JOSHUA uikutwa kuziyeleha. Ufilwe musebezi wa kuetelela sicaba sa Isilaele kusilibisa mwa Naha ya Sepiso mi ukopana ni miinelo yetaata hanzaa eza cwalo. Kono Jehova umutaluseza kuli ukakondisa, mi umususueza ka kumubulelela kuli: ‘Ube ni bundume mi utiye. Umamele Mulao waka. Uubale musihali ni busihu, kuli umamele ka tokomelo zeñozwi mwateñi kaufela. Kakuli haiba ueza cwalo ukakondisa mi ukaba ni butali.’—Josh. 1:7, 8.

Ni luna lukopana ni miliko mwa “linako zetaata, zeziyeza” ze. (2 Tim. 3:1) Sina Joshua, lwakona kukondisa haiba lulatelela kelezo yanaa mufile Jehova. Luswanela kubalanga Bibele kamita ni kulika ka molukonela kaufela kusebelisa likuka ze ku yona halukopana ni miliko.

Kono mwendi buñata bwaluna lukona kubulela kuli haluzibi hande mwakubalela Bibele mi lufumana taata kuibala. Niteñi, bakeñisa kuli kubala Bibele ki kwa butokwa hahulu, munyakisise litaba zebonisizwe mwa mbokisi yeli, “ Mulike Liakalezo Ze,” ili zebonisa momukona kuezeza kuli mutusiwe hahulu ni kuikola kubala Bibele.

Muñoli yomuñwi wa samu naaopezi kuli: “Unietelele mwa nzila ya milao yahao, kakuli naitabela.” (Samu 119:35) Mwakona kuikola hahulu kubala Linzwi la Mulimu. Mukafumana litaba za butokwa za kwa moya haiba mueza lipatisiso.

Nihaike kuli hamuna kufiwa musebezi wa kuetelela sicaba sina mone kubezi ku Joshua, ni mina kunani miinelo yetaata yemuka kopana ni yona. Kacwalo, sina Joshua, mubale ni kumamela litaba zelelezwi kumitusa. Haiba mueza cwalo, mukakondisa mi mukaba ni butali.