E AITARA Iotua ma te mwioko ae matoatoa. E riai ni kaira te natannaomata ae Iteraera nakon te Aba ni Berita n aki ongei kangaanga aika kakaiaki. Ma e karaua nanona Iehova bwa e na bon tokanikai, ao e kaungaa ni kangai: ‘Ko na ninikoria ma ni korakora. Kakairi n au Tua. Warekia ni ngaina ao ni bong, bwa ko aonga ni kakairi raoi ni bwaai ni kabane ake a koreaki i nanona. Ane e na nakoraoi arom iai, ao ane ko na bwaina te wanawana iai.’—Iot. 1:7, 8.

N “taai aika okoro aika karuanikai” aikai, ti kaaitara naba ma kangaanga aika kakaiaki. (2Tim. 3:1) N aron Iotua, ti kona n tokanikai ngkana ti kakairi n ana taeka n reirei Iehova are e anganna. Ti kona ni wawareka te Baibara ao ni maiuakin ana boto n reirei ngkana ti kaaitara ma kataaki.

Ma a bati i buakora aika kona n taekinna bwa tiaki anuaia te ukeuke n reirei ao e aki bebete irouia. Ma ngkai e rangi ni kakawaki te ukeuke n reirei n te Baibara, ko riai n rinanon te bwaoki ae “ Katai Reirei n Ibuobuoki Aikai,” bwa a kona tabeua mai iai ni karika am ukeuke n reirei bwa e na uaana ao ni kakukurei riki.

E taku te tia areru: “Kairirai ni kawain am kaetieti nako, bwa I rangi ni kimwareirei iai.” (TaiAre. 119:35) Ko kona ni karekea te kimwareirei man iaiangoan Ana Taeka te Atua. Ngkana ko keniken n te Baibara, ane ko na kunei kaubwai n taamnei.

E ngae ngke ko aki kaira te natannaomata n aron Iotua, ma bon iai naba kangaanga aika ko na kaaitarai. Ngaia are katotonga Iotua, n ukeuke n reirei ao ni kakairi raoi ni baike a koreaki ibukini kabwaiam. Ni karaoan anne, e na nakoraoi arom ao ko na wanawana.