer.
Ewõr jet armej jemaroñ iioon er ilo iien kwal̦o̦k naan, im remaroñ jab kõn̦aan roñjake kõj kõnke rar iioon apañ ko rel̦l̦ap im elukkuun l̦ap aer bũrom̦õj. Juon jeid im jatid kõrã mijinede etan Kim ej ba: “Ilo jet jikin ko ilo teretore eo ammim, elõñ armej rar iioon tarin̦ae im rar luuji aolep men ko m̦weieer. Kõn men in, ejjel̦o̦k aer kõjatdikdik kõn ilju im jekl̦aj, el̦ap aer inepata im illu, im rejjab lõke ro jet. Ilo jikin in, ekkã ammim iioone armej ro rej lãj im jum̦ae kõm ñe kõmij kwal̦o̦k naan. Im juon iien, iar iioone wãween in ke iar kwal̦o̦k naan.”
Ewi wãween an Kim kwal̦o̦k wõt an meanwõd im tũriam̦o meñe ej iiooni wãween kein renana? Ej ba: “Ñe ejjab em̦m̦an an armej ro kõm̦m̦an ñan eõ, ij kajjioñ keememej naan ko ilo bokin Jabõn Kõnnaan 19:11 me ej ba: ‘Jel̦ãl̦o̦kjen̦ an juon armej ej kõm̦m̦an bwe en rum̦wij an illu.’ Ñe ij keememej wãween mour ko an armej ro ij iioone er ilo teretore eo aõ, men in ej jipañ eõ ñan kwal̦o̦k tũriam̦o ñan er. Ilo m̦ool ejjab aolep ro kõmij iioone er ilo kwal̦o̦k naan rej lãj ñan kõm. Ilo ejja bukwõn in wõt, ewõr jet armej ro rem̦õn̦õn̦õ in roñjake im kõmij bar jepl̦aak ippãer.”
Jemaroñ kajjitõk ippãd make, ‘Ñe in kar jab jel̦ã m̦ool eo, en kar ewi wãween aõ em̦m̦akũt ñe Ri Kõnnaan ro an Jeova ren kar itok im kwal̦o̦k naan ñan eõ?’ Ñan waanjoñak, ta el̦aññe elõñ alen an ro jet jiroñ tok kõj kõn mel̦el̦e ko reriab kõn Ri Kõnnaan ro an Jeova? Ñe en kar ãindein, bõlen jeban kar m̦õn̦õn̦õ in roñjake im jenaaj aikuji aer kwal̦o̦k tũriam̦o ñan kõj. Jesus ear ba bwe jen kõm̦m̦ani men ko jekõn̦aan bwe ro jet ren bar kõm̦m̦ani ñan kõj. Innem jej aikuj kate kõj ñan mel̦el̦e kõn eñjake ko an ro jet im kijenmej ippãer meñe jet iien men in emaroñ pen.—Matu 7:12, UBS.
ANÕKE PAUL ILO AN KWAL̦O̦K TŨRIAM̦O
Rijjilõk Paul ear kwal̦o̦k tũriam̦o ñan ro rar lãj im jum̦aiki. Etke? Kõnke ear jab mel̦o̦kl̦o̦k kõn wãween mour eo an m̦okta. Ear ba: ‘Meñe m̦okta I kein kajjirere im matõrtõre im lãj. A Anij ear tũriam̦okake eõ bwe iar kõm̦m̦an ãindein ke Iar jaje wõt im jañin tõmak.’ (1 Ti. 1:13) Paul ear kile bwe Jeova im Jesus rar kwal̦o̦k aer lukkuun tũriam̦okake e. Ilo an kar iioon armej ro rar jum̦aik e ilo kwal̦o̦k naan emaroñ kar kakeememeje kõn wãween mour eo an m̦okta.
Jet iien, Paul ear iioone armej ro rar lukkuun tõmak katak ko rejjab m̦ool. Innem ta eo Paul ear kõm̦m̦ane? Ilo Jerbal 17:16 (UBS) ej kwal̦o̦k bwe ke Paul ear pãd ilo Atens, “ear kanooj inepata bũruon kõn an lo an lõñ ekjab ilo jikin kweilo̦k eo.” Bõtab ear ukot men eo ear abn̦õn̦õ im inepata kake im kwal̦o̦k naan ñan armej ro. (Jrb. 17:22, 23, UBS) Ear m̦õn̦õn̦õ in kõm̦m̦an oktak ko ekkar ñan armej ro ear iioone er ilo kwal̦o̦k naan bwe en maroñ “lo̦mo̦o̦ren jet.”—1 Ko. 9:20-23.
Ñe jej iioon armej ro ejjab em̦m̦an aer kõm̦m̦an ñan kõj ilo kwal̦o̦k naan ak rej tõmaki katak ko rejjab m̦ool, jemaroñ anõke joñak eo an Paul. Jemaroñ ukote wãween eñjake ko aer im jipañ er ilo ad katakin er kõn “naan ko rem̦m̦an.” (Ais. 52:7, UBS) Juon jeid im jatid kõrã etan Dorothy ej ba: “Ilo teretore eo ammim elõñ armej em̦õj aer katak bwe Anij elãj im ej ekajete kõj kõn kõm̦m̦an ko ad. Ij nõbar armej rein kõn aer tõmak ilo Anij innem ij kwal̦o̦k ta eo Baibõl̦ ej ba kõn Jeova, im kadkad ko rem̦m̦an ippãn im kallim̦ur ko an kõn ilju im jekl̦aj.”
“KWÕN ANJO̦ IOON NANA KÕN EM̦M̦AN”
Ilo ad epaakel̦o̦k jem̦l̦o̦kin jukjukun pãd in, jej kõtmãne bwe kõm̦m̦an ko an armej ro enaaj ‘l̦apl̦o̦k aer nana.’ (2 Ti. 3:1, 13) Ijoke jejjab aikuj kõtl̦o̦k bwe men in en kabõjrak kõj jãn ad kwal̦o̦k tũriam̦o im jãn ad m̦õn̦õn̦õ wõt. Jeova emaroñ kõkajoor kõj bwe jen “anjo̦ ioon nana kõn em̦m̦an.” (Rom 12:21, UBS) Juon bainier etan Jessica ej ba: “Ekkã aõ iioone armej ro eutiej bũrueer im rej kajjirere kake kõj im kõn ennaan eo jej kwal̦o̦ke. Jet iien men in ej kõm̦m̦an aõ inepata im illu. Ñe ij jino kõnono ippãn juon armej, ij jar ñan Jeova ilo bũruõ im kajjitõk bwe en jipañ eõ bwe in watõk armej eo ãinwõt an bar watõke. Wãween in ekõm̦m̦an bwe in jab l̦õmn̦ak wõt kõn eñjake ko aõ ak in l̦õmn̦ak kõn wãween aõ maroñ jipañ armej eo.”
Jej wõnm̦aanl̦o̦k im kappukot ro rekõn̦aan jel̦ã m̦ool eo
Ñe jej kwal̦o̦k ad kijenmej, jet renaaj oktak im m̦õn̦õn̦õ in katak kõn m̦ool eo
Jej aikuj bar kate kõj ñan rõjañ ro jeid im jatid ñe jej kwal̦o̦k naan ippãer. Jessica ej ba: “Ñe ij kwal̦o̦k naan ippãn ro jeid im jatid im ñe ewõr juon men enana ear wal̦o̦k ñan juon iaammim, ij kajjioñ jab l̦õmn̦ak kõn men in. Bõtab ij ukot men eo kõmij kõnnaan kake ñan men ko remaroñ kõketak kõj, ãinwõt men ko rem̦m̦an rej wal̦o̦k jãn ammim kwal̦o̦k naan meñe ewõr jet rejjab kõn̦aan roñjake.”
El̦ap an Jeova jel̦ã kõn apañ ko jej iiooni ilo jerbalin kwal̦o̦k naan. Innem ejjel̦o̦k pere bwe elukkuun m̦õn̦õn̦õ ñe ej lo ad kate kõj ñan anõke ilo ad kwal̦o̦k tũriam̦o ñan ro jet! (Luk 6:36, UBS) Ilo m̦ool eban to an Jeova kwal̦o̦k tũriam̦o ñan armej ro ilo lal̦ in. Jemaroñ lõke bwe Jeova ejel̦ã iien eo ejejjet ñan an bõktok jem̦l̦o̦kin jukjukun pãd in. Bõtab ilo tõrein, jerbalin kwal̦o̦k naan eo ad ej juon menin ekkaiuriur. (2 Ti. 4:2) Kõn men in jen wõnm̦aanl̦o̦k wõt im kijejeto ilo ad kwal̦o̦k naan im kwal̦o̦k tũriam̦o ñan “armej otemjej.”
