Matikimiknelikan nochimej tlaltikpakchanejkej
IJKUAK Jesús okinmachti inomachtijkauan kenon kiteijliskej kuajli tlajtoltin, yejua kimatstoya ika miyekej xkinekiskiaj kinkakiskej (Luc. 10:3, 5, 6). Kemantika ijkuak titenojnotsaj tikinnextiaj akin techixnamikij niman hasta akin kinekij techkokoskej. Yejuin uelis kichiuas matechtekiyomaka tikimikneliskej akin tikinnojnotsaj.
Akin teikneliani kita tlenon kinpoloua tlaltikpakchanejkej niman katlejua tlaueltin kixnamikij, kimiknelia niman kineki kinpaleuis. Kuakon, tla tejuamej xok ijkon titeikneliaj ken achtopa, kanaj xok techyolpaktis titenojnotsaskej niman xok kuajli tikchiuaskej. San ika, tla tokojtiliaj titeikneliskej, kichiuas matiyolpakikan ijkuak titenojnotsaskej. Kentla tiktlatokilijtoskiaj se tlitl niman ijkon maka maseui (1 Tes. 5:19).
¿Tlenon techpaleuis matiteiknelikan, maski ijkuak techtekiyomakas? Matikitakan ineskayo Jehová, Jesús niman apóstol Pablo.
MATITEIKNELIKAN IJKON KEN JEHOVÁ
Melak miyek xiujtin, Jehová yokijyoui tlen xkuajli kijtouaj itech. Maski ijkon, yejua kimiknelia “on yejuan xitlaj kitlajsojkamatij niman intech on yejuan xkuajkualtin tlakamej” (Luc. 6:35). Kuajli tikitaj ika teiknelia pampa kimijyouiya nochimej. Jehová kineki ika “nochi tlakatl ma makisa” (1 Tim. 2:3, 4). Maski toTajtsin kitlauelita tlen xkuajli, yejua kintlasojkaita tlaltikpakchanejkej niman xkineki yakaj mamiki (2 Ped. 3:9).
Jehová kimatstika ika Satanás kintlamachilispoloua akin xtlaneltokaj (2 Cor. 4:3, 4). Miyekej yokimijlikej tlen xmelauak itech toTajtsin ijkuak ok kokonej katkaj. Kuakon ken tlanemiliaj niman tlen kimachiliaj xkinkauilia makiselikan tlen melauak itech Biblia. San ika, Jehová melak kineki kinpaleuis. ¿Kenon tikmatstokej?
Matikitakan kenon Jehová kimitaya akin chantiyaj Nínive. Maski kichiuayaj tlen xkuajli, Jehová okijli Jonás: “¿Xkinamikiskia ika nejua noijki manikikneli ueyi kalpan Nínive, kampa nemij ipantsin 120,000 tlakamej akin nion xkimatij tlenon kuajli niman tlenon xkuajli, niman noijki inyolkauan tlen melak miyekej[?]”(Jon. 4:11). Jehová melak okimikneli akin chantiyaj Nínive pampa yejuamej xkixmatiyaj. Ika yejon, okititlan Jonás makimijliti tlenon kinekiya kichiuas.
Ijkon ken Jehová, tejuamej noijki tikintlasojkaitaj tlaltikpakchanejkej. Niman uelis tikixkopinaskej tla melak tiknekij tikinpaleuiskej akin techkakij, maski nesiskia ika xkinekij kitekichiuiliskej toTajtsin.
MATITEIKNELIKAN IJKON KEN JESÚS
Ijkon ken iTaj, Jesús okimikneli tlaltikpakchanejkej “pampa yejuamej najmanayaj niman xkipiayaj yolchikaualistli. Yejuamej nemiyaj ken on borreguitos yejuan xkipiaj intlajpixkau” (Mat. 9:36). Jesús okasikamat tleka ijkon nemiyaj. Tlaltikpakchanejkej ijkon nemiyaj pampa tlayekankej ipan tlaneltokiltin kinchiuiliayaj tlen xkuajli niman kinmachtiayaj tlen xmelauak. Niman maski Jesús kimatstoya ika miyekej akin kikakiyaj xnochiuaskiaj inomachtijkauan pampa itlaj kinteltiaya, yejua okinmachti “miyek tlajtlamach” (Mar. 4:1-9).
Maka xmajmana tla yakaj xkineki mitskakis
Innemilis tlaltikpakchanejkej nopatla niman noijki nopatla ken kitaj tlen melauak
Ijkuak tlaltikpakchanejkej xkuajli techkakiskej, kipiya tikasikamatiskej tleka ijkon kichiuaj. Kanaj miyekej xkitlakaitaj Biblia noso kintlauelitaj akin kichiuaj ken Cristo pampa miyekej akin kijtouaj ika tlaneltokaj kichiuaj tlen xkuajli. Oksekimej kanaj yokimijlikej tlen xmelauak itech tlen tikneltokaj. Noso kanaj oksekimej kinmojtia ika inchanejkauan noso akin kimixmatstokej makinpijpinaujtikan pampa touan tlajtouaj.
Sekimej tlaltikpakchanejkej kanaj xkinekij techkakiskej pampa okixnamijkej tlen melak okinyolkoko. Se misionera akin itoka Kim kijtoua: “Kampa titenojnotsaj, miyekej tlaltikpakchanejkej nochi okipolojkej ipampa se guerra. Xkipiyaj tlamachialistli. Najmanaj niman xakaj kineltokaj. Miyekpa tikinnextiaj akin xkinekij matitenojnotsakan. Se tonajli ijkuak nitenojnotstinemiya, kinekiyaj nexchiuiliskej tlen xkuajli”.
¿Tlenon kichiua Kim niman ijkon nochipa teiknelis? Yejua kijtoua: “Ijkuak nexchiuiliaj tlen xkuajli, nikyejyekoua nikilnamikis Proverbios 19:11 kampa kijtoua: ‛Itlamachilis se tlakatl kichiua maka nimantsin makualani’. Kuakon, nikilnamiki tlenon inpan onochiuj niman yejon nechpaleuiya manikimikneli. Noijki, nemij akin kema kuajli techkakij. Miyekej akin ompa chantij inikomintlajpaloua”.
Tejuamej uelis totlajtoltiskej: “Tla nejua xninomachtiskia, ¿tlenon nikchiuaskia tla iteixpantijkauan Jehová nechajnojnotsaskiaj?”. Matiknemilikan yejuin, tla miyekpa techijliskiaj tlen xmelauak itech iteixpantijkauan Jehová, kanaj noijki xtiknekiskiaj tikinkakiskej niman tiknekiskiaj matechiknelikan. Jesús okijto matikinchiuilikan oksekimej tlen tejuamej tiknekiskiaj matexchiuilikan. Kuakon, kipiya tikyejyekoskej tikasikamatiskej kenon oksekimej nomachiliaj niman tikimijyouiskej, maski ijkuak techtekiyomakas (Mat. 7:12).
MATITEIKNELIKAN IJKON KEN PABLO
Apóstol Pablo okimikneli hasta akin okitlaueltokakej pampa tenojnotsaya. ¿Tleka? Pampa yejua kilnamikiya tlenon okichiujka yeuejkaui. Okijto: “Maski nejua achtopa nikuijuikaltiaya Dios, niman niktlauelitaya niman niktlajyouiltiaya niman nikpijpinajtiaya, yejua sanoyej onechiknelij, pampa nejua xe nitlaneltokaya niman xnikmaktiya tlinon nikchiuaya” (1 Tim. 1:13). Pablo okasikamat ika Jehová niman Jesús melak okiknelijkaj. Yejua ouel okimasikamat tlaltikpakchanejkej akin kitlaueltokayaj pampa yejua noijki ijkon okichiujka.
Kemantika, Pablo kinnextiaya akin melak kineltokayaj tlen xmelauak katka. ¿Tlenon kimachiliaya ipampa yejon? Hechos 17:16 kijtoua ika ijkuak Pablo nemiya Atenas, yejua “noyolkokouaya, pampa okitak ika on ueyikan tentikaj ika on tlamachijchijualtin tetajtsitsiuan”. San ika, Pablo okitekitilti yejon tlen kiyolkokouaya niman ijkon kinmachtis tlaltikpakchanejkej (Hech. 17:22, 23). Yejua kitaya tlenon inpan yonochiujka tlaltikpakchanejkej niman ijkon kitaya kenon kinnojnotsas. Ijkon kichiuaya pampa kinekiya kichiuas nochi tlen ueliskia ika kinmakixtis oksekimej (1 Cor. 9:20-23).
Ijkuak tikinnextiskej akin kualanij noso kineltokaj tlen xmelauak, uelis tikchiuaskej ken Pablo. Uelis tiktekitiltiskej tlen tikmatstokej intechkopa niman ijkon tikinpaleuiskej makimatikan “kuajli tlajtoltin itech tlen melak kuajli” (Is. 52:7). Se tokniuj siuatl akin itoka Dorothy kijtoua: “Kampa titenojnotsaj, miyekej yokinmachtijkej ika toTajtsin xteikneliani niman ika chikauak tetlajtlakolmaka. Nejua nikimijlia ika melak kuajli ika tlaneltokaj itech toTajtsin, niman sakin nikimijlia tlenon kijtoua Biblia itech itlasojtlalis Jehová niman itech tlen yokijto kichiuas tlayekapan”.
“IKA ON TLEN KUAJLI XTLANIKAN ON TLEN XKUAJLI”
Tinemij “itlajtlankan” tonaltin niman tlaltikpakchanejkej ok melak kichiuaskej tlen xkuajli (2 Tim. 3:1, 13). San ika, xkipiya tijkauiliskej ika yejuin makichiua ika maka sa matiteiknelikan noso maka sa matipakikan. Jehová uelis techkojtilis niman ijkon matiktlanikan “on tlen xkuajli” ika “on tlen kuajli” (Rom. 12:21). Se tokniuj precursora akin itoka Jessica kijtoua: “Miyekpa nikiminextia akin noueyimatij niman akin techpijpinaujtiaj niman xtechkakisnekij ijkuak tikinnojnotsaj. Yejuin uelis melak techkualanis. Ijkuak peua yakaj niknojnotsa, san yoliktsin niktlajtlanilia Jehová manechpaleui manikita yejon tlaltikpakchane ijkon ken yejua kita. Ijkon xok san niknemilijtika tlen nikmachilia, niman niknemilia kenon uelis nikpaleuis”.
Nochipa tikintejtemojtokej akin kinekij kimatiskej tlen melauak
Sakin, sekimej kinekiskej matikinpaleuikan niman kinekiskej kixmatiskej tlen melauak
Noijki noneki matiknemilikan kenon tikinyolchikauaskej tokniuan akin imiuan titenojnotsaj. Jessica kijtoua: “Tla topan nochiua tlen xkuajli, nikyejyekoua xok san ipan yejon nitlanemilijtos. Okse tlemach nikteneua niman nikyejyekoua nitlajtos itech itlaj tlen teyolpakti, itlaj ken, tleka melak tepaleui ika titenojnotsaj maski sekimej xkuajli technankiliaj”.
Jehová kuajli kimatstika ika kemantika ouijtika tikitaj titenojnotsaskej. San ika, melak paki ijkuak kita ika tikixkopinaj niman titeikneliaj (Luc. 6:36). Niman yemelak, Jehová xnochipa kimiknelis nion xnochipa kimijyouis tlaltikpakchanejkej. Uelis kuajli tikmatstoskej ika yejua kimati kemanon kipopolos tlen xkuajli ipan yejuin tlaltikpaktli. Kuakon, amantsin, melak noneki matitenojnotsakan (2 Tim. 4:2). Kuakon, matitenojnotstokan ika pakilistli niman nochimej matikimiknelikan.
