Atube Aluzyalo ‘Kubantu Boonse’
JESU naakali kuyiisya basikwiiya bakwe mbubeelede kukambawuka amakani mabotu, wakalizi kuti bamwi teebakali kuyoowaswiilila makani aali atala aBwaami. (Lk. 10:3, 5, 6) Mumulimu wakukambawuka tulakonzya kujana bantu bataswiilili. Bantu bali boobo, balakonzya kupa kuti kutuyumine kubafwida luzyalo bantu mbitukambawukila.
Muntu ulaaluzyalo ulangisisya nzibayanda bamwi, ubona mapenzi ngibaswaana, ulabeetelela mpawo ulabagwasya. Nkinkaako, kuti teetwabafwida luzyalo bantu mbitujana zipa kuti tutabi basungu akuti tutazwidilili mumulimu wakukambawuka. Kubafwida luzyalo bantu mumulimu wakukambawuka kuli mbuuli kufulida mulilo kuti utaleki kuyaka alubo kuchita oobo kupa kuti tuzumanane kukambawuka.—1 Tes. 5:19.
Niinzi chikonzya kutugwasya kuti tube aluzyalo nikuba kuti nkuyumu chimwi chiindi? Jehova, Jesu amwaapostolo Pawulu nzikozyano zibotu. Atulange-lange mbutukonzya kuzitobelezya.
ATUTOBELEZYE LUZYALO LWAJEHOVA
Kwaminyaka myiingi, Jehova ulikulisimya kukusampawulwa kwazina lyakwe. Pesi “uli aluzyalo walo kulibatalumbi akubabi.” (Lk. 6:35) Luzyalo ndwalaalo lulaboneka nkaambo uli amoyo mulamfu. Jehova uyanda kuti “bantu boonse” bakafutuke. (1 Tim. 2:3, 4) Nikuba kuti Leza tabuyandi pe bubi pesi bantu ubabona kabayandikana alubo tayandi kuti bakafwidilile.—2 Pet. 3:9.
Jehova ulizizi nzila Saatani nzyalikubelesya koofwaazya bantu batakombi. (2 Kor. 4:3, 4) Bantu biingi bayiisigwa njiisyo zyakubeja kuzwa kabachili baniini nkinkaako, njiisyo eezi zipa kuti kubayumine kutambula kasimpe. Pesi Jehova ulayanda kubagwasya bantu bali boobu. Tuzizi biyeni?
Atubone Jehova mbaakalimvwa atala abantu bakuNineve. Nikuba kuti bakali kuchita zintu zibi pesi Jehova wakaambila Jona kuti: “Lino ime sa nsyeeleede kufwida insoni oyu munzi mupati waku-Nineve? Mulinguwo muli bantu bainda zyuulu zili mwaanda amakumi obile batana kwiiya kwaandaanya ijanza lyabo lyalulyo ajanza lyabo lyalumonswe.” (Jon. 4:11) Jehova wakabona kuti bantu bakuNineve teebakakazi pe kasimpe atala anguwe nkinkaako, wakatuma Jona kuti akabachenjezye.
Bantu tweelede kubabona kuti balayandikana mbuuli Jehova mbababona. Tulakonzya kutobelezya chikozyano chaJehova kwiinda mukugwasya bantu batuswiilila nikuba kabatondeezya kuti tabakwe chiyandisyo pe.
ATUTOBELEZYE LUZYALO LWAJESU
Jesu wakatobelezya chikozyano chaWisi nkaambo wakabafwida luzyalo bantu bakali kuyanda kuziba kasimpe. Bbayibbele lyaamba kuti: “Nkabela naakabona makamu aabantu wakabafwida luzyalo, nkaambo kakuti bakalikatede akumwaika mbuli imbelele zitakwe mweembezi.” (Mt. 9:36) Jesu wakali kubona zili mumyoyo yabantu nkinkaako, wakabona kuti bantu bakali kumuswiilila bakali kuyiisigwa njiisyo zyakubeja akuti teebakali kujatwa kabotu abeendelezi bazikombelo. Nikuba kuti Jesu wakalizi kuti bamwi bantu mbaakali kuyiisya bakali kuyookachilwa kuba basikwiiya bakwe pesi taakaleka pe ‘kubayiisya makani miingi.’—Mk. 4:1-9.
Tatweelede kunyema pe kuti twajana bantu batakwe chiyandisyo
Zyiimo zyabantu zilakonzya kuchincha nkinkaako zilakonzya kupa kuti babe achiyandisyo
Kuti bantu mbitukambawukila kabatatuswiilili, tweelede kuyanduula kaambo kapa kuti batatuswiilili akuziba kuti nkamboonzi nibali amaboneno aali boobo. Bamwi balakonzya kutaswiilila makani aamuBbayibbele naakuti kutaba maKristu nkaambo bakabona bamwi balyaamba kuti maKristu pesi kabachita zibi. Amwi bamwi bakabuzigwa makani aatali kabotu atala anzitusyoma. Alubo zilakonzeka kuti bamwi tabatuswiilili nkaambo bayoowa kusekwa abamwi naakuti abamumpuli yabo.
Bamwi mbitukambawukila balakonzya kutatuswiilila akaambo kazintu zibi zyakabachitikila zyakapa kuti bakataazikane mumizeezo. Mumishinali uutegwa Kim wakati: “Kuli bumwi busena nkutukambawukila, bantu biingi bakachija nkondo alubo bakasweekelwa azintu nzibakali aazyo. Tabazi pe kuti lyajuunza lyabo linooli biyeni. Bakkala kabanyemede alubo taakwe muntu ngubasyoma. Bantu biingi mbitukambawukila kubusena oobu, tabayandi pe kutuswiilila. Kuli chimwi chiindi, bantu bakasinduume nindakali kukambawuka.”
Niinzi chigwasya muchizi Kim kuti akkale kabafwida luzyalo bamwi chiindi natajatwi kabotu? Wakati: “Chiindi nindajana bantu batandijati kabotu, ngandayeeya majwi aali muli Tusimpi 19:11 aati: ‘Busongo bwamuntu bulamuumusya kukalala.’ Kuyeeyesesya atala amaponeno abantu bali muchilawu chesu, kupa kuti ndibafwide luzyalo. Bantu bamuchilawu eechi teembubabede pe boonse nkaambo twakajana bamwi bali achiyandisyo chakwiiya.”
Tulakonzya kulibuzya kuti: ‘Kaansinga ndime ndali muchiimo eecho, ndali kunooswiilila na nibandikambawukila?’ Muchikozyano, wali kunoochita biyeni kaansinga wakamvwa makani aakubeja atala aBakamboni baJehova? Zilakonzeka kuti andiswe teetwakali kunooswiilila pe alubo twakali kunooyanda kufwidwa luzyalo. Kuyeeya makani Jesu ngakaamba aakuti tuchitile bamwi mbuuli mbutuyanda kuti batuchitile, kuyootugwasya kuti tubafwide luzyalo bamwi nikuba kuti achiindi eecho nkuyumu kuchita oobo.—Mt. 7:12.
ATUTOBELEZYE LUZYALO LWAPAWULU
Mwaapostolo Pawulu wakabafwida luzyalo bantu nikuba bakali kumupenzya. Nkamboonzi? Nkaambo wakayeeya mbaakabede chiindi. Wakaamba kuti: “Kuciindi cakamana ndakali sikasankusanku asikakomokomo asikazundozundo, nekuboobo ndakafwidwa luzyalo nkaambo teendakazi ncendakali kucita cakutazumina.” (1 Tim. 1:13) Wakabona kuti Jehova aJesu bakamufwida luzyalo. Amwi bube mbwaakali aabo katanasanduka wakali kububona kuli bamwi mbaakali kukambawukila.
Chimwi chiindi Pawulu wakali kuswaana bantu bakali kusyoma njiisyo zyakubeja. Wakali kumvwa biyeni? Naakali kuAtene, lugwalo lwaIncito 17:16 luti, ‘moyo wakwe wakaata muchamba chakwe naakabona muunzi uzwide zifanikisyo zyabaleza bakubeja.’ Nikuba boobo, Pawulu wakabelesya zikozyano zibezedwe kuti akambawukile bantu. (Inc. 17:22, 23) Wakali kubelesya nzila zisiyene-siyene chiindi naakali kukambawukila bantu basiyene-siyene kuti akonzye “kufutula bamwi.”—1 Kor. 9:20-23.
Chiindi nituli mumulimu wakukambawuka, tweelede kutobelezya chikozyano chaPawulu chakukambawuka “makani mabotu loko” kubantu batatuswiilili naakuti basyoma njiisyo zyakubeja. (Is. 52:7) Muchizi utegwa Dorothy wakati: “Muchilawu mutukambawukila, bantu biingi bakayiisigwa kuti Leza ulaalunya akuti uzoobasubula bantu. Ngandabalumba bantu aaba nkaambo balamusyoma Leza mpawo ngandabatondeezya nzilyaamba Bbayibbele atala abube bubotu Jehova mbwali aabo kuswaanizya azisyomezyo nzyayootuchitila.”
“KOZUMANANA KUZUNDA BUBI KWIINDA MUKUCITA ZIBOTU”
Mbutulikupona “kumazuba aakumamanino,” bantu mbitukambawukila ‘bayooyindilila kuchita zibi.’ (2 Tim. 3:1, 13) Pesi tatweelede kuleka kubafwida luzyalo naakuti kuleka kubotelwa akaambo kakuti tabatuswiilili pe. Chiindi choonse Jehova unootupa manguzu ‘aakuzunda bubi kuti tuchite zibotu.’ (Rom. 12:21) Muchizi uupayona uutegwa Jessica wakati: “Ndiswaana bantu balisumpula abatulangilila aansi kuswaanizya amulimu ngutuchita. Eezi zilakonzya kutunyemya. Chiindi nindiyanda kukambawukila muntu, ngandasaanguna kukomba mumoyo kandikumbila Jehova kuti andigwasye kuti muntu ooyo ndimubone mbuuli mbamubona. Kuchita oobu kundigwasya kuti nditayeeyi mbundilimvwa pesi kuti ndibone mbundikonzya kumugwasya.”
Tuyanduula bantu balibambilide kutambula buumi butamani
Mukuya kwachiindi, bamwi bazoozumina kwiiya Bbayibbele
Tatweelede kuluba kusungwaazya bakombima mbitweenda aabo mukukambawuka. Jessica wakati: “Kuti umwi ngundilikubelekaawe mukukambawuka wajana bantu bataswiilili, tandizibikkili maanu pe zyachitika. Pesi ndileezya kwaambuula atala azintu zibotu nzitujana mumulimu wakukambawuka nikuba kuti bamwi tabaswiilili.”
Jehova ulibuzi buyumu-yumu mbutuswaana mumulimu wakukambawuka. Ulabotelwa kuti twatobelezya chikozyano chakwe chakubafwida luzyalo bantu. (Lk. 6:36) Pesi luzyalo lwaJehova luyoomana alubo takabafwidi luzyalo bantu babi kukabe kutamani. Tuli achoonzyo chakuti ulichizi chiindi nayoomaninsya bubi buli munyika eeyi. Pesi katanazichita eezi, mulimu wakukambawuka weelede kuchitwa chakufwambaana. (2 Tim. 4:2) Atuzumanane kuchita mulimu ooyu chabusungu akubafwida luzyalo “bantu boonse.”
