JOSUÉ ogueraha vaʼerã tetã Israélpe pe Tiérra Prometídape. Upéva ningo haʼe peteĩ mbaʼe ijetuʼuetereíva, péro Jehová omombarete ha omokyreʼỹ Josuépe heʼívo: “Ndepyʼaguasu ha nembaretékena”. Jehová heʼi Josuépe olee ha okumpli hag̃ua Iléi, ikatu hag̃uáicha odesidi hekoitépe ha osẽ porã chupe opa mbaʼe (Jos. 1:7, 8).

Jaiko rupi “umi ára pahápe” pe situasión ijetuʼu ha hasy jagueropuʼaka hag̃ua (2 Tim. 3:1). Jaipotáramo osẽ porã ñandéve opa mbaʼe Josué rehe oiko haguéicha, jasegi vaʼerã umi konsého Jehová omeʼẽ vaʼekue chupe. Tekotevẽ jalee meme la Biblia ha jajapo umi mbaʼe ñaaprendéva ikatu hag̃uáicha jadesidi porã.

Péro naentéroi ningo oikuaa mbaʼéichapa ostudia vaʼerã, térã mbaʼéichapa ikatu igústo chupe pe estúdio. Upéicharõ jepe iñimportanteterei jastudia la Biblia ñaneañoháme. Iporãta ñamañáramo pe rrekuádro héravare “ Eñehaʼãmína ejapo koʼã mbaʼe”. Upépe oĩ heta konsého ñanepytyvõtava ideprovécho ha igustove hag̃ua ñandéve ñande estúdio de la Biblia.

Pe salmísta heʼi vaʼekue peteĩ purahéipe: “Ñandejára, che ningo amombaʼeterei umi ne mandamiénto, chegiána aiko hag̃ua nde remandaháicha” (Sal. 119:35). Nde avei ikatu redisfruta restudia jave Ñandejára Ñeʼẽ. Reaprendevévo rehóvo retopáta pype heta mbaʼe iporãitereíva.

Natekotevẽiramo jepe regia peteĩ tetã Josué ojapo haguéicha, katuete rembohovái vaʼerã heta mbaʼe ijetuʼúva. Upévare, estudiákena Ñandejára Ñeʼẽ ha neñeʼẽrendúkena Josué ojapo haguéicha, péicha redesidi porãta ha osẽ porãta ndéve opa mbaʼe.