‘Baalanka Manna’ Mararre
YESUUSI rosaanosi dancha duduwo hiittoonni duduwa hasiissannonsaro rosiisanni, mitu manni sokkansa macciishsha giwannota kulinonsa. (Luq. 10:3, 5, 6) Ninkeno soqqammeemmo woyite mitu manni gara ikkinokkire coyiꞌrara woy xonankera dandaanno. Tini sabbankeemmo mannira mararro leellisha qarra ikkitannonke gede assitara dandiitanno.
Mararanno manchi wolootaho hasiisannorenna insa noo gara wodanchanno; tini qolte mararannonsanna kaaꞌlannonsa gede assitannosi. Ikkollana sabbankeemmo mannira noonke mararro ajjanni hadhuro, soqqanshote noonke diinaggenna afiꞌneemmo gumino ajanno. Bubbanni noo giirara haqqe worriro ledde wala yite bubbannonte gede, mannaho mararro leellinsheemmoha ikkiro, albinni roore soqqanshote diinaggaambeemmore ikkineemmo!—1 Tes. 5:19.
Mararro leellisha qarra ikkitannonke woyite nafa, togo assa dandiineemmohu hiittoonniiti? Hanni Yihowa, Yesuusinna soqqamaasinchu Phaawuloosi tennera dancha lawishsha ikkitinonke gara laꞌno.
YIHOWA GEDE MARARTINANNIRE IKKE
Yihowa lowo kume diro suꞌmasi minshanna cince keeshshino. Ikkirono, isi “galata afidhinokkiriranna bushuulleho nafa shaqqadoho.” (Luq. 6:35) Shaqqillesi anfeemmo doogga giddo mitte cincate. “Maganu halcho, mannu baalunku gatanno” gedeeti. (1 Xim. 2:3, 4) Maganu bunshe giwannoha ikkirono, mannu ooso muxxe ikkitinohu gede asse laꞌꞌanno daafira, mittu manchino baꞌꞌara dihasiꞌranno.—2 Phe. 3:9.
Yihowa, Sheexaanu ammanannokki manni wodana beeshshinota afino. (2 Qor. 4:3, 4) Batinyu manni anjensanni kayise kaphu roso rosinonna gara ikkitinokki hedo heedhannonsa gede assiꞌrino daafira, halaale ammane adha qarra ikkitinonsa. Yihowa togoo manna kaaꞌla hasiꞌranno. Tenne mayinni anfeemmo?
Yihowara Nennewe katamira heeꞌranno mannira noosi lao hedi. Insa finqila manna ikkirono, Yihowa Yoonaasira togo yiino: ‘Bushanna dancha bade afinokkihu 120,000 manni heeꞌrannoha konne jawa katama dimarareemmo?’ (Yon. 4:11) Yihowa Nennewe katamira heeꞌranno manni ayyaanaamittetenni gawajjaminota huwatino daafira, qorowisiisannonsa gede Yoonaasi soye mararro leellishinonsa.
Ninkeno Yihowa gede mannu heeshsho lowori gede assine laꞌneemmo. Sokkanke macciishsha dibaxanno yine hendeemmo manna nafa diinaggaambe kaaꞌline isi lawishsha harunsa dandiineemmo.
YESUUSI GEDE MARARTINANNIRE IKKE
Yesuusi Annisi gede ayyaanaamittetenni gawajjamino manna mararino. Isi “Allaalaanchu nookki geꞌreewi gede ikke qarramenna gara hawe noo manna afe [mararino].” (Mat. 9:36) Yesuusi iillinonsa qarra huwatino; isi coyiꞌranna macciishshate dayino manni kaphu roso rosinotanna ammaꞌnote massagaano beebba assidhinonsata huwatino. Hakko manni giddo batinyu babbaxxino coyi guficho ikkeennansa sokka macciishshe adhannokkita afinoha ikkirono, ‘lowo coye rosiisinonsa.’—Maq. 4:1-9.
Umi qara mittu manchi halaale macciishsha giwiro, hexxo mudhitooti
Mittu manchi noo gari soorramanno woyite, halaaleho noosi laono soorrantara dandiitanno
Mannu sabbankeemmo sokka macciishsha giwanno woyite, adha giwinohu mayiraatiro wodanchate woꞌnaala hasiissannonke. Mitootaho, ninke Kiristaanaho yaanno manni busha lawishsha ikkinonsa daafira Qullaawu Maxaafira woy Kiristinnu ammaꞌnora gara ikkitinokki lao noonsa. Wolootu qolte Yihowa Farciꞌraasine ammana daafira kapho ikkinore macciishshitinoha ikkara dandaanno. Qooxeessinsara heeꞌranno manna woy maatensa miilla waajjite sokkanke macciishsha baxxannokkirino heedhara dandiitanno.
Soqqammanni xaandeemmo manni giddo mitu sokkanke macciishshannokkihu heeshshonsa giddo buutote qarri iillinonsa daafira ikkara dandaanno. Kiimi yinanniti misiyoone ikkite soqqantanno rodoo togo yitino: “Mittu soqqanshote qoqqowinkera heeꞌranno manni giddo batinyu olunni kainohunni woxensa baala hoogino. Insa hexxo mudhino. Qoleno hanqaaleeyyehonna manna diammaꞌnannoho. Konni qooxeessira sokkanke macciishshannokkihu duuchu manninni xaandeemmo. Mitte hige isinni soqqamanni heeꞌreenna gannoonnie.”
Kiimi mannu macciishsha giwirono mararro leellishshannonsa gede kaaꞌlinoseri maati? Ise togo yitino: “Mannu gara ikkinokkire assannoe woyite ‘Egenno mannaho cinca uyitanno’ yitannota Lawishsha 19:11 te noo hedo qaageemma. Qoqqowinkera heeꞌranno mannira alba iillinonsa coye hedaꞌya, marareemmansa gede assitinoe. Qoleno xaandeemmo manni baalu hanqannoho yaa diꞌꞌikkino. Hakko qooxeessinkura wirro marre hasaawinseemmo manna afiꞌnoommo.”
Ninkeneeto ‘Ani hakkonne manna ikkoommoro Maganu Mangiste sokka macciishsheemmo?’ yine xaꞌma dandiineemmo. Lawishshaho hanni Yihowa Farciꞌraasine daafira kapho ikkinore kulloonninke yine hendo. Hattoo yannara, ninkeno sokkansa macciishsha gimbeemmohanna mararro leellinshankera hasiꞌneemmoha ikkara dandaanno. Yesuusi wolootu assitankera hasiꞌneemmore ninkeno insara assineemmonsa gede hajajinonke; tenne hajajo qaaganke mararro leellisha qarra ikkitannonke woyite nafa hatto assate kaaꞌlitannonke.—Mat. 7:12.
PHAAWULOOSI GEDE MARARTINANNIRE IKKE
Phaawuloosi gibbannosirira nafa mararro leellishino. Mayira? Phaawuloosi alba isi umisi hiittoohoro qaagino. Isi togo yiino: “Kunni albaanni Kiristoosa xonoommosiha, xiiwoommosihanna shollishoommosiha ikkiro nafa, isi kayinni saoꞌya agurinoe.” (1 Xim. 1:13) Phaawuloosi Yihowanna Yesuusi lowo maaro leellishshinosita huwatino. Sabbakannonsa manni giddo mitu alba isira noosi gedee akatta noonsata wodanchikki digatino.
Phaawuloosi sabbakino manni giddo mitu kaphu rosi xaxxawe amadinonsaho. Hatte yannara isi maa assiyya? Soqqamaasinete Looso 17:16 Phaawuloosi Ateenaho heeꞌre “Hakko katamira kaphu maganna batidhinota afe wodanisinni lowo geeshsha” dadillinota kultannonke. Ikkollana Phaawuloosi hakkonne dadillanno gede assino coye horoonsiꞌre dancha gede farciꞌrino. (Soq. 17:22, 23) ‘Dandaamisi deerrinni mito mito gatisate yee’ sabbakanno doogo mannu mannu garinni soorrino.—1 Qor. 9:20-23.
Sabbankeemmohu sokkanke macciishshannokki woy kaphu roso harunsanno mannira ikkara dandaanno; konni daafira tenne hendanni “dancha duduwo” hayyotenni dudumbe Phaawuloosi lawishsha harunsa dandiineemmo. (Isa. 52:7) Mitte Dooreeti yinanni rodoo togo yitino: “Qoqqowinkera batinyu manni Maganu kaajjadohonna muddame yoo yaannoho yite heddanno. Kuni manni Magano seekke ammananno daafira galatummansa gedensaanni, Yihowa baxillaancho ikkinotanna Qullaawu Maxaafi giddo Isi eino qaale illachishanno gede kuleemmansa.”
“BUSHA DANCHU COYINNI QEELI”
‘Goofimarchu’ roore gambisanni haꞌranno woyite, sabbankeemmo manni giddo mitu “bunshete aana bunshe” ledanni haꞌrannota anfoommo. (2 Xim. 3:1, 13) Ikkollana mannu akati yannate kiiro bushanni haꞌrasi, woloota mararreemmokki gede guficho ikkankera woy soqqanshonkenni hagiirre hoongeemmo gede assankera wodha dihasiissannonke. Yihowa ‘busha danchu coyinni qeelleemmo’ gede jawaante aannonke. (Rom. 12:21) Jesika yinanni suwisaancho togo yitino: “Duucha woyite naaxxaleeyyenna ninkeno ikko sokkanke ayirrisannokki manninni xaadeemma. Tini hexxo mudhinanni gede assitara dandiitanno. Hasaawa hanafeemma woyite, hakkonne mancho Yihowa laꞌꞌanno garinni laeemma gede kaaꞌlaera wodaniꞌyanni huuccatto assiꞌreemma. Tini qolte ane hedo aana illachisha agure, hakkonne mancho kaaꞌla dandeemma gara hedate kaaꞌlitannoe.”
Hegere heeshsho afiꞌrate gara ikkitinoti wodanu dooꞌꞌo noonsa manna hasa diagurreemmo
Mitu manni insa cincine kaaꞌlate sharrammeemmo woyite macciishshankera dandaanno
Ledonke soqqantanno roduuwa jawaachisha dandiineemmo garano heda hasiissannonke. Jesika togo yitino: “Soqqanshote jaalaꞌyara woy anera soqqammanna dancha ikkinokkiri iillinonkeha ikkiro, hattee haja aana illachisha hoogate woꞌnaaleemma. Hatteentenni dancha danchare hasaambeemmo; lawishshaho mannu sokkanke macciishsha giwiro nafa, sabbakate loosinke afiꞌrino hoꞌro illachishate woꞌnaaleemma.”
Yihowa soqqammeemmo woyite iillannonke fonqolo seekke afino. Ninke isi gede mannaho mararro leellinsheemmo woyite lowo geeshsha hagiidhanno! (Luq. 6:36) Hatto yaa kayinni Yihowa leellishanno mararrora gawalo dino yaa diꞌꞌikkino. Yihowa tenne alame hunanno yanna afinota dihuluullammeemmo. Hakka geeshsha kayinni sabbakate loosonke wiinamme loosa hasiissannonke. (2 Xim. 4:2) ‘Baalunku mannira’ mararro leellinshe, uyinoonninke looso diinaggaambe loonso.
